1 Хун ԓын мир пеԓа пŏтәртсәтән, Турма йир верты йох пӑ Турәм Хот шавиты куща пӑ саддукейәт ԓын хŏщайән вана йисәт,

2 щит пеԓа ԉикихурыйа уԓман, мўйа ԓын мир утәԓтәԓԓән пӑ пӑрәм эԓты Иисус иты нŏх ԓыԓәӈԓәты вер айәԓәтән;

3 Щӑԓта ԓын ԋӑрэмәсайтән пӑ аԓәӈсӑхат унты касна хот шавиты йоха мӑсайӈән; йэтән ус, щишән.

4 Йасәӈ хуԓәнтәм мŏхет эԓты пӑ ар пеләк эвԓәс; пӑ эвԓәм хŏйат аратәԓ вет щŏрәс кем ус.

5 Кимет хӑтәԓән Иерусалимән ԓыв куща йохԓаԓ, пӑ уна уԓты икет, пӑ Закона утәԓтәты икет ӑктәщсәт,

6 Пӑ Анна - Турма йир верты ŏх ики, пӑ Каиафа, пӑ Иоанн, пӑ Александр, пӑ па мŏхет ԓўв рутәԓ эԓты;

7 Щӑԓта, ԓынан кўтԓәпа ԓощәԓтәман, иԋщәссэԓ: «Мўй йурән пӑ мўй нэмән нын тӑми версәтән?»

8 Щиӈәԋща Петра, Йэмәӈ Ԓыԓән тэкәнман, ԓывиԓаԓа йастәс: «Мир кущайәт пӑ Израиль ун икет!

9 Тӑм хӑтәԓ мин эԓтэмән кӑшаӈ хŏйат йӑма вермемән урәӈән такан иԋщәсԓаймән ки, хŏты ԓўв тўмтака верса,

10 нын хŏԓ пӑ хŏԓ Израиль мир уйтаԓән: тӑм хŏйат ин нын йэԓпанән тўмтака ԓойәԓ Назарет эԓты уԓты Иисус Христос нэм хўват, Хŏй нын пернайа сэксәԓән пӑ Хŏй пӑрәм эԓты Турәмән нŏх ԓыԓӈатса!

11 Ԓўв уԓ кев шуп, нынанән, кев хот омәсты хŏйатәтән, эртәм ŏт, туп щуӈ тӑйән мет мосты кева йис. Пӑ нэмәԓтты па ŏт хŏща нŏх пайтәсты щир ӑнтом;

12 Турәм иԓпийән хŏйатәта мийәм па нэм ӑнтом, мўй щирән мўӈ нŏх пайтәсты верәтсув ԓуԓән».

13 Петра пӑ Иоанн ӑт пӑԓты вер кащаԓәмеԓ пӑ ԓын ӑнта утәԓтыйәм пӑ аԓ хŏйата уԓты вер мŏштәмеԓ кемән, ԓыв ӑԓ щи пакнысысәт. Щи кўтән ԓын ŏша пайтыԓысайтән, ԓын Иисус пиԓән уԓԓыстән;

14 Тўмтака йўвәм пӑ ԓын пиԓәнән ԓойәм хŏйат пеԓа ватман, нэмәԓты шŏппи йастәты ӑт верәтсәт.

15 Щӑԓта, синедрион*синедрион - Словарьән ванты; эԓты ԓывиԓаԓ ким этты партман йўпийән, ԓыв кўтэԓән нумәссәт,

16 пŏтәртман: «Мўӈев тӑм хŏйатӈән пиԓән а мўй верты? Иерусалимән уԓты хŏйатәтән хŏԓ уйәтԓа, ԓын йӑна вантыԓԓаӈәԓ вер версәӈән, пӑ мўӈ тӑми хŏԓт хуләтты ӑт верәтԓэв;

17 туп, тӑми мир ԓŏвата лакки ӑт ат ԓӑрпиԓәс, пӑԓтаптәман, ԓывиԓаԓа тӑм нэм эԓты пŏтәртты нэмәԓты хŏйата ӑт эсәԓԓэв».

18 Щӑԓта, ԓынан вана вохман, ԓынана нэмәԓты щирән ӑт пŏтәртты пӑ Иисус нэм эԓты утәԓтәты такан ӑт эсәԓсэԓ.

19 Туп Петра пӑ Иоанн ԓывиԓаԓа йŏхԓы йастәсӈән: «Нумәсаты, Турәм йэԓпийән мўй вещкат - Турәм эԓты нынан аршәк хуԓәтты?

20 Мин, мўй ватсәмән пӑ мўй хуԓсәмән, щит эԓты мин ӑт пŏтәртты ӑт верәтԓәмән».

21 Ԓыв пӑ, ԓынан пӑԓтаптәман эсәԓсэԓ, ар хŏйат уԓәм пӑтыйән, ԓынан йŏвәртты щир ӑт уйәтсәт; тыйәм вер урәӈән хŏԓыйэ Турәм ишәксәт, щишән.

22 Щи хŏйата ԋӑԓйаӈ мŏԓтас тӑԓ ус, хŏй хŏща щи тўмтака йиты вантыԓԓаӈәԓ вер тыйәс.

23 Эсәԓман йўпийән, ԓын пиԓԓән хŏща йŏхәтсәтән пӑ пŏтәртсәԓән, мўй Турма йир верты ŏх икет пӑ уна уԓты икет ԓынана йастәсәт.

24 Ԓыв пӑ, хуԓәтмеԓ йўпийән, и нŏмәсән Турәм пеԓа тўрԓаԓ сыйәӈа версәԓаԓ пӑ йастәсәт: «Тӑйтаӈ Турәм! Нӑӈ турәм хӑр пӑ мўв пӑ щарәс пӑ мўй щита уԓ иса хŏԓ тыйәԓтсэн.

25 Нӑӈ мўӈ Давид ащев, Нӑӈ митхуйэн, ўӈәԓән Йэмәӈ Ԓыԓэнән йастәсән: 'Мўй урәӈән па мирәт рома уԓты ӑт верәтԓәт, пӑ ԓыв таԓ нŏмәс туты ўтщиԓәт?

26 Мўвәӈ хонәт нŏх эԓԓәсәт, пӑ вŏс йохәт йӑха Турәм Куща йэщаԓт пӑ Ԓўв Христосәԓ†Христос - Словарьән ванты; йэщаԓт ӑктәщсәт'.

27 Йӑна тӑм вошән Нӑӈ Йэмәӈ Пŏхен Иисус, Нӑӈ ԋŏсытәм Ŏтэн, йэщаԓт, Ирод пӑ Понтий Пилат па мир йох пӑ Израиль йох пиԓән ӑктәщсәт,

28 ԓыв щит версәт, мўй Нӑӈ йурэнән пӑ Нӑӈ партты щирэнән уԓты верәԓ ус.

29 Пӑ ин, йэшәк Турәм Куща, ԓыв пӑԓтапԓаԓ пеԓа ӑӈкәрма, пӑ Нӑӈена рупитты йохԓана иса ӑт пӑԓман, Нӑӈ йасӈен пŏтәртты мийи,

30 Нӑӈ йошен йэԓ ԋинши пӑ кӑшаӈ хŏйатәт тўмтака вераԓән, Нӑӈ Иисус Йэмәӈ Пŏхен нэмән йэмәӈ посәт пӑ вантыԓԓаӈәԓ верәт вера».

31 Щӑԓта, ԓыв пойәкщәмеԓ йўпийән, хŏта ԓыв ӑкәтман усайәт, щи тӑхайэԓ ԋŏхԓыйәс, пӑ хŏԓыйэ Йэмәӈ Ԓыԓән тэкәтсайәт, пӑ Турәм йасәӈ хурԓы пŏтәртсэԓ.

32 Ар эвԓәм хŏйатәт хŏща пӑ и сӑм и ԓыԓ ус; пӑ нэмәԓты хŏйат тӑйәм ŏтԓаԓ эԓты ԓывиԓаԓа ӑт айәԓԓәԓаԓ, туп иса и сура тӑйты ŏтԓаԓа усәт.

33 Апостоләт пӑ ун йурән Турәм Куща Иисус Христос нŏх ԓыԓәӈԓәм эԓты пŏтәртсәт; пӑ вŏԓаӈ йӑм хŏԓыйэ ԓыв пиԓԓаԓән ус.

34 Ԓыв кўтэԓән и нўша хŏйат ӑнтом ус; хŏԓ хŏй мўвәт мўй хотәт тӑйәс, щитԓаԓ тынымеԓ кемән, тынасәм тынԓаԓ тутԓысәт,

35 пӑ апостоләт кўр шŏма пŏныԓысәт; пӑ кашәӈ хŏйата, хŏй мўй хŏща мосты вер тӑйәԓ, мийԓыса.

36 Щиты Иосий, апостоләтән Варнавайа айәԓтәм (щит: «торамтыты пŏх»), левит, рутәԓ Кипр мўв эԓты уԓ,

37 хŏй ԓўв йŏра мўв тӑйәс, щитәԓ тынымаԓ йўпийән, ŏхԓаԓ тусԓы пӑ апостоләт кўрәт шŏма пŏтсәԓы.