1 Vigabitile gago, Abisalomu kapata mtuka ubululigwa na falasi na wanhu malongo matano wakumulongolela. 2 Abisalomu kakala yolamuka ulukwili kachola kwima mwiinzila ichola kuna ulwivi lwa buga. Munhu yoyose yeli na usemi kolonda yaugale kwa mndewa ili yapate kitala cha usemi awo, Abisalomu komkema munhu ayo na kumuuza, “Kolawa buga gani?” Kamba munhu iyo yahamulongela kolawa buga dimoja da kabila da Izilaeli, 3 abaho Abisalomu komulongela, “Kolondigwa upate haki muusemi wako, lakini habule munhu yasaguligwe na mndewa kukutegeleza.” 4 Abisalomu kagendelela kulonga, “Kamba niye nahakuwile msemi wa Izilaeli, kila munhu yeli na usemi hebu kitala nahamgwelele haki yake”

5 Munhu yoyose yahamkwesela behi Abisalomu ili yamfugamile, Abisalomu komwinula na komfagatila na komnonela. 6 Avo, ivo viyakalile yowatendela wanhu wose wa Izilaeli wezile kugala usemi kwa mndewa. Abisalomu kwa kutenda avo Waizilaeli wamnogela heyo kubanza mndewa Daudi.

7 Viibitile miyaka mine, Abisalomu kamulongela mndewa, “Chonde nhogolela nichole Hebuloni nikasegese nduwilo yangu iniiduwile kwa Mndewa Imulungu. 8 Kwavija, niye msang'hanaji wako, vinikalile kuja Geshuli mwiisi ya Alamu, niiduwila nilonga, ‘Kamba Mndewa Imulungu konibweza Yelusalemu nomtambikila heyo ako Hebuloni.’ ”

9 Mndewa Daudi kamulongela, “Genda kwa tindiwalo.” Avo kachola Hebuloni.

10 Lakini Abisalomu kagala usenga kinyelegezi mna gamakabila gose ga Izilaeli, wawalongela, “Mwahahulika mhalati yolila mulonge, ‘Abisalomu kawa mndewa ako Hebuloni.’ ” 11 Wanhu magana mabili kulawa Yelusalemu wailongoza na Abisalomu wakala wagonekigwe kamba wageni. Na hewo wachola bila kujuwa choni kigendelela. 12 Kipindi Abisalomu kolava nhosa, katuma usenga kwa Ahitofeli wa buga da Gilo, yakalile yomgwaa magesa mndewa Daudi. Uhindulo wa Abisalomu ugendelela kupata nguvu na wanhu wagendelela kuilumba na heyo.

13 Msenga imoja kachola kwa Daudi kumulongela, “Wanhu wa Izilaeli oilumba na Abisalomu.”

14 Avo, Daudi kawalongela wasang'hanaji zake yakalile nao Yelusalemu, “Inukeni tukimbile kamba hatukimbila hatudaha kulawa mmakono ga Abisalomu. Tulopoleni kusegela ili sambi yatuvamile siye na kudibananga buga jetu.”

15 Wasang'hanaji zake wamulongela, “Go mndewa wetu, siye wasang'hanaji zako tuitanda kwa chochose chonda utulongele.”

16 Avo mndewa kasegela hamoja na wanhu wa mng'anda mmwake, lakini kawaleka watumwa wa kitwanzi longo wakalile kamba wehe zake ili wailolese ng'anda. 17 Mndewa kasegela, na wanhu wamkweleleza, lakini wema kidogo viwavikile ng'anda ya uhelelo wa buga. 18 Wasang'hanaji wose wa mndewa, Wakeleti wose, Wapeleti wose na Wagiti magana sita wakalile omkweleleza mndewa Daudi kulawa buga da Gati walongola.

19 Abaho mndewa viyamone Itai, Mgiti, kamulongela, “Habali na gweye kwiza hamoja na siye? Bwela ukakale na ayo imndewa mbwanga, kwavija gweye kuno kwa munhu baki, vivija kwa munhu ukimbile ukayako. 20 Gweye kwiza juzi juzi habali nikugaze nikutende munhu wa kutanga tanga hamoja na siye, hata kunichola sikujuwa? Bwela hamoja na ndugu zako, Imulungu yakulagusile unogelwa na kutamanilwa.”

21 Lakini Itai kamwidika mndewa, “Kamba Mndewa Imulungu viyokala na kamba mndewa wangu viyokala, hohose mndewa wangu honda yawe, na niye msang'hanaji wako baho honda niwe, iwe muugima hebu mwiiifa.”

22 Avo, Daudi kamulongela Itai, “Longola ugendelele kumwande.” Avo, Itai, Mgiti kalongola hamoja na wakalizi wose na wanage iyakalile nao.

23 Daudi viyakalile yobita hamoja na wanhu zake, wanhu wose wa buga ajo walila kwa sauti. Daudi hamoja na wanhu zake waloka kizanda cha Kidoloni, walongozela kuluwala.

24 Mulava nhosa Abiatali kalawa, na mulava nhosa Sadoki kalawa hamoja na Walawi wose wadipapa Sanduku da lagano da Imulungu. Wadika hasi mbaka wanhu wose viweshilize kubita kulawa Yelusalemu.

25 Mndewa kamulongela Sadoki, “Dibweze sanduku da lagano da Imulungu mdibuga, kamba Mndewa Imulungu konhogolela, konibweza na nojona kabili sanduku da lagano na hema jake. 26 Lakini kamba Mndewa Imulungu hanogeligwe na niye, na yanhende chochose choona kumwake kinoga.”

27 Abaho mndewa kamulongela Sadoki, “Bweleni kudibuga kwa tindiwalo, mweye hamoja na wanenu, Ahimaasi mwanago gweye na Yonatani mwanage Abiatali. 28 Lakini noubeta usenga hana diloko da kiwala vonda univikile kulawa kumwenu. 29 Avo Sadoki na Abiatali wadibweza sanduku da lagano da Imulungu mdibuga da Yelusalemu, na hewo wakala kuko.”

30 Lakini Daudi kagendelela kukwela lugongo lwa Mizeituni kuno kolila, kabule vilatu mmagulu na kuno kagubika pala jake, na wanhu wose wakalile hamoja na heyo wagubika mapala gao na wakala olila. 31 Kipindi acho, Daudi kalongeligwa hata Ahitofeli kakala imoja ya wanhu wamuhinduke na kuilumba na Abisalomu. Lakini Daudi kapula kalonga, “Go Mndewa Imulungu nokupula gatende magesa ga Ahitofeli gawe ubozi.”

32 Daudi viyavikile kuna inhembeti ya lugongo, hanhu hakumtambikila Imulungu, munhu imoja kulawa mwiisi ya Aliki, twaga jake Hushai kachola kumbokela, viwalo vake vikala videgeke na kudipala jake kakala na mitimbwisi kulagusa kakala na usungu. 33 Daudi kamulongela, “Kamba wahachola na niye kokuwa mzigo kumwangu. 34 Lakini wahabwela kudibuga, na kumulongela Abisalomu, ‘Nokuwa msang'hanaji wako go mndewa, kamba vinikalile msang'hanaji kwa tatako,’ Aho kogatenda magesa ga Ahitofeli gahumwe. 35 Walava nhosa Sadoki na Abiatali wahamoja na gweye kudibuga. Avo, chochose chonda uhulike kulawa mwiing'anda ya mndewa uwalongele walava nhosa Sadoki na Abiatali. 36 Wanao wabili, Ahimaasi mwanage Sadoki na Yonatani mwanage Abiatali, wahamoja na hewo. Mbuli yoyose yonda uhulike ungalile kubitila hewo.”

37 Avo, Hushai mbwiga wa mndewa Daudi, kabwela kudibuga kipindi Abisalomu viyakalile kokwingila Yelusalemu.