Ukanikorongi u Kagita̱ Ubana a Asu u
Aza a Korintiya
Ukukpa̱ u kadyanshi
Bulus korongu ta̱ ikanikorongi i re ubana a asu u Atoni a Korintiya. Korintiya ilyuci iꞌya i pige kpam a ikengi i kushiva̱. Ama a ɗa a ka rongo pini a wuta̱ ta̱ a asu kau‑kau. Kala ka ilyuci ki ka̱ri n karinga̱ wa adama a ukuna u cingi u ɗa wa̱ri pini. Kuwa ku kameli ka a ka isa̱ Afurodita ka iryoci i tsicingi tsu ilyuci yi, kpaci a zuwa ta̱ pini ashankala kazu ka te adama a aza ɗa a ka gbashika yi. Bulus bana ta̱ a ilyuci yi u yain manyan ma uyan atani tsa̱ra̱ u tsa̱ra̱ ikebe iꞌya wa lya n u wenishiki ama a ukuna u Yesu. Ama ushani aza a Korintiya yi aza a unambi a ɗa, shegai aza roku azapige a ɗa ama a reve ta̱ n ele.
A ukanikorongi u na vi Bulus wenishike ta̱ tyoku ɗa Atoni a ka rongo a asu u ɗa ama a ka yansa ukuna u cingi cika. U da Atoni a gan ta̱ a rongo na̱ ndishi n shinga, kotsu a rongo aɓolo aɓolo a ɗa a ka shila̱ka̱na̱sa̱ wa. U wenishike ta̱ u da kotsu Atoni a yansa unyushi u tsishankala ko ukuna u cingi u roku wa. U dansa ta̱ tyoku ɗa Kashila̱ ka ciga iyolo i rongo. A ukanikorongi u na vi, Bulus wenishike ta̱ tyoku ɗa uciga u mayun wa̱ri n ucira. U wenishike ta̱ kpam tyoku ɗa ulya u kayala u mayun wa̱ri. A makorishi, u wenishike ta̱ tyoku ɗa a ꞌya̱nga̱sa̱i Yesu a ukpa̱, nala dem atoni a ne a ka tsa̱ra̱ utsa̱ra̱ u kaci.
Utsa̱ra̱ u kaci u Yesu a ukpa̱ u tuko ta̱ Atoni ucira u uma. Tagara̱da u na u tonuko tsu ta̱ an utsa̱ra̱ u kaci u Kirisiti u lai uciga u ili i likimba, kpam nala dem Atoni a ka fuɗa ta̱ a ꞌyuwan ili i likimba a toni Kirisiti.
Ili iꞌya iꞌa̱ri a tagara̱da u na vi
Idyani n kavasu ka Bulus (1:1-9)
Udani a kaci ka uɓolomgbono kaci (1:10–4:21)
Ukpa̱ɗa̱ u upanamgbana u aza a kuwa a te (5:1–7:40)
Una̱ka̱ Kashila̱ tsupige a una̱ u kameli (8:1–11:1)
Ulya u kayala n ukuna u kuwa ku Atoni (11:2–14:40)
Utsa̱ra̱ u kaci u Kirisiti a ukpa̱ (15:1-58)
Kune ubana a asu u aza a unambi (16:1-4)
Afoɓi a nwalu n Bulus (16:5-12)
Ili iꞌya ya ɓa̱la̱ Bulus n idyani (16:13-24)
1
Ukukpa̱ u kadyanshi
1 Mpa Bulus uza ɗa wa koronku ɗa̱ ukanikorongi u na vi, utoku u tsunu Sasatsani dem wa dana̱sa ɗa̱ ta̱. Kashila̱ ka isa̱ mu ta̱ n woko kasuki ka Yesu Kirisiti Kawauwi adama a ɗa nala Kashila̱ ka cigai u woko.
2 Eɗa̱ Kuwa ku Atoni ku Kashila̱ ka ka̱ri a Korintiya ka ma koronku. Kashila̱ ka isa̱ ɗa̱ ta̱ i woko ama a uwulukpi a ne. U gonuko ɗa̱ ta̱ uwulukpi a asu u Yesu Kawauwi. U yan ta̱ dem nala a asu u ama a ɗa gba̱ a ka lyaka kala ka Yesu Kawauwi kayala a asu kau‑kau. Kawauwi aya Asheku a tsunu kpam dem n Asheku a le.
3 A̱sa̱ka̱ Kashila̱ Tata u tsunu n Asheku Yesu Kawauwi u na̱ka̱ ɗa̱ ukuna u shinga na̱ ndishi n shinga.
Bulus cikpai Kashila̱
4 N tsu cikpa ta̱ Kashila̱ ka va̱ adama a kune ku ushani ka u ne ɗa̱, an i wokoi ama a Yesu Kawauwi gogo‑na. 5 I yan ta̱ utsa̱ri a ili dem, hal n gba̱ kadyanshi n ureve dem adama a ɗa iꞌa̱ri kaɓolo n eyi. 6 Nala u wenike ta̱ la vi ili iꞌya n tonuko ɗa̱ a kaci ka ne mayun ɗa. 7 Adama a nala i wusha ta̱ gba̱ kune ku Kulu ku Kashila̱ ka u gain i tsa̱ra̱ hal n i vani ugono u Yesu Kawauwi Asheku a tsunu. 8 Wa zuwa ɗa̱ ta̱ i gbama hal ubana a makorishi tsa̱ra̱ Kashila̱ ka ka̱na̱ ɗa̱ n unyushi wa kain ka baci Yesu Kawauwi Asheku a tsunu wa gono. 9 Mayun ɗa Kashila̱ ka yanka ɗa̱ nala, kpaci u tsu yansa ta̱ gba̱ ili iꞌya baci dem u danai, kpam u ɗanga̱sa ɗa̱ ta̱ i yain tsije n Maku ma ne; wata, Yesu Kawauwi Asheku a tsunu.
Atoni a pecenei aɓon aɓon
10 Ama a va̱, ma folo ɗa̱, adama a kala ka Yesu Kawauwi Asheku a tsunu, gba̱ ɗe i panamgbana n atoku. Kotsu i pecene kaci ka ɗe aɓon kau‑kau wa, shegai ɓolomgbonoi kaci ka ɗe tsa̱ra̱ i woko n katakasuvu ka te n ure u uyawunsa u te. 11 Ama a va̱, ama roku aza ɗa aꞌa̱ri a kuwa ku Kuluwi*Kuluwi uka ɗa, kpam a dana ko ama yi ama a ne a ɗa ko agbashi ko aza ɗa a ka rongo a kuwa ku te wa. a tonuko mu ta̱ a da eɗa pini ya yamgbana kananamgbani. 12 A da ya dem a asuvu a ɗe wa dansa ili kau‑kau. Uza roku u dana, “Mpa Bulus ɗa ma tono.” Uza roku u dana, “Mpa Apolo ɗa ma tono.” Uza roku u dana, “Mpa Bituru ɗa ma tono.” Uza roku kpam u dana, “Mpa Kirisiti Kawauwi ɗa ma tono.”
13 A ka fuɗa a peci Kawauwi uza ɗa wa̱ri uza u te a asu kau‑kau ɗa? Aꞌa! Bulus kuwa̱ adama a ɗe a mawandamgbani ɗa? Aꞌa! A lyuɓugu ɗa̱ tsa̱ra̱ i woko atoni a Bulus ɗa? Aꞌa! 14 N cikpa ta̱ Kashila̱ an bawu n lyuɓugi ko uza u te u ɗe, shegai Kirisibu n Gayu. 15 Gogo‑na ko uza wa dana a lyuɓugi yi a kala ka va̱ wa. 16 (N ciɓa ta̱ gba̱m, n lyuɓugu ta̱ dem Isitifanu n aza a kuwa a ne gba̱, shegai ma fuɗa ma ciɓa an n lyuɓugi aza roku kpam wa.) 17 Kawauwi ka suku mu n lyuɓugu ama wa. Shegai u suku mu ta̱ n yain Kadyanshi ka Shinga. Kpam aꞌayin a ɗa baci ma yan Kadyanshi ka Shinga ki, n tsu yan ka n ugboji u ama wa, kpaci ma ciga ucira u ukpa̱ u Kawauwi a mawandamgbani u woko u gbani wa.
Kawauwi ka ucira n kakiri ka Kashila̱
18 Ama ɗa aꞌa̱ri a ure u ubana a ukpa̱ a pana baci akani a ukpa̱ u Kawauwi, wa woko ta̱ utengeshi ara le. A̱tsu kpam aza ɗa Kashila̱ ka wauwusa, tsu pana baci, ucira u Kashila̱ u ɗa. 19 A korongu ta̱ a Tagara̱da u Kashila̱:
“Ma wacinsa ta̱ kakiri ka aza ɗa a bidyai kaci ka le aꞌa̱ri n kakiri.
Ma ka̱ngu ta̱ ureve u arevi.” ◊Isha. 29:14.
20 Ndya kalen ka likimba u ayawunshi, n awenishiki a mele, n aza a kananamgbani ka ukuna? Kashila̱ ka zuwa le ta̱ a wokoi ili i gbani kpam u wenikei kakiri ka le ka woko ka gbani. 21 Kashila̱ uza ɗa wa̱ri n kakiri u bidiga ta̱ kaci ka ne wa a̱sa̱ka̱ ama a likimba u na a yain manyan n kakiri ka le a boli yi hal a wene yi wa. A una̱ u nala, aku u gonoi u ɗanga̱sai u wauwa aza ɗa a wushuki n kadyanshi ka tsu yain kuɓari, ka ka̱ri yavu utengeshi. 22 Aza a Yahuda a tsu zama ta̱ a wene ikunesavu tsa̱ra̱ u wenike le Kashila̱ ka yan ta̱ manyan. Awulawa a tsu ciga ta̱ a tsa̱ra̱ kakiri. 23 Adama a nala, an tsu yain kuɓari ku Kawauwi ka kuwa̱i a mawandamgbani, aza a Yahuda a bidya ta̱ u ɗa unyushi u ɗa, Awulawa kpam a bidyai u ɗa ili i gbani. 24 Shegai a asu u aza ɗa Kashila̱ ka isa̱i, gba̱ aza a Yahuda n Awulawa, akani yi a ɗa na: Kawauwi, aya ucira n kakiri ka Kashila̱. 25 Ko Kashila̱ ka̱ baci n utengeshi, u la ta̱ ya dem kakiri, kpam ko wa̱ baci bawu ucira, u la ta̱ ya dem ucira.
26 Ama a va̱, ciɓai tyoku ɗa iꞌa̱ri an Kashila̱ ka ɗanga̱sa ɗa̱. Ama a likimba u naha a yawunsa an ama ushani a asuvu a ɗe aꞌa̱ri n kakiri wa. Ama ɗa aꞌa̱ri azapige a asuvu a ɗe aꞌa̱ gan wa. Ama ɗa aꞌa̱ri aza a kuwa ku tsugono a asuvu a ɗe aꞌa̱ gan wa. 27 A una̱ u nala, Kashila̱ ka ɗanga̱sa ta̱ ili iꞌya likimba danai ili i utengeshi iꞌya tsa̱ra̱ u nei aza ɗa a bidyai kaci ka le aꞌa̱ri n kakiri uwono. U ɗanga̱sai kpam aza ɗa bawu aꞌa̱ri n ucira tsa̱ra̱ u nei aza ɗa aꞌa̱ri n ucira uwono. 28 U ɗanga̱sai ili iꞌya ama a likimba a goroi a yawunsai yavu i maci iꞌya wa ko kpam yavu ili i roku iꞌya wa gba̱ gba̱, aku u yankai ili i nala yi manyan a asu u ili iꞌya a wenei n kalen tsa̱ra̱ i woko i gbani. 29 U yan ta̱ nala tsa̱ra̱ ko uza u yain ara̱ɗi a kapala ka ne wa. 30 Kashila̱ ka ka zuwa ɗa̱ i woko ili i te n Yesu Kawauwi. U zuwai Kawauwi eyi kaci ka ne u woko kakiri adama a ulya u kapala u tsunu. Adama a ne a ɗa Kashila̱ ka wusha tsu. U gonuko tsu uwulukpi, kpam u nekei kaci ka ne tsa̱ra̱ u wutukpa̱ tsu a asu u unyushi u cingi. 31 Tagara̱da u Kashila̱ u dana ta̱, “Uza ɗa wa ciga u yain ara̱ɗi, u yain a ɗa a ili iꞌya Asheku a yain koshi.”