3
Yesuna adaa bimiri Moses-na bi page rabuniaaya
Nina Krais-na ame baaninu-ya, Gote-me nimi page yaaloa epe-rupa mapiraasa. Goa pisa-ga nimimi Yesu madaa kone waru salepape. Gote-me Yesu niaa piri-para mea rapasanare nipumi Gote-na miru irae aa mudu pirua niaame kone rulaminalo kogono pisa. Goa pua Gote-me abade nipu go kogono mapaasa rabu nipumi Gote-na agaa ora waru pagesa. Gote-na ruru onaa medalomare nipuna ada ru-para piri nona piane pirisimi. Goa pua abade Moses-me kogono pisa pare Yesumi go kogono wala ora misa. Goa pea pare Gote-me Yesu nipu adaa bi mina kone isa. Go adaa bimiri Moses-na adaa bi maoge yaina kone isa. Gore ada pi aare nipuna adaa bi muaaya rabu nipumi go adana bi rabuaniaaya. Go-rupare Yesuri nipuna adaa bimi ada pi aa nona piane pia. Go ada rayore kogono pape aame paaya. Goa pua oyae rayo warini aare ora Gote nipu padane pia. Gore Moses-me nipu kogono puare nipumi Gote-na pora waru ratua nipuna ruru raapu pirua agaa waru lakesa. Go rabu nipumi Gote-na orope pape-anuna agaa go rurunu lakesa. Goa pisa pare Krais-re Gote-na Si pirua nipumi Gote-na ruru onaa ada nona piane waria mapiraaya. Gore nipumi Gote-na agaa ratua go kogono pisa. Gore oro yaalo niaana robaa-para puri mapalaawa Aa Mudu epaliade yapi di madaa pedo pu waru suruba pimare niaa page Gote-na ruru mada pima. Goa pua nipuna ada nona piane pima.
Agaa rasini onaanuri Gote-na kitu pirape su namealimi
Goa pea-ga niaame Holi Spirit-na agaa pagamina. Gore Gote-na buk madaa i agaame gupa ta:
Abia Holi Spirit-na agaa pagalimi-daare nimina pu robaa-para go agaa mealimina lo robaa narogaatepape.
Abade nimina akuanumi nipuna agaa rasua aakone isimiya-rupa napipape.
Go rabu nimimi mo onaa napiri su-para pua pirua
Gote ko tisimi rabu yola mi kone isimi.
Go su-parare nimina akuanumi maali 40 ru-para pisa.
Kogono pisu rabu ado kiritisimi. Go adisimi rabu ronome omoa ni ko tisimi.
10 Goa pisimi-pulu neme go onaanu nimu ora ronome omoa neme goa lakesu:
Oro yaalo nimimi kone wae sua nina agaa oro yaalo rasua nina kone namua pora go-rupa pameme.
11 Ni ora rono pisa rabu neme ora yaa madaa makuaa loa goa lakesu:
Nimi nina pirape su-parare ni raapu ora mada naepa piralimi sude.
Israel onaanumi Gote-na agaa rasisimi-rupa niaame goa napamina
12 Gore amenu nimina rikiraana aa meda nipuna pu robaa-para wae kone salia-daare Gote madaa kone narulaaya. Goa pua nipumi oro yaalo piri Gote gimalia-ga nimimi nipu waru suruboa adalepape. 13 Goa pea pare nimina rikiraana piri onaanumi makiraawa pu robaa-para yola mi kone sulalo palimi-daare oro yaalo go ame baaninu waru raba mealepape. Goa pua Gote-na buk madaa i agaamere go rabu ta diri niaame page mada adalima. 14 Goa pua abade ripia niaame kone puri paloa rulasima-rupare abia page go kone puri paloa rulaa-mama puare omalima rabu page goa palima. Goa pua niaare ora Krais raapu nipuna onaa pitima.
15 Go madaare Gote-na buk madaa i agaame gupa tua suaaya:
Gore abia go rabu nipuna agaa pagalimiri gore nimi pu robaa narogaatepape.
Abade nimimi nipuna agaa rasua wae onaa pirisimide-rupa go kone namogeatepape sa.
16 Gore abade Gote-na agaare aapimi pa pagoa wae kone sua nipuna agaa rasisimi pae? Go onaa rayore Moses-me nimu Isip su gimoa lamua pisa raburi go wae kone simi. 17 Gore maali 40 patinaloare Gote-me aapi ratu yawesa pae? Gore nipumi waea pisimide onaanu ronome omesa. Goa pisa-pulu nimu omenaloa nimuna ronu onaa napiri su-para pa suaasa. 18 Gore Gote-me ora yaa madaa makuaa loa gupa lakesa: Nimi epe Kitu Pirape su-para ni raapu napiralimi. Goa saere aapi madaa sa ya? Gore abade mo nipuna agaa rasisimi onaanu lakesa. 19 Gore nimumi kone narulaawa Gote-na epe Kitu Pirape Yapi su-parare mada napua pirisimi-daa pagemade.