1 Heyo yokala hana uukalizi wa ayo yeli Uchanha Ng'hani,

yokala kudisisila da ayo yeli na udahi wose.

2 Nomulongela Mndewa Imulungu,

“Gweye ayo kimbililo jangu na ngome yangu,

Imulungu wangu, nikutamanila.”

3 Heyo kokukombola na mtego wa imunhu yosaka,

na utamu wa kulokeza ukomaga iwanhu.

4 Kokugubika kwa mitipilo yake,

hasi ya mabawa gake kopata kimbililo,

kutamanilwa kwake kokuwa kamba ngao na zindiko.

5 Sikuudumbe vinhu vidumbiza va ikilo,

hebu msale ubitaga imisi,

6 hebu utamu wa kulokeza uwasepaga iwanhu kudiziza,

na utamu ukomaga imisi.

7 Kamba iwanhu elufu olagala behi yako,

iwanhu elufu kumi mwambu wako wa ukudila,

lakini gehile hagakukwesela gweye.

8 Kolola kwa meso gako mwenyego,

na kokona iwanhu wehile viwokobozwa.

9 Kwavija gweye kumtenda Mndewa Imulungu kimbililo jako,

na ayo yeli Uchanha Ng'hani kumtenda ukazi wako.

10 Avo haduhu gehile gonda gakupate gweye,

na mikubulo honda idikwesele hema jako.

11 Kwavija Imulungu kowalagiza wasenga zake mbuli yako,

wakukalize mnzila yako.

12 Mmakono gao okugoga,

ili sikuuikwale mgulu wako mdibwe.

13 Kowakanyaga simba na zoka,

mwana simba na nyoka kowahonda kwa magulu.

14 Mndewa Imulungu, kolonga,

“Nomkombola ayo yoninogela,

nomkaliza kwavija kodijuwa twaga jangu.

15 Yahanikema nomwidika,

nokuwa hamoja na heyo mmagazo,

nomkombola na nomgwaa ukulu.

16 Nomgwaa nhunza ya kukala mgima siku nyingi,

na nomulagusila ukombola wangu.”