1 Gweye Mndewa Imulungu nokutogola,

kwavija kunikombola,

huwalekile iwanhu onihila waniseke.

2 Gweye Mndewa Imulungu, Imulungu wangu,

nikulilila unitaze,

na gweye kunihonya.

3 Mndewa Imulungu, kunikombola kulawa kuzimu,

kunigwaa kabili ugima,

kunisegesa mna iwanhu ochola kuzimu.

4 Mwimbileni nhogolwa Mndewa Imulungu,

mweye mutamanila,

kumbukeni ukung'ala kwake na kumshukulu.

5 Ng'hasiliki yake yokala kwa siku ndodo,

kunoga kwake kumwetu kokala siku zose.

Kililo chodaha kukala kilo chose,

lakini imitondo modeng'ha.

6 Niye vinimwedile nilonga,

“Sidaha ng'o kuhumwa!”

7 Kwa ganogile gako gweye Mndewa Imulungu,

kunigangamiza kamba kigongo kikulu.

Lakini vuifisile kutali na niye,

na niye nigwaya.

8 Nikulilila gweye Mndewa Imulungu,

nikupula gweye Mndewa unitaze.

9 “Kopata choni nahafa na kuchola kuzimu?

Vino timbwisi da iwanhu wafile dodaha kukugwaa nhogolwa?

Vino dodaha kusimulila kutamanila kwako?

10 Utegeleze gweye Mndewa Imulungu, na unyonele bazi,

gweye Mndewa Imulungu, unitaze!”

11 Gweye kuhindula kuiyalala kwangu kamba ngoma ya deng'ho.

Kunisegesela giogio jangu,

kunizungulusila deng'ho.

12 Niye nokutogola na sinyamala bule.

Gweye Mndewa Imulungu, Imulungu wangu nokushukulu milele.