1 Gba̱ uza ɗa baci wushuki Yesu Kirisiti Kawauwi ka, vuma u nala vi maku ma Kashila̱ ma. Kpam uza ɗa baci wa ciga Tata, wa ciga ta̱ la vi mmuku n ne. 2 Tyoku ɗa tsa reve an tsa ciga mmuku n Kashila̱ u ɗa na: tsu cigi Kashila̱ kpam tsu pana udani u ne. 3 Uciga u Kashila̱ u ɗa tsu pana udani u ne, kpam udani vi u wuyana utono wa. 4 Maku ma Kashila̱ dem ma lya ta̱ kaci ka likimba, kpam upityanangu u tsunu u ɗa u tsu na̱ka̱ tsu ulya u kaci u nala vi. 5 Ya wa lya kaci ka likimba? She uza ɗa u wushuki Yesu Maku ma Kashila̱ ma.

6 Yesu Kawauwi aya u tuwa̱i n mini ma ne na̱ mpasa ma ukpa̱ n ne. N mini ma u tuwa̱i koshi wa, shegai gba̱ n mini mi kaɓolo na̱ mpasa. Kulu ku dana ta̱ dem ukuna u na vi mayun ɗa, kpaci Kulu ki mayun ɗa. 7 Ili i tatsu i na yi i wenike tsu ta̱ ukuna u mayun a kaci ka Yesu, 8 iꞌya: Kulu, n mini, na̱ mpasa, kpam kadyanshi ka te ka a yain. 9 Tsu tsu wushuku ta̱ n ama aꞌayin a ɗa baci a danai ukuna wa̱ ta̱ mayun, shegai ili iꞌya Kashila̱ ka danai i tsu la ta̱ ucira, kpam u yanka tsu ta̱ kadyanshi ka mayun a kaci ka Maku ma ne. 10 Uza ɗa baci u wushuki n Maku ma Kashila̱, u reve ta̱ la vi ili iꞌya Kashila̱ ka danai a kaci ka Maku ma ne mayun ɗa. Shegai uza ɗa baci bawu u wushuki n ili iꞌya Kashila̱ ka danai mayun ɗa, u woko ɗe dere n uꞌisa̱ Kashila̱ uza u kaɓan. 11 Ili iꞌya Kashila̱ ka tonuko tsu iꞌya na: Kashila̱ ka na̱ka̱ tsu ta̱ uma u ɗa bawu wa̱ri n utyoku, Maku ma ne ma kpam ma zuwai uma vi u yain. 12 Uza ɗa baci wa̱ri n Maku mi, wa̱ ta̱ n uma. Uza ɗa baci bawu wa̱ri n Maku ma Kashila̱, wa̱ n uma wa.

13 Eɗa̱ aza ɗa i wushuki n Maku ma Kashila̱ eɗa ma koronku, tsa̱ra̱ i reve an iꞌa̱ri n uma u ɗa bawu wa̱ri n utyoku. 14 Tsa fuɗa ta̱ tsa tuwa̱ a asu u Kashila̱ bawu uwonvo, an tsu revei tsu folo yi baci ili iꞌya u wushuki n iꞌya, wa pana̱ka tsu ta̱. 15 U tsu pana̱ka tsu ta̱ aꞌayin a ɗa baci dem tsu folo yi, tsu reve ta̱ kpam u tsu na̱ka̱ tsu ta̱ ili iꞌya baci dem tsu folo yi.

16 Vu wene baci katoni ka ka yan unyushi u cingi u ɗa bawu wa zuwa ukpa̱, vu yanka yi kavasu tsa̱ra̱ Kashila̱ ka na̱ka̱ yi uma. Aza ɗa bawu unyushi u cingi u le wa zuwa ukpa̱, alya ma dansa̱ka pini na vi. Unyushi u cingi u ɗa pini u ɗa wa zuwa ukpa̱, shegai ma zuwa ɗa̱ i yain kavasu ubana a asu u Kashila̱ a kaci ka ama ɗa a ka yansa unyushi u nala vi wa.* Unyushi u ɗa u tsu zuwa ukpa̱ wa woko ta̱ ukpa̱ɗa̱ u uwushuku an Yesu Kawauwi ka, kpam n ukpa̱ɗa̱ u uciga atoku. She uza u unyushi vi u kpatala, aku u tsa̱ra̱ ucimbusuka̱ u unyushi vi. 17 Aꞌayin a ɗa baci dem i yain ukuna u cingi, unyushi u ɗa. Shegai gba̱ unyushi u cingi u ɗa u tsu zuwa ukpa̱ wa.

18 Tsu reve ta̱ aza ɗa aꞌa̱ri mmuku n Kashila̱ a tsu lya kelime n uyansa u unyushi u cingi wa. Maku ma Kashila̱ ma tsu kirana ta̱ n ele, adama a nala uza u cingi vi u tsu sawa le wa.

19 Tsu reve ta̱ an tsa̱ri ama a Kashila̱, shegai uza u cingi vi aya wa lya tsugono tsu likimba gba̱.

20 Tsu reve ta̱ an Yesu Kawauwi Maku ma Kashila̱ u tuwa̱i kpam u wenike tsu Kashila̱ ka mayun. Tsa̱ ta̱ kaɓolo n Kashila̱ mayun an tsa̱ri kaɓolo n Maku ma ne Yesu Kawauwi. Aya Kashila̱ ka mayun uza ɗa u tsu na̱ka̱ uma bawu utyoku.

21 Mmuku n va̱, banai dan n ameli.