3
Kavasu ka Habaku
1 Naha ɗa kavasu ka Habaku matsumate ka u yain n ulingu u Shigiyonotu.
2 Magono ma Zuba, n pana ta̱ alabari a ili iꞌya vu yain,
aku uwonvo u ka̱na̱ mu.
Gogo-na, doku vu yain ikunesavu yi a aꞌayin a tsunu.
Aꞌayin a ɗa baci vu yain upan n a̱tsu,
ciɓa, vu pana asuvayali a tsunu.
3 Kashila̱ ka wuta̱ a Teman a uyamba u Edom wa tuwa̱,
Uza u Uwulukpi wa wuta̱ a masasa ma Paran wa tuwa̱.
Tsupige tsu ne tsu kimba̱ ta̱ zuba;
likimba kpam u shaɗangi n icikpali i ne.
Sela
4 U tuwa̱ ta̱ n ulaɗa yavu katyashi;
katyashi ki ka wakana̱sa a akere a ne,
a asu u ɗa ucira u ne wa̱ri ukpawin.
5 U suku ta̱ usaru a kapala ka ne,
usaru u ukpa̱ kpam wa tono yi.
6 An u shamgbai, likimba gba̱ɗa̱ ta̱,
an u weɓelei, u zuwa ta̱ kakuma̱ ka ama ka giruwa̱i.
U ta̱sa̱sa̱i nsasa n aga̱la̱la̱ yuku-yuku n ɗa ma̱ri pini tun caupa.
Pini ɗa ire i ne iꞌa̱ri tun caupa.
7 N wene ta̱ ama ɗa aꞌa̱ri ndishi a atani aza a Kushan a asuvu a upana u ikyamba,
aza a Midiya a ka jeke ikyamba adama a uwonvo.
8 Magono ma Zuba, va yan upan n aga̱ta̱ ko ayenete a mini ɗa?
Va suɗugba asuvu n mala ɗa?
An vu yuwa̱i adoki a vunu
na̱ nringongo ma adoki a vunu, vu tuwa̱ ta̱ adama a iwauwi.
9 Vu foɓuso ta̱ utaun u vunu,
aku vu foɓusoi vu taku aya.
Sela
An katyashi ka vunu ka wakanai aku iyamba i ɓatsai aga̱ta̱ a wuta̱i.
10 Nsasa n pige n wene vu, aku a ka jeke ikyamba.
A ro ta̱ mini ma pige;
mala ma̱ri a mawura̱,
aku aɓali a ꞌya̱nga̱i ubana a zuba.
11 Kaara n uwoto a shamgba ta̱ asu u te a zuba,
aꞌayin a ɗa aya a vunu ka wurusa n a laɗi
kaɓolo n katyashi ka masari ka vunu.
12 Asuvu a upan u vunu vu ɓa̱tsa̱mgba̱na̱ ta̱ likimba,
n asuvu a shen a vunu kpam vu kpatsa ta̱ kakuma̱ ka ama.
13 Vu tuwa̱ ta̱ adama ɗa vu wauwa ama vunu,
vu wauwa uza ɗa vu tsunki manivi.
Vu wuna ta̱ uzapige u uyamba u ama a cingi
aku vu filikpa̱ yi ili iꞌya i bidyai a kaci hal a ubana a aꞌene.
Sela
14 Vu tawa ta̱ kaci ka uza u kuvon n kaya ka ne,
aꞌayin a ɗa a tuwa̱i yavu kabatara̱kpa adama a wacinsa tsu.
A ka yan maza̱nga̱ yavu aza ɗa a ryafai
aza a unambi a usokongi.
15 Va wala n adoki a vunu vu pasai mala,
vu gba̱ɗa̱ ta̱ aɓali a mini.
16 An n panai ukuna u nala vi, ikyamba i va̱ i gigira̱ ta̱,
ajiri a va̱ a je ta̱ dem adama a uwonvo.
Atele a ikyamba a va̱ a kuwa̱ ta̱,
mpa pini kushani, aku aꞌene a va̱ a gita̱i udagatsa.
Gba̱ n nala, ma shamgba ta̱ shiriri n vana kain ka upana u ikyamba,
u ɗa wa rukpa̱ a asu u ama ɗa a ka tukuso tsu kuvon.
17 Ko an u wokoi nɗanga n kapopi n topo wa,
kpam atyaci a cinwi a matsa wa,
nɗanga n zayitum kpam n na̱ka̱ ilimaci wa,
ashina kpam a matsa ilikulya wa,
ncon n buwa pini a asu u nkulatsu n le wa,
kpam anaka dem aꞌa̱ pini asu u nvain u le wa,
18 gba̱ n nala ma yan ta̱ maza̱nga̱ a asu u Magono ma Zuba,
n yain ipeli n Kashila̱ Kawauwi ka va̱.
19 Magono ma Zuba Uzapige aya ucira u va̱;
u gonuko ta̱ aꞌene a va̱ a wokoi yavu aꞌene a maren,
u zuwa mu n walai yaa a zuba u masasa yavu maren.
Udani ubana asu u uzapige u ashipi: A shipi u ɗa n imolo n igogi.