31
King Lemuel-na agaa
Go agaa-re King Lemuel-na agaa. Agime agaa mana loa epe kone minalo lakesa.
Nina naaki nere nina madiawa-pulu neme ne raaname waru ome.
Neme Gote agaa misu rabu ni gisa-da madisu. Neme ake lano ya?
Neme ona meda nayoloa money page nakaloa nena puri dia yalia.
Gore akoloya king-nu ma-oyaeme-daa go agaa lagialo.
 
Lemuel-yo king nimi ipa waini na-nape.
Nimumi bia nape kone nasalepape.
Gore nimimi ipa agu nalimi raburi rekana agaa ruguloa mo aa naraanu-para epea meda mada napalimi.
Pa bia-para waene lapo-re omape onaa-para kedaa adaapu rini onaana nape eta yade.
Go piane onaare ipa nalame omalimiri pa nalimina.
Yapare nimu naraa pimi onaa oyae rudu yoa kedaa riapere kone rugulaawa nalimina.
 
Kedaa madaa nariape kepele pi onaare rabameape agaa lape.
Goa pua mo naraanumi koso teme rabu raba meape-na puri waru pabape.
Neme koso te rabu mogo onaanu epe-rupa redepoya pagape.
Goa pua neme mo naaranu raba mua surubape.
 
Redepone ona-na pea
 
10 Go yapare aame ona epe kone-i rumaatalo pe?
Ora yapare kalai pua asa palia. Go piaene ona-na yotore gol-na yoto pea-rupa mada yade.
11 Go piaene ona nipuna aanimi mo onana pea luabu epea peada aba adea.
Goa pea-pulu ona-me nipu raba mealia rabu mo aa nipu oyae ora adaapu salia.
12 Go ona-me aani-para oro yalo epea agu pea.
13 Nipumi laplap wariape ope adaapu page pusua laplap adaapu wari pea.
14 Nimu luabumi eta ora adaapu waru imi.
Gore akolo-ya? Go oname eta ora su adaalu-para mea epea.
Gore mo adaa sipi-numi eta madita pemede-rupa mada mea epea. 15 Epe onamere yapi abi nane aina eta nipuna onaa raapu nape aba yawea.
Goa puare nipuna kogono onana pape kogono robo su kata.
16 Mo puri pane oname su kabolalore su ora waru adoa kabea.
Goa pua orope mone muare repena waene maapu kaboa poaaya.
17 Nipu oro meda gime naomea oro yalo puri paloa kogono puaaya.
18 Nipuna labana wiki ora waele waru rubia epeta rabu laba waru roaaya.
Go laba roaina ribaa ruma rumane nipuna pea bisinisi raayo pua epe ta-daa adea.
19 Go piaaene oname ope waria nipuna bipa laplap rabuta.
20 Gore nipumi mo naraa onaa adoa oyaenu rudu teme rabulu kata.
21 Gore yai radaki adaa lopea rabu page nipuna aani nogo naaki yada dia kone ia.
Gore akolo ya? Nipumi mo laplap ora epe pepena pi yae rabuta-pulu yada dia kone ia.
22 Goa pua nipuna ada-para sape balaket oyae page nipuna bipa rabuta-pulu nimuna ada-para epeta.
Goa pua laplap kane-para yakopi lapo rata mua nipuna yamape oyae warita.
23 Gore mo adare-para piri aa mudunumi nipu adaa bi kateme.
Nipuna aani page mo aa mudu meda yapulu goa peme.
24 Oro yalo mo oname epe mamina waria aako lete page waru warita.
Goa pea-pulu mo bisinisi peme onaame epa kabeme.
25 Nipuna mogo pea kogono madaa mo ona ora epeta kone sua mo ona kone mapiraawa go piane ona yade teme.
Go orope epaliade yaere nipu palame naomea.
26 Nipumi onaa kogono mogeatalo palia-dare pawasi agaa loa pea.
Nipuna ta agaa luaburi epe kone-para makuae yae lapo ora waru rubita.
27 Nipuna ada-para oyae surubolalo palia raburi gime na-omea.
Goa pua epe puri pane kogono pea.
28 Ora epeta ora epeta gore niaana ama teme. Mo ona nipuna nogo naakimi goa teme.
Nipuna animi ona-na bi ora waru minasaawa goa ta.
29 Niaana taun-para page niana oge adarenu-nini page go piane ona adaapu pimi:
Pare neme go ona luabu rabuaye teme.
30 Ona padaneme niaa epe rede pi agaa lagialia pare nipuna peare rado piane.
Ona ora epe yalia page pinawa. Nipu oro yalo gorupa mada napitia. Goa pea-ga niaame Adaa Aa-na rolo-para pia onana bi minasamina.
31 Niame ona nipuna epe kogono adoa nipuna epe kone page rumaawa nipuna bi minasaeme.