1 Lakini gweye kolondigwa ufundize mafundizo gailumbile na mafundizo gaukweli. 2 Walongele wambigalo wavele wailongoze wenyego, wakale kwa kutegelezigwa, wawe na nzewele zinogile, wawe na tamanilo digangamale, unogelwa na kufunga umoyo.

3 Vivija walongele watwanzi wavele wakale ugima wa kung'ala, sikuwawalonge vihile wanhu hebu kuwa watumwa wa ugimbi. Olondigwa kufundiza mbuli zinogile, 4 ili wawafundize wandele kuwanogela wakasano zao na wanao, 5 wailongoze vinogile, wang'ale, walolese kae zao, wawategeleze wakasano zao, ili usenga wa Imulungu sikuulongigwe vihile.

6 Vivija wagangamize wabwanga wailongoze wenyego mna ikila kinhu. 7 Mzimbuli zose gweye kolondigwa uwe kilaguso cha kutenda ganogile, mna gamafundizo gako ulaguse ukweli na sambi utende mwangalo. 8 Ulonzi wako sikuutagusigwe, ili wose okulema gweye wagwe kinyala kwa kuswela kulonga gehile kumwetu. 9 Vivija walongele watumwa wawategeleze wakulu zao na wawanogeze mna izimbuli zose. Sikuwaibamilile nao, 10 hebu kuwebila vinhu vao, lakini walaguse wanoga na kutamaniligwa kwa sang'hano zao zose, ili mafundizo ga Imulungu Mkombola wetu gagweleligwe nhogolwa na wanhu.

11 Kwavija ng'hekewa ya Imulungu igubuligwa kwa kuwakombola wanhu wose. 12 Ng'hekewa ino yotufunza tuleme mbuli hazimnogelaga Imulungu na kusulukila vinhu va mwiisi ino, lakini tuilongoze wenyego, tukale ugima wa kumnogela Imulungu mwiisi ino ya sambi, 13 kuno tobeta siku dijo da deng'ho ditutamanila, kipindi ukulu wa Imulungu wetu mkulu na Mkombola wetu Yesu Kilisito vonda ulawilile. 14 Yesu kailava mwenyego mbuli yetu ili yatulekese kulawa mna izinzambi na kututenda wanhu wanogile weli wake mwenyego, wanhu osulukila kutenda ganogile.

15 Avo ufundize vinhu vino, sang'hanila udahi wako wose kwa kuwagangamiza na kuwazuma. Munhu yoyose sikuyakubeze.