1 Иисус, ӑӈкәрмәмаԓән, тащәӈ хŏйатәт мойԓәпсайәт тащ ӑкәтты ԓараща пŏнты вер шийаԓәс;

2 хŏԓна Ԓўв и нўша, икиԓы хӑщәм, ими шийаԓәс, щи ими тŏхи кӑт ԉэпта нэмпи мет ай ŏх картэӈән пŏнәс.

3 Иисус йастәс: "Йӑна нынана пŏтәртԓәм, тӑм нўша ими па хŏйатәт эԓты аршәк пŏнәс.

4 Ԓыв хŏԓ мŏԓтасԓаԓ эԓты Турма мойԓәпса пŏтсәт, ԓўв па нўшайәԓ эԓты, мўй арат тӑйәс, хŏԓ пŏтсәԓы".

5 Щӑԓта, хун тухԓәт Турәм Хот хŏрамәӈ тынәӈ кев пŏталэтән пӑ мойԓәпсайәтән хŏрамтәм эԓты пŏтәртсәт, Ԓўв йастәс:

6 "Хӑтԓәт йŏхәтԓәт, хун, мўй ин тӑта ватԓәты, и кев шўк ӑт хӑщәԓ; иса хŏԓ шўкатԓайәт".

7 Ԓўвеԓ пӑ ищмәсэԓ: "Утәԓтәты Ху! Хун пӑ щит питәԓ? Пӑ мўй сыр пос хўват мŏштәԓэв, хун щит питты верәԓ уԓ?"

8 Ԓўв йастәс: "Хурийаты, аԓт ԓэпәԓԓайты; ар ŏтәт Ма нэмемән йŏхәтԓәт, йастыман: "Щит Ма", пӑ "Щи пŏра ванән": ԓыв йўпиԓаԓән аԓ мӑнаты.

9 Хун ԉаԉәт пӑ ўшмащты верәт эԓты хуԓԓәты, пӑԉщәма аԓ ўйаԓән, тӑм вера оԓәӈән уԓты мосәԓ, туп ӑнта щи пўԉаӈ хŏԓаԓа".

10 Щи пŏрайән ԓывиԓаԓа йастәс: "И сыр мир па сыр мир пеԓа ԉаԉәсты питщәԓ, и хон пеләк кимет хон пеләк пеԓа ԉаԉәсты питщәԓ;

11 ар тӑхайән мўв такан тӑрийты щирәт питԓәт, ԓэԓԓы пŏрайәт, пӑ атәм мушәт питԓәт, пӑ пӑԓщәмәт, пӑ турәм эԓты вŏԓаӈ посәт питԓәт.

12 Щитәт йэԓпийән, нын иԓ катәԓтты питԓайты пӑ ԋўхәтԓыты питԓайты, Турәм йасӈа утәԓтәты хотәта, касна хотәта мӑты питԓайты, хонәта пӑ рим йохәтән пŏнәм кущайәта Ма нэмем урәӈән туты питԓайты;

13 щит нынана Ма эԓтэм вещкат йасәӈ туты вер питәԓ.

14 Щиӈәԋща, сӑмԓәна пŏнаԓән: оԓӈа ӑт мосәԓ нумәсты, мўй щирән йŏхԓы йастәты,

15 Ма нынана щимәщ йасӈәт пӑ ŏш мӑԓәм, нын йэщаԓтән эԓԓәты ŏтԓән йŏхԓы йастәты пӑ йэщаԓт ԓойты ӑт верәтԓәт.

16 Нын хŏԓна ащиԓәнән-аԋԏиԓәнән , йайԓәнән-апщиԓәнән, пӑ па рутԓәнән, пиԓйохԓәнән эԓпа аԉԓайты, пӑ нын эԓтан тухәԓԓән пӑратԓайәт;

17 пӑ Ма нэмем урәӈән хŏйатәтән хŏԓ нын ԉикән этты питԓайты,

18 туп и ŏхсŏхийэ хŏԓна ŏхԓән эԓты ӑт ушәԓ, -

19 верәтты щирԓәнән нын ԓыԓԓән этәԓтаԓән.

20 Хун пӑ Иерусалим вош ԉаԉ йохәтән лӑп кертәм шийаԓәԓты, щи пŏрайән уйтаты, ԓўв таԓа йиты пŏрайәԓ вана йŏхтәс:

21 щи пŏрайән Иудея мўвән уԓты хŏйатәт кев ԓоӈԓа ат хухәԓԓәт; хŏй вошән уԓ, ким ат этәԓ, хŏй вош ԉэпән уԓ, ԓыпийа ӑт ат ԓŏӈәԓ,

22 щит йŏхԓы сŏхәптәты хӑтԓәт, хӑншәм ŏтәт хŏԓ йӑнәмԓәт.

23 Щи имета шук питәԓ, хŏй щи хӑтԓәтән ԋаврэм щирән уԓ пӑ ԋаврэм эсәмән ԓапәтәԓ; вŏԓаӈ шук мўва йŏхәтәԓ, пӑ ун ԉик тӑм мира нумәԓта питәԓ:

24 щӑԓта аԓты кеши йэтәԓ эԓты рыйты питԓәт, мўв ԓŏватән уԓты мирәта ԋӑрэмәман туԓайәт; Иерусалим вош пӑ Турәм ӑт уйәтты па рут мирәтән пурәтты питԓа, пŏрайэԓ хŏԓаты унты.

25 Хӑтәԓ, тыԓәщ пӑ хусәт хŏща Турәм посәт этԓыты питԓәт, мўв хŏща пӑ ар сыр мир туп ӑԓ пакнысыԓәт щарәс сыйащты эԓты пӑ овитаԓ-хўплытаԓ эԓты;

26 пӑԓщәм эԓты пӑ уԓты–омәсты мўва йиты шукәӈ верәт эԓты хŏйатәт рэԋԓы керыԓәт, турәм хусәт, тыԓщәт ԋŏхԓәԓәт.

27 Щӑԓта щи пŏрайән ԓыв Хŏйат Пŏх шийаԓәԓәт, пӑԓәӈән йурәԓ пиԓән пӑ вŏԓаӈ хутԓәты–вŏрԓәты щирәԓән йŏхәтәԓ.

28 Хун пӑ щи верәт йӑнәмты питԓәт, щи пŏрайән нŏх ԓойаты пӑ ŏхԓән нŏх аԓмаԓән, нын хŏԓт пайтәсты верән вана йŏхтәс".

29 Щӑԓта Иисус ԓывиԓаԓа утәԓтәты пŏтәр пŏтәртәс: "Смоква йўх пеԓа пӑ па йўхәт пеԓа ӑӈкәрматы:

30 хун ԓыв шўвԓаԓ пел пўншащтэԓ пŏрайән, щит пеԓа ватман, нын уйәтԓәԓән, йэшавуԓ ԓўӈ пŏра йŏхәтәԓ.

31 И щиты нын па, хун щи питты верәт шийаԓәԓты, уйтаты, Турәм Хон Уԓәпса ванән уԓ.

32 Йӑна нынана пŏтәртԓәм: ин тӑм хŏйат рут хŏԓна ӑт хŏԓаԓ, тӑм иса уԓты питтаԓән;

33 турәм пӑ мўв хŏԓт пеԓа хŏԓаԓәт, Ма йасәӈԓам йурԓаԓ ӑт хŏԓаԓәт.

34 Нынәԓән нын вантаԓән, сӑмԓән, охла-щохла ԓэвман-йищман пӑ тӑйтаӈ уԓәпса эԓты нумәсман, ӑт аԓ ԓавәртамәсайәт пӑ щи хӑтәԓән шӑӈкап ӑт аԓ йŏхәтԓайты,

35 щи хӑтәԓ, мўвән уԓты кашәӈ ŏта, хоԓәп иты, лӑп лопкәԓ.

36 Щиӈәԋща кашәӈ сыс эԓәпән уԓаты пӑ пойәкщаты, ԓуԓән нын щи питты верәт эԓты шаващты пӑ Хŏйат Пŏх йэщаԓт ԓойты ат верәтсәты".

37 Хӑтԓәԓән Ԓўв Турәм Хотән хŏйатәт утәԓтәс, атәтән па, вош ким пелка этман, Элеон нэмпи кев пай ԓоӈәԓән ус.

38 Хŏйатәт хŏԓ аԓәӈсӑхат эԓты Ԓўв хŏщайәԓ Турәм Хота йŏхтыԓысәт, Ԓўвеԓ хуԓәтты.