4
Petulo na Yohana ogaligwa mkitala cha Wayahudi
1 Petulo na Yohana viwakalile wang'hali olonga na wanhu, walava nhosa, wakulu wa wakalizi wa Ng'anda ya Imulungu, na Masadukayo wayagwe wavika. 2 Wagevuzika ng'hani kwavija watumigwa wao wabili wakala owafundiza wanhu kuwa Yesu kazilibuka kwa wafile, na ino ilagusa kamba wafile ozilibuka. 3 Avo wawagoga na kuwagodeka mkifungo mbaka imitondo yake, kwavija zuwa dikala dihongile. 4 Lakini wanhu wengi wauhulike usenga watogola, na wambigalo ongezeka mbaka gana malongo matano.
5 Siku diyagwe wakulu wa Wayahudi, wavele, na wafundiza Malagizo ga Musa waiting'hana Yelusalemu. 6 Waiting'hana na Anasi mulava nhosa mkulu, na Kayafa na Yohana na Alekizanda, na wanhu wayagwe wa lubuga lwa mulava nhosa mkulu. 7 Waweka Petulo na Yohana haulongozi wao, wawauza, “Vino mweye mutendaze? Nguvu gani yumpatile hebu mosang'hana kwa twaga da nani?”
8 Petulo kuno kamema Loho Yang'alile, kawedika, “Vilongozi wa wanhu na wavele! 9 Kamba lelo touzigwa mbuli ya kija kinogile kitendigwe kwa munhu mbetembete magulu na vija viyahonyigwe, 10 avo molondigwa mose mujuwe, na wanhu wose wa Izilaeli mujuwe, kamba munhu ino yemile haulongozi wenu kahona kwa twaga da Yesu Kilisito wa Nazaleti, ayo yummuwambile mumsalaba na Imulungu kamzilibula kulawa kwa wafile. 11 Yesu iyo yolongigwa mna Gamaandiko Gang'alile,
‘Dibwe dilemigwe na mweye wazengaji
digalamuka dibwe da kutamanila kubanza gose.’
12 Ukombola haupatikana kwa munhu yoyose iyagwe, kwavija mwiisi yose kuduhu twaga diyagwe diyatugwee Imulungu donda tukomboligwe wa dijo.”
13 Wakulu wa mkitala wakanganya kona vija Petulo na Yohana viwagangamale, kwavija wawajuwa kamba hawaifunzile ubala wowose. Abaho wajuwa kamba wakala mbwiga zake Yesu. 14 Lakini viwamone munhu ayo yahonyigwe kema hamoja na Petulo na Yohana, hawadahile kulonga mbuli. 15 Avo wawalongela walawe mdigati da ikitala, abaho wakulu wa mkitala wasonga kuilongela wenyego. 16 Wakulu wa mkitala waiuza, “Tuwatende choni wanhu wano? Kila munhu mwiisi ya Yelusalemu kojuwa kamba unzonza uno mkulu utendigwa na hewo, na siye hatudaha kuibela bule mbuli ino. 17 Lakini kutenda mbuli ino sikuibwililike ng'hani kwa wanhu, leka tuwazume wanhu wano waleke kulonga kwa munhu yoyose kwa twaga da Yesu.”
18 Avo wawakema kabili mng'anda, wawazuma sikuwalonge hebu kufundiza kwa twaga da Yesu. 19 Lakini Petulo na Yohana wawedika, “Mweye wenyego taguseni choni kinogile mgameso ga Imulungu, kuwategeleza mweye hebu kumtegeleza Imulungu. 20 Kwavija hatudaha kuleka kulonga kija kituwone na tukihulike siye wenyego.” 21 Avo wanhu wa mkitala wawazuma ng'hani abaho wawalekesa. Hawadahile kuwatagusa, kwavija wanhu wose wakala omgwaa nhogolwa Imulungu mbuli ya kija kilawilile. 22 Munhu yatendiligwe unzonza uno wa kuhonyigwa kakala na miyaka kubanza malongo mane.
Wanhu wamtogole Yesu ompula Imulungu yawagangamize
23 Bahaja Petulo na Yohana viwalekesigwe, wabwela kuna ikibumbila chao na kuwalongela kija kilongigwe na wakulu wa walava nhosa na wavele. 24 Wanhu wamtogole Yesu viwahulike avo, wailumba hamoja mna ukumpula Imulungu, walonga, “Mndewa gweye kuumba ulanga, isi, bahali na vose vili mgati mmwake! 25 Kulonga kubitila muhenga wetu Daudi, mtumigwa wako, kwa udahi wa Loho Yang'alile. Viyalongile,
‘Habali wanhu wa mwiisi yose wagevuzika?
Habali wanhu okala kiseto cha kibozi?
26 Wandewa wa mwiisi waitanda wenyego,
vilongozi waiting'hana hamoja
kumbiduka Mndewa na Mkombola ayo yaamsagule.’
27 Kwavija Helode na Pontio Pilato waiting'hana hamoja mna idibuga dino da wanhu haweli Wayahudi na wanhu wa Izilaeli kumbiduka Yesu, Mtumigwa wako Yang'alile, Kilisito Mkombola yuumsagule. 28 Watenda mbuli zija ziulondile toka mwaka zilawilile kwa udahi wako. 29 Sambi, gweye Mndewa, ulole mbuli zao za kugela bwembwe ziwatendile. Tutaze siye wasang'hanaji zako sikutudumbe kuwapetela wanhu usenga wako. 30 Golosa mkono wako uwahonye wanhu. Tenda vifukuzi na unzonza kwa twaga da Yesu mtumigwa wako yang'alile.”
31 Viwamambukize kumpula Imulungu, aho hawakalile waiting'hane hatigisika. Wose wamemezigwa Loho Yang'alile na wagendelela kuwapetela wanhu usenga wa Imulungu bila kudumba.
Wanhu wamtogole Yesu okala kamba wanhu wa lubuga lumoja
32 Kibumbila cha wanhu wamtogole Yesu wakala na moyo umoja. Kuduhu imoja wao yalongile vija viyakalile navo vikala vake, lakini waigolela na wayao kila kinhu kiwakalile nacho. 33 Watumigwa wawapetela wanhu mbuli ya kuzilibuka kwa Mndewa Yesu kwa nguvu ng'hulu, na Imulungu kawagwaa wanhu ng'hekewa ng'hani. 34 Kukala kuduhu munhu yoyose mkibumbila yakalile bila kinhu. Wanhu wayagwe wakalile na migunda hebu ng'anda wakala ochuuza, na kugala zisente ziwapatile, 35 na wawagwaa watumigwa, na zisente izo zigoligwa kwa kila munhu kamba viyalondile.
36 Kukala na Mulawi imoja twaga jake Yusufu, mwenekae wa Kupulo, ayo watumigwa wamkema Balinaba, fambulo jake, “Munhu yogangamiza wanhu,” 37 kachuuza mgunda wake, kawagwaa zisente watumigwa.