1 Имŏԓты ишән, хун Иисус и тӑхайән пойәкщәс, пӑ нŏх вŏԓымаԓ йўпийән, и утәԓтәты хуйәԓ Ԓўвеԓа йастәс: "Турәм Куща! Мўӈев пойәкщәты утәԓты, хŏты Иоанн утәԓтәты йŏхԓаԓ утәԓтәс".

2 Ԓўв щиты ԓывиԓаԓа йастәс: "Хун пойәкщәԓты, щиты пŏтәрттаты: "Турәм Ащев! Турәмән Нӑӈ уԓԓән! Нӑӈ нэмен ат йэмԓәԓ! Нӑӈ Хон Уԓәпсайэн ат йŏхәтәԓ! Нӑӈ партәпсайэн хŏты турәмән уԓ, щиты мўвән ат питәԓ;

3 Ԓэты ԋаԋэв мўӈева кашәӈ хӑтԓа мийи;

4 Мўӈ кӑрэкԓув мўӈева йŏрэмаԓән, хŏты мўӈ хŏйатԓува ԓўв артнайԓаԓ йŏрэмәԓув; атәм хўщәпсайа питты мўӈев аԓ эсԓы, ԉикәӈ ŏт эԓты хŏԓт пайты!"

5 Щӑԓта ԓывиԓаԓа йастәс: "Мӑттыки нын мӑтŏтән ԓухәс тӑйәԓ, ат кўтәпән ԓўв хŏщайәԓ йŏхәтәԓ пӑ йастәԓ: "Ԓухсыйэ, мӑнэм хуԓәм ԋаԋ, артнайа мийԓыйа,

6 пиԓхуйэм мӑнтаԓ сӑхат ма хŏщайэм хойәс, ма нэмәԓты ԓўвеԓ ԓапәтты ӑт тӑйԓәм".

7 Щитэн ов мŏхты ԓўвеԓа йастәԓ: "Мӑнема аԓ тŏрастыйа, овем йӑканән лӑп пŏтсэм, ԋаврэмԓам па ма пиԓэмән ŏԓтӑхайән уԓԓәт. Ма ӑт верәтԓәм нŏх киԓты пӑ нӑӈена ԋаԋ мӑты".

8 Нынана пŏтәртԓәм, ԓўв ԓухсәԓ урәӈән нŏх ӑт ԓойәԓ ки, пӑ ԋаԋ ԓўвеԓа, пиԓа уԓтаԓ хўватән, ӑт мӑԓ ки, щитәԓ такан вохтаԓ урәӈән, ищи пӑ нŏх киԓты вера йиԓ, мўй арат вохәԓ, щи арат ԓўвеԓа мӑԓ.

9 Ма нынана щи йастәԓәм: вохаты, пӑ мӑԓайты, кӑншаты, пӑ уйәтԓәты; ов сэӈкаԓән, пӑ пўшԓа,

10 кашәӈ ŏт, хŏй вохәԓ, мŏщатәԓ, хŏй кӑшәԓ, уйәтәԓ, ов сэкты ŏта, ов пўшԓа.

11 Мўй щимәщ ащи, хун пŏхәԓ ԓўв эԓтайәԓ ԋаԋ вохәԓ, щи йўкана кев шупән мӑԓԓы? Хун хўԓ вохәԓ, хўԓ йўкана ŏхты вой мӑԓ?

12 Мўй пӑ, карәӈ пŏшәх вохтаԓән, скорпион*Щит нўм мўв карәӈ хŏмләх ԓыйәԓән ԓощтаԓ йўпийән хŏйат, вой пӑрты верәтәԓ. нэмпи карәӈ хŏмләхән мӑԓԓы?

13 Щӑԓта, хун нын ԉик тӑйман, ԋаврэмԓәна йӑм ŏт мӑты хошԓәты, Турәм Ащи мет щи Ԓўв эԓтэԓ вохты хŏйатәта Йэмәӈ Ԓыԓ мӑԓ".

14 И пўш Иисус уӈәԓԓы пайәтты кўԉ хŏйат эԓты ким воштәсԓы. Хун кўԉ ким этәс, уӈәԓԓы хŏйат пŏтәртты питәс. Хŏйатәт туп ӑԓ пакнысысәт.

15 Тухәԓаԓ пӑ пŏтәртсәт: "Ԓўв кўԉәт веельзевул†сатана, дьявол, хиԋ; йурән воштәԓ. Щит кўԉәт ŏх".

16 Па хŏйатәт пӑ Иисус артаԓәман, Ԓўвеԓа мŏԓты пос турәм эԓты этәԓтәты партсәт.

17 Туп Ԓўв ԓыв нŏмәсԓаԓ уйәтман, йастәс: "Кашәӈ, кӑт йэшащты пелка ортәсәм хон мўв, таԓа йиԓ, пӑ хот, хŏта йэшащԓа, иԓ ӑркәпәԓ.

18 Сатана ԓыпи нŏпсәԓән кӑт щира ки уԓ, мўй щирән ԓўв хон пелкәԓ уԓты верәтәԓ? Нын пŏтәртԓәты, мӑтты Ма веельзевул йурән кўԉәт воштәԓәм;

19 Ма веельзевул йурән кўԉәт ки воштәԓәм, нын йўпанән йиты йохԓән пӑ хŏй йурән ԓывиԓаԓ воштәԓԓаԓ? Щишән ԓыв нынана сўт верты хŏйатәта питԓәт.

20 Ма Турәм йурән кўԉәт воштәԓәм ки, уйәтман Турәм Хон Уԓәпса нын хŏщайән йŏхтәс.

21 Хун йурәӈ ŏт ԉаԉәсты пŏрмасы тэԓән хотәԓ шавиԓԓы, ԓўв тащәԓ-вещәԓ нэмәԓты хŏтащ ӑт йиԓ.

22 Хун пӑ ԓўв эԓтэԓ йурәӈшәк ŏт ԉаԉәсты йŏхәтәԓ пӑ ԓўвеԓ иԓ пайәтԓәԓы, щи пŏрайән хотәӈ ху нŏмәс пŏныԓыйәм ԉаԉәсты пŏрмасԓаԓ, ԓўв эԓтэԓ нŏх уԓԓы, пӑ ԋӑрэмәм мŏԓтыԓаԓ лакки ортԓәԓы.

23 Хŏй ӑнтом Ма пиԓэмән уԓ, щит Ма йэщаԓтэм уԓ‡Ма пеԓайэм ԉик туԓ.; хŏй Ма пиԓэмән ӑт ӑкәтәԓ, щит лакки йовәԓәԓ.

24 Хун кўԉ, хŏйат эԓты ким этәԓ, йикԓы тӑхайәтән йӑӈхәԓ, щўтщәты тӑха кӑшман, пӑ ӑт уйәтман, пŏтәртәԓ: "Ма хотэма керԓәԓәм-са, хŏԉща этсәм!".

25 Йŏхԓы йŏхәттаԓән, хотәԓ нŏх йовәԓман пӑ нŏх ԓэщатман уйәтԓәԓы;

26 щӑԓта ԓўв мӑнәԓ пӑ па ԓапәт кўԉ туԓ, ԓўв эԓтэԓ мет ԉикәӈәт; ԓыв, ԓыпийа ԓŏӈман, щита уԓты питԓәт. Щиӈәԋща хŏйата оԓәӈ уԓәм эԓты мет атма йиԓ".

27 Хун Иисус щи йасӈәт йастәс, ий ими хŏйат кўт эԓты такан ўваԓтәс: "Щўԋәӈ щи аԋԏи, хŏйән Нӑӈ сэма пайәтсайән пӑ эсәмән ԓапәтсайән!".

28 Туп Ԓўв йŏхԓы йастәс: "Щўԋәӈ щит, хŏй Турәм йасәӈ хуԓәԓ пӑ щиты верәԓ!"

29 Хун хŏйатәт арән йŏхәтты питсәт, Иисус пŏтәртты питәс: "Ин тӑм уԓты мир ԉикәӈ. Ԓыв Турәм пос кӑшԓәт, туп Иона Турәм йасәӈ туты ики этәԓтыйәм пос тўмпийа, нэмәԓты Турәм пос ԓывиԓаԓа ӑт питәԓ.

30 Хŏты Иона, Нинэвия вошәӈ хŏйатәта, поса ус, щиты Хŏйат Пŏх тӑм уԓты мира поса питәԓ.

31 Нўм мўв нэ хон, сўт вертыйән, ин тӑм хŏйат рут пиԓән нŏх ԓойәԓ пӑ ԓывиԓаԓ сўтытԓәԓы, ԓўв Соломон мўтра йасӈәт хуԓәтты урәӈән, мўв кимәԓ эԓты йŏхтыԓыйәс. Ин тӑта пӑ нын пиԓәнән Щит, Хŏй Соломон эԓты вŏԓаӈшәк.

32 Нинэвия вошәӈ хŏйатәт ищи, сўт вертыйән, ин тӑм уԓты мир пиԓән нŏх ԓойԓәт, пӑ ԓывиԓаԓ сўтытԓыԓаԓ. Ԓыв Иона йастәм Турәм йасӈәт хуԓәтман, кӑрэкԓаԓ эԓты шӑшән керԓәсәт. Ин тӑта пӑ нын пиԓәнән Щит, Хŏй Иона эԓты вŏԓаӈшәк.

33 Нэмәԓты хŏйат тўт сун ўщитман, ԓўвеԓ хӑԋа тӑхайа мўй пӑ хŏшам иԓпийа ӑт омәсԓәԓы, нŏхшәк, тўт акԓа, омәсԓәԓы, ԓуԓән хота ԓŏӈты хŏйатәта нŏви ат ныса.

34 Ԓыпийән уԓты тўт сун – щит сэм; сэмԓан сыстамәт ки, эԓэн иса нŏвийән тэкәнман уԓԓа, атмәт ки – эԓэн ԓыпийән иса пӑтԓам.

35 Щишән ванта: нӑӈ ԓыпийән тӑйты нŏвен мосәӈ пӑтԓам.

36 Эԓэн нŏвийән ки тэкәнман уԓԓа пӑ нэмәԓты питы лот ӑт тӑйәԓ ки, щишән иса нŏви питәԓ, хŏты тўт сунән нӑӈ хутԓәптыԓайән".

37 Хун Ԓўв щит пŏтәртәс, и фарисей Ԓўвеԓ хотәԓа йŏхи ԓэты вохсәԓы. Иисус йŏхтәс пӑ пӑсан сурыйа опсәс.

38 Иисус ԓэты йэԓпийән йошԓаԓ ӑт ԉŏхәтсәԓы, Фарисей щит шийаԓәмаԓ кемән, пӑ ӑԓ щи пакнәс.

39 Туп Турәм Куща ԓўвеԓа йастәс: "Нын, фарисейәт, анԓән-сунԓән эԓтыԓаԓ сыстапԓәԓән, нын ԓыпиԓән аратэԓән тармәт пӑ ԉикәӈәт.

40 Ŏтшамәт! Ăнта мўй Щит, Хŏй эԓпат уԓты ŏт тыйәԓтәс, ԓыпийән уԓты ŏт ищи тыйәԓтәс?

41 Щикем ушән нўша хŏйатәта анԓәнән мўй тӑйԓәты, щит мийԓыйаты, щи пŏрайән нынана иса сыстам питәԓ.

42 Шук нынана, фарисейәт! Мята, рута пӑ арсыр эпԓәӈ тŏрән эԓты йаӈмет шупәԓ мӑԓты, вещкат пӑ Турма сӑма мосты вер эԓты пӑ пўӈԓа ўратԓәты: тӑми верты мосәс, пӑ тўми хӑйты ӑт мосәс.

43 Шук нынана, фарисейәт! Нын Турәм йасӈа утәԓтәты хотән ԓӑтәӈ тӑхайәтән омәсты сӑмәӈәт, пӑ хŏйатәт ӑктәщиты тӑхайән нын иса ат ватԓайты, ўщайән иса ат верԓайты.

44 Шук нынана, Закона утәԓтәты икет пӑ фарисейәт, нын нэмәԓты щирән ӑт постәм хӑԓа лотәт хŏрпет, хŏйатәтән, ӑт мŏштыман, эԓты шушиԓыԓайәт§Закон щирән хŏйат туп хӑԓайа, мўй пӑ хӑԓа лота, хӑнәмтыйәԓ ки, ӑнта сыстама йиԓ.".

45 Закона утәԓтәты ий ики Ԓўвеԓа йастәс: "Утәԓтәты Ху! Щиты пŏтәртман, Нӑӈ мўӈев па ԉикән этԓэн!"

46 Ԓўв йастәс: "Нынана, Закона утәԓтәты икета, па шук! Хŏйатәта ԓавәрт вер пŏнԓәты, нын пӑ и ԓуйән нэш ԓўв хŏщайэԓа ӑт хӑнәмтыԓты.

47 Шук нынана! Ащиԓәнән пӑратәм Турәм йасәӈ туты хŏйатәт урәӈән, ԓыв ӑпа лотԓаԓ хŏрән верԓәԓән.

48 Щитән нын ащиԓән верәм верәт аԉԓәты пӑ ԓыв пиԓԓаԓән кашащԓәты, ԓыв Турәм йасәӈ туты хŏйатәт пӑратсәт, нын пӑ ӑпа лотԓаԓ хŏрән верԓәԓән.

49 Щишән Турәм ŏшәӈ нŏпсәԓ йастәс: "Турәм йасәӈ туты хŏйатәт пӑ апостоләт ԓыв хŏщайэԓа китԓәм, щитәт эԓты тухәԓаԓ пӑратԓайәт, тухәԓаԓ пӑ воштыԓайәт,

50 мўйа Турәм йасәӈ туты хŏйатәт кӑԓы мӑнәԓтса, уԓты турәм тыйәԓтәм уш эԓты, щишән ин уԓты хŏйатәт эԓты щи нўр иԋщәсты питԓа,

51 Авель кӑԓы эԓты Захария кӑԓы унты, хŏй йирасты нŏрәм пӑ Турәм Хот кӑт кўтән пӑратса. Йӑна пŏтәртԓәм нынана: ин уԓты хŏйатәт эԓты мўй ус иса кӑшԓа.

52 Шук нынана, Закона утәԓтәты хŏйатәта! Нын уйәтты вер щирәԓ усԓән: нын ӑт ԓŏксәты, хŏй ԓŏӈты утщийәс, щит ӑт эсәԓԓәԓән".

53 Хун Ԓўв щит пŏтәртәс, Закона утәԓтәты хŏйатәт пӑ фарисейәт мет такан ўшмащты питсәт, Ԓўвеԓ ар вер эԓты апрәӈа иԋщәсты питсэԓ.

54 Ԓыв щиты ŏщмарәӈа каншатсәт пӑ верәтты кемеԓән мŏԓты Ԓўв эԓтэԓ мӑтты йасәӈ нŏх кӑтәԓты ўтщисәт, Ԓўвеԓ ўнавота павәттыйа.