2
Kwiza kwa Loho Yang'alile
1 Siku da Pentekoste vidivikile, wanhu wose wamtogole Yesu wakala waiting'hane hamoja. 2 Bahaja wanhu wahulika kinhu chobuma kulawa kuulanga kiigalile na beho kulu dibuma, kinhu acho kiimemeza ng'anda yose iwakalile wanhu awo. 3 Baho ona vinhu viigalile na lambi da moto, vipwililika na kumkwasa kila munhu yakalile aho. 4 Wanhu wose wamemezigwa Loho Yang'alile na wasonga kulonga kwa ulonzi uyagwe, kamba Loho viyawadahize kulonga.
5 Ako Yelusalemu kukala na Wayahudi omdumba Imulungu, walawile kila hanhu mwiisi yose. 6 Viwazihulike nyangi azo, lunhu mkulu luiting'hana hamoja. Wanhu wose wakanganya, kwavija kila munhu kahulika wanhu wamtogole Yesu olonga kwa ulonzi wake mwenyego. 7 Wakanganya ng'hani na kulonga, “Wanhu wose wano olonga, ni wenekae wa Galilaya. 8 Yokuwaze kabili, kila imoja wetu kowahulika olonga kwa ulonzi wake mwenyego? 9 Wayagwe vitwili olawa Palitiya na Mediya na Elama, kulawa Mesopotamia, Yudea na Kapadokia, kulawa Ponto na Asiya, 10 kulawa Fulugia na Pamfulia, kulawa Misili na banzi za Libiya behi na Kilene. Wayagwe wetu walawa Lumi, 11 Wayahudi na wanhu wengile dini ya Kiyahudi, na wayagwe wetu olawa Kilete na Alabiya lakini kila imoja wetu kowahulika olonga mbuli ng'hulu ziyatendile Imulungu kwa ulonzi wa kumwetu!” 12 Wose wakanganya na kwazanywa, waiuza, “Mbuli ino fambulo jake choni?”
13 Lakini wanhu wayagwe wawageweza, walonga, “Wanhu wano wakoligwa!”
Usenga wa Petulo kwa wanhu
14 Abaho Petulo kema hamoja na watumigwa longo na imoja na kwa sauti ng'hulu kasonga kululongela ulunhu, “Mbwiga zangu Wayahudi na mweye mose mukalaga isi ya Yelusalemu, nhegelezeni niwalongele fambulo da mbuli zino. 15 Wanhu wano hawakoligwe, kamba vimugelegeza, sambi saa ndatu ya imitondo. 16 Lakini, gano gago gayalongile mtula ndagu wa Imulungu Yoeli,
17 Imulungu kolonga, ‘Vino vivo vondanhende mna isiku ya uhelelo,
Nomgidila kila munhu Loho yangu.
Wanenu wa kimbigalo na wa kitwanzi olagula mbuli zangu,
wabwanga zenu olagusiligwa vinhu na Imulungu,
wavele wenu olota nzozi.
18 Ona, hata wasang'hanaji zangu wose wa kitwanzi na wa kimbigalo,
nowagidila Loho yangu mna izisiku azo,
na wao olagula.
19 Notenda unzonza kuulanga
na vilaguso mwiisi.
Hokuwa na damu, moto na yosi,
20 Zuwa dogeligwa ziza,
mbalamwezi yokuwa dung'hu kamba damu,
ing'hali hainavika siku ija ng'hulu ya kwiza kwa Mndewa.
21 Abaho, munhu yoyose yompula Mndewa kwa kutazigwa kokomboligwa.’ ”
22 “Wanhu wa Izilaeli! Tegelezeni mbuli zino, Yesu wa Nazaleti kakala munhu wa udahi na kalagusigwa kumwenu kwa unzonza na vilaguso viyatendile Imulungu kubitila kumwake. Mweye wenyego muijuwa mbuli ino kwavija ilawilila bahano hamwenu. 23 Toka mwaka Imulungu kajuwa na kalonda mweye mumgoge Yesu na mweye mumkoma kwa kuwaleka wanhu otenda nzambi wamuwambe mumsalaba. 24 Lakini Imulungu kamzilibula kulawa kwa wafile, kamulekesa kulawa muusungu wa ifa, kwavija havidahike ifa imwike mkifungo. 25 Kwavija Daudi kalonga mbuli yake,
‘Nimona Mndewa ka haulongozi wangu siku zose,
kahabehi yangu, na niye sigwaya bule.
26 Avo niye nodeng'helela,
na lulimi lwangu lolonga kwa kudeng'helela,
na lukuli lwangu lokala kwa kutamanila,
27 kwavija gweye Imulungu honda undeke kowochola wanhu wafile,
honda umuleke mtumigwa wako yang'alile yole mdipanga.
28 Kundagusila nzila ilongoza muugima,
nimema deng'ho kwavija kwa hamoja na niye.’ ”
29 “Ndugu zangu, nolondigwa nonge fulu ipile kamba muhenga wetu mkulu Daudi yajuwike ng'hani. Kafa, kazikigwa, na mbaka lelo panga jake dabahano hamwetu. 30 Kwavija kakala mtula ndagu wa Imulungu, kakijuwa kija kiyalongile Imulungu, Imulungu kamulongela kwa kuiduwila kamba yahamtendile munhu imoja kulawa mulukolo lwa Daudi yawe Mndewa kamba viyakalile heyo. 31 Daudi kagona gonda yatende Imulungu, avo kasimulila mbuli ya kuzilibuka kwa Kilisito Mkombola viyalongile,
‘Halekigwe kuwochola wanhu wafile,
lukuli lwake halwolile mdipanga.’
32 Imulungu kamzilibula ino Yesu, na siye wao tuyone mbuli ayo na towapetela mweye. 33 Kazilibuligwa na kwikigwa muukulu mwambu wa mkono wa kudila wa Imulungu Tatake, na kambokela Loho Yang'alile, kamba viyalongeligwe. Kino kimona na kuhulika ayo Loho iyatugidile Yesu. 34 Kwavija Daudi hagaligwe kuulanga, lakini kalonga,
‘Mndewa kamulongela Mndewa wangu,
Kala hano muukulu mwambu wangu wa mkono wa kudila
35 mbaka niwatende wanhu wakwihile kamba kigoda cha kwikila magulu gako.’
36 “Wanhu wose wa Izilaeli molondigwa mujuwe kamba ino Yesu, yummuwambile mumsalaba, Imulungu kamtenda Mndewa na Kilisito Mkombola!”
37 Wanhu viwahulike vivo, wasomigwa mmizoyo na wamulongela Petulo na watumigwa wayagwe, “Ndugu zetu, lelo tutende choni?”
38 Petulo kawalongela, “Kila imoja wenu kolondigwa yaleke nzambi na yabatizigwe kwa twaga da Yesu Kilisito, na Imulungu kozigela kumgongo nzambi zenu na mobokela Loho Yang'alile yeli nhunza. 39 Kwavija lagano da Imulungu ditendigwa mbuli yenu na mbuli ya wanenu, na wose wali mmatali na Mndewa Imulungu wetu kowakema kumwake.”
40 Petulo kawalongela mbuli nyingi na kwa kuwazuma kalonga, “Ihonyeni wenyego kulawa mna inhaguso yonda ize ya wanhu wa lukolo luno wihile!” 41 Wanhu wengi wazitogola mbuli zake na wabatizigwa, wanhu gana malongo madatu ongezeka mkibumbila siku dijo. 42 Wagendelela kufundizigwa na watumigwa, wakala kimbwiga na kuja gate hamoja na kumpula Imulungu.
Wanhu wamtogole Yesu viwakalile okala
43 Mbuli nyingi za unzonza na vilaguso zikala zitendigwa na watumigwa, na kila munhu kengila bwembwe. 44 Wanhu wose wamtogole Yesu wagendelela kukala hamoja na kuigolela vinhu vao. 45 Wakala ochuuza migunda na vinhu viwakalile navo na kuigolela zisente kwa kila munhu viyalondile. 46 Wagendelela kuiting'hana Mng'anda ya Imulungu kila siku, wakala oja hamoja mzikae zao, waja kwa kudeng'helela na kwa moyo uholile, 47 kuno omtogola Imulungu, na wanhu wose wawanogela. Kila siku wanhu wamtogole Yesu ongezigwa na Mndewa mdibumbila jao.