1 Хун Иисус хуԓәнтәм мир пеԓа йасәӈԓаԓ хŏԓасәт, Капернаум воша мӑнәс.

2 Щита и сот ԉаԉ йох ŏх ху*сот ԉаԉ йох ŏх ху – сотник, центурион, римский офицер; митхуйәԓ ԓавәртат кӑшаӈ ус, сŏрмәԓ вŏԓԓы ванамәс. Щи митху ԓўв шек мостыйа тӑйсәԓы.

3 Иисус эԓты хуԓмаԓ кемән, ԓўв иудейәт хŏща уна уԓты икет эԓты тухәԓԓаԓ Иисус хŏща китсәԓԓы, йастәты, ԓўв митхуйәԓ тўмтака верты урәӈән, ат йŏхтәс.

4 Ԓыв Иисус хŏща йŏхәтмеԓән, эвԓа-йŏԓа Ԓўвеԓ пойәксэԓ, щиты пŏтәртԓәт: "Нӑӈен ԓўвеԓа щит верты рӑхәԓ, ԓўв йӑм хŏйат,

5 ԓўв мирэв мостыйа тӑйԓәԓы, хŏԓна Турәм йасӈа утәԓтәты хот мўӈева верәс".

6 Иисус ԓыв пиԓԓаԓән мӑнәс. Туп хун Ԓўв ԉаԉ йох ŏх ху хот ԉэпа йŏхтәс, ԉаԉ йох ŏх ху ԓухәсԓаԓ йэщаԓт китсәԓы, йастәты: "Йэшәк Турәм Куща, йэԓԓы аԓ мӑна, ма мўй вŏԓаӈ хŏйат, ма хотэма Нӑӈ ат ԓŏксән,

7 щишән, мӑнэм ма йӑм хŏйата ӑт ԓуӈәтсэм, Нӑӈ хŏщайэн ванамәты урәӈән; туп и йасәӈ йаста, митхуйэм тўмтака йиԓ.

8 Ма ищи хуԓәтты хŏйат, туп ма иԓпемән ищи ԉаԉ йохәт уԓԓәт, ита йастәԓәм: "Мӑна", па мӑнәԓ, пӑ кимета йастәԓәм: "Ты йўва!", пӑ йиԓ, митхуйэма йастәԓәм: "Щит вера", пӑ верәԓ".

9 Щит хуԓмаԓ кемән, Иисус ԓўв пелайәԓ ӑԓ ватәԓ пӑ, йŏхԓы каремәман, Ԓўв йўпеԓән шушәм хŏйатәта йастәс: "Нынана пŏтәртԓәм, тӑмәщ эвәԓты щир Ма Израиль мир хŏща хŏԓна ӑт уйәтсәм".

10 Китыԓыйәм мŏхет, йŏхԓы йŏхәтмеԓән, кӑшаӈ митхуйэԓ, уйәтмеԓән, тўмтака йўвмаԓ.

11 Щи йўпийән Иисус Наин нэмпи воша мӑнәс; ар пеләк утәԓтәты йŏхԓаԓ пӑ тэԓыйэ хŏйат Ԓўв пиԓәԓән шушсәт.

12 Хун Ԓўв вош пушас ова вана йŏхтәс, вош эԓты пӑрәм хŏйат ким этәԓтәса, икиԓы хӑщәм ими туп тӑйәм и пŏхәԓ ус. Ши ими пиԓән вош эԓты ар хŏйат шушәс.

13 Ими шийаԓәмаԓ кемән, Турәм Куща сӑмәԓ хощты питәс, щаԉа ўсԓы пӑ ԓўвеԓа йастәс: "Аԓ хоԓԓа!"

14 Вана шушман, Иисус ԓэԓтŏта йошәԓән хӑнәмтыйәс; ӑпа тўвәм мŏхет иԓ ԓойсәт. Щӑԓта Иисус йастәс: "Энәмты пŏх, нӑӈена йастәԓәм, нŏх ԓойа!"

15 Пӑрәм пŏх нŏх опсәс пӑ пŏтәртты питәс; Иисусән ԓўв аԋԏеԓ йоша катԓәптәса.

16 Хŏйатәт пӑԓщәмән йŏхәтсайәт, пӑ ԓыв Турәм вŏԓаӈа айәԓтты питсәт, пŏтәртԓәт: "Вŏԓаӈ, ун Турәм йасәӈ туты хŏйат этәс, мўӈ кўтэвән уԓ! Турәм мирәԓ хŏща ԋотты йŏхтәс!"

17 Тӑмәщ айкеԓ Ԓўв эԓтэԓ Иудея мўв ԓŏвата пӑ керәтман иса лакки ԓӑрпиԓәс.

18 Иоанн тӑм верәт утәԓтәты йохԓаԓ эԓты хуԓсәԓы.

19 Кӑт хŏйатӈәԓаԓ вана вохман, Иисус хŏща китсәԓы, иԋщәсты: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"

20 Ԓын Иисус хŏща йŏхәтсәӈән, йастәсӈән: "Иоанн йиӈка ԓŏӈәԓтыты хŏйат минэмән Нӑӈ хŏщайэна иԋщәсты китсәԓы: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"

21 Щи пŏрайән Иисус ар сыр муш пӑ кӑши эԓты, кўԉ сŏх эԓты йӑмәԓтәс, пӑ мŏԓты кем сэмԓы хŏйатәта ватты щир мойԓәс.

22 Щӑԓта Ԓўв щиты йŏхԓы йастәс: "Мӑнаты пӑ Иоанна пŏтәртаты, мўй ватсәты, хуԓсәты: сэмԓы хŏйатәт сэмәӈа йиԓәт, нохты хŏйатәт йӑма шушиԓыԓәт; ԓайӈәӈ ԋўлмәӈ хŏйатәт сыстама йиԓәт, пӑԓԓы хŏйатәт хуԓԓәт, пӑрәм хŏйатәт нŏх ԓыԓӈатԓайәт, пӑ нўша хŏйатәта Йӑм айкеԓ эԓты сыйәӈа пŏтәртԓа;

23 Щит ŏйәӈ, хŏй мӑнэма эвәԓты нŏх ӑт вŏԓыйәԓ".

24 Иоанн китәм йохӈән мӑнәм йўпийән, Иисус мирәԓа Иоанн эԓты пŏтәртты питәс: "Хӑр пӑ таԓ мўва мўй ватты йӑхсәты? Вотән йовәԓты тŏрән ватты?

25 Мўй пӑ ватты нын йӑхсәты? Ԓэпәт сŏхәта ԓумәтԓыйәм хŏйат ватты? Йӑма ԓумәтԓыйәм пӑ тащәӈа уԓты хŏйатәт хон хотәтән уԓԓәт.

26 Мўй пӑ ватты нын йӑхсәты? Турәм йасәӈ туты хŏйат? Йӑна, пŏтәртԓәм нынана, Турәм йасәӈ туты хŏйат эԓты вŏԓаӈшәк хŏйат ватты йӑхсәты.

27 Тӑм щит, хŏй эԓты хӑшман уԓԓа: "Тӑм, Ма айкеԓ туты хŏйатэм Нӑӈ йэԓпенән китԓэм, xойән Нӑӈ йушен Нӑӈ йэԓпенән ԓэщатԓа".

28 Щишән нынана пŏтәртԓәм: иметән сэма пайтәм хŏйатәт кўтән, Иоанн йиӈка ԓŏӈәԓтыты хŏйат эԓты ԓӑтәӈшәк Турәм йасәӈ туты хŏйат ӑнтом; туп мет ай ŏт Турәм Хон Уԓәпсайән ԓўв эԓтайәԓ ԓӑтәӈшәк".

29 Хŏԓ Ԓўвеԓ хуԓәнтәм мир, пӑ налог ӑкәтты мŏхет, Турәм вещкат вер вана ўйман, Иоанн йиӈка ԓŏӈәԓтыты щирән йиӈка ԓŏӈәԓтысайәт;

30 фарисейәт пӑ Закона утәԓтәты икет йиӈка ԓŏӈәԓтыты ӑт кашащсәт, Турәм ԓӑӈхаты щир вана ӑт усэԓ.

31 Щӑԓта Турәм Куща йастәс: "Ин тӑм хŏйат рут артаԓәты мосәԓ, хŏй хŏрпет? Ԓыв хŏй хŏрпет?

32 Ԓыв вош хӑры хŏща омәсты ԋаврэмәт хŏрпет, кўтԓаԓән ўвәтԓәт пӑ пŏтәртԓәт: ”Мўӈ нарәс йўхән нын урӈәнән йŏтсув, нын пӑ ӑт йаксәты, мўӈ хоԓԓәты арәт арисув, нын ӑт хоԓԓәсты”.

33 Иоанн йиӈка ԓŏӈәԓтыты хŏйат йŏхтәс: ԋаԋ ӑт ԓэԓ, ўна ӑт йищәԓ, пӑ пŏтәртԓәты: ”Ԓўв ԓыпеԓән кўԉ уԓ”.

34 Хŏйат Пŏх йŏхтәс: ԓэԓ пӑ йищәԓ; пӑ йастәԓты: ’’Тӑта щи хŏйат, хŏй ԓэԓ пӑ ўна йищәԓ, налог ӑкәтты хŏйатәт пиԓән, кӑрэкәӈ хŏйатәт пиԓән ԓухса уԓ’’.

35 Ŏшәӈ–щащәӈ нŏмәс хŏԓыйэ ԓўв ԋаврэмԓаԓән вещката пӑйәтса".

36 И фарисейән Иисус ԓэты вохса; Ԓўв хота ԓŏӈәс, пӑсан сурыйа иԓ опсәс.

37 Щи вошән и уԉԋайа уԓты нэ ус, Иисус фарисей хотән ԓэты вер хуԓмаԓ кемән, нŏви кев эԓты верәм, эпԓәӈ миро вŏйән пŏнәм, ващ турпи пўт тус.

38 Щӑԓта, ԓўв шӑш пеләк сӑхат Иисус кўрнат шŏма шаншәха омәсман пӑ хоԓԓәман, Ԓўв кўрԓаԓ сэмйикән ŏвӈәԓтты пӑ ŏхсŏхԓаԓән нŏх мухты питсәԓы. Ԓўв кўрԓаԓ мосәԓтәсԓы пӑ эпԓәӈ миро вŏйән ԋŏсәтсәԓы.

39 Хун Иисус вохәм фарисей щит шийаԓәс, нумәсэмәс: "Тӑм йӑна Турәм йасәӈ туты хŏйат ки ус, Ԓўв ԓуԓән уйәтсәԓы, хŏй, мўй хŏрпи нэ Ԓўв хŏщайәԓ хӑныԓыйәԓ, щит кӑрэкәӈ нэ".

40 Ԓўв пеԓайәԓ Иисус йастәс: "Симон! Ма нӑӈена мŏԓты йастәты верэм уԓ". Ԓўв йастәс: "Пŏтәрта, Утәԓтәты Ху".

41 Иисус йастәс: "И ŏхәӈ ху кӑт артнайәӈ хŏйатӈән тӑйәс: итәԓ – ветсот динарий†динарий - словарь ванта, киметәԓ – ветйаӈ.

42 Ԓын артнайԓын сŏхәптәты ŏх ӑт тӑйсәӈән, щишән ŏхәӈ ху кӑтӈән артнайԓын йŏрэмәсԓы. Йаста, мӑты ŏтәԓән ŏхәӈ ху мет мостыйа тӑйԓа?"

43 Симон йастәс: "Аԓт щитэн, хŏйа ԓўв аршәк ŏх йŏрэмәс". Иисус ԓўвеԓа йастәс: "Йӑна щиты пŏтәртԓән".

44 Ин нэ пеԓа керԓәман, Симона йастәс: "Тӑм нэ нӑӈена ныԓа? Ма нӑӈ хотэна йŏхәтсәм, нӑӈ кўр ԉŏхәтты йик Мӑнэм ӑт мӑсән, ԓўв пӑ Ма кўрԓам сэм йикԓаԓән ŏвӈәԓтсәԓы, ŏхсŏхԓаԓән нŏх мўхсәԓы;

45 уйтатмемәнән нӑӈ Мӑнэм хŏԓна ӑт мосәԓтәсэн, ԓўв пӑ, Ма йŏхәтмем ўш эԓты, Ма кўрԓам мосәԓтәты ӑт вŏԓыйәԓ.

46 Нӑӈ Ма ŏхем оливка вŏйән ӑт ԋŏсәтсэн, ԓўв пӑ эпԓәӈ миро вŏйән кўрԓам ԋŏсәтсәԓы.

47 Щишән, Ма нӑӈена йастәԓәм: Ма пеԓайэм артан сӑмәӈа уԓты верәԓ аԉәԓ, мўй арат ԓўв ар кӑрэкԓаԓ йŏрэмәсайәт; хŏйа шимәԓ нўр йŏрэмәԓа, щит шимәԓ сӑмәӈа уԓ".

48 Иисус щи нэ пеԓа йастәс: "Нӑӈ кӑрэкԓан йŏрэмәсайәт".

49 Ԓўв пиԓәԓән пӑсан сурыйән опсәм мŏхет нумәсты питсәт: "Хŏй тӑм, кӑрэкәт пӑ йŏрэмәԓ?"

50 Иисус пӑ нэӈа йастәс: "Нӑӈ эвәԓты верэнән нӑӈ нŏх пайәтсайән, йӑм нŏмәсән мӑна!"