1 Munhu yoyose yotogola kamba Yesu ayo Kilisito munhu ayo mwana wa Imulungu. Munhu yomnogela tata munhu, vivija komnogela na imwana. 2 Vino avo vitujuwa kamba towanogela wana wa Imulungu, kwa kumnogela Imulungu na kugagoga malagizo gake. 3 Kwavija kumnogela Imulungu ako kugagoga malagizo gake. Na malagizo gake gabuha, 4 kwavija kila yeli mwana wa Imulungu kodaha kuihuma isi. Vino avo vituihuma isi kwa kumtamanila kwetu Imulungu. 5 Vino nani yodaha kuihuma isi? Ni munhu ija yaiyeka yomtogola Yesu Kilisito kamba Mwana wa Imulungu.

6 Yesu Kilisito ayo yezile kwa mazi na kwa damu ya kufa kwake. Hezile kwa mazi gaiyeka ila keza kwa mazi na kwa damu. Nayo Loho kolonga kweli, kwavija Loho awo ukweli. 7 Avo wa kuko wadatu osindila. 8 Loho wa Imulungu na mazi na damu na wano wose wadatu oitogolela. 9 Tobokela usindila wa wanhu, lakini usindila wa Imulungu ubanza ng'hani, na kasindila vino mbuli ya Mwanage. 10 Munhu yoyose yomtogola Mwana wa Imulungu kanao usindila awo mgati yake, lakini munhu yoleka kumtogola Imulungu kamtenda mvizi, kwavija hautogole usindila uyalongile Imulungu mbuli ya Mwanage. 11 Na uno awo usindila, Imulungu katugwelela ugima wa milele, na ugima awo wa mna Imwanage. 12 Munhu yoyose yeli na Mwana wa Imulungu kanao ugima awo, munhu yelibule Mwana wa Imulungu kabule ugima awo.

13 Nowandikila mbuli zino, mweye mumtogole Mwana wa Imulungu, ili mujuwe kamba munao ugima wa milele. 14 Na siye hatudumba kumgendela Imulungu, kwavija tojuwa twahampula kinhu chochose kamba viyolonda, kotutegeleza. 15 Avo tojuwa kamba heyo kotutegeleza twahampula kinhu chochose, vivija tojuwa kamba katugwaa kija kitumpulile.

16 Munhu yahamona ndugu yake katenda nzambi haimgala mwiiifa, yampulile kwa Imulungu nayo Imulungu komgwelela ugima. Nolonga mbuli ino kwa awo watendile nzambi haimgala munhu mwiiifa. Lakini kuna nzambi yomgala munhu mwiiifa, na niye silonga kamba mumpulile kwa Imulungu.

17 Ubananzi wowose wihile mgameso ga Imulungu ni nzambi, lakini kuna nzambi haimgala munhu mwiiifa.

18 Tojuwa awo weli wana wa Imulungu hawagendelela kutenda nzambi, kwavija Mwana wa Imulungu kowalolesa, na ija Imdumuka hadaha kuwalumiza.

19 Tojuwa kamba siye twa wana wa Imulungu na wanhu wose wayagwe mwiisi otawaligwa na ija Imdumuka.

20 Vivija tojuwa kamba Mwana wa Imulungu keza, katutenda tumjuwe Imulungu wa kweli, tukale mna ukuilumba na Imulungu wa kweli, mna ukuilumba na mwanage, Yesu Kilisito. Heyo yuyo Imulungu wa kweli na yuyo ugima wa milele.

21 Wanangu, muiteganye sikumuvitambikile vinyago.