1 Kotsu vu ɓarana makoshi n asuvu a shen wa, shegai vu toni n eyi yavu tata u vunu u ɗa. Vu dansa n alobo yavu atoku a vunu a ɗa va dansa n ele. 2 Yanka mmici tyoku ɗa va yanka mma u vunu. Vu yanka nkere tyoku ɗa va yanka ataku a vunu n uwulukpi.

3 Atoni a kirana n mara̱na̱ ma baci dem bawu ma̱ri n uza ɗa wa kirana n eyi. 4 Shegai wa̱ baci na̱ mmuku ko mmuku n tsikaya, u ka̱na̱ ta̱ a rotsongusu tyoku ɗa a ka wenike aza a kuwa a le ukuna u shinga u Kashila̱ a asu u ukirana n isheku i le. Kpaci nala a ka tsupa isheku i le ili iꞌya a yanka le, kpam wa zuwa ta̱ Kashila̱ ka pana kayanyan.

5 Uka ɗa baci wa̱ri mara̱na̱ ma mayun uza ɗa bawu wa̱ri n uza ɗa wa ɓa̱nga̱ yi gba̱ gba̱, icun i ne uzuwa u uma u ne a asu u Kashila̱ ɗa wa̱ri. U tsu rongo ta̱ a ufolu a asu u Kashila̱ kaara n kayin, n u yansi kavasu aꞌayin dem. 6 Shegai mara̱na̱ ma ma ciga upana u kayanyan, kakushe ka asuvu a katakasuvu ka ne, ko an wa̱ri n uma. 7 Wenishike Atoni gba̱ ukuna u na vi tsa̱ra̱ a woko uwulukpi a kapala ka ama. 8 Shegai ama a ɗa a ꞌyuwain ukirana n amaci a le hal gai aꞌuwa a le, a wushuku n iꞌya tsu wushuki wa. Ama a nala a la ta̱ gba̱m aza ɗa bawu a pityanangi unamgba.

9 Mara̱na̱ ma ma gain ma wushi uɓa̱nga̱, u gan ta̱ u yain uza ɗa u rawai ayen a amangatatsu kpam uza ɗa wa̱ri u rongoi n vali u ne mai. 10 Kpam u ka̱na̱ ta̱ u woko uza ɗa ama a ka pana n eyi adama a ili i shinga iꞌya u yain; wata, u rongo na̱ mmuku n ne mai? U tsu wusha amoci mai? U vakunku kaci ka ne a asu u ugbashika Atoni? U ɓa̱nga̱ aza ɗa a ka pana ikyamba? U yansa ili i shinga?

11 Kotsu Atoni a zuwa nra̱na̱ n ɗa bawu n yain mmici a asuvu a aza ɗa a ka ɓa̱nga̱ wa. Kpaci aꞌayin a ɗa baci uciga u vali u ꞌya̱nga̱ le wa pece le ta̱ n uyanka Kawauwi manyan, aku a cigi a yain iyolo. 12 Pini nala, unyushi wa ka̱na̱ le ta̱ cinda a kpa̱ɗa̱i utono kazuwamgbani ka a yain n Kawauwi a kagita̱.*“ukpa̱ɗa̱ utono kazuwamgbani n Yesu” Aꞌayin a nala yi kahu a ɓa̱nga̱ mara̱na̱ n ili ushani, she u yan kazuwamgbani n Atoni wa ya kpam iyolo i roku wa, kpam wa gbashika ta̱ Kawauwi. 13 A ka fuɗa ta̱ kpam a woko awonvoli, a woko aza a utono aꞌuwa a ama n a dansa̱ki ama. A ka pana ta̱ maluwa ma ukuna u ama n a dansi kadyanshi ka bawu ka gain a dansa. 14 Adama a nala, adooki a ɗa ma na̱ka̱ nra̱na̱ n kenu n na mi a ɗa a yain iyolo i roku. A matsa mmuku, a kirana n kuwa ku le, pini nala, utokulalu u le wa tsa̱ra̱ asu ɗa wa dansa kadyanshi ka gbani a kaci ka le wa. 15 Aza roku a le gba̱m a a̱sa̱ka̱ ɗe ure u mayun vi a ka̱na̱i utono ure u Kanangasi.†Kanangasi; wata, “Shetan” kala ka dem ka Kala̱pa̱nsi.

16 Uka u ɗa wa̱ri Katoni wa̱ baci n amaci aza ɗa aꞌa̱ri nra̱na̱, u ka̱na̱ ta̱ u kirana n ele, shegai u a̱sa̱nka̱ Atoni manyan wa. Atoni kpam a kirana na̱ nra̱na̱ n ɗa bawu ma̱ri n aɓa̱ngi.

17 Nkoshi n kuwa ku Atoni n ɗa n yain manyan ma le mai, u gan ta̱ a na̱ka̱ le tsupige kpam a tsupa le. Hal gai a kaci ka aza ɗa a ka dansa kadyanshi ka Kashila̱ n aza ɗa a ka wenishike ama ukuna u Kashila̱. 18 Ili iꞌya a korongi a kadyanshi ka Kashila̱ ki iꞌya na, “Va kimba̱ una̱ u kanaka aꞌayin a ɗa wa lapa ilya wa.” A doku ta̱ a korongi kpam, “Kayain ka manyan ka gan ta̱ a tsupa yi.”

19 Kotsu vu wushuku n kadyanshi ka a tuko vu a kaci ka makoshi wa, she vu tsa̱ra̱ aza ɗa a ka̱na̱ka̱i uza ɗa tukoi kadyanshi ki hal ama a re ko ama a tatsu. 20 Uza ɗa baci dem u nusai, ɓarana yi a kapala ka Atoni, tsa̱ra̱ aza ɗa a buwai a pana uwonvo u unusa. ◊Mat. 18:15-17. 21 A kapala ka Kashila̱ ka n ka Yesu Kawauwi n ka atsumate a zuba aza ɗa Kashila̱ ka ɗanga̱sai ka ma yanka vu kadyanshi ka na ki, kpam vu toni udani vi. Kotsu vu cigi uza roku kapala n uza roku wa ko vu yain kuɗyangi wa.

22 Aꞌayin a ɗa baci va ɗanga̱sa azapige, kotsu vu yain maloko vu taɗanku uza akere wa. Kotsu vu ɓolomgbono kaci ka vunu n aza roku a asuvu a unyushi u cingi u le wa, shegai vu takpa kaci ka vunu kau n uwulukpi.

23 Mini ma de ma va rongo uso wa, vu yain n vu ɓolomgbonusi kenu n mini ma cinwi adama a mɓa̱la̱ n katsuma̱ n unambi u alafiya u ɗa va yansa maco vi.

24 Ma ciga ta̱ vu reve, aza roku a tsu yan ta̱ unyushi u cingi kpam ama a reve n u ɗa a kateshe kahu gba̱m a yanka le afada. Shegai aza roku unyushi u cingi u le n kucina̱ ka ama a ka tuwa̱ reve n u ɗa. 25 Nala dem, aza roku a ɗa pini aza ɗa ama a ka reve n manyan ma shinga ma le, shegai ma aza roku n kucina̱ ka ama a ka tuwa̱ a reve n ma.