10
1 Ndugu zangu, moyo wangu olonda ng'hani na nowapulila kwa Imulungu Waizilaeli wayangu wakomboligwe! 2 Nokona kuwa owamba ng'hani kumnogeza Imulungu, lakini kuwamba kwao hakutimilike kwavija hawaujuwile ukweli wose. 3 Kwavija hawajuwile vija Imulungu viyowatenda wanhu wanoge mgameso gake, lakini wao watenda viwogesa, avo walema kutogola vija Imulungu viyowatenda wanhu wanoge mgameso gake. 4 Kwavija Kilisito viyezile, keza kugamambukiza Malagizo, avo munhu yoyose yomtogola Kilisito kotendigwa kanoga mgameso ga Imulungu.
Ukombola kwa wanhu wose
5 Mbuli ya kutendigwa kunoga mgameso ga Imulungu kwa kugagoga Malagizo, Musa kandika vino, “Munhu yoyose yogoga Malagizo kokuwa mgima kwa Malagizo.” 6 Lakini mbuli ya kutendigwa kunoga mgameso ga Imulungu kwa kumtamanila, Maandiko Gang'alile golonga vino, “Sikuuiuze mwenyego, nani yonda yachole kuulanga kumuhumulusa Kilisito?” 7 “Vivija sikuuiuze, nani yonda yachole hasi kowochola wanhu wafile kumzilibula Kilisito?” 8 Maandiko Gang'alile golonga, “Imbuli ya behi yenu, ya mmilomo yenu na mmizoyo yenu,” nayo, ayo imbuli ya kumtamanila Imulungu, ituwapetela wanhu. 9 Wahalonga kwa mulomo wako kuwa Yesu ayo Mndewa na kotogola muumoyo wako kuwa Imulungu kamzilibula kwa wafile, kokomboligwa. 10 Kwavija wahatogola muumoyo wako, kotendigwa kunoga mgameso ga Imulungu na wahalonga kwa mulomo wako kokomboligwa. 11 Maandiko Gang'alile golonga, “Munhu yoyose yomtogola honda yageligwe kinyala.” 12 Imulungu hawabagula Wayahudi na wanhu haweli Wayahudi, kwavija wose Mndewa wao imoja, nayo kowatendela ganogile wanhu wose ompula. 13 Kwavija Maandiko Gang'alile golonga, “Munhu yoyose yopula kwa twaga da Mndewa kokomboligwa.”
14 Vino ompulaze kamba hawamtogole? Na omtogolaze kamba hawauhulike usenga wake? Na ouhulikaze usenga kamba kuduhu munhu wa kuwapetela? 15 Wanhu opetaze usenga kamba hawatumigwe? Kamba Maandiko Gang'alile vigalonga, “Lola vivinogile kwiza kwa wanhu opeta Mbuli Inogile!” 16 Lakini siyo wose waitogola Mbuli Inogile ya Imulungu. Kwavija Isaya mtula ndagu wa Imulungu kalonga, “Mndewa, nani yautogole usenga wetu?” 17 Avo munhu komtamanila Imulungu kwa kuuhulika usenga, usenga awo okwiza kwa kupetigwa kwa mbuli inogile ya Kilisito.
18 Lakini niye nouza, vino hawauhulike usenga? Ona, kuuhulika wauhulika, kwavija Maandiko Gang'alile golonga,
“Nyangi zao zihulikigwa mwiisi yose,
mbuli zao zivika kuuhelelo wa isi.”
19 Nouza kabili, vino wanhu wa Izilaeli hawajuwa bule? Imulungu kalonga kwa mulomo wa Musa,
“Nowatenda mweye wanhu zangu muwonele migongo,
wanhu wa isi iyagwe
nowagevuza kubitila wanhu
wanhu wa isi ya wabozi.”
20 Imulungu kagangamiza kulonga kwa mulomo wa Isaya,
“Wanhu walekile kunizahila wanyona,
niwalawilila wanhu walekile kuuza mbuli zangu.”
21 Lakini mbuli ya Izilaeli, Imulungu kolonga, “Imisi yose niwenulila makono gangu kuwabokela wanhu oleka kunihulika na ononga vihile.”