16
Ɩbrám na Agáarɩ baalʊ́rʊ Asʊmáyɩ́la
1 Ɩbrám ɖɛɛlʊ́ Saaráyɩ wɛ bɩlɛ́ nɛ́, ɩdalʊ́rʊ yɩ bú. Aléeré yoḿ naárʊ wɛ ná ɩjɔ́ ɩgɛ́ɛ Mɩ́sɩra ńnɩ́, bánÿaá yɩ sɩsɩ Agáarɩ.
2 Bɩjɔɔ́ɔ nɛ́, ngɛ Saaráyɩ wɔɔdɔ́ ɩwaalʊ́ Ɩbrám sɩsɩ: «Nyááná sɩsɩ Ɖádʊ́ʊ Ɩsɔ́ɔ wɔɔdɔ ma lʊrʊ́ʊ! Bɩlɛ́ nɛ́, yele mɛ́dɛ́ɛ yoḿ ɩsʊ́ʊ nyɔ́jɔ́ nyána yɩ ɩfɩ́nɩ; nabʊ́rʊ, ɩlɛ́ wánlʊrʊ́ʊ bɩka moyuú bú mɔɖɔ́kɩ.»
Saaráyɩ waaŋmátɩ Ɩbrám bɩlɛ́ nɛ́, ɩlɛ́ waanɩ́ɩ ɩnɔɔ́. 3 Ngɛ wɔɔgbɔ́ɔ ɩdɛ́ɛ yoḿ Mɩ́sɩra alʊ́ Agáarɩ ɩmʊ́ ɩfa ɩwaalʊ́. Bɩdɛ́ɛ sáátɩ nɛ́, Ɩbrám-dɛ́ɛ bɩ́ɩ́zɩ fuú nbɩlɛ́ Kanáanɩ laadɔ́ɔ-daá. 4 Ngɛ Ɩbrám waazʊ́ʊ ɩ́na Agáarɩ bafɩ́nɩ, ngɛ fuwá waazʊ́ʊ. Sáátɩ wenkí Agáarɩ waadɩlɩ́ sɩsɩ ɩ́na fuwá nɛ́, idokúti wénzewɔ́ɔ ɩgʊ́bɔnɩ́ Saaráyɩ. 5 Saaráyɩ waana bɩlɛ́ nɛ́, ngɛ wɔɔdɔ́ ɩwaalʊ́ sɩsɩ: «Kʊdʊ́ʊ́nɩ bándʊ́ʊ́dɩ ma tɩ ɖɔ́ nɛ́, nyádɩɩná tɩ. Mɔ́ɔ́ mávʊndɩɩná yoḿ gɛ mɔ́ɔ́gbɔ́ɔ yɩ mava nya; amá, lɛlɛɛɖɔ́ wooyuú fuwá nɛ́, wɛ́ngbɛɛnáa ma. Bɩlɛ́ nɛ́, Ɖádʊ́ʊ Ɩsɔ́ɔ riké wánvʊʊ kʊ mána nya ɖɔ́dɔ́m.» 6 Waaŋmátɩ bɩlɛ́ nɛ́ gɛ Ɩbrám sɩsɩ: «Nyɛ́dɛ́ɛ yoḿ gɛ; a nyánlám yɩ wenbí nɛ́, nlá yɩ.» Ngɛ Saaráyɩ waabá ɩnáázɩ Agáarɩ hálɩ ɩlɛ́ ɩwɩ́ɩ ise iyéle yɩ.
7 Ngɛ Ɖádʊ́ʊ Ɩsɔ́ɔ-dɛ́ɛ malááyɩ́ka wɔɔmɔɔná yɩ bɔɔnʊʊ́ kɩdɩláána Súuri ɖibimbiɖé nɛ́ kɩjɔ́ tɛɛwʊ́lɔ́ɔ́-daá. 8 Ngɛ ɩlɛ́ wɔɔbɔ́ɔ́zɩ yɩ sɩsɩ: «Agáarɩ Saaráyɩ-dɛ́ɛ yoḿ, lé gɛ nyáagálɩɩ, ngɛ lé gɛ nyɛ́nɖɛɛ́.» Ngɛ woobúsi yɩ sɩsɩ: «Mágʊ́bɔnɩ́ ɩmʊ́ gɛ ménzewɔ́ɔ bɩlɛ́.» 9 Ngɛ ɩlɛ́ wɔɔdɔ́ yɩ sɩsɩ: «Bɩsɩ nyágʊ́bɔnɩ́ ɩmʊ́ ɩjɔ́, a nyáádála, fʊʊzɩ nyádɩ ɩdɛɛzɩ́. 10 Ménÿelíi nyɛ́dɛ́ɛ lʊrʊ́ʊ-daá ɩráa ɩbá bɔkɔ́nɩ bɔɖɔ́ɔ; bɛdɛ́ɛ ɖɔɔmɩ́nɩ ikúti biyéle naárʊ tándabɩɩzɩ ɩkála wɛ.» 11 Ngɛ sɩsɩ: «Fuwá nyɛ́yɛ́ɛ́na kɛ ɖɔ́ nɛ́, bú abaalʊ́ gɛ sɩ ngɔ́nɩ nlʊ́rʊ, bɩka nva yɩ yɩ́ɖɛ sɩsɩ Asʊmáyɩ́la; káma, Ɖádʊ́ʊ Ɩsɔ́ɔ waanɩ́ɩ nyɛ́dɛ́ɛ mɛɛdɩrɛ. 12 Nyóbú ɩmʊ́ sɩ ɩbɩ́sɩ gɛ nyazɩ fɔɔ́-daá kpangbɔ́ɔ; wónÿoó ɩráa rɩ́ŋa na bɛlɛ́ ɖʊɖɔ boyóo yɩ. Sɩ ɩlɩ́ɩ gɛ ɩcɔɔná ɩdɩ, iyóo igoobíya.»
13 Ńna gɛ Agáarɩ wɔɔbɔ́ɔ́zɩ ɩdɩ sɩsɩ: «Weení ɩbɛɛ́na ma ɖɔ́ nɛ́, mɔ́ɔ́ máábá mana yɩ toovonúm yáá wé.» Ngɛ waava Ɖádʊ́ʊ Ɩsɔ́ɔ weení wɔɔgɔ́nɩ ɩŋmatɩná yɩ nɛ́ yɩ́ɖɛ sɩsɩ: «Nyɔ́ɔ́ gɛ Ɛl‑Rɔ́ɔyɩ,» bugutoluú sɩsɩ, Ɩsɔ́ɔ weení ɩbɛɛ́na ma nɛ́. 14 Ngɛ baava bɔɔnʊʊ́ kɩḿ yɩ́ɖɛ sɩsɩ Lakáayɩ-Rɔ́ɔyɩ; sɩsɩ weezuú-dʊ́ʊ wánnáa ma nɛ́ ɩdɛ́ɛ lɔkɔ. Lɔkɔ kɩḿ kɩdɛɛzɩwɛ Kadɛ́ɛsɩ tɛ́ɛ́dɩ na Bɛrɛ́ɛdɩ tɛ́ɛ́dɩ bɔlɔwʊtáá.
15 Ngɛ Agáarɩ waalʊ́rʊ bú abaalʊ́; ɩjaa Ɩbrám waava yɩ́ɖɛ sɩsɩ Asʊmáyɩ́la. 16 Sáátɩ wenkí baalʊ́rʊ bú ɩmʊ́ nɛ́, Ɩbrám wɛná bɩ́ɩ́zɩ nɩɩ́náázá na loɖo (86).