1 Оԓәӈ нэпекем ма нӑӈена, Феофил, иса щит эԓты хӑшсэм, мўй Иисус верәс пӑ мўйа утәԓтәсԓы оԓӈәԓ эԓты

2 щи хӑтәԓ унты, хун Йэмәӈ Ԓыԓ сӑхат Ԓўв пирыйәм апостолԓаԓа партәпсайәт*Ԓўв партәпсайԓаԓ - ванта Лука 24:47-49 мийман, Ԓўв турма нŏх ўйман уса.

3 Ԓўв шукәԓ йўпийән, ар тŏрԓы уԓты посԓаԓ пиԓән, щитԓаԓа щи Ԓўвеԓ ԓыԓӈат этәԓтәсԓы, ԋӑԓйаӈ хӑтәԓ хўват ԓыв хŏщайэԓ этыԓыйәс пӑ Турәм Хон Уԓәпса эԓты пŏтәртәс.

4 Щӑԓта, ԓывиԓаԓ йӑха ӑкәтман, Ԓўв ԓывиԓаԓа партсәԓԓы: «Иерусалим эԓты аԓ мӑнаты, Ащэм аԉәм ŏт ԓавԓаты, хŏты Ма эԓтэм хуԓԓысты,

5 Иоанн йиӈка ԓŏӈәԓтыйәс, нын пӑ, тӑми йўпийән кӑмәтса хӑтәԓ кемән Йэмәӈ Ԓыԓа ԓŏӈәԓтты питԓайты».

6 Хун ԓыв йӑха ӑктәщсәт, Ԓўвеԓ иԋщәссэԓ, пŏтәртман: «Турәм Куща, Израиль хон пеләк ӑнта мўй ин Нӑӈ нŏх йӑԓпитԓэн?»

7 Иисус пӑ ԓывиԓаԓа йастәс: «Ащем Ԓўв йурәԓән пŏнәм пŏрайәт мўй сысәт уйәтты, ӑнтом нын верән,

8 нын йур вана ўԓты, хун нын хŏщайән Йэмәӈ Ԓыԓ ŏхәԓәԓ; пӑ Иерусалимән пӑ иса Иудея пӑ Самария ԓŏватән хŏԓна пӑ мўв кимәԓ унты Мӑнэм вантәм хŏйатәта уԓты питԓәты».

9 Щит йастәмаԓ кемән, ԓыв ватман, Ԓўв нŏх эԓәтса, пӑ пӑԓәӈән ԓыв сэмԓаԓ эԓты лӑп ўса.

10 Щиӈәԋща, хун ԓыв турәм хӑр пеԓа ватмеԓән, Ԓўв нŏх эԓԓәмаԓ пŏрайән, шӑмкапан ԓыв йэԓпиԓаԓән нŏви ԓумтәмәӈ кӑт ху этсәӈән

11 пӑ йастәсӈән: «Галилея йох! Мўй нын ԓойԓәты пӑ турәм хӑр пеԓа ватԓәты? Тӑм Иисус, нын эԓтан турма нŏх ўйәм Ŏт, тӑм иты щи йŏхәтәԓ, хŏты нын Ԓўвеԓ турма эԓԓәтаԓ ватсәԓән».

12 Щиӈәԋща ԓыв Иерусалим воша, Элеона айәԓты кев пай эԓты, йŏхԓы йŏхәтсәт, ԓўв Иерусалим ԉэпән шаббат хӑтәԓ шушты хўватән†шаббат хӑтәԓ шушты хўват - словарьән ванты; уԓ.

13 Щӑԓта, йŏхԓы йŏхәтмеԓ йўпийән, нўм хот йӑта, хŏта уԓԓысәт, нŏх мӑтсәт: Петр пӑ Иаков, Иоанн пӑ Андрей, Филипп пӑ Фома, Варфоломей пӑ Матфей, Иаков Алфей пŏх пӑ Симон Зилот, пӑ Иуда, Иаков пŏх усәт.

14 Хŏԓыйэ ԓыв и йӑха пойәкщәман усәт нэӈәт пӑ Мария, Иисус аԋԏи пиԓән, пӑ Ԓўв ху апщиԓаԓ пиԓән.

15 Пӑ щи хӑтԓәтән Петр, утәԓтәты йŏх кўтән нŏх ԓойман, йастәс, –

16 сот хус кем хŏйат йӑха ӑктәщиты щир ус: «Хӑнам йох! Щита тыйты мосәс, мўй Йэмәӈ Нэпекән Йэмәӈ Ԓыԓ Давид ўӈәԓән Иуда эԓты йастәс. Иисус ԋӑрэмәм ŏтәт хŏща ԓўв ŏха ус;

17 Ԓўв мўӈ хŏщайэв ԓўӈәтман ус пӑ тӑм Турәм урәӈән верты верәт пеԓа пирыса»;

18 Туп атәм вермаԓ сӑхат ўйәм ŏхԓаԓән, мўв хӑрән ԓутса, пӑ хун оԓӈат ŏхән рӑкәнмаԓән, ԓўв пўтайәԓ пелки похәс, пӑ сӑмԓаԓ-мŏхәԓԓаԓ ким ӑркәпсәт.

19 Щиӈәԋща щи вер Иерусалим хŏйатәтән хŏԓ уйәтты питса, щишән щи мўв ԓыв йасӈеԓән Акелдама нэма пŏтсэԓ, щит «ўр мӑнәм мўв».

20 «Псалмәт нэпекән‡Псалмәт нэпекән - словарьән ванты; хӑшман уԓԓа: 'Ԓўв хотәԓ таԓ ат уԓ, пӑ нэмәԓты уԓты ŏт щита ӑт ат питәԓ'; пӑ: 'Ԓўв тӑйәм верәԓ па хŏйатән ат ўԓа'.

21 Щишән мўӈев щи хŏйатәт эԓты ит пирыты мосәԓ, хŏй мўӈ пиԓэвән иса йӑӈхәс, хун Иисус Турәм Куща мўӈ кўтэвән ус,

22 Иоанн йиӈка ԓŏӈәԓтыты вер уш эԓты пӑ щи хӑтәԓ унты, хун Ԓўв мўӈ эԓтэв нŏх ўса. Ԓўв и щиты Иисус нŏх ԓыԓәӈԓәм вер хŏща мўӈ пиԓэвән ватты ŏта ат ус».

23 Пӑ кӑт хŏйат аԉса: Варсавайа айәԓты Иосиф, Иуста нэмтәм ŏт, пӑ Матфий;

24 Щӑԓта пойәкщәсәт пӑ йастәсәт: «Нӑӈ, Турәм Куща, кашәӈ хŏйат сӑм уйәтԓән, тӑм кӑтӈән эԓты итәԓ, Нӑӈ пирыйәм ŏтэн, аԉи,

25 тӑм Турәм урәӈән верты верәт пӑ апостола уԓты щир вана ўты кеша, хŏԓща Иуда пўӈԓа мӑнәс, ԓўв тӑхайәԓа мӑнтаԓ урәӈән».

26 Щӑԓта ԓын эԓтан пос вŏщкәсәт, пӑ Матфия пос питәс, пӑ ԓўв ихŏщйаӈ апостоләт пеԓа ԓўӈәтты питса.