1 Кӑтхŏщйаӈәԓ вохмаԓ йўпийән, ԓывиԓаԓа кўԉәт воштәты, мушәт йӑмәԓты йур пӑ партатты щир мӑс,

2 пӑ ԓывиԓаԓ Турәм Хон Уԓәпса эԓты сыйәӈа пŏтәртты, мушәӈ хŏйатәт тўмтака верты китсәԓы.

3 Щӑԓта ԓывиԓаԓа йастәс: "Пӑтән нэмәԓты аԓ ўйаты, - ӑнта шушты сўв, ӑнта хир, ӑнта ԋаԋ, ӑнта ŏх, ӑнта кимет ԓумәтты сŏх;

4 мўйсыр хота ԓŏӈԓәты, щита хӑщаты, щиԓта йэԓԓы мӑнаты.

5 Хŏта вана ӑт ки ўԓайты, щи вош эԓты эттанән, кўрԓән эԓты хиш иԓ пӑркатаԓән. Щит ԓывиԓаԓа нўра ат питәԓ".

6 Ԓыв мӑтсәт, пӑ куртәт сӑхат кашәӈ тӑхайән Йӑм айкеԓ тутԓыман пӑ мушәӈ хŏйатәт йӑмәԓтман йӑхсәт.

7 Ԋӑԓмет мўв щуӈ кущайа уԓты Ирод ики, Иисус верәм верәт эԓты хуԓмаԓ кемән, нŏпсәԓ ԓыԓԓәс: хŏй йастәԓ, мӑтты щит Иоанн пӑрмаԓ эԓты нŏх ԓыԓәӈԓәс,

8 тухԓәт пӑ – Илия сэма этәс, па хŏйатәт пӑ – катра уԓәм Турәм йасәӈ туты икет эԓты мӑтты ŏт нŏх ԓыԓәӈԓәс.

9 Ирод йастәс: "Ма Иоанн ŏхәԓ хŏԓт пайәтсэм; а хŏй Тӑм Хŏйат, Хŏй эԓты ма тӑмәщ айкеԓ хуԓԓәм?" Пӑ Ԓўвеԓ ватты урәӈән, мŏԓты щир кӑшты питәс.

10 Апостоләт йŏхԓы йŏхәтмеԓән, мўй версәт, Иисуса иса пŏтәртсэԓ; щӑԓта Ԓўв, щитԓаԓ пӑтән ўйман, Вифсаида вош ԉэпән уԓты атэԓ тӑхайа мӑнәс.

11 Хŏйатәтән щи вер мŏштәм кемән, Ԓўв хŏщайәԓ мӑтсәт. Ԓўв, щи мŏхет вана усԓы, ԓывиԓаԓа Турәм Хон Уԓәпса эԓты пŏтәртәс пӑ хŏй тўмтака верты мосәс, щит тўмтака версәԓ.

12 Хӑтәԓ йэтна пелка йиты питәс. Кӑтхŏщйаӈ утәԓтәты йохԓаԓ Ԓўв ԉэпәԓа вана хӑтман, йастәсәт: "Мŏхет эсԓаԓән, ванән уԓты куртәта хоԓты пӑ ԓэтәт кӑшты ат мӑнԓәт; мўӈ тӑта таԓ тӑхайән уԓԓув".

13 Ԓўв пӑ йастәс: "Нын ԓывиԓаԓ ԓэтәтән мийаԓән!" Ԓыв йастәсәт: "Мўӈ вет ԋаԋ, кӑт хўԓ тўмпийән па ӑт тӑйԓув; мосәӈ мўӈева тӑм хŏйатәт урәӈән ԓэтәт ԓутты йӑхты?".

14 Щита вет щŏрәс кем йох хŏйат ус. Иисус утәԓтәты йохԓаԓа йастәс: "Ԓывиԓаԓ и пўӈԓа ветйаӈ хŏйат аратән опсәԓтаԓән".

15 Щӑԓта ԓыв щиты версэԓ, иса хŏԓ опсәԓтсәԓаԓ.

16 Ԓўв, вет ԋаԋ, кӑт хўԓ ўйман, турәм пеԓа нŏхԓы ӑӈкәртман, пойәкщәман, Турма пумащипа йасӈәт йастәс, морәтсәԓы пӑ утәԓтәты йохԓаԓа мӑсԓы, мира ортты урәӈән.

17 Щӑԓта ԓэсәт пӑ хŏԓ тӑрәпсайәт; пӑ хӑщәм ԋаԋ пўләт кӑтхŏщйаӈ кураԋэк арат ӑкәтсәт.

18 И пўш, хун Ԓўв атэԓт тӑхайән пойәкщәман ус, пӑ утәԓтәты йохԓаԓ Ԓўв пиԓәԓән усәт, йухәт Ԓўв ԓывиԓаԓ ищмәсԓы: "Хŏйатәтән Ма хŏй йўкана тӑйԓайәм?"

19 Ԓыв йŏхԓы йастәсәт: "Иоанн йиӈка ԓŏӈәԓтыты хŏйат йўкана, тухԓәтән пӑ – Илия йўкана; па хŏйатәт пӑ йастәԓәт, катра пŏрайән уԓәм Турәм Йасәӈ туты икет эԓты и мӑтты ŏт нŏх ԓыԓәӈԓәс".

20 Ԓўв ԓывиԓаԓ ищмәсԓы: "Нын пӑ хŏй йўкана Мӑнэм тӑйԓәԓән". Петра йŏхԓы йастәс: "Турәмән китәм Христоса".

21 Туп Иисус ԓывиԓаԓа щит эԓты нэмәԓты хŏйата пŏтәртты шек такан ӑт эсәԓсәԓы,

22 йастәс: "Хŏйат Пŏха мосәԓ ар шук туты, уна уԓты икетән, Турма йир верты хŏйатәт ŏх икетән, Закона утәԓтәты икетән вана ӑт ўты вер уԓ, пӑ пӑратты вер уԓ, щӑԓта хуԓмет хӑтәԓән нŏх ԓыԓәӈԓәты верәԓ уԓ".

23 Ԓўв хŏԓ хŏйатәт пеԓа йастәс: "Хŏй Ма йўпемән йиты ԓӑӈхаԓ ки, ԓўв эԓтайәԓ ат йŏрэмәԓ, пернайәԓ ат ўԓ*пернайәԓ ат ўԓ – Ма урӈемән шук туты пӑ пӑрты ԓэщатыман ат уԓ;, пӑ Ма йўпемән йиԓ.

24 Хŏй уԓәпсайәԓ шавиты ки ԓӑӈхаԓ, щит ԓўвеԓ уштәԓԓы; хŏй уԓәпсайәԓ Ма урӈема уштәԓԓы ки, щит ԓўвеԓ шавиԓԓы.

25 Мўй ŏнтас хŏйата, уԓты омәсты мир иса йоша пайәтԓәԓы ки, ԓўвеԓ пӑ ԓўв пӑратԓәԓы, мўй пӑ ԓўвеԓ ԓўв атәм верәԓ?

26 Хŏй Ма эԓтэм пӑ Ма йасәӈԓам эԓты йэԓамтыты питәԓ, щи хŏйат эԓты Хŏйат Пŏх ищи йэԓамтыты питәԓ, хун Ԓўв хутԓәты–вŏрԓәты щирәԓән, щӑԓта Ащэԓ пӑ йэмәӈ ангеләт хутԓәты–вŏрԓәты щирән йŏхәтәԓ.

27 Йӑна нынана йастәԓәм: тӑта ԓойты хŏйатәт эԓты тухԓәт, Турәм Хон Уԓәпса шийаԓәтэԓ унты, сŏрма ӑт питԓәт.

28 Щи йасәӈԓаԓ йўпийән, ԋийәԓ кем хӑтәԓ хӑщәм йўпийән, Иисус Петра, Иоанн пӑ Иаков пӑтән ўйман, кев ԓŏӈԓа нŏх хуӈхәс, пойәкщәты урәӈән.

29 Хун Ԓўв пойәкщәс, веш хŏрасәԓ па хŏрпийа йис, ԓумтәмԓаԓ нŏвийа йисәт, вŏрԓәты питсәт.

30 Щӑԓта, кӑт ики Ԓўв пиԓәԓән пŏтрэмәсӈән. Щит Моисей пӑ Илия усӈән;

31 ԓын хутԓыман–вŏрԓыман этсәӈән, Иисус тӑм уԓәпса эԓты мӑнты верәԓ эԓты пŏтәртсәӈән, мўй Ԓўвеԓ Иерусалим вошән верты мосәԓ.

32 Петра пӑ ԓўв пиԓәԓән уԓәм йохӈиԓаԓ оԓәмән ԓавәртамәсайәт; туп нŏх верԓәмеԓән, Иисус хутԓәты–вŏрԓәты щирәԓ пӑ Ԓўв пиԓәԓән ԓойәм щи кӑт икеӈән, шийаԓәсәт.

33 Хун ԓын Ԓўв эԓтайәԓ йэԓ мӑнты питсәӈән, Петра Иисуса йастәс: "Утәԓтәты Ху! Тӑта мўӈева йӑм уԓты; хуԓәм ԓэпәс хот верԓув: ит – Нӑӈена, ит – Моисейа, ит – Илияйа", - мўй пŏтәртәс ӑт уйәтәԓ.

34 Хун ԓўв щит пŏтәртмаԓән, пӑԓәӈ этәс пӑ ԓыв эԓтэԓа иԓ эсԓәщәс; хун пӑԓӈа ԓŏксәт, ԓыв шек пӑԓтамәсәт.

35 Пӑԓәӈ эԓты тўр сый ус, щащыԓыйәс: "Тӑм – Ма сӑмема мосты Пŏхем, Ԓўвеԓа хуԓәнтаты".

36 Хун щи тўр сый щащәс, Иисус утща хӑщәс. Ԓыв мӑшйайа йисәт, пӑ мўй ватсәт, нэмәԓты хŏйата щи пŏрайән ӑт пŏтәртысэԓ.

37 Кимет хӑтәԓ, хун ԓыв кев эԓты иԓ ŏхәԓсәт, Ԓўв ар хŏйатән йэщаԓ этса.

38 Шӑмкапан, а хŏй ху мир кўт эԓты ўваԓтәс: "Утәԓтәты Ху! Щи ԓŏват йӑм вера, Нӑӈ пŏхем пеԓа ӑӈкәрмийа, ԓўв ма туп тӑйты и ԋаврэмем:

39 ԓўв кўԉән ԓŏӈтыԓа, щӑԓта ԓўв роман ўваԓтәԓ, пӑ ԓўвеԓ шукатԓәԓы, пӑ ўӈԓәԓ эԓты ԋавәр мӑнәԓ; пӑ йӑма шукаттаԓ йўпийән ўрайән ԓўв эԓтэԓ йэԓ мӑнәԓ.

40 Ма Нӑӈ утәԓтәты йохԓан, щи кўԉ воштәты урәӈән, вохсәԓам, пӑ ԓыв ӑт верәтсәт".

41 Иисус пӑ йŏхԓы йастәс: "Ӑт эвәԓты пӑ вевтама нумәсты хŏйат рут! Мўй унты Ма нын пиԓанән уԓты пӑ нынан верәтты питԓәм! Пŏхен ты тўви".

42 Хун щи пŏх шушәс, кўԉ ԓўвеԓ мўва иԓ вŏщкәсԓы пӑ кӑмән щирән тӑрӈәԓтты питсәԓы; туп Иисус ԋаврэм кетәмты кўԉа ӑт эсәԓсәԓы, пŏх тўмтака версәԓы пӑ ԓўв ащеԓа ԓўвеԓ мӑсԓы.

43 Иса хŏԓ Турәм ун йурәԓ эԓты туп ӑԓ пакнысысәт. Хун пӑ хŏԓыйэ Иисус верты верәт эԓты ӑԓ пакнысысәт, Ԓўв утәԓтәты йохԓаԓа йастәс:

44 "Тӑм йасӈәт нын нŏпсәна пŏнаԓән: Хŏйат Пŏх хŏйатәт йоша мӑԓа".

45 Ԓыв щи йасәӈ ŏша ӑт пŏтсэԓ, пӑ ԓыв эԓтэԓ щит лӑп уса, щишән ԓыв ӑт мŏштәсэԓ, Ԓўвеԓ щит эԓты ищмәты пӑ ԓыв пӑԓсәт.

46 Ԓывиԓаԓа и нŏмәс йŏхтәс: хŏй ԓыв кўтэԓән вŏԓаӈшәк?

47 Иисус ԓыв сӑмԓаԓән тӑйты нŏмәсԓаԓ ватман, ԋаврэм ўсԓы пӑ Ԓўв йэԓпәԓа ԓощәԓтәсԓы

48 пӑ ԓывиԓаԓа йастәс: "Хŏй тӑм ԋаврэмийэ Ма нэмем урәӈән вана уԓԓы, щит Мӑнэм вана уԓԓы; хŏй Мӑнэм вана уԓԓы, щит Мӑнэм Китәм Ŏт вана уԓ; хŏй нын эԓтан мет айшәк, щит вŏԓаӈ питәԓ".

49 Щи пўԉаӈ Иоанн йастәс: "Утәԓтәты Ху! Мўӈ и хŏйат ватсув, ԓўв Нӑӈ нэменән кўԉәт воштәԓ, пӑ ԓўвеԓ нŏх вŏԓәтсэв, ԓўв мўӈ пиԓэвән Нӑӈ йўпенән ӑт йӑӈхәԓ, щишән.

50 Иисус Иоанна йастәс: "Аԓ вŏԓытаԓән, хŏй ӑнта нын йэщаԓтән уԓ†нын йэщаԓтән уԓ – нын пеԓайән ԉик туԓ, щит нын пеԓайән уԓ".

51 Хун Ԓўвеԓ мир уԓәпса эԓты нŏх ўты пŏра ванамәс, Ԓўв Иерусалим воша мӑнты нŏмәс верәс;

52 щишән айкеԓ туты йохԓаԓ Ԓўв йэԓпеԓән китсәԓы; щиӈәԋща ԓыв мӑтсәт пӑ Самария‡Самария – словарь Самария ванта; мŏхет курта йŏхәтсәт, Ԓўв урӈәԓән мўй иса ԓэщатты.

53 Туп щита Ԓўв вана ӑт эсәԓса, Ԓўв Иерусалим воша шушәс, щишән.

54 Щит шийаԓәмаԓән, Ԓўв утәԓтәты кӑтӈиԓаԓ, Иаков пӑ Иоанн, йастәсӈән: "Турәм Куща, Нӑӈ ԓӑӈхаԓән ки, мўӈ йастәԓув, турәм эԓты тўт иԓ ат ŏхәԓәԓ, ԓывиԓаԓ ат пӑратԓәԓы, хŏты Илия верәс?"

55 Туп Ԓўв, ԓын пеԓайԓәна карэмәман, ԓынан нўрысԓы пӑ йастәс: "Ӑт уйәтԓәԓән, мӑты ԓыԓ эԓты нын уԓԓәтән?"

56 Хŏйат Пŏх ӑнта хŏйатәт уԓәпса пӑратты йŏхтәс, нŏх пайәтты". Щишән ԓыв па курта мӑтсәт.

57 Щиты тыйәс, хун ԓыв мӑнмеԓән, и мӑтты ŏт Ԓўвеԓа йастәс: "Турәм Куща! Ма Нӑӈ йўпенән мӑнԓәм, хŏԓта кепа Нӑӈ ат мӑтсән".

58 Иисус ԓўвеԓа йастәс: "Ŏхсарәт ух тӑйԓәт, щищкет - тыхәԓ, Хŏйат Пŏх пӑ ŏхәԓ пŏнты тӑха ӑт тӑйәԓ".

59 Кимет хŏйата Ԓўв йастәс: "Ма йўпемән йўва". Щитэн йастәс: "Турәм Куща, мӑнэм оԓәӈән йŏхи йӑхты эсԓы, пӑрәм ащем иԓ ԓэщатты".

60 Туп Иисус ԓўвеԓа щиты йастәс: "Пӑрәм хŏйатәта хӑԓайԓаԓ ԓывиԓаԓа иԓ ԓэщатты хӑйи, нӑӈ пӑ мӑна, Турәм Хон Уԓәпса эԓты такан пŏтәрта.

61 Хŏԓна хуԓмет хŏйат па йастәс: "Турәм Куща, ма Нӑӈ йўпенән мӑнԓәм, туп йэԓпи мӑнэм йŏԓән уԓты мŏхиԓам пиԓән пайәмуԓәм верты эсԓы".

62 Иисус ԓўвеԓа йастәс: "Нэмәԓты хŏйат, хŏй йошәԓ мўв шўкатты ŏта пŏнмаԓ йўпийән пӑ йŏхԓы ӑӈкәртыйәԓ, Турәм Хон Уԓәпсайа ӑт рӑхәԓ".