1 యా మెల్కిసదెక్‌ సాలెం పట్నమ్‌ది రాజు. విజు దని ముస్కు ఆతికారం మని దేవుణు పుజెరి. నండొ రాజురి ముస్కు విదెం కిజి గెలసి, అబ్రాహము వన్ని ఇండ్రొ మర్‌జి వాజి మహివలె, మెల్కిసెదెక్‌ వన్నిఙ్‌ దసూల్‌ ఆతండ్రె, దీవిస్తాన్. 2 అయావలె అబ్రాహము, వాండ్రు ఉద్దం కిజి గెలసి దొహ్‌క్తి విజు వన్కాఙ్‌ లొఇ మెల్కిసెదెకుఙ్‌ దసంబాగం సితాన్. వన్ని పేరు తొలిత అర్దం ఇనిక ఇహిఙ, నీతి నిజాయితిదాన్‌ ఏలుబడిః కిని రాజు. మరి ఉండ్రి అర్దం ఇనిక ఇహిఙ సమాదనమ్‌దాన్‌ ఏలుబడిః కిని రాజు ఇజి. ఎందనిఙ్‌ ఇహిఙ, వాండ్రు సాలెం పట్నమ్‌ది రాజు. సాలెం ఇహిఙ సమాదనం. 3 వన్ని అయ్‌సి అప్పొసి వందిఙ్‌నో, వన్ని అనిగొగొర్‌ వందెఙ్‌నొ గుర్తు ఇనికెఙ్‌ సిలు. వన్ని పుడుగు వందిఙ్‌నో, పావు వందిఙ్‌నో తెలిఎద్. వాండ్రు దేవుణు మరిసి లెకెండ్‌ ఎల్లకాలం ఒరెన్‌ పుజెరి. 4 యా మెల్కిసెదెకు ఎసొ పెరికాన్‌ ఇజి ఎత్తు కిదు. దేవుణు ఏర్‌పాటు కితి లోకుర్‌ లొఇ గొప్ప పెరి అనిగొగొ ఆతి అబ్రాహము, విదెమ్‌దు గెలసి వన్నిఙ్‌ దొహ్‌క్తి విజు వన్కాఙ్‌ లొఇ వన్నిఙ్‌ దసంబాగం సితాన్. 5 మోసె సితి రూలు వజ, లేవి తెగ్గదు పుట్తి పుజెరిజు ఆతికార్, ఇస్రాయేలు లోకుర్‌ బాణిఙ్‌ దసంబాగం లొసినార్. ఇహిఙ వారు వరి సొంత లోకుర్‌ బాణిఙ్‌ లొసినార్. యా పుజెరిఙుబా, అబ్రాహము తెగ్గదు పుట్తికార్‌ ఆతిఙ్‌బా వరి సొంత లోకుర్‌ బాణిఙ్‌ దసంబాగం లొసినార్. 6 మెల్కిసెదెకు లేవి తెగ్గదు పుట్తికాన్‌ ఆఎన్. గాని వాండ్రు అబ్రాహము బాణిఙ్‌ దసంబాగం లొస్తాండ్రె, దేవుణు సితి ఒట్టుఙ్‌ మని అబ్రాహముఙ్, దీవిస్తాన్. 7 దీవిస్నికాండ్రె, దీవన లొసె ఆని వన్నిఙ్‌ ఇంక పెరికాన్‌ ఇని మాట అనుమానం సిలికాదె. 8 యూదురి పుజెరిఙ సుడ్ఃతిఙ, సాజిసొనికారె దసంబాగం లొసినార్. గాని మెల్కిసెదెకుఙ్‌ సుడ్ఃతిఙ, దసంబాగం లొసె ఆనికాన్‌ బత్కిజినాన్‌ ఇజినె దేవుణు మాట వెహ్సినాద్. 9 అహిఙ, దసంబాగం లొసిని లేవి తెగ్గదు పుట్తికార్, మెల్కిసెదెకుఙ్‌ దసంబాగం సితార్. వరి అనిగొగొ ఆతి అబ్రాహము సిలిదనితాన్‌ వారు సితార్ ఇజి ఒరెన్‌ వన్నిఙ్‌ వెహ్తెఙ్‌బా ఆనాద్‌. 10 ఎందనిఙ్‌ ఇహిఙ, మెల్కిసెదెకు అబ్రాహముఙ్‌ సుడ్ఃతివలె, లేవి పుట్‌ఎండ్రె. వాండ్రు అబ్రాహము పొటాద్‌నె నస్తివలె మహాన్‌.

11 దేవుణు మెసె వెట మఙి రూలుఙ్‌ సిత మనాన్. అయా రూలుఙ్‌ వజ, లేవి తెగ్గదు పుట్తికార్‌ పుజెరిఙు ఆదెఙ్‌వలె. ఏలు, లేవి తెగ్గదు మని పుజెరిఙు ఇహిఙ ఆరోను కుటుమ్‌దికార్‌ దేవుణు ఎత్తు కితి ఉపదేసమ్‌కు పూర్తి కిదెఙ్‌ అట్తార్‌ ఇహిఙ, మరి ఒరెన్‌ పుజెరి వాదెఙ్‌ అవ్‌సరం సిలెతాద్‌ మరి. అహరోను కుటుమ్‌దు మనికాన్‌ ఆఏండ, మెల్కిసెదెకు మహి లెకెండ్‌ ఒరెన్‌ వన్నిఙ్‌ పోక్తెఙ్‌ అవ్‌సరం సిల్లెద్‌. 12 పుజెరఙు యా లెకెండ్‌ మారితిఙ, మోసె సితి రూలుఙ్‌బా మార్‌దెఙ్‌ వలె. 13 ఎయె వందిఙ్‌ మాటు వెహ్సినాటొ, వాండ్రు మరి ఉండ్రి తెగ్గదు మనికాన్. అయా తెగ్గదు మనికార్‌ ఎయెర్‌బా పుజెరి వజ, మాలి పీటదు ముఙాలె సేవ పణి కిఎర్. యా సఙతిఙ్, మా ప్రబు వందిఙె వెహ్తె మన్నె. 14 వాండ్రు యూద తెగ్గదు పుట్తికాండ్రె ఇజి టెటాఙ్‌ నెసినాట్‌. పుజెరిఙ వందిఙ్‌ మోసె వెహ్తివలె, యూద తెగ్గ వందిఙ్‌ ఇనికబా వెహ్‌ఎతాన్. 15 మెల్కిసెదెకు పుజెరి మహివజ, మరి ఒరెన్‌ పుజెరి వాత మనాన్. అందెఙె, మాటు వెహ్తిక మరి ఒదె టెటాఙ్‌ అర్దం ఆజినాద్. 16 లేవి తెగ్గదు మనికాండ్రె పుజెరి ఆదెఙ్‌ ఇని రూలు వాండ్రు పూర్తి కిఎండ పుజెరి ఆతాన్. గాని నాసనం కిదెఙ్‌ అట్‌ఇ, బత్కిజిని సత్తుదాన్‌నె పుజెరి ఆతాన్. 17 ఎందనిఙ్‌ ఇహిఙ “మెల్కిసెదెకు మని లెకెండ్, నీను ఎలాకాలం ఒరెన్‌ పుజెరి”,✡7:17 కీర్తన 110:4. ఇజి దేవుణు మాటు క్రీస్తు వందిఙ్‌ వెహ్సినాద్. 18 అందెఙె, పుజెరిఙ వందిఙ్‌ మని పడాఃయి రూలుదిఙ్‌ విలువ సిల్లెద్‌. ఎందనిఙ్‌ ఇహిఙ దనిఙ్‌ సత్తు సిల్లెతాద్. పణిదిఙ్‌ రఎతాద్. 19 ఎందనిఙ్‌ ఇహిఙ, మోసె సితి రూలుఙ్, ఇని దనిఙ్‌బా పూర్తి కిఉతె. ఏలు మాటు ఎద్రు సుడ్ఃతిక మోసె సితి రూలుఙ్‌ కితి ఒటుదిఙ్‌ ఇంక నెగెద్. అయా ఒట్టుదాన్‌ దేవుణు డగ్రు సొండ్రెఙ్‌ అట్నాట్. 20 క్రీస్తు ఎలాకాలం మని ఒరెన్‌ పుజెరి ఇజి దేవుణు ఒట్టు కిత్తాన్‌. గాని మరి ఎమేణి పుజెరిఙబా దేవుణు యా లెకెండ్‌ ఒట్టు కిఎతాన్. 21 దేవుణు యేసుఙ్‌నె వెహ్తాన్‌, “ప్రబు ఉండ్రి ప్రమాణం కిత మనాన్. అయాక ఎసెఙ్‌బా తప్‌ఎన్. ‘నీను ఎలాకాలం మని ఒరెన్‌ పుజెరి’✡7:21 కీర్తన 110:4.”, ఇజి. 22 దేవుణు యా లెకెండ్‌ ఒట్టు కతాన్. అందెఙె, యాక ఉండ్రి నెగ్గి ఒపుమానం ఇజి తప్‌ఎండ నిజం కినికాన్‌ యేసునె. 23 పడాఃయి అలవాటు వజ నండొండార్‌ పుజెరిఙు మహార్‌. ఒరెన్‌ సాతిఙ, మరి ఒరెన్‌ వన్ని పణి కినాన్. 24 గాని యేసు ఎలాకాలం మని ఒరెన్‌ పుజెరి. ఎందనిఙ్‌ ఇహిఙ, వాండ్రు ఎలాకాలం బత్కిజినాన్. 25 అందెఙె వాండ్రు, ఏలు మరి ఎలాకాలం వన్ని వెట దేవుణు డగ్రు సొని వరిఙ్‌ రక్సిస్తెఙ్‌ వాండ్రు అట్నాన్. ఎందనిఙ్‌ ఇహిఙ, వరి వందిఙ్‌ దేవుణుదిఙ్‌ బతిమాల్‌దెఙ్‌ వాండ్రు ఎల్లకాలం బత్కిజినాన్. 26 అందెఙె, మా అవ్‌సరమ్‌కు తిరిసిని విజు పుజెరిఙ ముస్కు మని పెరి పుజెరి యేసునె. వాండ్రు ఇని పాపం సిలికాన్, నింద సిలికాన్, ఇని తపు సిలికాన్, పాపం కిని వరిబాణిఙ్‌ కేట ఆతికాన్. వన్నిఙె పరలోకమ్‌దు గొప్ప పెరి గవ్‌రం సిత మనాన్. 27 మహి పెరి పుజెరిఙు లెకెండ్, వాండ్రు రోజు పూజెఙ్‌ సీదెఙ్‌ అవ్‌సరం సిల్లెద్‌. ముఙాలె వన్ని పాపమ్‌క వందిఙ్, వెనుక లోకురి పాపమ్‌క వందిఙ్‌ పూజెఙ్‌ సీదెఙ్‌ అవ్‌సరం సిల్లెద్‌. వన్నిఙ్‌ వాండ్రె సిలువాదు ఒపజెప్తి వలె, వరి పాపమ్‌క వందిఙ్, ఎలాకాలం వందిఙ్‌ ఉండ్రి సుటు పూజ సితాన్. 28 మోసె సితి రూలు వజ ఏర్‌పాటు ఆతి విజెరె పుజెరిఙ ముస్కు మని పెరి పుజెరిఙు పూర్తి ఆఇకార్. గాని మోసె సితి రూలుఙ్‌ వెనుక, దేవుణు ఒట్టు కిత్తాన్‌. అయా ఒట్టు వజ మరిసి విజెరె పుజెరిఙ ముస్కు మని పెరి పుజెరి ఇజి ఏర్‌పాటు ఆతాన్. దేవుణు వన్నిఙ్‌ ఎలాకాలం పూర్తి ఆతికాన్‌ కిత్తాన్‌.