1 Abaho Miliamu na Haluni wasonga kumulonga vihile Musa kwavija kakala yasolile mtwanzi Mkushi. 2 Walonga, “Vino Mndewa Imulungu kalonga na kumulagiza Musa yaiyeka? Vino halongile na siye vivija?” Mndewa Imulungu kazihulika mbuli azo. 3 Musa kakala muhole ng'hani, kubanza iwanhu wose wayagwe wakalile mwiisi.

4 Bahaja Mndewa Imulungu kawalongela, Musa na Haluni na Miliamu, “Mweye wadatu mwize kuna dihema da mting'hano.” Avo, wose wadatu wachola kuna dihema da mting'hano. 5 Baho Mndewa Imulungu kahumuluka mna imhanda ya wingu, kema hana ulwivi lwa dihema, kawakema Haluni na Miliamu. Wose wabili wakwesa kuulongozi. 6 Abaho Mndewa Imulungu kawalongela, “Tegelezeni mbuli zangu. Kamba hana mtula ndagu hagati yenu, niye Mndewa Imulungu noigubula kwa kumulagusila vinhu na nolonga na heyo mzinzozi. 7 Lakini kwa msang'hanaji wangu Musa, haili vivo. Heyo kana sang'hano ya kuwalola wanhu zangu wose. 8 Niye nolonga na heyo kihanga kwa kihanga, silonga kwa kuzunguluka. Heyo konyona niye Mndewa Imulungu vinili. Avo habali hamdumbile kumulonga vihile msang'hanaji wangu Musa?”

9 Aho Mndewa Imulungu kawagevuzikila, kasegela. 10 Wingu vidisegele uchanha ya dihema, Miliamu koneka kana utamu wa dikulu, ukala mzelu kamba pamba. Haluni viyahinduke na kumulola Miliamu kakanganya, kumona kana utamu wa dikulu. 11 Aho Haluni kamulongela Musa, “Chonde nokupula mndewa wangu, sikuutukoboze kwavija tutenda ubozi na nzambi. 12 Sikuumtende Miliamu yawe kamba munhu yavumbuke yafile, na nusu ya lukuli lwake lukola.”

13 Musa kamulilila Mndewa Imulungu yolonga, “Chonde, go Mndewa Imulungu muhonye!”

14 Lakini Mndewa Imulungu kamulongela Musa, “Kamba tatake yahamtemela mate mkihanga chake, vino, sambi yakone kinyala kwa siku saba? Avo, mulave kunze ya ing'hambi yakale kuko kwa siku saba, abaho yabwele mwiing'hambi.” 15 Avo, Miliamu kawingigwa yachole kunze ya ing'hambi kwa siku saba. Wanhu hawagendelele na mwanza mbaka Miliamu viyabwezigwe kuna ing'hambi. 16 Vigabitile gago wanhu wagendelela na mwanza kulawa Haseloti, weka ng'hambi kuluwala lwa Palani.