1 Musa kakala kodisusila bumbila da ng'hondolo wa tata mkwe wake Yetulo, imulava nhosa wa ako Midiani. Musa kadigala bumbila dijo mwambu wa kuluwala na kavika Holebu, kulugongo lwa Imulungu. 2 Baho, msenga wa Mndewa Imulungu kamulawilila Musa mna dilambi da moto ulawile hagati ya ikisolo. Musa kachona ikisolo chokwaka moto lakini hakilukula. 3 Musa kagelegeza, “Beta ng'hwese behi ndole unzonza uno, habali kisolo chokwaka lakini hakilukula.”

4 Mndewa Imulungu viyamonile kakwesa behi, kamkema kulawa kuna ikisolo! “Musa! Musa!”

Musa kedika, “Niye nabaha.”

5 Imulungu kamulongela Musa, “Sikuukwese behi! Vula vilatu vako kwavija aho hawimile hong'ala.” 6 Abaho Imulungu kamulongela, “Niye na Imulungu wa tatako, Imulungu wa Abulahamu na Imulungu wa Isaka na Imulungu wa Yakobo.” Avo Musa kagubika kihanga chake kwavija kadumba kumulola Imulungu.

7 Abaho Mndewa Imulungu kamulongela, “Nigona madununzo gowopata wanhu zangu weli kuko Misili. Mhulika viwoiyalala kwa kudununzwa na waja owemilila. Kwavija nojuwa viwogaya, 8 avo nihumuluka ili niwakombole walawe mmakono gawa Misili na niwagale mwiisi ng'hulu na inogile, isi imemile uki na maziwa, isi ya Wakanaani na Wahiti na Waamoli na Wapelizi na Wahivi na Wayebusi. 9 Na sambi kililo cha Waizilaeli kinivikila na niwona Wamisili viwowadununza. 10 Sambi nokutuma kwa Falao, ili uwalave wanhu zangu wa Izilaeli mwiisi ya Misili.”

11 Lakini Musa kamulongela Imulungu, “Niye na nani mbaka nichole kwa Falao, nikawalave Waizilaeli mwiisi ya Misili?”

12 Imulungu kamulongela, “Niye nokuwa hamoja na gweye. Vonda uwalave wanhu wa Izilaeli mwiisi ya Misili, monitambikila niye kulugongo luno. Acho chokuwa kilagusa kamba niye nikutuma.”

13 Musa kamulongela Imulungu, “Nahachola kwa Waizilaeli kuwalongela, ‘Imulungu wa wahenga zenu kanhuma kumwenu,’ wao wahaniuza, ‘Twaga jake nani?’ Niwalongele choni?”

14 Imulungu kamulongela Musa, “Nene iyo Nene. Vino vivo viulondigwa kuwalongela Waizilaeli, ‘Ija yokemigwa Nene iyo Nene, kanhuma kumwenu.’ ” 15 Imulungu kamulongela Musa, “Walongele Waizilaeli kamba, ‘Niye Mndewa Imulungu, Imulungu wa wahenga zenu, Imulungu wa Abulahamu na Imulungu wa Isaka na Imulungu wa Yakobo nikutuma kumwao.’ Dino dijo twaga jangu milele, vino vivo ulelo wose vonda wanikumbuke. 16 Genda ukaiting'hane na wavele wa Izilaeli walongele kamba, ‘Niye Mndewa Imulungu, Imulungu wa wahenga zenu, Imulungu wa Abulahamu na Imulungu wa Isaka na Imulungu wa Yakobo, kandawila na kanilongela.’ Walongele, ‘Niwalola goya na nigona gaja gomutendeligwa mwiisi ya Misili. 17 Na niye nilonga kamba nowalava mwiisi ya Misili kuna gamagazo, nowagala mwiisi ya Wakanaani na Wahiti na Waamoli na Wapelizi na Wahivi na Wayebusi mwiisi imemile uki na maziwa.’

18 “Wao okutegeleza, abaho gweye na wavele wa Izilaeli mochola kwa mndewa wa Misili na kumulongela, ‘Mndewa Imulungu, Imulungu wa Waebulania katulawila siye. Avo tutogolele tuchole kwa siku ndatu kuluwala tukamulavile nhosa Mndewa Imulungu wetu.’ 19 Nojuwa mndewa wa Misili honda yawatogolele muchole mbaka yananahizwe kwa nguvu. 20 Lakini nougolosa mkono wangu na kuwakoboza Wamisili kwa vilaguso vonda nitende kuko. Abaho Falao kowaleka musegele.

21 “Abaho nowatenda Wamisili wawatendele ganogile Waizilaeli ili vonda musegele mwiisi ya Misili, sikumusegele makono gaiyeka. 22 Kila mtwanzi wa Kiebulania yampule Mmisili yokala behi na heyo hebu mgeni yokala mng'anda yake viwalo na vinhu va kuihamba va zahabu na shaba. Avo mowavaza wanenu wa kitwanzi na wa kimbigalo vinhu avo vose. Vino vivo vonda musole vinhu va Wamisili.”