18
Нэ эԓты пӑ сўт ики эԓты уԓты пŏтәр
1 Иисус ԓывиԓаԓа щит эԓты утәԓтәты пŏтәр пŏтәртәс, мӑтты иса пойәкщәты мосәԓ пӑ равԓы-хушԓы уԓты ӑт мосәԓ,
2 йастәман: "И вошән сўт ики ус, ԓўв Турәм эԓты ӑт пӑԓәс пӑ хŏйатәт эԓты ӑт йэԓамтыйәс.
3 Щи вошән и икиԓы хӑщәм нэ ус, пӑ ԓўв, сўт ики хŏща йŏхтыԓыман, пŏтәртәс: "Мӑнэм нўр верты хŏйат эԓты эԓт питы".
4 Туп ԓўв хўв ӑт кашащәс. Йухәт иԓта нŏпсәԓән йастәс: "Турәм эԓты ма кўш ӑт пӑԓԓәм пӑ хŏйатәт эԓты ӑт йэԓәмԓайәм,
5 туп тӑм икиԓы хӑщәм имийән рома ӑт хӑйԓайәм, ԓўвеԓ эԓт питԓэм, ԓўв мӑнэма тŏрастәтыйа ԓуԓән па ӑт aт йŏхтыԓыйәс".
6 Турәм Куща йастәс: "Хуԓԓәԓән, ӑнтом вещкат сўт ики мўй пŏтәртәԓ?
7 Турәм мўй Ԓўв пирыйәм хŏйатԓаԓ, атәԓ-хӑтәԓ Ԓўвеԓ вохты ŏтԓаԓ, эԓт ӑт питԓәԓы? Пӑр мŏԓты Ԓўв ԓывиԓаԓа ԋотәп верты рŏнәԓ?
8 Нынана пŏтәртԓәм, ԓывиԓаԓа сорайән эԓт питты щир мӑԓ. Туп Хŏйат Пŏх йŏхәттаԓән, эвәԓты вер мўвән а мўй уйәтәԓ?"
Фарисей эԓты пӑ налогәт ӑкәтты хŏйат эԓты утәԓтәты пŏтәр
9 Тухԓәт пеԓа па, хŏй ԓыв нумәссәт ԓыв тўӈа–щира уԓты хŏйатәт, пӑ па хŏйатәт ԋэрсәт, Иисус щимәщ утәԓтәты пŏтәр пŏтәртәс:
10 "Кӑт хŏйатӈән Турәм хота пойәкщәты ԓŏксәӈән: итәԓ - фарисей, киметәԓ - налог ӑкәтты ики.
11 Фарисей, утща щира ԓойман, ԓўв турмәԓән шитаман пойәкщәс: "Йэшәк Турәм! Пумащипа Нӑӈена йастәԓәм, ма ӑнта щимәщ, ӑнта па хŏйатәт хŏрпи - ԓоԓмахәт, хорахщет, пакрасԓәты ŏтәт, мўй пӑ тӑм налог ӑкәтты ики иты:
12 ԓапәт кӑт пўш вўщԓыԓәм,*вўщԓыты, щит: мŏԓты арат сыс ԓэԓԓы пӑ пойәкщәман уԓты щир; кашәӈ шитты ŏтэм эԓты, йаӈмет шупәԓ мӑԓэм".
13 Налог ӑкәтты ики пӑ, йэԓәншәк ԓойман, сэмԓаԓ турма хŏԓна нŏх аԓәмты пӑԓәс; туп мевԓәԓ хӑтщиман, пŏтәртәс: "Йэшәк Турәм, ма, кӑрэкәӈ ху, ма пелайэм йӑмен этәԓты!"
14 Нынана йастәԓәм, щит, фарисейа пŏнман, Турәмән вещката пайәтман, йŏхи мӑнәс: кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат ԓӑтәӈа пайәтԓа.
Христос ԋаврэмәт вана ўԓ
15 Иисус хŏща ай ԋаврэмәт тўтԓысайәт, Ԓўв ԋаврэмәт хŏща ԓуԓән ат хӑнәмтыйәс; утәԓтәты йохԓаԓ щит шийаԓәмеԓ кемән, ԓывиԓаԓ ӑт эсәԓты питсәԓаԓ.
16 Туп Иисус, ԋаврэмәт вана вохман, йастәс: "Ԋаврэмәт Ма хŏщайэм йŏхтыԓыты эсԓаԓән, ԓывиԓаԓ аԓ йэртԓыйаԓән, щимәщ ŏтәт урәӈән Турәм Хон Уԓәпса уԓ.
17 Йӑна нынана йастәԓәм: Турәм Хон Уԓәпсайа щит ӑт ԓŏӈәԓ, хŏй ԋаврэм иты, вана ԓўвеԓ ӑт ўԓԓы".
Тащәӈ куща
18 Щӑԓта и мӑтты кущайа уԓты ŏтән Ԓўв ищмәса: "Сӑмәӈ Утәԓтәты Ху! Мўй мӑнэм верты мосәԓ, ԓуԓән и пўша уԓты уԓәпса ат мŏщатсәм?"
19 Иисус ԓўвеԓа йастәс: "Мўйа нӑӈ Мӑнэм сӑмәӈа айәԓԓэн? Нэмәԓты ŏт ӑнта сӑмәӈ, туп Турәм утща;
20 Турәм партәпса йасӈәт уйәтԓәԓан: "Па хŏйат ими пиԓән, па хŏйат ики пиԓән аԓ пакрасԓа", "Хŏйат аԓ пӑрата", "Аԓ ԓоԓма", "Аԓ ԋаԓмийа", "Аԋԏен-ащен нумман тӑйи".
21 Ԓўв пӑ йастәс: "Тӑм иса ма ай эԓты шависэм".
22 Щит хуԓмаԓ кемән, Иисус ԓўвеԓа йастәс: "Нӑӈена па ит ӑт тӑрмәԓ: иса мўй тӑйԓән, тыныйаԓән пӑ нўша хŏйатәта ортаԓән, пӑ турәмән тащ, сорԋэт тӑйты питԓән, щӑԓта йŏхта пӑ Ма йўпемән шуша".
23 Ԓўв пӑ, щит хуԓмаԓ кемән, рўтаԉа йис, шек тащәӈ ус.
24 Иисус, ԓўв рутаԉа йўвмаԓ, шийаԓәмаԓ кемән, йастәс: "Мўй хŏрпи ԓавәрт тащәӈ хŏйата Турәм Хон Уԓәпсайа ԓŏӈты!
25 Верблюд нэмпи войа йинтуп пўв мŏхты мӑнты хŏԓна туԓшәк, тащәӈ хŏйата Турәм Хон Уԓәпсайа ԓŏӈты эԓты".
26 Щит хуԓәм мŏхет йастәсәт: "Хŏй пӑ нŏх пайтәсты верәтәԓ?"
27 Туп Ԓўв йастәс: "Хŏйатәтән ӑт верәтты щир, Турәмән верәтԓа".
Христос Турма посатты ŏт мойԓәԓԓы
28 Петра пӑ йастәс: "Тӑм, мўӈ мўй тӑйсув, иса хŏԓ хӑйсәԓув пӑ Нӑӈ йўпенән мӑтсув".
29 Ԓўв ԓывиԓаԓа йастәс: "Йӑна нынана пŏтәртԓәм: нэмәԓты хŏйат ӑнтом, хŏй хотәԓ, мўй ащеԓ-аԋԏеԓ, мўй пӑ йайԓаԓ-опиԓаԓ-апщиԓаԓ, имеԓ мўй пӑ ԋаврэмԓаԓ Турәм Хон Уԓәпса урәӈән ԓуԓән хӑйсәԓы,
30 пӑ тӑм пŏрайән мет хŏԓна аршәк ԓуԓән мŏщатәԓ, йиты пŏрайән пӑ - и пўша уԓты уԓәпса".
Христос хуԓмет пўш Ԓўв сŏрмәԓ пӑ нŏх ԓыԓәӈԓәты верәԓ эԓты йэԓпи йастәԓԓы
31 Кӑтхŏщйаӈ утәԓтәты йохԓаԓ пўӈԓа вохман, ԓывиԓаԓа йастәс: "Тӑм мўй, мўӈ Иерусалим воша мӑнԓув, пӑ щиты иса тыйәԓ, хŏты Турәм йасәӈ туты хŏйатәт сӑхат Хŏй ат Пŏх эԓты хӑшса,
32 Ԓўв Турәм ӑт уйәтты па рут мира мӑԓа, пӑ Ԓўв щӑԓта кӑмән щирән ԋэрԓа, шукатԓа пӑ пŏлщәӈән ԉакԓа,
33 пӑ хомщийән сэкты питԓа, пӑ Ԓўв пӑратԓа: хуԓмет хӑтәԓән пӑ нŏх ԓыԓәӈԓәԓ".
34 Туп утәԓтәты йохԓаԓ щит эԓты нэмәԓты ŏша ӑт пайәтсәт; щи йасӈәт ԓывиԓаԓа хӑԋа щир тӑйсәт, пӑ йастәм ŏт ԓыв ŏша ӑт пайәтсэԓ.
Христос Вартимей тўмтака верәԓ
35 Хун Ԓўв Иерихон воша ванамәс, и сэмԓы ики йуш пўӈәԓән, меԓащ†меԓащ 'милостыня' вохман, опсәс,
36 щӑԓта, ԓўв пўӈԓәԓ эԓты хŏйатәт шушты хуԓмаԓ кемән, ԓўв ищмәсԓы: "Мўй щит?"
37 Ԓўвеԓа йастәса, щит Иисус Назарет эԓты йиԓ.
38 Щи йўпийән ԓўв такан ўваԓтәс: "Иисус, Давид Пŏх! Мӑнэм щаԉиты!"
39 Оԓӈа мӑнты хŏйатәт ԓўвеԓ мӑшйайа уԓты партԓэԓ; туп ԓўв па таканшәк ўваԓтәс: "Давид Пŏх! Мӑнэм щаԉиты!"
40 Иисус иԓ ԓойәс пӑ щит Ԓўв хŏщайәԓ вана туты партсәԓы: пӑ хун щит Ԓўв хŏщайәԓ вана йŏхтәс, ԓўвеԓ ищмәсԓы :
41 "Мўй нӑӈ Ма эԓтэм ԓӑӈхаԓән? Сэмԓы ики йастәс: "Турәм Куща! Ԓуԓән сэмәӈа ат йисәм".
42 Иисус ԓўвеԓа йастәс: "Сэмәӈа ат йиԓән! Нӑӈ эвәԓты верэнән нӑӈ йӑмәԓтсайән".
43 Щӑԓта ԓўв ищи мŏхты сэмәӈа йис пӑ Ԓўв йўпеԓән мӑнәс, Турәм вŏԓаӈа айәԓтман; пӑ мир хŏԓ щит ватман, Турма ишәк йасӈәт йастәты питсәт.