1 Mweye wana, wategelezeni tata zenu na mama zenu kamba viilondigwa kwa wanhu wa Kilisito, kwavija mbuli ayo inoga. 2 “Wategeleze tatako na mamako,” dino dijo lagizo da ichanduso dili na nhunza, 3 “Muladi ukale goya na ukale siku nyingi mwiisi.”

4 Na mweye kina tata sikumuwagevuze wanenu ila waleleni goya na wafundizeni mafundizo ga Kilisito.

5 Watumwa wategelezeni wakulu zenu kwa kudumba na kugwaya, tendeni avo kwa moyo unogile kamba vija momsang'hanila Kilisito. 6 Tendeni vivo siyo mna ikipindi wao owalola ili wawatogole, lakini sang'haneni kwa moyo umoja kamba viyolonda Imulungu kwavija mweye mwa wasang'hanaji wa Kilisito. 7 Mutogole kusang'hana kwa kuwamba mbuli ya Mndewa na siyo mbuli ya wanhu. 8 Kumbukeni kuwa, Mndewa komgwaa nhunza munhu yoyose, yawe mtumwa hebu kakomboligwa mbuli ya sang'hano yake inogile.

9 Na mweye iwakulu, vivija watendeleni ganogile watumwa zenu, sikumulonge kwa kukomhoka. Kumbukeni kuwa mweye vivija kamba wao, mnayo Mndewa iija kuulanga, nayo habagula munhu.

10 Kisigale, nowapula mugangamale kwa kuilumba na Mndewa na kwa kutazigwa na udahi wake. 11 Soleni silaha zose zilondigwa kwa kuitowela ziyowagwaa Imulungu mudahe kuuhuma ubala wihile wa Mwenembago. 12 Kwavija siye hatuitowa na wanhu ila toitowa na nguvu za loho zihile zili kuulanga, toitowa na watawala na wakulu weli na nguvu, otawala isi imemile ziza. 13 Kwa mbuli ayo soleni silaha zose zilondigwa kwa kuitowela ziyowagwaa Imulungu ili yahavika siku ija ya gehile mudahe kuzihuma nguvu za ija yamwihileni, mwahaitowa mbaka kuuhelelo mokuwa mung'hali na nguvu.

14 Avo muitande goya na ukweli uwe kamba mkwiji mvigudi venu, na kutenda goyolonda Imulungu kamba kiwalo cha zuma cha kukimila mmhambaga zenu, 15 musulukile kuwapetela wanhu Mbuli Inogile kamba vilatu mmagulu genu. 16 Kipindi chose acho, mumtamanile Imulungu kamba ngao, ili mudahe kuizima misale ikwaka ipigisigwa na ija Imdumuka. 17 Ubokeleni ukombola kamba kofiya da kuvala mdipala, na Mbuli ya Imulungu iwe kamba panga dimugweleligwe na Loho Yang'alile. 18 Siku zose mpuleni Imulungu yawataze. Mpuleni Imulungu kipindi chose, kwa kulongozigwa na Loho. Kwa mbuli ino muiteganye sikumubwele kuchugu, siku zose wapulileni wanhu wose wa Imulungu. 19 Vivija nipulileni na niye, Imulungu yanigwee mbuli ya kulonga, ili nidahe kuwalongela wanhu kinhu kifisigwe cha mna Imbuli Inogile bila kudumba. 20 Niye na msenga wa Mbuli ino Inogile, hamoja sambi na mkifungo. Mnipulile nidahe kulonga Mbuli Inogile inilondigwa bila kudumba.

21 Ndugu yangu Tukiko inimnogela na msang'hanaji yomtamanila Imulungu mwiisang'hano ya Mndewa, kowalongela mbuli zangu zose, ili mujuwe kija kinhenda. 22 Lekaavo nomtuma kumwenu yawalongele mbuli zetu, na yawagangamize.

23 Imulungu Tata na Mndewa Yesu Kilisito wawagwee wanhu wose wamtogole Yesu tindiwalo na unogelwa kwa kutamanila. 24 Ng'hekewa ya Imulungu ikale na wanhu wose omnogela Mndewa wetu Yesu Kilisito kwa unogelwa wa milele.