1 Yozumigwa miyanza mingi lakini hahulika,

kwa kusinhukiza kobeneka vihile na honda yahone bule.

2 Weli na haki wahongezeka, wanhu odeng'helela,

lakini wasang'hana gehile wahatawala, wanhu onung'unika.

3 Yonogelwa na ubala komnogeza tatake.

Yoilumba na mtwanzi mgoni kokwagiza ugoli wake.

4 Mndewa yahagoga haki, koigangamiza isi,

lakini yahanogelwa na hongo, koibananga isi.

5 Yomuhembekeza miyage kwa uvizi,

kotandika lwavu ili kuitega migulu yake.

6 Munhu yehile kogogigwa na ubananzi wake,

lakini munhu yeli na haki kokwimba na kudeng'helela.

7 Munhu yeli na haki kotanga haki za wakiwa,

lakini munhu yehile hatanga goya mbuli azo.

8 Munhu yeli na bezeli kodigela ndwagi buga jose,

lakini wanhu weli na ubala osegesa ng'hasiliki.

9 Munhu yeli na ubala yahaibamila na mbozi,

mbozi kogevuzika hebu koseka, vivija habule tindiwalo.

10 Wanhu onogelwa kwita damu,

omgevuzikila munhu yelibule kitala,

lakini wanhu weli na haki oulola goya ugima wake.

11 Mbozi koilagusa kunze kunze ng'hasiliki yake,

lakini munhu yeli na ubala koikimila.

12 Mtawala yahategeleza mbuli za uvizi,

vilongozi wake wose okwiha.

13 Mkiwa na mzulumati wose oigala kwa kinhu kimoja,

wose wabili wagweleligwa meso na Mndewa Imulungu.

14 Mndewa yowatagusa wakiwa kwa haki,

utawala wake okuwa unoga milele.

15 Mbalati na kuzumigwa vogala ubala,

lakini mwana yolekigwa yatende viyolonda komgela kinyala mamake.

16 Wehile wahongezeka gehile nago gokwengezeka,

lakini weli na haki olola kugwa kwao.

17 Mzume mwanago na heyo kokugwaa tindiwalo,

heyo kounogeza moyo wako.

18 Kamba habule usenga wa mtula ndagu,

wanhu ochola chakachaka,

vinoga kwa munhu ija yogagoga malagizo.

19 Mtumwa hazumigwa kwa mbuli ziiyeka,

kwavija kozitanga lakini hazigoga.

20 Wahamona munhu kohabuka chakachaka,

kuna tamanilo kwa zozolo kubanza heyo.

21 Kamba munhu yahamsang'hanila ng'hani ganogile mtumwa wake tangu haudodo,

kukimambukizo mtumwa ayo komgalila magazo.

22 Mwene kugevuzika kogala ugomvi,

na munhu yeli na ng'hasiliki ya himahima kobananga mengi.

23 Kibuli cha munhu chomtenda yabezigwe,

lakini yeli muhole kotegelezigwa.

24 Yoilumba na mbavi koilumiza mwenyego,

kohulika nduwilo lakini halonga mbuli.

25 Wahawadumba wanhu koitega mwenyego,

lakini yomtamanila Mndewa Imulungu kokala goya.

26 Wanhu wengi olonda kutegelezwa na mtawala,

lakini nhaguso ya kila kinhu yolawa kwa Mndewa Imulungu.

27 Msang'hana gehile, ngevuzo kwa munhu yeli na haki,

na munhu yeli na haki, ngevuzo kwa msang'hana gehile.