1 Go Imulungu, siye tuhulika kwa magwiti getu,

iwahenga wetu watulongela gaja gausang'hane kuzisiku zao,

ona gaja gausang'hane siku za ako umwaka.

2 Kwa mkono wako kuwaswaswanya wanhu wakalile mwiisi ino,

na kuwahanda iwahenga zetu,

kuwabananga wanhu wa isi azo,

lakini kuwatenda wahenga zetu wamwede.

3 Kwavija siyo kwa sime jao waisola isi ayo,

wala siyo mkono wao uwakombole,

lakini mkono wako wa ukudila na mng'alo wa ikihanga chako,

kwavija kuwanogela.

4 Imulungu, gweye kwa Mndewa wangu,

gweye kolagiza mhumo kwa ulelo wa Yakobo.

5 Kwa udahi wako towasung'ha kuchugu iwanhu otwihila,

kwa twaga jako towabojoga iwanhu otwihila.

6 Niye siutamanila upinde wangu,

wala sime jangu hadidaha kunikombola.

7 Gweye ayo ututenda tuwahume iwanhu otwihila,

wagwe kinyala iwanhu otwihila.

8 Kwa Imulungu wetu toitapa imisi yose,

na siye toditogola twaga jako milele.

9 Lakini sambi kutulema na kutugela kinyala,

sambi huchola na iwakalizi zetu.

10 Kututenda tubwele kuchugu ya iwanhu otwihila,

iwanhu otudeta watuboka vinhu vetu.

11 Kutuleka tudafunwe kamba ng'hondolo,

na kutupwililisa mziisi ziyagwe.

12 Kuwachuuza wanhu zako kwa sente ndodo,

wala hupatile chochose vuuwachuuze.

13 Kututenda kilozo kwa iwanhu okala behi na siye,

kututenda tubezigwe na kugewezwa na iwanhu otuzunguluka.

14 Kututenda wasekwa hagati ha iwanhu wa isi ziyagwe,

wanhu wa isi ziyagwe otigisa mapala gao.

15 Kinyala changu cha kuulongozi wa wanhu imisi yose,

kihanga changu kimema kinyala,

16 mbuli ya ugewezi wa iwanhu oniliga,

na kunilonga vihile mbuli ya imunhu yonihila yolonda kunibwezela.

17 Gose gago gatupata,

hamoja hatukusemwile,

na hatubenile lagano jako.

18 Mizoyo yetu haibwelile kuchugu,

wala migulu yetu hailekile nzila yako.

19 Lakini kutuhonda na kututenda kae ya mbweha,

na kutugubika kwa sisila da ifa.

20 Maza tudisemwile twaga da Imulungu wetu,

hebu kumgolosela makono getu imulungu iyagwe,

21 vino Imulungu sambi yajuwe?

Kwavija heyo ayo yagajuwile magesa ga kinyelegezi geli mmoyo.

22 Mbuli yako tokomigwa imisi yose,

siye kamba ng'hondolo ochola kuchinjwa.

23 Lamuka gweye Mndewa.

Habali kowasa?

Inuka, sikuutuleme milele.

24 Habali kofisa kihanga chako?

Habali koisemwa magazo getu na madununzo getu?

25 Tuhumuluswa mbaka mditimbwisi,

ng'huli zetu zinanahilwa na ulongo.

26 Inuka na ututaze,

utukombole kwavija unogelo wako hawishaga.