23
1 Bɩlɛ́ bʊwɔ́rɔ́ gɛ Yeésu waaŋmatɩná zamɔ́ɔ na ɩwanbaaráa 2 sɩsɩ: «Mará wɩlɩɖáa na Faríízi‑dɩnáa bánlɩzɩ́ɩ kʊ anɖébi Múúsa‑dɛ́ɛ Mará kutoluú. 3 Bɩlɛ́ nɛ́, ɩlá bɩka ifu wentí rɩ́ŋa bánŋmatɩ́ mɩ́ɩ nɛ́, amá ɩ́kámáázɩ balakásɩ. Káma badánlaḿ wentí bánŋmatɩ́ nɛ́. 4 Bɔ́nvɔkɩ́ sʊʊ́tɩ yíni ńdɩ bándɩnɩ́ ɩráa faamɩ́nɩ‑rɔ, amá bɛḿ badɩtɩŋa bedéndendekiná tɩ na niiká basɩná wɛ. 5 Bánlám balakásɩ rɩ́ŋa gɛ sɩsɩ na ɩráa ɩna wɛ. Bʊrɔɔzɩ́ nɛ́, bɔ́ngbɔwʊ́ʊ tɔná bátawáa23.5 Yahúúɖúwá‑dɛ́ɛ, tɩdaá gɛ bánŋmaá Ɩsɔ́ɔ‑dɛ́ɛ tɔ́m bánɖʊ́ʊ. bándám bɛnyɛ́ na banʊ́ʊ́zɩ‑rɔ; bɩka bónzuú kpáyɩwá tɩwɛná kpɛ́ɛ́dɩ kɩ́bɩ́ɩ́zɩ́tɩ nɛ́b23.5 Yahúúɖúwá‑dɛ́ɛ, kpɛ́ɛ́dɩ wánwɩlɩ́ɩ kʊ sɩsɩ ɩrʊ́ fóo Ɩsɔ́ɔ‑dɛ́ɛ Mará. 6 Kʊ́bɔ́ɔ‑ɖɩdáarɛ gɛ bɔɔzɔ́ɔ́lɩ cɔwʊ́ʊ ɖíínawá‑daá na Ɩsɔ́ɔ yaazɛɛɖɛ́, 7 bɩka bɔzɔɔlɛ́ɛ ɩráa wɔ́nɖɔɔzɩ́ wɛ bɛ́nzɛɛ́ wɛ nɛ́, bɩka bánÿaá wɛ sɩsɩ «Ɩsɔ́ɔ‑dɛ́ɛ tɔ́m wɩlɩɖáa kʊ́bɔnáa» zamɔ́ɔ‑daá. 8 Bɩɩga mɩ́nyɔ́ɔ́ nɛ́, ɩ́kɔ́sɔ́ɔ́lɩ sɩsɩ báyaa mɩ́ɩ sɩsɩ Ɩsɔ́ɔ‑dɛ́ɛ tɔ́m wɩlɩɖáa kʊ́bɔnáa, káma Ɩsɔ́ɔ‑dɛ́ɛ tɔ́m wɩlɩɖʊ́ kʊ́bɔnɩ́ kʊ́ɖʊḿ gɛ mɩ́wɛná, bɩɩga mɩ́rɩ́ŋa nɛ́, koobíya gɛ mɩ́gɛ́ɛ. 9 Ɩkáyaa naárʊ adɛ laadɔ́ɔ‑rɔ sɩsɩ mɩ́jáa, káma Caawʊ́ kʊ́ɖʊḿ gɛ mɩ́wɛná, ɩnáá Caawʊ́ ɩwɛ ɩsɔ́ɔ́dáá nɛ́. 10 Íkéyéle bayáa mɩ́ɩ́ sɩsɩ "Nɩ́báádɛɛrʊ́", káma Nɩ́báádɛɛrʊ́ kʊ́ɖʊḿ gɛ mɩ́wɛná, ɩnaá Lɛɛrʊ́. 11 Mɩ́dáá kʊ́bɔnɩ́ ɩ́bɩsɩ mɩ́dɛ́ɛ bɔwʊtá‑dʊ́ʊ. 12 Weení ɩrɩ́ŋa wángbaazɩ́ ɩdɩ nɛ́, béndisí yɩ, bɩka weení ɩrɩ́ŋa wéndisí ɩdɩ nɛ́, bángbaazɩ́ yɩ.
13 Nbusú ɖamáana mɩ́ɩ Mará wɩlɩɖáa na Faríízi‑dɩnáa munáávikíwá. Mɩ́ndɔ́ɔ ɩráa Ɩsɔ́ɔ́‑dɛ́ɛ Kowúrɔ́ɔ wɔnɔɔ́. Mɩ́dɩ́tɩŋa mɩ́dánzʊʊ, ngʊ́ mídénÿelí wenbá bɔzɔɔlɛ́ɛ nɛ́ basʊ́ʊ.
[ 14 Nbusú ɖamáana mɩ́ɩ Mará wɩlɩɖáa na Faríízi‑dɩnáa munáávikíwá. Mɩ́nlɛɛ́ leeláa‑jɔ́ wenbíyɔ́ɔ rɩ́ŋa bɔwɛná nɛ́, bɩka mɩ́nlám sʊlʊ́ńdɩ kɩ́bɩ́ɩ́zɩ́tɩ ɖʊɖɔ na bana mɩ́ɩ́. Bʊrɔɔzɩ́ gɛ mɩ́dɛ́ɛ tɔ́m fʊʊnáa wánbáázɩ bɩlá ɖóni.] 15 Nbusú ɖamáana mɩ́ɩ Mará wɩlɩɖáa na Faríízi‑dɩnáa munáávikíwá. Mɩ́nɖɛɛ́ nɩ́báánɩ báa lé tenkú‑rɔ na adɛ laadɔ́ɔ‑rɔ na sɩsɩ iyuú naárʊ ɩlá túúbá. Na a mííyúu yɩ, ɩbɩsɩná yɩ nimíni ɩrʊ́ ɩdɛ́ɛ‑ńdɩ waagɩ́lɩ mɩ́ɩ nabʊ́lɛ nɛ́. 16 Nbusú ɖamáana mɩ́ɩ nɩ́báadɛɛráa njɛma wenbá mɩ́ndɔ́m sɩsɩ: "A ɩrʊ́ wooɖuuná Ɩsɔ́ɔ‑dɛ́ɛ ɖaána bɩdɛkɛ́ɛ tɔ́m, amá a ɩrʊ́ wooɖuuná Ɩsɔ́ɔ‑dɛ́ɛ ɖaána‑daá siká, asée waalá wentí wooɖuuná sɩsɩ wánlám nɛ́. 17 Kʊjʊʊ́ fɛ́yɩ́‑dɩnáa njɛma mɩ́ɩ. Ngbetíi waagɩlɩ ná gɛ ye? Siká yáá Ɩsɔ́ɔ‑dɛ́ɛ ɖaáná wenká keeyéle gɛ siká waabɩ́sɩ Ɩsɔ́ɔ‑dɛ́ɛ ńbɩ nɛ́? 18 Mɩ́ndɔtɔ́m ɖʊɖɔ sɩsɩ: «A ɩrʊ́ wooɖuuná Ɩsɔ́ɔ sarásɩ yaalanɖɛ́, bɩdɛkɛ́ɛ tɔ́m, amá a ɩrʊ́ wooɖuuná sarɔ́ɔ baalá batɩ́nɩ kɔrɔ nɛ́, aséé waalá wentí wooɖuuná sɩsɩ wánlám nɛ́. 19 Njɛma bana! Ngbetíi waagɩlɩ ná gɛ ye? Sarɔ́ɔ yáá kayaalanɖɛ́ wenɖé diiyéle gɛ sarɔ́ɔ waabɩ́sɩ Ɩsɔ́ɔ‑dɛ́ɛ ńbɩ nɛ́? 20 Bɩlɛ́ nɛ́, ɩdɩlɩ́ sɩsɩ weení wooɖuuná Ɩsɔ́ɔ sarásɩ yaalanɖɛ́ nɛ́ wooɖuuná wenbí rɩ́ŋa bʊwɛ ɖɩrɔ nɛ́. 21 Weení wooɖuuná Ɩsɔ́ɔ‑dɛ́ɛ ɖaána nɛ́, wooɖuuná wenbí rɩ́ŋa bʊwɛ kadaá nɛ́. 22 Weení wooɖuuá Ɩsɔ́ɔ‑daá nɛ́, wooɖuuná Ɩsɔ́ɔ‑dɛ́ɛ kowuro‑gbelé na Ɩsɔ́ɔ weení ɩjɔɔ́ kɔrɔ nɛ́.
23 Nbusú ɖamáana mɩ́ɩ Mará wɩlɩɖáa na Faríízi‑dɩnáa munáávikíwá. Mɩ́nvɛrɩ́ɩ yáázɩwá mɩ́nlanáa ɖóózi nɛ́‑dɛ́ɛ fuú‑rɔ kʊ́ɖʊńbɩ, bɩka mɩ́ngbɛɛnáa wenbí bɩjaarɛ́ɛ nɛ́ Mará‑daá: bɩlɛ bɩnáábɩ́lɛ́: toovonúm fúu, kʊnyɔnɩɩrɛ́ na ɩrʊ́ ɩsɩmná Ɩsɔ́ɔ. Tɩlɛ́ gɛ bʊmɔɔ́ná ɩɖaaná na ɩtásɩ tɩɩganáa. 24 Nɩ́báadɛɛráa njɛma, mɩ́njɛtɩ́ lɩ́m mɩ́nlɩzɩ́ bɔɖʊʊ́ bɩká mɩ́nnyɔɔ́ mɩ́ngbɛdɩ́na raakúm!
25 Nbusú ɖamáana mɩ́ɩ́ Mará wɩlɩɖáa na Faríízi‑dɩnáa munáávikíwá. Mɩ́nÿaalɩ́ yíka na nɩnyɔɔ́ wɔ́rɔ́ bɩka bɩdaá na ŋmɩɩlɩ‑gbɩná na wenbí mɩ́ɩ́lɛ́ɛ́ná ɖóni nɛ́. 26 Faríizi‑dʊ́ʊ njɛm! Yaalɩ yíka‑daá naanɩ́ na kɔwɔ́rɔ́ ɖʊɖɔ ɩlá ɖacɩrɩ‑cɩrɩ.
27 Nbusú ɖamáana mɩ́ɩ́ Mará wɩlɩɖáa na Faríízi‑dɩnáa munáávikíwá. Mɩ́jɔɔ́ɔ gɛ nyazɩ bɔɔláánɩ baavʊ́láázɩ tɩ nɛ́. A ɩrʊ́ bɛɛ́na tɩwɔ́rɔ́, tɩjɔɔ́ɔ bɛɛḿ, amá tɩdaána ɩsɩɖáa mʊwá na kpɩná áńɖázɩ́ nɛ́. 28 Bɩlɛ́ ɖʊɖɔ gɛ mɩ́nyɔ́ɔ́, ɩráa ɩzá‑daá nɛ́, bɛbɛɛ́na mɩ́ɩ́ sɩsɩ toovonúm‑dɩnáa, ngʊ́ nbɛ́ɛ́m nɛ́, mɩ́dáá nɛ́, munááfíísi na kidaavééníti riké gɛ.
29 Nbusú na mɩ́ɩ́ Mará wɩlɩɖáa na Faríízi‑dɩnáa munáávikíwá. Mɩ́nyɔ́ɔ́ wenbá mɩ́nmáa anɖébiwá‑dɛ́ɛ bɔɔláánɩ bɩka mɩ́nnyɔɔzɩ́ toovonúm‑dɩnáá‑dɛ́ɛ ńdɩ 30 bɩka mɩ́ndɔ́m sɩsɩ: «A ɖáfʊ́nwɛ ɖájáajaanáa‑dɛ́ɛ sáátɩ, ɖátátasɩná wɛ ɖɩkʊ anɖébiwá. 31 Bɩlɛ́ gɛ mɩ́dɩ́tɩŋa mɩ́nlɩzɩ́ɩ mɩ́dɩ seríya sɩsɩ mɩ́gɛ́ɛna wenbá baagʊ anɖébiwá nɛ́ bebíya. 32 Bɩlɛ́ nɛ́ ɩdɛ́ɛ́zɩ wenbí mɩ́jáanáa waabáázɩ nɛ́. 33 Mɩ́ɩ́ ɖomáa bɔɔzá ana ɖɔ́! Nŋɩ́nɩ́ gɛ sɩ ɩlá na ɩlɩ́ɩ azáába nɩgbamʊʊ́ narɩ́ɩ‑daá? 34 Bʊrɔɔzɩ́ gɛ méngediríi mɩ́ɩ́ anɖébiwá, asénsi‑dɩnáa na Mará wɩlɩɖáa. Mɩ́ngʊ́ʊ badaá nɛbɛ́rɛ, ɩká nɛbɛ́rɛ ɖɛ́nɩ abɛlɩ́ akɔ́ɔ‑rɔ basɩ́. Mínzutí badaá nɛbɛ́rɛ agbáázá mɩ́dɛ́ɛ Ɩsɔ́ɔ yaazɛ́ɛɖɛ́ bɩka ɩtɩ́nɩ bɔwɔ́rɔ́ ɩlɩ́ɩ tɛ́ɛ́dɩ ɩsʊ́ʊ tɛ́ɛ́dɩ 35 na bɩka ɩráa toovonúm‑dɩnáa, kɔgbɔɔ Abílu ɩrʊ́ toovonúm‑dʊ́ʊ hálɩ ngɔ́nɩ Sákárɩ Barasíi biyaalʊ́ weení mɩ́ɩ́gʊ́ yɩ Ɩsɔ́ɔ‑dɛ́ɛ ɖaána na sarásɩ yaalanɖɛ́ bɔlɔwʊ́táá nɛ́ bɛdɛ́ɛ azimá‑dɛ́ɛ nɩgbamʊʊ́ narɩ́ɩ ití mɩ́rɔ́. 36 Ménveerím mɩ́ɩ́ toovonúm sɩsɩ zaamáánɩ kɩna kɩdɛ́ɛ ɩráa‑rɔ gɛ nbusúwá tɩḿ tɩrɩ́ŋa ɖɔ́ sɩ tití.
37 Yerusalɛ́m, Yerusalɛ́m, nyɔ́ɔ́ weení nyángʊ́ʊ anɖébiwá bɩka nyɔ́nÿɔwʊ́ʊ tɩndɩnáa bɔ́ nɛ́, bʊrɔ nŋɩ́nɩ́‑nŋɩ́nɩ́ gɛ mɔ́ɔ́zɔ́ɔ́lɩ sɩ modúúzi nyébíya nŋɩ́náa konɖóówu wónduuzí kibíya kigelíni‑dɛ nɛ́, amá nyéégízi. 38 Bɩlɛ́ nɛ́, Ɩsɔ́ɔ wándalɩnáa mɩ́ɩ́ mɩ́ɖaána. 39 Káma ménveerím mɩ́ɩ toovonúm sɩsɩ kɛtɛngɛrɛ mɩ́dándanáa ma hálɩ wɩ́rɛ wenɖé sɩ ɩtɔ́ sɩsɩ: «Sám mɔɔ́na kʊ weení ɩgɛrɛŋɛ na Ɖádʊ́ʊ yɩ́ɖɛ‑daá nɛ́.»