Tawúratɩ na Injiila dɛ́ɛ fɔɔlɩ́nɩ MAATÉWU 6

1 Ɩ́kalá mɩ́dɛ́ɛ aɖííni ɩráa‑daá sɩsɩ na balaakáarɩ ɩkábɩ́sɩ mɩ́rɔ́. Tɩ́fa mɩ́vɛ́yɩ́na kɩvɛrɛwʊ nakɩ́rɩ mɩ́jáa weení ɩwɛ ɩsɔ́ɔ́dáá nɛ́ ɩjɔ́. 2 A bɩgɛ́ɛ nyɔ́ɔ́ nyánváa kadanbʊrʊ́sɩ nabʊ́rʊ nkalá hálɩ ɩráa laakáárɩ ɩbɩ́sɩ nyɔ́rɔ́ ńŋɩnáa munáávikíwá wánlám Ɩsɔ́ɔ yaazɛɛɖɛ́ na nɩ́báánɩ‑daá nɛ́; bɛlɛ́ bánlám bɩlɛ́ gɛ sɩsɩ na ɩráa ɩsá wɛ. Ménveerím mɩ́ɩ́ toovonúm sɩsɩ bɛlɛ́ báńmʊ́ʊ bɛdɛ́ɛ kɩvɛrɛwʊ nbɩlɛ́. 3 Amá nyɔ́ɔ́, a sɩ nva kadanbʊrʊ́sɩ nabʊ́rʊ, nyánʊ́ʊ́nɩ nɩbɩɩwʊ́ ɩ́kátɩlɩ́ wenbí kíɖííwú waava nɛ́, 4 na bɩlɔ́ɔ nyána weení nyáává yɩ nɛ́ mɩ́lɔ́wʊ́táá, na njaa weení wánnáa súmúú‑daá nɛ́, ɩfɛ́rɛ nya bɩdɛ́ɛ kɩvɛrɛwʊ.

5 A sɩ ɩsɛ́ɛ Ɩsɔ́ɔ, ɩ́kalá nyazɩ munáávikíwá wánlám nɛ́, bɛlɛ́ bángʊrʊ́ʊ gɛ bazɩ́ŋɛ́ɛ Ɩsɔ́ɔ yaazɛɛɖɛ́ yáá nɩ́báadará na bʊcɔ ɩráa rɩ́ŋa ɩna wɛ. Ménveerím mɩ́ɩ́ toovonúm sɩsɩ baajáŋ bánmʊ́ʊ bɛdɛ́ɛ kɩvɛrɛwʊ nbɩlɛ́. 6 Amá nyɔ́ɔ́ a bɩgɛ́ɛ sɩ nzɛ́ɛ Ɩsɔ́ɔ, sʊʊ nyáɖaḿ‑daá ndɔ tará na nzɛ́ɛ Ɩsɔ́ɔ ńna súmúú‑daá, na njaa Ɩsɔ́ɔ weení ɩbɛɛ́na súmúú‑daá nɛ́, ɩfɛ́rɛ nya bɩdɛ́ɛ kɩvɛrɛwʊ.

7 A sɩ ɩsɛ́ɛ Ɩsɔ́ɔ, ɩ́kɔ́kpɔ́ɔ ŋmatɩrɛ tʊmm bɩdɛ́ndɛḿ bɩka mɩ́láána tɔ́m kʊ́ɖʊḿtɩ tɩvɛ́yɩ́na fɔ́ɔ́zɩrɛ nɛ́ busí ńŋɩnáa wenbá baasɩ Ɩsɔ́ɔ nɛ́ wánlám nɛ́. Bɛlɛ́ bɛdɛ́ɛ lomaazɛ́ gɛ sɩsɩ, asée ɩrʊ́ waaŋmátɩ bʊɖɔ́ɔ na Ɩsɔ́ɔ ɩmʊ ɩdɛ́ɛ sʊlʊ́ńdɩ. 8 Ɩ́kamáázɩ wɛ, káma mɩ́jáa Ɩsɔ́ɔ nyɩ wenbí bɩjaarɛ́ɛ mɩ́ɩ nɛ́ naanɩ́ ɩbɔ́ɔ́zɩ yɩ. 9 Ɩnɩ́ɩ nŋɩ́nɩ́ bɩmɔɔ́na ɩsɛ́ɛ Ɩsɔ́ɔ́dáá nɛ́:

Ɖájáa weení ɩwɛ ɩsɔ́ɔ‑daá nɛ́,

báyáa nyáyɩ́ɖɛ na ɖacɩrɩ‑cɩrɩ;

10 nyógówúrátɩ íkédi adɛ laadɔ́ɔ‑rɔ,

bála nyɔ́zɔɔlɩ́m adɛ laadɔ́ɔ‑rɔ ńŋɩnáa ɩsɔ́ɔ́dáá.

11 Fa ɖáa sinje wɩ́rɛ‑dɛ́ɛ kíɖíím.

12 Cɛ ɖáa ɖɛ́dɛ́ɛ yɩsɩ́tɩwá,

ńŋɩnáa ɖɛ́njɛ́m wenbá baayɩsɩná ɖáa nɛ́.

13 Nkeyéle ɖáa ɖɩsála ɩ́bɛ́rɛ‑dɛ́ɛ kɔdɔ́sɩ‑daá,

amá laná‑ɖáa bolíni na Sitáánɩ.

[Káma nyanaa kowúrɔ́ɔ na yíko rɩ́ŋa, na ásícé‑dʊ́ʊ kpɔɔ lɛlɛɛɖɔ́ hálɩ bɩkpɔ́ɔ bɩɖɛ́ɛ. Amí.]

14 Bɩlɛ́ nɛ́, a bɩgɛ́ɛ mɩ́njɛ́m mɩ́ranáa bɛdɛ́ɛ yɩsɩ́tɩ, mɩ́jáa weení ɩwɛ ɩsɔ́ɔ́dáá nɛ́ wɛ́njɛ́m mɩ́ɩ́ ɖʊɖɔ, 15 amá a mɩ́dɛ́njɛḿ mɩ́ránáa bɛdɛ́ɛ yɩsɩ́tɩ, mɩ́jáa ɖʊɖɔ tɛ́njɛḿ mɩ́ɩ́ mɩ́dɛ́ɛ‑ńdɩ.

16 A bɩgɛ́ɛ sɩsɩ mɩ́vɔ́kɩná, ɩ́kɔ́cɔ́ɔ cʊ́ḿḿ ńŋɩnáa munáávikíwá wánlám nɛ́. Bɛlɛ́ bɔ́nvɔrɔ́sɩ baazá‑daá gɛ bɩka bɔdɔ́nnyɔɔzɩ badɩ na báa weení ɩna sɩsɩ bɔvɔ́kɩná. Ménveerím mɩ́ɩ́ toovonúm sɩsɩ bɛlɛ́ bánmʊ́ʊ bɛdɛ́ɛ kɩvɛrɛwʊ nbɩlɛ́. 17 Amá nyɔ́ɔ́, a bɩgɛ́ɛ sɩsɩ nyɔ́vɔ́kɩná, kɔ nyáázá bɩka nzaárɩ nyágʊjʊʊ́ tulaarɩ́, 18 na baaganáa ɩ́kátɩlɩ́ sɩsɩ nyɔ́vɔ́kɩná; amá yele bɩlɔ́ɔ nyána Ɩsɔ́ɔ mɩ́lɔ́wʊ́táá na bɩka ɩmʊ́ weení wánnáa súmúú‑daá nɛ́, ɩfɛ́rɛ nya bɩdɛ́ɛ kɩvɛrɛwʊ.

19 Ɩ́kácáa ɖɔ́ɔ́lɛ ɩmáárɩ adɛ laadɔ́ɔ‑rɔɔzɩ́ lénlé sizé na korɔ́ɔ wánbɩɩzɩ́ bʊfɔrɔ́sɩ ɖɛ yáá ŋmɩɩláa wánbɩɩzɩ́ baŋmɩ́ɩ́lɩ ɖɛ nɛ́. 20 Ɩjáa ɖɔ́ɔ́lɛ ɩmáárɩ ɩsɔ́ɔ́dáá, káma ńna sizé na korɔ́ɔ tánbɩ́ɩ́zɩ bɩfɔrɔ́sɩ ɖɛ cáńfáná ŋmɩɩláa ɩyɔ́ basʊ́ʊ baŋmɩ́ɩ́lɩ. 21 Káma lénlé nyɛ́dɛ́ɛ ɖɔ́ɔ́lɛ wɛ nɛ́, ńna dʊɖɔ gɛ nyálaakáarɩ wɛ.

22 Ɩzɩ́rɛ gɛ tɔnʊʊ́‑dɛ́ɛ fɩtɩ́la. A nyáázɩ́rɛ na ɖɩdɩ, bɩ́nnáa nyárɩ́ŋa gɛ kazɔ́ɔ riké. 23 Amá a nyáázɩ́rɛ fɛ́yɩ́ ɖéyí‑ɖéyí, nyárɩ́ŋa nyɔ́wɛ temenuú‑daá gɛ. A ngʊ́ bɩlɛ́ gɛ ɖɛnyɛm kɩwɛ nyɔ́rɔ́ nɛ́ kɛ́ɛ temenuú, yaatá bɩ́nbá bɩnyɔ́ɔ́zɩ bɩlá temeenuú gɛ.

24 Naárʊ fɛ́yɩ́ wánbɩɩzɩ́ ɩlá kʊ́bɔnáa nɔwɔ́lɛ bɔwʊtá: wɔ́nzɔɔlɩ́ kʊ́ɖʊḿ, ikízi lííní; yáá wánmalanáa ɩdɩ kʊ́ɖʊḿ bɩka ɩkpɛɛná lííní. Mɩ́dánbɩ́ɩ́zɩ ɩlá Ɩsɔ́ɔ na liideé bɔwʊtá.

25 «Bʊrɔɔzɩ́ gɛ mɔ́ɔ́dɔ́ mɩ́ɩ́ sɩsɩ ɩ́káyɩ́tɩ mɩ́dɩ kíɖíím sɩ iɖi na ɩcɔ́ɔ weezuú‑daá nɛ́, na kúsúúdi‑rɔ. Weezuú waagɩ́lɩ kíɖíím bɩka tɔnʊʊ́ ɩkɩ́lɩ kúsúúdi, yáá bɩdɛkɛ́ɛ bɩlɛ́? 26 Ɩbɛɛmná siḿsi sɩ́ngʊrʊ́ʊ nɛ́: sidónɖuu, sɩdángʊḿ; ngʊ́ sɩdánjaa kíɖíím sɩmáárɩ kpééni‑daá, amá mɩ́jáa weení ɩwɛ ɩsɔ́ɔ́dáá nɛ́ wɛ́njɛlɩ́ɩ sɩ. Mɩ́nyɔ́ɔ́ mɩ́vɛ́yɩ́na fɔ́ɔ́zɩ́rɛ bɩkɩ́lɩ siḿsi? 27 Mɩ́dáá weení wánbɩɩzɩ kʊ ɩdɛ́ɛ ɩdɩ yɩtɩ́‑daá itúúzi iweezuú?

28 Tɔ́ɔ ngbaalá gɛ mɩ́nÿɩtɩ́ mɩ́dɩ kúsúúdi‑rɔɔzɩ́? Ɩbɛɛmná nyɩ́ɩ́dɩ na tɩdɛ́ɛ fɛ́ɛ́dɩ́tɩ‑dɛ́ɛ kazɔ́ɔ, tɩdánlaḿ tɩmɛ́rɛ, tɩdánlʊʊ, 29 amá wúro Sulemáána tɩtɩŋa na ɩdɛ́ɛ ásícé, ɩdɛ́ɛ kúsúúdí tacʊʊná tɩ. 30 A Ɩsɔ́ɔ wɔ́nzɔ́ɔ nyɩ́ɩ́dɩ tʊwɛ sinje bɩka ceré sɩ bɔsɔ́ tɩ nimíni nɛ́ lɩ́m ńŋɩnáa ɖɔ́, ɩdɔ́nzɔ́ɔ mɩ́ɩ́ bɩkɩ́lɩ bɩlɛ́? Yaraɖá bumísi‑dɩnáa mɩ́ɩ́. 31 Bɩlɛ́ nɛ́ ɩ́káyɩ́tɩ mɩ́dɩ sɩsɩ: «We gɛ ɖénɖíi. We gɛ ɖɔ́nnyɔɔ́ yáá we gɛ ɖɔ́nzuú.» 32 Wenbá baasɩ Ɩsɔ́ɔ nɛ́ mɔɔ́na kʊ balá bɩlɛ́. Mɩ́nyɔ́ɔ mɩ́jáa Ɩsɔ́ɔ nyɩ wenbí bɩjɔɔ́ mɩ́ɩ́ takáásɩ́ nɛ́. 33 Ɩjáa kaɖaa‑dɛ́ɛ, Ɩsɔ́ɔ‑dɛ́ɛ kowúrɔ́ɔ na wenbí bɩzɩɩzɛ́ɛ yɩ nɛ́. Bɩɩga wenbí rɩ́ŋa nɛ́, wánváa mɩ́ɩ́ bɩ. 34 Bɩlɛ́ nɛ́, ɩ́káyɩ́tɩ mɩ́dɩ ceré‑rɔɔzɩ́ sinje. A ceré‑dɛ́ɛ ńbɩ wɔɔgɔ́nɩ, ɩrʊ́ wánnáa wenbí sɩ ɩkpɔɔná nɛ́. Báa wɩ́rɛ wénɖé na ɖɩdɛ́ɛ ɖɩwɩɩrɛ gɛ.