1 Mndewa Imulungu kamulongela Musa na Haluni, 2 “Mna Iwalawi wapeteni wanhu wa ulelo wa Kohati kamba viweli mzing'holo zao na mzing'anda zao, 3 muwapete wambigalo wose weli na miyaka malongo madatu mbaka malongo matano waja odaha kusang'hana mdihema da mting'hano.

4 “Sang'hano ya ulelo wa Kohati yokuwa kuvipapa viya vose vili hanhu hong'ala ng'hani. 5 Kipindi cha kusegela chahavika Haluni na wanage wengile mng'anda ya dihema wadihumuluse dipanziya dili kuulongozi wa disanduku da lagano, abaho wadigubike disanduku da lagano kwa panziya dijo. 6 Uchanha yake wadigubike na ing'hwembe ya mnyama wa mbahali na wadikunzule dikumbi da langi ya buluu. Abaho wengize zimango za kudipapila disanduku.

7 “Uchanha ya meza ili kuulongozi wangu niye Mndewa Imulungu wakunzule dikumbi da buluu na uchanha yake weke sahani na ivikasi va ubani na bakuli na bilika mbuli ya kulavila nhosa ya king'waji. Gago gamagate gasigale aho mmeza siku zose. 8 Abaho, wavike viya vose mdikumbi didung'hu na uchanha yake weke ingubiko ya ng'hwembe ya mnyama wa mbahali. Abaho wengize zimango za kuipapila.

9 “Wasole dikumbi da buluu wagubikile ikingolobweda cha kwikila taa hamoja na taa zake, na viya va kugogela makala ga moto na viya va kuhalila moto na viya vose va kwikila mavuta. 10 Abaho wakike ikingolobweda hamoja na viya vake vose mna ing'hwembe ya mnyama wa mbahali, na wengize zimango za kukipapila.

11 “Abaho wakunzule dikumbi da buluu uchanha ya upango wa zahabu na waugubike kwa ng'hwembe ya mhala. Abaho wengize zimango za kuupapila.

12 “Wasole viya vose va kusang'hanila hanhu hong'ala, wavifunge mdikumbi da buluu na wavigubike kwa ng'hwembe ya mhala, abaho wengize zimango za kupapila.

13 “Wasegese imitozi ili uchanha ya uupango wa nhosa na wadikunzule dikumbi da langi ya zambalau uchanha yake. 14 Uchanha yake weke viya vose visang'haniligwa hana uupango, lwiko lwa kuzolela mitozi na bakuli na lwiko lwa kuhindulila nhosa na viya va kuhalila moto, abaho uchanha yake wakunzule ingubiko ya ng'hwembe ya mnyama wa mbahali. Na wengize zimango za kupapila.

15 “Abaho, Haluni na wanage wahamambukiza kuhagubika hanhu hong'ala hamoja na vinhu vose viyagwe waitande kwa mwanza, abaho wanhu wa ulelo wa Kohati weze wavipape. Lakini hewo hawalondigwa kuvikwasa viya avo ving'alile ili sikuwafe, ino ayo sang'hano ya ulelo wa Kohati kipindi chose dihema da mting'hano chahahamizwa.

16 “Eleazali mwanage Haluni imulava nhosa, kolondigwa yagalolese mavuta ga taa na ubani na nhosa za ndiya zilavagwa kila siku na gamavuta gang'alile. Yalolese kila kinhu kili mgati ya dihema ajo.”

17 Mndewa Imulungu kamulongela Musa na Haluni, 18 “Sikumuwakanhe ulelo wa Kohati mna Iwalawi. 19 Avo, ili sikumuwahonze wakomigwe vonda wavikwesele viya avo ving'alile ng'hani, utende vino kumwao, Haluni na wanage wengile mgati na wampangile kila imoja sang'hano yake. 20 Lakini Wakohati hawalondigwa kwingila na kuvilola viya avo ving'alile, wahatenda vivo wofa.”

21 Mndewa Imulungu kamulongela Musa, 22 “Uwapete wanhu wa ulelo wa Gelishoni kamba viweli mzing'holo zao na mzing'anda zao, 23 uwapete wambigalo wose weli na miyaka malongo madatu mbaka malongo matano waja odaha kusang'hana mdihema da mting'hano.

24 “Sang'hano yao yokuwa ino, 25 kupapa mapanziya ga dihema da mting'hano, na ngubiko yake na ingubiko ya ng'hwembe ya mnyama wa mbahali na dipanziya dili haulwivi lwa dihema, 26 wapape mapanziya na nzabi za uluwa uzunguluke dihema na upango wa nhosa, panziya da ulwivi lwa uluwa na vinhu vose va kusang'hanila mumo. Hewo sang'hano yao yokuwa kwa viya avo vose. 27 Sang'hano zose azo iwe kupapa hebu sang'hano yoyose iyagwe, waitende kwa kulagizwa na Haluni na wanage. Uwalagize ivinhu vose viwolondigwa kupapa. 28 Sang'hano ayo itendigwe na wanhu wa ulelo wa Gelishoni mna dihema da mting'hano na walongozwe na Itamali mwanage Haluni imulava nhosa.

29 “Uwapete wanhu wa ulelo wa Melali, kamba viweli mzing'holo zao na mzing'anda zao, 30 uwapete wambigalo weli na miyaka malongo madatu mbaka miyaka malongo matano waja odaha kusang'hana mdihema da mting'hano. 31 Sang'hano yao yokuwa kupapa zimbao na zifito na zimhanda na ivikalilo va dihema da mting'hano, 32 vivija wapape na zimhanda za uluwa zizunguluke mhande zose, ivikalilo, na vifungilo vake na nzabi hamoja na vinhu vake vose na viya vake viyagwe vose. Na gweye kowapangila ivinhu va kupapa kamba matwaga gao vigeli. 33 Sang'hano ayo itendigwe na wanhu wa ulelo wa Melali mna dihema da mting'hano na walongozwe na Itamali mwanage Haluni imulava nhosa.”

34 Avo, Musa na Haluni na vilongozi wayagwe wa wanhu wawapeta wanhu wa ulelo wa Kohati kamba viweli mzing'holo zao na mzing'anda zao. 35 Wambigalo wose weli na miyaka malongo madatu mbaka malongo matano, kila munhu yadahile kusang'hana mna dihema da mting'hano, 36 wose kwa wose wakala elufu mbili na magana saba na hamsini (2,750). 37 Wanhu awo wa ulelo wa Kohati awo wasang'hane mdihema da mting'hano. Musa na Haluni wawapeta kamba Mndewa Imulungu viyamulagize Musa.

38 Ulelo wa Gelishoni wapetigwa kamba viweli mzing'holo zao na mzing'anda zao. 39 Wambigalo wose weli na miyaka malongo madatu mbaka malongo matano, kila munhu yadahile kusang'hana mna dihema da mting'hano, 40 wose kwa wose wakala elufu mbili magana sita na selasini (2,630). 41 Wanhu awo wa ulelo wa Gelishoni awo wasang'hane mdihema da mting'hano. Musa na Haluni wawapeta kamba Mndewa Imulungu viyawalagize.

42 Ulelo wa Melali wapetigwa kamba viweli mna zing'holo zao na mzing'anda zao. 43 Wambigalo wose weli na miyaka malongo madatu mbaka malongo matano, kila munhu yadahile kusang'hana mna dihema da mting'hano, 44 wose kwa wose wakala elufu ndatu na magana mbili (3,200). 45 Wanhu awo wa ulelo wa Melali awo wasang'hane mdihema da mting'hano. Musa na Haluni wawapeta kamba Mndewa Imulungu viyamulagize Musa.

46 Avo, Walawi wose wapetigwa na Musa na Haluni na vilongozi wa wanhu, kamba viweli mzing'holo zao na mzing'anda zao. 47 Wambigalo wose weli na miyaka malongo madatu mbaka malongo matano, kila munhu yadahile kusang'hana na kupapa dihema da mting'hano, 48 wose kwa wose wakala elufu nane na magana tano na semanini (8,580). 49 Kila munhu kagweleligwa sang'hano yake ya kinhu cha kupapa, wapetigwa kamba Mndewa Imulungu viyamulagize Musa.