1 Аполлос Коринфән уԓмаԓ сыс, Павел нŏхԓы уԓты мўвәт мŏхты мӑнман, Ефеса йŏхтәс пӑ щита тухәԓ утәԓтәты йох уйәтмаԓ кемән,

2 ԓывиԓаԓа йастәс: «Йэмәӈ Ԓыԓ нын, эвәԓман йўпийән, вана ўсԓән амўй?» Ԓыв пӑ ԓўвеԓа йастәсәт: «Мўӈ хŏԓна пӑ ӑт хуԓԓысэв, Йэмәӈ Ԓыԓ амўй щит».

3 Ԓўв ԓывиԓаԓа йастәс: «Мўй пеԓа нын йиӈка ԓŏӈәԓтысайты?» Ԓыв йŏхԓы йастәсәт: «Иоанн йиӈка ԓŏӈәԓтыйәпса пеԓа».

4 Павел йастәс: «Иоанн йиӈка ԓŏӈәԓтыйәпса ус кӑрэк эԓты шӑшән керԓәты йиӈка ԓŏӈәԓтыйәпса, хŏйатәта пŏтәртман, ԓўв йўпеԓән Йиты Ŏта, Христоса Иисуса*Христос Иисус - щит Мессия Иисус;, ат эвәԓсәт».

5 Щит хуԓмеԓ кемән, ԓыв Турәм Куща Иисус нэм урәӈән йиӈка ԓŏӈәԓтысайәт,

6 пӑ, хун Павел ԓыв ŏхпӑтԓаԓ эԓты йошӈиԓаԓ пŏтсәԓы, ԓыв эԓтыԓаԓа Йэмәӈ Ԓыԓ иԓ ŏхԓәс, пӑ ԓыв па йасӈәтән пŏтәрты пӑ Турәм эԓты айкеԓ туты питсәт.

7 Ԓыв аратэԓән кӑтхŏщйаӈ кем хŏйат ус.

8 Иудейәт пойәкщәты хота йŏхәтмаԓән, ԓўв, ӑт хурыман, хуԓәм тыԓәщ утәԓтәс, Турәм Хон Уԓәпса эԓты пŏтрэмәман пӑ эвԓәптәман.

9 Туп ԓыв эԓтыԓаԓ тухԓәт сӑмԓаԓ така версәԓаԓ пӑ эвәԓты ӑт ԓӑӈхасәт, Турәм Куща Йуш мир йэԓпийән ԉикәӈ йасәӈән йастәман. Щиӈәԋща Павел ԓывиԓаԓ хӑймаԓ кемән, утәԓтәты йŏх утща щира ӑкәтсәԓы пӑ и мŏԓты Тиранн ху утәԓтәты хотән кашәӈ хӑтәԓ хŏйатәт утәԓтәсԓы.

10 Кӑт тӑԓ-ԓўӈ кем хўват щиты ус, Асия мўвән уԓты хŏйатәт, иудейәт мўй пӑ грекәт, Турәм Куща Иисус эԓты уԓты утәԓтәпса хŏԓыйэ хуԓсэԓ.

11 Турәм пӑ Павел йош мŏхты мŏԓты арат вантыԓԓаӈәԓ вер верәс,

12 кӑшаӈ хŏйатәт ԓоӈԓа ԓўв тӑйты ŏхшамԓаԓ пӑ ӑнтәп сŏхԓаԓ пŏныԓысайәт пӑ ԓыв мушԓаԓ нŏх вŏԓысәт, пӑ ԓыв эԓтыԓаԓ кўԉ сŏхәт ким этсәт.

13 Хŏԓна пӑ уԉԋайа йӑхты, йасәӈән кўԉ сŏх воштәты иудей йох эԓты, тухԓәт кўԉ сŏхәӈ хŏйатәт хŏща Турәм Куща Иисус нэм йастәты питсәт, пŏтәртман: «Нынан Иисус нэмән воштәԓэв, Хŏй эԓты Павел такан йастәԓ».

14 Щит мӑтты мŏԓты Скева нэмпи, иудей Турма йир верты ŏх ики, ԓапәт пŏх версәт.

15 Туп кўԉ сŏх йŏхԓы йастәс: «Иисус уйәтԓэм, пӑ Павел ищи мӑнэма ԓэр, нын пӑ хŏйтат?»

16 Щӑԓта ԓыв хŏщайэԓа щи кўԉ сŏхәӈ хŏйат щи ԓŏват ун йурән ӑратәс пӑ ԓывиԓаԓ иԓ пайәтсәԓы, ԓыв ԋара питман пӑ ԋўлмәӈа йўвман, щи хŏт эԓты ким хŏнтасәт.

17 Щит хŏԓ Ефесән уԓты иудейәта пӑ грекәта уйәтты щира питәс, пӑ хŏԓ ԓыв пӑԉщәмән йŏхәтсайәт, пӑ Турәм Куща Иисус нэм ԓӑтәӈа айәԓтты питсэԓ.

18 Эвԓәм ŏтәт эԓты ар хŏйат йŏхтыԓыйәс, вещкат щирән верԓаԓ эԓпа аԉсәԓаԓ.

19 Мўтра верыԓыйәм мŏхет эԓты йӑм ар хŏйат, мўтра верты нэпекԓаԓ йӑха ӑкәтман, хŏйатәт йэԓпийән нŏх ўщәтсәԓаԓ, пӑ тынԓаԓ йӑха пŏтсәԓаԓ пӑ ветйаӈ щŏрәс щел ŏх арата хойәс.

20 Щиты такан Турәм Куща йасәӈ лакки ԓӑрпиԓәс пӑ йурамәс.

21 Хун пӑ щит йэтшәс, Павел, Ԓыԓән тўвман, Македония пӑ Ахаия мўв сӑхат Иерусалима мӑнты нŏмәс верәс, йастәс: «Щи йŏхтыԓытэм йўпийән, мӑ Рим ватты верэм уԓ».

22 Щӑԓта, кӑт ԓўвеԓ ԋотты хŏйатӈәԓаԓ, Тимофей пӑ Ераст, Македония мўва китмаԓ йўпийән, ԓўв Асия мўвән мŏԓты сыс кема хӑщиԓыйәс.

23 Щи пўԉаӈ Турәм Куща Йуш урәӈән ун йэшащты вер тыйәс,

24 и хŏйат, нэмәԓән Димитрий, щелŏх верән тус ху, щелŏх эԓты Артемида ԓух ими хŏрамәӈ хот хŏр верыԓыйәс пӑ вератты тус йохәта ŏх шитты щир мийиԓыйәс.

25 Ԓывиԓаԓ пӑ па вератты йохәт йӑха ӑкәтман, йастәс: «Мŏхет! Нын уйәтԓәты, тӑм вератты вер эԓты мўӈ тӑйтаӈ щирэв уԓ;

26 щи кўтән нын ватԓәты пӑ хуԓԓәты, ӑнта туп Ефесән, иса хӑщ Асия ԓŏватән щи Павел ар хŏйат ԓўв эвԓәптәты верәԓән йŏвра хўщәс, пŏтәртман, мӑтты хŏйат йошән верты ŏт - щит ӑнта ԓуӈхәт.

27 Щит пӑ мўӈева атәм верәԓ ӑнта туп вератты верэв атма айәԓтты щирән, Артемида ԓух ими йэмәӈ хот па нэмәԓтты йўкана ӑт тӑйты питԓа. Ԓух ими хŏԓна ԓўв Асия мўв ԓŏватән пӑ мирән иса ԓӑтәӈа тӑйԓа, ԓух ԓатәӈ верәԓ хŏԓт павәтԓа!»

28 Щит хуԓәтмеԓ кемән, ԓыв ԉикән йŏхәтсайәт пӑ ўвты питсәт, пŏтәртман: «Ефес вош Артемида ԓӑтәӈ!»

29 Щӑԓта вош ԓŏватәԓән нŏх ԋŏхԓәс. Ԓыв Павел пиԓән йӑӈхәм Македония кӑтӈән, Гаий пӑ Аристарх, ԋӑрэмәман, и йӑха каш ватты тӑхайа ԋŏхтәсэԓ.

30 Хун пӑ Павел мир хŏща этты ўтщийәс, утәԓтәты йохәтән ԓўв ӑт эсәԓса.

31 И щиты тухәԓ Асия кущайәт эԓты па, ԓўвеԓа ԓухса уԓман, ԓўв хŏщайәԓ айкеԓ китсәт, каш ватты тӑхайа ӑт ат йис.

32 Щи кўтән итԓаԓ ит ўвԓәт, киметԓаԓ пӑ кимет ŏт ўвԓәт, пŏтәртты ӑктәщәм щир и нулама ус, пӑ ар пеләк йӑха ӑктәщәм ŏтәт ӑт уйәтԓәт, мўй урәӈән ӑктәщсәт.

33 Иудейәт йастәм щирән, мир кўт эԓты Александр ким вохса. Йошән пос верман, Александр мир пеԓа пŏтәртты ўтщийәс.

34 Хун ŏша пайәтсэԓ, ԓўв иудей ху, хŏԓ и турән ўваԓтсәт пӑ кӑт щос кем увсәт: «Ефес вош Артемида ԓӑтәӈ!»

35 Вошәӈ хӑншатты куща пӑ, хŏйатәт иԓ роммәԓтмаԓ кемән, йастәс: «Ефес йох! Мӑты хŏйат ӑт уйәтәԓ, Ефес - щит ԓӑтәӈ ԓух ими Артемида пӑ турәм эԓты иԓ рӑкнәм хŏрәԓ шавиты вош?

36 Щит хŏща ўра ворты вер ӑнтом ки, нынан рома уԓты мосәԓ пӑ, ӑт нумәсман, вер верты ӑт мосәԓ.

37 Нын тӑм икеӈән ты тусԓән, ԓын ӑнта Артемида йэмәӈ хот ԓыпи ԓоԓәпсәтән, ӑнта нын ԓух имана атәм версәтән.

38 Димитрий пӑ па вератты йох ԓўв пиԓәԓән мӑтты хŏйат пеԓа пŏләщ тӑйԓәт ки, щи кеша сўт верты урәӈән ӑктәщиты щир уԓ пӑ сўт кущайәт уԓԓәт: кўтԓаԓән поләщ ат тутԓыԓәт.

39 Нын мŏԓтты па ŏт кӑшԓәты ки, щит закон щирән ӑктәщиты тӑхайән ватты питԓа.

40 Мўӈ вевтам щира питсув - ин тӑм тыйәм вер урәӈән, йэшащты щира пŏнԓайув, щи урәӈән нэмәԓты сŏнтәӈ ӑнтом, мўӈ ӑктәщәм верэв ԓуԓән нŏх пайәтты». Щит йастәмаԓ йўпийән, ԓўв ӑктәщәм мŏхет лакки эсәԓсәԓы.