1 Щӑԓта Лаван пŏхәт йасӈәт Иаков хуԓтсәԓы, ԓыв щиты пŏтәртсәт: «Ащев тӑйәм тащ Иаков иса нŏх ўймаԓ, щишән ԓўв тащәӈа йис».

2 Иаков Лаван вешәԓ кащаԓәс пӑ, ԓўв ӑнта мŏԓхатәԓ хŏрпи, ин пӑ иса мŏԓты хӑрәх-мŏрәх.

3 Щӑԓта Турәм Куща Иакова йастәс: «Ащиԓан мўвәта, нӑӈ мўвена йŏхԓы керԓа; Ма пӑ нӑӈ пиԓэнән питԓәм».

4 Иаков айкеԓ китәс, Рахиль пӑ Лия вохты, ԓўв шавиты ош тащԓаԓ хŏща ԓынан йŏхәтты партсәԓы.

5 Пӑ ԓынана йастәс: «Ма ваттэмән, ащан вешәԓ ӑнта щи йэԓпи хŏрпи, ин пӑ иса хӑрәх-мŏрәх; туп ма ащем Турәм иса ма пиԓэмән уԓ;

6 нын уйәтԓәԓԓән, йурэмән нын ащана ма рупитсәм,

7 ащан пӑ мӑнэм ԓэпәԓтысԓы пӑ сŏхәптәты тынәԓ йаӈ пўш пелтыԓысԓы; туп Турәм ԓўвеԓа атәм верты мӑнэма ӑт эсәԓсәԓы.

8 Хун ԓўв йастәс: ‘Лотәӈ войәт нӑӈена тына питԓәт’, иса лотәӈ войәт сэма питсәт. Хун пӑ ԓўв йастәс: ‘Хӑншаӈ войәт нӑӈена тына питԓәт’, иса хӑншаӈ войәт сэма питсәт.

9 Щиты Турәм нын ащан эԓты тащ нŏх ўсԓы пӑ мӑнэма мӑсԓы.

10 Ипуш ма уԓәмән ватсэм, вохатты питмеԓән козёл хор войәт иса хӑншаӈәт пӑ лотәӈәт усәт.

11 Турәм ангел мӑнэма уԓәмән йастәс: ‘Иаков!’ Ма йастәсәм: ‘Ма щи’.

12 Ԓўв йастәс: ‘Ӑӈкәрма пӑ ванта: козёл хор войәт вохатты питмеԓән иса лотәӈәт пӑ хӑншаӈәт усәт. Мӑнэма иса ныԓа, мўй Лаван нӑӈ пиԓэнән верәԓ.

13 Ма Вефильән нӑӈ хŏщайэн этԓыйәм Турәм, хŏта нӑӈ оливка вŏй кев эԓты шошәпсән пӑ Мӑнэма так йасәӈ мӑсән. Ин нӑӈ нŏх ԓойа, тӑм мўв хӑйи пӑ нӑӈ сэма питәм мўвена йŏхԓы мӑна’».

14 Рахиль пӑ Лия ԓўвеԓ йŏхԓы йастәсӈән: «Ащемән хот эԓты мин йўканэмәна хӑйәм мŏԓты пŏрмәс уԓ а мўй?

15 Аԓт пӑ пўӈәԓ ŏтәта минэмән ԓўӈәтԓәԓы? Минэмән тынысԓы пӑ шитәм щел ŏхәԓ ищи посатсәԓы;

16 Щишән, Турәмән ащемән эԓты нŏх ўйәм тащ мўӈева пӑ мўӈ ԋаврэмԓува уԓ; щишән, хŏты нӑӈена Турәм йастәс, хŏԓ щиты веры».

17 Иаков нŏх ԓойәс, ԋаврэмԓаԓ пӑ имиԓаԓ верблюдәт шӑнша опсәԓсәԓы,

18 шитәм тащԓаԓ пӑ пŏрмасԓаԓ пӑтән ўсԓы, Месопотамия мўвән ԓўв шитәм тащԓаԓ пӑ пŏрмасԓаԓ, Ханаан мўва Исаак ащеԓ хŏща мӑнты урәӈән.

19 Лаван пӑ, ошԓаԓ ԓŏртты мӑнмаԓән, Рахиль эвеԓән ԓухԓаԓ нŏх ԓŏԓәпсайәт.

20 Иаков пӑ Лаван арамей ики ԓэпәԓсәԓы, ԓўв эԓтэԓ хŏнтаман мӑнәс, мӑнты айкеԓән ӑт версәԓы.

21 Мўй тӑйәс, щитәԓ пиԓән мӑнәс; йŏхан ўшсәԓы пӑ Галаад кев ўр пеԓа мӑнәс.

22 Хуԓмет хӑтәԓән Иаков мӑнәм вер Лавана йастәса.

23 Ԓўв рутԓаԓ ԓўв пиԓәԓән ўс пӑ ԓапәт хӑтәԓ ԓўв йўпеԓән ԋухԓәсәс, Галаад кев ўр хŏща эԓты йŏхәтсәԓы.

24 Атән Лаван арамей ики хŏща уԓәмән Турәм йŏхтәс пӑ ԓўвеԓа йастәс: «Пӑԓԓән ки, Иакова йӑм аԓ йаста, атәм аԓ йаста».

25 Лаван Иаков эԓты йŏхәтсәԓы; Иаков пирщин хŏтԓаԓ кев ўр хŏща ԓощсәԓы, Лаван пӑ рутԓаԓ пиԓән ищи Галаад кев ўрән пирщин хŏтԓаԓ ԓощсәԓы.

26 Щӑԓта Лаван Иакова йастәс: «Мўй нӑӈ версән? Мўйа нӑӈ мӑнэм ԓэпәԓсэн пӑ эвеӈәԓам ԉаԉәсты иты, ԋӑрэмәман, тусԓан?

27 Мўйа нӑӈ хӑԋайән мӑтсән, ма эԓтэм хӑԋэмәсән, мӑнэма ӑт йастәсән? Ма, ԓуԓән, нӑӈен каш пиԓән, ар пиԓән, тимпанән пӑ нарәс йўхән йŏтман эсәԓсэм.

28 Нӑӈ мӑнэма хиԓыԓам пӑ эвиԓам мосәԓтәты ӑт эсәԓсэн; нӑӈ щит ӑт нумәсман версэн.

29 Нынан атәм верты йур ма тӑйԓәм; туп нын ащан Турәм мŏԓха атән мӑнэма йастәс: ‘Пӑԓа, Иакова атәм ӑԓ йаста, йӑм аԓ йаста’.

30 Ат уԓ, нӑӈ мӑтсән, ащен хота нӑӈ мӑнты шек ԓӑӈхасайән, – туп мўйа нӑӈ ма ԓухԓам ԓоԓәпсәԓан?»

31 Иаков Лаван пеԓа йастәс: «Ма пӑԓсәм, щиты нумәссәм, нӑӈ эвеӈәԓан йурән нŏх ӑт ат ўсԓан, ԓўԓән.

32 Хŏй хŏща ԓухԓан уйәтԓәԓан, щит ԓыԓӈа уԓты ӑт питәԓ; рутԓәмән уԓман ванты, мўй нӑӈ ŏтэн эԓты ма хŏщайэм уԓ, пӑ нӑӈена ўйи». Иаков ӑт уйәтсәԓы, щит Рахильән ԓоԓәпсайәт.

33 Иаков пирщин хота Лаван йӑӈхәс, пӑ Лия пирщин хота, пӑ митнэӈӈән пирщин хота, туп нэмәԓты ӑт уйтәс. Щӑԓта, Лия пирщин хот эԓты этмаԓән, Рахиль пирщин хота ԓŏӈәс.

34 Рахиль щи йэԓпийән ԓухԓаԓ ўсԓы пӑ верблюд шӑнша хушәм хира пŏтсәԓы, щӑԓта эԓты омәссәԓы. Лаван пирщин хот хŏԓ кӑшсәԓы пӑ нэмәԓты ӑт уйтәс.

35 Ԓўв ащеԓа щиты йастәс: «Кущайэм ӑт ат ԉикащәԓ, ма ԓўв йэԓпеԓән нŏх ԓойты ӑт верәтԓәм, нэ верән уԓԓәм». Пӑ Лаван кӑншатәс, туп ԓухԓаԓ ӑт уйәтсәԓы.

36 Иаков ԉикащәс пӑ Лаван пиԓән ԉавәтты питәс. Иаков пŏтәртты питәс пӑ Лавана йастәс: «Мўй хŏрпи нўр тӑйԓәм, мўй хŏрпи кӑрэк версәм, ма йўпем нӑӈ туԓэн?

37 Хŏԓ пŏрмасԓам нӑӈ вӑтсәԓан, нӑӈ хотэн пŏрмасәт эԓты нӑӈ мўй уйәтсән? Этәԓтыйи тӑта нӑӈ рутԓан йэԓпийән пӑ ма рутԓам йэԓпийән; ԓыв минэмән ат сўтәтԓэԓ.

38 Хус тӑԓ ма нӑӈ хŏщайэн усәм; коза пӑ ош нэ войәт ӑт мушмиԓысәт, тащен эԓты ош ма ӑт ԓэсәм;

39 войән веԓәм ŏт нӑӈена ма ӑт тутԓысәм, щит ма сŏхәптысэм; нӑӈ ма эԓтэм иса нŏх кӑшсэн, мўй хӑтԓәԓән ушәс, мўй атәԓән тӑпәс,

40 хӑтԓәԓән рўв эԓты, атәԓән ищки эԓты шукащсәм, ŏԓмем ӑт ŏԓԓысәм.

41 Щиты хус тӑԓ нӑӈ хотэнән усәм. Ԋӑԓхŏщйаӈ тӑԓ эвеӈәԓан урәӈән рупитсәм пӑ хут тӑԓ тащен урәӈән, нӑӈ пӑ сŏхәптәты тынэн йаӈ пўш пелтыԓысэн.

42 Ащем Турәм ма пиԓэмән ӑт ки ус, Авраам Турәм пӑ Исаак пӑԓты Ŏт, нӑӈ мӑнэм таԓты китсэн, ԓуԓән. Ма шукащты верэм пӑ ма йошԓам рупата Турәм кащаԓәсԓы пӑ хӑщәм атән мӑнэм эԓт питсәԓы».

43 Щӑԓта Лаван пŏтәртәс пӑ Иакова щиты йастәс: «Эвеӈәԓам – ма эвеӈәԓам; ԋаврэмәт – ма ԋаврэмԓам; тащ – ма тащем, иса, мўй нӑӈ ватԓән, щит мӑнэм: ма эвеӈәԓам пиԓән пӑ ԓын тӑйәм ԋаврэмԓән пиԓән мўй верты верәтԓәм?

44 Ин ма пӑ нӑӈ йастатԓәмән кўтԓәмәнән йӑма уԓты, щи йастантәпса минэмән нумты ат питәԓ».

45 Иаков кев шуп ўс пӑ нумты кева омәссәԓы.

46 Щӑԓта Иаков рутԓаԓа йастәс: «Кевәт ӑктаты». Ԓыв кевәт ӑкәтсәт пӑ кев пай версәт, щи кев пай ԓоӈәԓән ԓэсәт.

47 Лаван кев пай щиты нэмәтсәԓы: Иегар-Сагадуфа*Иегар-Сагадуфа – (арам.) «вер вантәм кев пай»;; Иаков пӑ кев пай Галаада†Галаад – (евр.) «вер вантәм кев пай»; нэмәтсәԓы.

48 Щӑԓта Лаван йастәс: «Тӑм хӑтәԓ тӑм кев пай мин кўтэмәнән вер вантәм ŏта питәԓ». Щишән, нэмән пŏтса: Галаад,

49 хŏԓна пӑ: Мицпа‡Мицпа – (евр.) «шаващты пос»;, щит Лаван йастәм урәӈән: «Турәм Куща мӑнэм пӑ нӑӈен ватман ат тӑйԓәԓы, хун уԓты кўтэмән хўва питәԓ;

50 эвеӈәԓам пиԓән атма уԓты питԓән ки мўй пӑ ма эвеӈәԓам тўмпийән хŏԓна имет ўԓән ки, кўш щит ватты хŏйат ӑнтом, нӑӈ уйты, Турәм ищипа ватәԓ».

51 Щӑԓта Лаван Иакова йастәс: «Тӑта щи кев пай пӑ нумты кев, щит мин кўтэмәнән ма ԓощсэм;

52 тӑм кев пай вер вантәм ŏта питәԓ, па нумты кев ищи вер вантәм ŏта питәԓ, тӑм кев пай пӑ нумты кев атәм верты урәӈән нӑӈ ма пелкема ӑт ўшԓэн пӑ ма нӑӈ пелкена ӑт ўшԓэм;

53 Авраам Турәм пӑ Нахор Турәм, ԓын ащан Турәм, мин кўтэмәнән ат сўтытәԓ». Исаак ащеԓ пӑԓәм Турәмән Иаков йасәӈ мӑс.

54 Иаков щи кев ўрән йир тус пӑ рутԓаԓ порыԓыты вохсәԓы; ԓыв порыԓысәт пӑ щи кев ўрән хоԓсәт.

55 Аԓәӈсӑхат аԓәӈ Лаван нŏх киԓәс, хиԓыԓаԓ пӑ эвеӈәԓаԓ мосәԓтәсԓы пӑ йӑм йасәӈән мӑсԓы. Щӑԓта Лаван мӑнәс пӑ ԓўв хотәԓа йŏхтәс.