1 Abaho Mndewa Imulungu kagendelela kuwalongela Musa na Haluni, 2 “Gano gago malagizo gonilava, niye Mndewa Imulungu. Walongeleni Waizilaeli wawagalile ng'ombe mdung'hu mtwanzi yelibule kilema chochose na yawe yang'hali hanatenda sang'hano ya kulima. 3 Mweye mumgwelele ng'ombe ayo Eleazali imulava nhosa. Ng'ombe ayo yalavigwe kunze ya ing'hambi na yachinjigwe kuulongozi wa ayo imulava nhosa.

4 “Abaho Eleazali imulava nhosa yasole damu kidogo na yaimize kwa kidole chake miyanza saba, kulozela umwambu wa kuulongozi wa dihema da mting'hano. 5 Ng'ombe ayo wose hamoja na ing'hwembe na inyama na idamu na ivinhu vose va mgati, visomigwe moto kuulongozi wa imulava nhosa. 6 Abaho imulava nhosa yasole lubiki lwa mwelezi na bunho da hisopo na sufi ndung'hu, yavigele vose muumoto awo ukwaka. 7 Yahamambukiza, ayo imulava nhosa yavifuwe viwalo vake na yakoge mazi lukuli lose, abaho kodaha kubwela mna ing'hambi, na kokala yafitile mbaka ichungulo. 8 Vivija imunhu ayo yonda yamsome moto ayo ing'ombe yavifuwe viwalo vake kwa mazi na yakoge lukuli lose, vivija na heyo kokala yafitile mbaka ichungulo.

9 “Munhu yong'ala yazole ayo imitozi ya ing'ombe na yaigale hanhu hanogile kunze ya ing'hambi. Mitozi ayo ikigwe goya na isang'hanilwe na iwanhu wose wa Izilaeli kutendela mazi ga kusegesela gehile, ili kusegesa nzambi. 10 Imunhu yonda yaizole imitozi ya ayo ing'ombe kolondigwa yafuwe viwalo vake lakini kokala yafitile mbaka ichungulo. Lagizo dino da siku zose, kwa Waizilaeli wose na iwanhu baki okala hamoja nao.

11 “Munhu yoyose yahakwasa maiti kokala yafitile kwa siku saba. 12 Siku da kadatu na siku da isaba munhu ayo yaisunhe kwa gaja gamazi ga kusegesa gehile na heyo kokuwa kang'ala. Lakini kamba haisunha kudisiku da kadatu na da isaba munhu ayo kosigala vivo yafitile. 13 Munhu yoyose yahakwasa maiti na haisunha kodifitiza hema da Mndewa Imulungu na yabaguligwe na iwanhu wa Izilaeli. Munhu ayo kosigala yafitile kwavija hamiziligwe gaja gamazi ga kusegesa gehile.

14 “Gano gago malagizo kamba munhu yahafila mdihema. Munhu yoyose yokwingila mdihema ajo hebu munhu yeli mumo mng'anda ya dihema kokuwa kafita kwa siku saba. 15 Kiya chochose hakigubikigwe chokuwa kifita. 16 Munhu yoyose yonda yakwase maiti ga munhu yakomigwe hebu munhu yafile mwenyego mng'anda hebu munhu yahakwasa mizege ya munhu yafile hebu munhu yahakwasa panga, munhu ayo kokuwa kafita kwa siku saba.

17 “Mbuli ya wanhu awo wafitile isoligwe ayo imitozi ya ing'ombe mdung'hu ya kusegesa gehile na ihanganyigwe na mazi ga lwanda mna inongo. 18 Abaho munhu yong'ala yasole bunho da hisopo yadivabike mgamazi gago abaho yadimizile dihema na viya vose vili mng'anda na iwanhu weli mumo mng'anda. Vivija yammizile gago gamazi, munhu ayo yakwasile imizege ya munhu yafile hebu ayo yakwasile imaiti ya munhu yakomigwe hebu imunhu yakwasile maiti ya munhu yafile mwenyego hebu imunhu yakwasile panga. 19 Kudisiku da kadatu na da isaba munhu ayo yong'ala yammizile imunhu yafitile mazi gago, avo kudisiku da saba komtenda yang'ale ayo imunhu yafitile, na heyo yavifuwe viwalo vake na yakoge na ichungulo kokuwa kang'ala.

20 “Lakini kamba munhu kafita na haisunhile bule, munhu ayo kobaguligwa na iwanhu wose kwavija kodifitiza hema da Mndewa Imulungu. Kwavija hamiziligwe gago gamazi ga kusegesa gehile, avo munhu ayo kokuwa kafita. 21 Wanhu wadigoge lagizo dino siku zose. Vivija imunhu yomiza gago gamazi ga kusegesa gehile, yafuwe viwalo vake, na munhu yoyose yogakwasa gago gamazi kokuwa kafita mbaka ichungulo. 22 Kinhu chochose chonda yakikwase munhu ayo yafitile, kinhu acho chokuwa kifita, na munhu yonda yakikwase kinhu acho kokuwa kafita mbaka ichungulo.”