4
Masasa ma Magono ma Zuba
(Isha 2:2-4)
1 A a'ayin a ɗa a ka tuwa̱
masasa ma Kuwa ku Kashila̱ ku Magono ma Zuba
ma woko ta̱ masasa ma ma lai karinga̱;
a ka ra̱ɗugba̱ ta̱ ma ma lai aga̱la̱la̱.
Ama a ushani a ka ta̱sa̱ ta̱ ubana pini tyoku u aga̱ta̱ a ɗa a ka yene.
2 Kakuma̱ ka ama ushani a ka tuwa̱ ta̱ a dana,
<<Tuwa̱i tsu banai a masasa ma Magono ma Zuba,
ubana a Kuwa ku Kashila̱ ku Yakubu.
Wa wenishike tsu ta̱ ire i ne,
tsu wala kpam a ure u ne.>>
Kpaci mele ma wuta̱ ta̱ a Sihiyona,
a Urishelima kpam kadyanshi ka
Magono ma Zuba ka tambura a ubana a asu u ama.
3 Wa yanka ta̱ ama ushani afada
kpam wa tuko ta̱ makorishi ma ibili
ma uyamba u ucira u ɗa wa̱ri mɓa̱ri.
A gonuko iburundu i le mberu ma ucimba,
asovu a le kpam mmuwun ma ugyara nɗanga.
Uyamba wa doku wa ra̱ɗugba̱ burundu
u ne a uyamba u roku wa,
kpam a ka doku a rotsongusu ure u kuvon wa.*4:3 Kondo: Isha 2:4; Juw 3:10
4 Ya dem wa dusuku ta̱ yaa
u lyai ilimaci i katyaci ka cinwi
n maɗanga ma kapopi a kuwa ku ne.
Uza wa̱ la wa giruwusa̱ yi wa,
kpaci Magono ma Zuba ma Ucira Gba̱ aya u danai nala.
5 Ko an u wokoi gba̱ ama
ya dem wa tono ta̱ ameli a ne;
shegai a̱tsu tsa tono ta̱ Magono ma Zuba
Kashila̱ ka tsunu a ubana.
Magono ma Zuba ma gonuko ta̱ ama a ne a kuwa
6 Magono ma Zuba ma danai, <<A kain ka nala ki,
ma ɓolomgbono ta̱ awunu,
aza ɗa n bankai tsuwula̱,
wata, aza ɗa n yain mavura.
7 Ma gonuko ta̱ awunu ama va̱ aza ɗa a buwai,
aza ɗa a lokoi kpam a woko kakuma̱ ka ama ka ucira.
Magono ma Zuba ma lya ta̱ tsugono
a kaci ka le a masasa ma Sihiyona
ili i'ya i bidyai a kain kala ki ubana.
8 Avu Urishelima, kunukuzuba ku uza u uwundya ushiga,
asu u kpawan u aza a Sihiyona,
asu u ɗe ɗa tsugono tsu cau tsa gono,
tsugono tsu nala tsi tsu ɗe tsa aza a Urishelima.>>
9 Ndya i zuwai gogo-na ya sa̱ cika,
i'a̱ri n magono wa ɗa?
Uza u na̱ka̱ adooki u ɗe u kuwa̱ ɗe ɗa?
Adama a nala ɗa i'a̱ri a asuvu a upana u ikyamba
yavu uka ɗa wa̱ri asuvu mɓa̱la̱ ma ilimaci.
10 Aza a Sihiyona, ikai n ucira,
yavu uka u ɗa wa̱ri nkuɗi ma ilimaci,
kpaci gogo-na u ka̱na̱ ta̱ i a̱sa̱ka̱ a ilyuci yi,
i bana i dusuku a kakura̱.
Ya bana ta̱ a Babila,
ɗe ɗa a ka wauwa ɗa̱.
Ɗe ɗa Magono ma Zuba ma wusa ɗa
a kukere ku atokulalu a ɗe.
11 Shegai gogo-na uyamba ushani
a ɓolomgbono ɗe a ka yan tsilala n a̱ɗa̱.
A dana, <<U ka̱na̱ ta̱ Urishelima u woko n nshinda̱!
A̱sa̱ka̱ tsu wene uwono u ilyuci yi.>>
12 Shegai a reve
uyanwusa u Magono ma Zuba n afoɓi a ne wa,
kpaci u ɓolomgbono le ta̱ yavu ndolu ma ilya,
ilya i'ya a bankai asu u ulapa u ilya.
13 Magono ma Zuba ma danai,
<<'Ya̱nga̱i i kpatsa uyamba, aza a Sihiyona!
Kpaci ma na̱ka̱ ɗa̱ ta̱ avana a urim,
a'ene a ɗe kpam a urim u shili,
adama ɗa i kpatsa uyamba ushani yuku-yuku.
Pini nala utsa̱ri u le u ɗa a bokoi
ya neke ta̱ u ɗa gba̱ a asu u Magono ma Zuba,
udukuyan u le kpam asu u Uzapige u likimba gba̱.>>