5
Оԓәӈ утәԓтәты йŏх вохсайәт
1 И пўш, хун Иисус Геннисарет нэмпи ԓор питарән ԓоймаԓән, хŏйатәт керәтман Ԓўв хŏщайәԓ нӑптәщсәт, Турәм йасәӈ хуԓәтты урәӈән,
2 Ԓўв кӑт ўты кӑтԓәм хоп шийаԓәс; хўԓ веԓты хŏйатәт пӑ, хоп эԓты иԓ ŏхәԓман, хоԓәпԓаԓ ԉŏхәтсәт.
3 Иисус и хопәԓа ԓэԓәс, Симон хопа. Ԓўв ԓор питар эԓты Симон йэша йэԓшәк мӑнты пӑртсәԓы, Ԓўв пӑ, хопән омәсман, хŏйатәт утәԓтәс.
4 Хун Ԓўв хŏйатәт утәԓтәты йэтшәс, Симон пеԓа йастәс: "Мӑԓ тӑхайа мӑна, пӑ хоԓпән хўԓ хойты щира йовәԓмаԓән".
5 Симон Ԓўвеԓа йастәс: "Утәԓтәты ху, мўӈ тӑԓаӈ ат рупәтсув, нэмәԓты ӑт мŏщатсув, туп Нӑӈ йасӈен хўватән ма хоԓпем йовәԓмәԓэм".
6 Щиты вермеԓ йўпийән, ԓыв щи арат ар хўԓ мŏщатсәт, пӑ хŏԓна хоԓпеԓ тŏхты питәс.
7 Щиӈәԋща ԓыв кимет хопән уԓәм пиԓԓаԓа йош йовәԓты питсәт, ԓывиԓаԓа ԋотты ат йŏхәтсәт; щӑԓта йŏхәтсәт пӑ хопӈәԓаԓ кинәӈтак хўԓән тэкәптәсԓаԓ, хопӈәԓаԓ вŏԓԓы иԓ шуйԓәты питсәӈән.
8 Щит шийаԓәмаԓ кемән, Иисусән Петрайа айәԓтәм Симон Иисус шашӈән хŏща рӑкнәс пӑ йастәс: "Турәм Куща, ма эԓтэм йэԓ мӑна, ма кӑрэкәӈ хŏйат".
9 Петрайа айәԓтәм Симон пӑ хŏԓ, ԓўв пиԓәԓән уԓәм йохԓаԓ, тӑм веԓәм хўԓԓаԓ пӑтыйән, пӑԓщәмән йŏхәтсайәт;
10 Симон пиԓӈәԓаԓ Иаков пӑ Иоанн, Зеведей пŏхӈән ищиты пӑԓтәмәсӈән. Щӑԓта Иисус Симон пеԓа йастәс: "Аԓ пӑԓа, тӑԓта йэԓԓы нӑӈ хŏйатәт кӑтәԓты питԓән".
11 Щиӈәԋща, хопӈән ўты тӑԓмеԓ йўпийән, пŏрмасԓаԓ иса хӑйсәԓаԓ пӑ Иисус йўпийән мӑтсәт.
Ԓайӈәӈ ԋўлмәӈ хŏйат сыстапты щир
12 Хун Иисус и мŏԓты вошән уԓмаԓән, ԓŏватәԓән ԓайӈәӈ ԋўләмән этәм хŏйат йŏхтәс. Щӑԓта, Иисус шийаԓәмаԓ кемән, Ԓўв йэԓпеԓән хŏмта шаншантәс пӑ, пойәкман пŏтәртәс: "Йэшәк Турәм Куща! Кашен уԓ ки, верәтԓэн мӑнэм Нӑӈ нŏх сыстапты".
13 Иисус йошәԓ йэԓ шӑшсәԓы, ԓўв хŏщайәԓа хӑнәмтыйәс пӑ йастәс: "Ԓӑӈхаԓайәм, сыстама йўва!" Ищи мŏхты ԓайӈәӈ ԋўләмԓаԓ йӑма йисәт.
14 Иисус ԓўвеԓа нэмәԓты хŏйата щи вер эԓты пŏтәртты ӑт эсәԓсәԓы. Туп Турма йир верты хŏйата этәԓтыты пӑртсәԓы, пӑ сыстапты верәԓ пеԓа йир туты пӑртсәԓы, хŏты Моисей партәс, ԓывиԓаԓ эвԓәптәты урәӈән.
15 Туп Иисус айкеԓәԓ мет йэԓ ԓӑрпиԓәс, пӑ тэԓыйэ хŏйат Ԓўв хŏщайәԓа йŏхтыԓыйәс, Ԓўв йасәӈԓаԓ хуԓәтты пӑ мушԓаԓ эԓты йӑмәԓтыты.
16 Туп Иисус таԓ шитам тӑхайата мӑныԓыйәс пӑ щита пойәкщәс.
Щащԓы питәм хŏйат тўмтака йиты щир
17 И хӑтәԓән, хун Иисус хŏйатәт утәԓтәс, щита Галилея пӑ Иудея куртәт эԓты, Иерусалим вош эԓты па йŏхтәм фарисейәт*Фарисейәт – словарь ванта пӑ Закона утәԓтәты икет†Закона утәԓтәты икет – ԓыв мирэԓ йаӈ Турәм партәпса йасӈәт пӑ Турәмән Моисея мийәм па законәт пӑ ащиԓаԓ хӑйәм ԓӑтәӈ йасӈәт нумты па щи йасӈәт хўват уԓты утәԓтәсԓаԓ. омәссәт; Турәм Куща йур мушәӈ хŏйатәт тўмтака верты верән этԓыйәс.
18 Щӑԓта ин, кӑмәтса хŏйат щащԓы питәм ху ŏԓты сŏxԓаԓән тусәт. Ԓыв хота ԓўвеԓ ԓŏӈәԓтты ўтщисэԓ, Иисус йэԓпийа ԓуԓән пŏнты,
19 туп и ԓӑӈкәрән ԓойты хŏйатәт кўт эԓты ӑт верәтсэԓ туты. Щиӈәԋща ԓыв хот ԓоӈԓа нŏх ўратсәт, хот ԓоӈәԓ, нŏх лосәтман, усән версэԓ пӑ мушәӈ ŏтэԓ ŏԓты сŏxԓаԓән кўтԓәпа Иисус йэԓпийа иԓ эсәԓсэԓ.
20 Иисус ԓыв эвәԓты щирэԓ шийаԓәмаԓ кемән, мушәӈ хŏйата йастәс: "Ԓухсэм, кӑрэкԓан йŏрэмәсайәт!"
21 Фарисейәт пӑ Закона утәԓтәты икет щит хуԓмеԓ кемән нумәсты питсәт, пŏтәртԓәт: "Хŏй щит, Хŏй Турма ӑт рӑхты йасӈәт йастыйәԓ? Турәм тўмпийән хŏй верәтәԓ хŏйата кӑрэкәт йŏрэмәты?"
22 Иисус, ԓыв нŏмәсԓаԓ ŏша пайәтмаԓ кемән, йŏхԓы ԓывиԓаԓа йастәс: "Мўйа щиты нумәсԓәты?
23 Мўй кеншәк йастәты: ”Нӑӈ кӑрэкԓан йŏрэмәсайәт!”, мўй пӑ йастәты: ”Нŏх ԓойа пӑ шушиԓыйа”?
24 Уйтаты, Хŏйат Пŏх тӑта, мўвән, кӑрэкәт йŏрэмәты щир тӑйәԓ, - Иисус щащԓы питәм хŏйат пеԓа йастәс, - Нӑӈена пŏтәртԓәм: нŏх ԓойа, ŏԓты сŏхԓан ўйаԓән пӑ йŏхи мӑна".
25 Ищи мŏхты ԓыв йэщаԓтэԓ ԓўв нŏх ԓойәс, ŏԓәм сŏxԓаԓ усԓы, Турәм вŏԓаӈа айәԓтман, йŏхи мӑнәс.
26 Щиӈәԋща вантәм хŏйатәт пӑԓщәмән йŏхәтсайәт, ԓыв Турәм вŏԓаӈа айәԓтсәт пӑ, пӑԓман, пŏтәртсәт: "Тӑмхӑтәԓ унты ӑт вантыԓыйәм верәт мўӈ ин щи ватсув!"
Матфей вохәпса
27 Щи йўпийән, Иисус ким этәс, пӑ Левий нэмпи налог ӑкәтты хŏйат шийаԓәс, налог ӑкәтты тӑхайәԓән опсәс. Иисус ԓўвеԓа йастәс: "Ма йўпемән йўва".
28 Щиӈәԋща, мŏԓтыԓаԓ иса хӑйсәԓы, нŏх ԓойәс пӑ Иисус йўпийән мӑнәс.
Иисус кӑрэкәӈ хŏйатәт пиԓән ԓэԓ
29 Левий ԓўв хотәԓән Иисус урәӈән ун поры пӑсан ԓэщатәс, ԓыв пиԓԓаԓән пӑсан сурыйән налог ӑкәтты ар хŏйат пӑ па мŏхет усәт.
30 Фарисейәт пӑ Закона утәԓтәты икет Иисус утәԓтәты йохԓаԓ пеԓа ўшмащсәт пӑ пŏтәртсәт: "Мўйа нын налог ӑкәтты хŏйатәт пӑ кӑрэкәӈ хŏйатәт пиԓән и йӑха ԓэԓты, йищԓәты?"
31 Иисус ԓывиԓаԓа йŏхԓы йастәс: "Тўмтак хŏйатәта хун ԉеккар мосәԓ, мушәӈ хŏйатәта мосәԓ.
32 Ма ӑнта тўӈа–щира уԓты хŏйатәт, Ма кӑрэкәӈ хŏйатәт кӑрэкԓаԓ эԓты шӑшән керԓәптәты урәӈән йŏхәтсәм".
Иисус вўщԓәты вер эԓты утәԓтәԓ
33 Щӑԓта ԓыв Иисуса йастәсәт: "Иоанн утәԓтәты йохԓаԓ ван кўтән вўщԓәты хӑтԓәт‡вўщԓәты хӑтԓәт – ԓэтŏт ӑт ԓэты пӑ, пойәкщәман, уԓты хӑтԓәт; верыԓыԓәт пӑ пойәкщәты верәт верԓәт, фарисейәт утәԓтәты йŏх ищиты уԓԓәт, Нӑӈиԓан пӑ ԓэԓәт-йищԓәт".
34 Иисус ԓывиԓаԓа йŏхԓы йастәс: "Нын мўй поры пӑсан хŏща, Нэ Туты Ху омәсман, мŏйәӈ йох вўщԓәты партты верәтԓәты?
35 Хӑтԓәт йŏхәтԓәт, хун Нэ Туты Ху ԓыв эԓтэԓ нŏх ўԓа, щи пŏрайән ԓыв вўщԓәты хӑтԓәт верты питԓәт".
Ԓумтәм эԓты пӑ ўна пŏнты хир эԓты утәԓтәты пŏтәр
36 Иисус ԓывиԓаԓа хŏԓна тӑмәщ утәԓтәты пŏтәр пŏтәртәс: "Нэмәԓты хŏйат, йӑԓәп ԓумтәмәԓ эԓты менэмәм йŏԓәптайәԓ, катра сŏхәԓа ӑт рӑхәԓԓәԓы; па щирән ки йӑԓәп ԓумтәмәԓ мӑшԓәԓы, пӑ йӑԓәп йŏԓәптайәԓ катра сŏхәԓа па ӑт рӑхәԓ.
37 Пӑ нэмәԓты хŏйат йӑԓәп ўна катра ԋўки хира§хир – ԋўки эԓты верәм хир (мосәӈ пӑ щуш хир эԓты верәм хир) ӑт пŏнԓәԓы, па щирән ки, веԉщи кавәрты ўнайән хир мӑшԓа, ўнайәԓ иԓ мӑнәԓ пӑ хирәԓ ӑт мосты питәԓ.
38 Ӑнта, йӑԓәп ўна йӑԓәп хира пŏнты мосәԓ. Ши пŏрайән тўмеԓ тӑԓаӈа хӑщәԓ, пӑ тӑмеԓ па.
39 Нэмәԓт хŏйат, катра ўна йиԋщемәман, ищи мŏхты йӑԓәп ўна йиԋщемәты ӑт ԓӑӈхамәԓа. Ԓўв йастәԓ: "Катра ўна йӑмшәк".
*5:17 Фарисейәт – словарь ванта
†5:17 Закона утәԓтәты икет – ԓыв мирэԓ йаӈ Турәм партәпса йасӈәт пӑ Турәмән Моисея мийәм па законәт пӑ ащиԓаԓ хӑйәм ԓӑтәӈ йасӈәт нумты па щи йасӈәт хўват уԓты утәԓтәсԓаԓ.
‡5:33 вўщԓәты хӑтԓәт – ԓэтŏт ӑт ԓэты пӑ, пойәкщәман, уԓты хӑтԓәт;
§5:37 хир – ԋўки эԓты верәм хир (мосәӈ пӑ щуш хир эԓты верәм хир)