1 అయా దినమ్‌కలొఇ ఉండ్రి నాండిఙ్, వాండ్రు దేవుణు గుడిఃదు లోకాఙ్‌ నేర్‌పిసి, సువార్త బోదిసి మహాన్‌. అయావలె పెరి పుజెరిఙు ని యూదురి రూలుఙ్‌ నెస్పిస్నికార్, పెద్దెల్‌ఙ వెట కూడ్ఃజి వన్ని ముస్కు వాతాద్. 2 నీను ఇనిఅతికారమ్‌దాన్‌ యా పణిఙ్‌ కిజిని? ఎయెన్‌ నిఙి యా అతికారం సితాన్‌? మఙి వెహ్‌అ”, ఇజి వన్నిఙ్‌ వెన్‌బాతార్. 3 అందెఙె వాండ్రు, “నాను బా మిఙి ఉండ్రి మాట వెన్‌బానా. 4 బాప్తిసం సీదెఙ్‌ అతికారం యోహనుఙ్‌ ఎయె బాణిఙ్‌ వాతాద్‌ దేవుణు బాణిఙ్‌నా లోకు బాణిఙ్‌నా నఙి యేలు వెహ్తు? ఇజి వెహ్తాన్‌. 5 వరిలొఇ వారు ఈహు వర్గితార్. దేవుణు బాణిఙ్‌ వాతాద్‌ ఇజి మాటు వెహ్తిఙ, ఎందనిఙ్‌ మీరు వన్నిఙ్‌ నమ్‌ఇతిదెర్‌ ఇజి వాండ్రు వెన్‌బానాన్. 6 లోకురి బాణిఙ్‌ ఇజి మాటు వెహ్తిఙ, లోకుర్‌ విజెరె మఙి పణకాణిఙ్‌ డెఃయినార్. ఎందనిఙ్‌ఇహిఙ, యోహాను, ఒరెన్‌ దేవుణు ప్రవక్త ఇజి విజెరె పూర్తి నమ్మిజినార్. 7 అందెఙె వారు, “అయాక ఎంబెణిఙ్‌ వాతాదొ మఙి తెలిఎద్”, ఇజి వారు మర్‌జి వెహ్తార్‌. 8 అహిఙ, ఎంబెణి అతికారమ్‌దాన్‌ నాను యా పణిఙ్‌ కిజిన ఇజి నాను బా వెహ్‌ఎ”, ఇజి యేసు వరిఙ్‌ వెహ్తాన్‌.

9 మరి, వాండ్రు ఉండ్రి కత వజ లోకురిఙ్‌ నెస్‌పిస్తాన్. “ఒరెన్‌ లోకు ద్రాక్స టోట ఉణుస్తాన్. ఆ టోట సెగొండార్‌ రయ్‌తూఙ తనక సితాన్. సితండ్రె నండొ కాలం మండ్రెఙ్‌ ఉండ్రి దూరం దేసెం సొహాన్‌. 10 పంట కొయ్‌ని కాలమ్‌దు వన్నిఙ్‌ వాని పట్కుఙ వంతు లొసి తగ్‌అ ఇజి ఒరెన్‌ గొతియ వన్నిఙ్‌ రయ్‌తూఙ డగ్రు పోక్తాన్. అయా రయ్‌తూఙ వన్నిఙ్‌ డెఃయితారె వహి కీదాన్‌ మర్‌జి పోక్తార్. 11 వాండ్రు మరి ఒరెన్‌ గొతియవన్నిఙ్‌ పోక్తాన్. వారు వన్నిఙ్‌బా డెఃయిజి, సిగు కితారె వహి కీదాన్‌ పోక్తార్. 12 మరి బా, ఒరెన్‌ వన్నిఙ్‌ పోక్తాన్. వారు వన్నిఙ్‌ గాయమ్‌కు ఆని లెకెండ్‌ డెఃయితారె వెల్లి విసీర్తార్. 13 అయావలె ద్రాక్స టోట ఎజుమాని, “నాను ఇనిక కిదెఙ్‌? నాను లావు ప్రేమిస్ని నా సొంత మరిసిఙ్‌ పోక్న. వారు వన్నిఙ్‌ గవ్‌రం సీనార్‌లెసు”, ఇజి ఒడ్ఃబితాండ్రె పోక్తాన్. 14 గాని పాలి ఆస్తి మన్నికార్‌ వన్నిఙ్‌ సుడ్ఃతారె, “వీండ్రు యా టోటాదిఙ్‌ అక్కు మనికాన్. యా టోట మాది ఆదెఙ్‌ వన్నిఙ్‌ సప్నాట్. రదు”, ఇజి వరి లొఇ వారు వర్గితార్. 15 అందెఙె వారు వన్నిఙ్‌ ద్రాక్స టోటదాన్‌ వెల్లి పొక్తారె సప్తార్. అహిఙ, ద్రాక్స టోట ఎజుమాని వరిఙ్‌ ఇనిక కినాన్‌? 16 వాండ్రు వాజి, అయా రయ్‌తూఙ సప్సి మహి వరిఙ్‌ టోట ఒపజెప్నాన్. లోకుర్‌ యాక వెహరె, “ఆ లెకెండ్‌ కిదెఙ్‌ ఆఎద్”, ఇజి వెహ్తార్‌.

17 యేసు వరిఙ్‌ డిటం బేసి ఈహు వెన్‌బాతాన్, “అహిఙ, ఇల్లు తొహ్నికార్‌ నెక్తి పొక్తి పణుకు మూలదిఙ్‌ మూల పణుకు ఆతాద్‌*20:17 కీర్తన 118:22. ఇజి దేవుణు మాటదు రాస్తి మన్ని దన్ని అర్‌దం ఇనిక?

18 అయా పణుకు ముస్కు అర్ని విజెరె ముకెఙ్‌ ఆనార్. అయా పణుకు ఎయెన్‌ ముస్కు అర్తిఙ, వాండ్రు సింద్‌సింద ఆనాన్”. 19 యూదురి రూలుఙ్‌ నెస్పిస్నికార్, పెరి పుజెరిఙు, మా వందిఙ్‌నె వీండ్రు కత వజ వెహ్తాన్‌‌ ఇజి నెస్తారె, వెటనె వన్నిఙ్‌ అస్తెఙ్‌ సుడ్ఃతార్. గాని లోకురిఙ్‌ తియెల్‌ ఆతారె, అస్‌ఎతార్.

20 అందెఙె వారు వన్నిఙ్‌ బాగ గురి కిజి మహార్‌. ఎందానిఙ్‌ఇహిఙ, వాండ్రు వెహ్సిని మాట లొఇ ఇని దనిఙ్‌బా తపు అసి వన్నిఙ్‌ తొహ్సి అతికారిఙ బాన్‌ఒపజెప్తెఙ్. దిని వందిఙ్‌ వారు నండొండారిఙ్‌ పోక్సినార్. యా సెగొండార్‌ మాపు నీతి నిజాయితి మనికాప్‌ ఇజి వేసం కినికార్. నని వరిఙ్‌ వన్ని డగ్రు పోక్తార్. వీరు సొన్సి వన్ని మాటెఙలొఇ తప్ప అస్తెఙ్‌ ఇజి. 21 వారు వాతారె వన్నిఙ్, “ఓ బోదకినికి, నీను నిజమతిక వెహ్సి బోదిసిని ఇజి మాపు నెస్నాప్. నీను ఇజ్రికార్‌ పెరికార్‌ ఇజి తేడ తొఇకి. దేవుణుదిఙ్‌ ఇస్టం ఆతి నిజమాతి బత్కు వందిఙ్‌ నీను నిజం నెస్పిస్ని ఇజి మాపు నెస్నాప్. 22 మాపు కయ్‌సరుఙ్‌ పన్ను సీనికెఙ్‌ నాయమ్‌నా? అనయమ్‌నా?”, ఇజి వన్నిఙ్‌ వెన్‌బాతార్. 23-24 వాండ్రు వరి సెఇ బుద్దిదిఙ్‌ నెస్తాండ్రె వరిఙ్, “ఉండ్రి దినారి కాసు తోరిస్తు. దిని ముస్కు మన్ని బొమ్మ ఎయెది? రాస్తి మన్ని రాంత ఎయెది?”, ఇజి వెన్‌బాతాన్. “కయిసర్‌వి”, ఇహార్‌ వారు. 25 అందెఙె వాండ్రు, “కయిసరుది, కయ్‌సరుఙ్‌ సీదు. దేవుణుది దేవుణుదిఙ్‌ సీదు”, ఇజి వెహ్తాన్‌. 26 వారు అబ్బె మంద ఎద్రు వాండ్రు వెహ్తి మాటదు తపు అస్తెఙ్‌ అట్‌ఎతార్. వాండ్రు మర్‌జి వెహ్తి మాటదిఙ్‌ నండొ బమ్మ ఆతారె అలెతార్.

27 నస్తివలె సెగొండార్‌ సదుకయ్‌రు యేసు డగ్రు వాతార్. సాతి వెనుక మర్‌జి నిఙ్‌నిక సిల్లెద్‌ ఇజి వారు వెహ్సినార్. వారు వాతారె ఈహు వెన్‌బాతార్. 28 ఓ బోదకినికి, ఒరెన్‌ కొడొఃర్‌ సిల్లెండ సాతిఙ. వన్ని తంబెర్సి ఒన్నిఙ్‌ ఇడ్డెః ఆజి కొడొఃర్‌ ఇడ్ఃదెఙ్. ఆహె సాతి వన్ని వందిఙ్‌ కుటుం నిల్‌ప్తెఙ్, ఇజి మోసె మఙి రాస్త సిత్తమనాన్. 29-31 యేలు సుడ్ఃఅ, ఉండ్రి కాలమ్‌దు, దాదతంబెర్‌సిర్, ఏడు గురు మహార్‌. తొల్‌సుర్‌దికాన్‌ ఉండ్రి బోదెల్‌దిఙ్‌ పెండ్లి ఆతాన్. కొడొఃర్‌ సిల్లెండ సాతాన్. సాతిఙ్, నడిఃపి వాండ్రు దనిఙ్‌ ఇడ్డెః ఆతాన్. కొడొఃర్‌ సిల్లెండ సాతాన్. వెనుక కొగ్రి నడిఃపి దనిఙ్‌ ఇడ్డెః ఆతాన్. కొడొఃర్‌ సిల్లెండ వాండ్రుబ సాతాన్. ఆహె ఏడు గురు బా కొడొఃర్‌ సిల్లెండ సాతార్. 32 కడిఃవేరిదు ఆ బోదెల్‌బా సాతాద్. 33 అందెఙె సాతి వరిబాణిఙ్‌ మర్‌జి నిఙ్‌ని వెలె, ఆ బోదెల్‌ ఎయెరిఙ్‌ ఆల్సి ఆనాద్‌? ఆ ఏడు గురుదిఙ్‌బా అది ఆల్సి ఆత మహాద్‌ గదె?”, ఇజి వెన్‌బాతార్.

34 అందెఙె యేసు వరిఙ్‌ ఈహు వెహ్తాన్‌, “యా లోకమ్‌ది లోకుర్‌ పెండ్లి ఆజినార్. పెండ్లిదిఙ్‌ సీజినార్. 35 గాని సాతి వరిబాణిఙ్‌ మర్‌జి నిఙ్‌జి పరలోకమ్‌దు మండ్రెఙ్‌ తగ్నికార్‌ పెండ్లి ఆఏర్. పెండ్లిదిఙ్‌ సిఏర్. 36 ఎంఆనిఙ్‌ ఇహిఙ, వారు మరి సాఏర్. వారు దేవుణు దూతెఙ పోలితికార్. వారు సావుదాన్‌ మర్‌జి నిఙ్‌నార్. అందెఙె వారు దేవుణు కొడొఃర్. 37-38 సాతికార్‌ నిఙ్‌నార్‌ ఇజి మోసె నెగ్రెండ రుజుప్‌ కిజినాన్. లట కస్ని బాన్‌ మోసె సొహాన్‌. అబ్బె, ‘అబ్రాహము దేవుణు, ఇస్సాకు దేవుణు, యాకోబు దేవుణు ఇజి వాండ్రు దేవుణు ఆతి ప్రబు వందిఙ్‌ వెహ్సినాన్. అయావలె అబ్రాహము, ఇస్సాకు, యాకోబు బత్కిజినార్‌ ఇజి తోర్నాద్. వాండ్రు బత్కితి మన్ని వరిఙ్‌నె దేవుణు. సాతి వరిఙ్‌ దేవుణు ఆఎన్. ఎందనిఙ్‌ ఇహిఙ, వన్ని వెట కూడిఃతి మనికార్‌ విజెరె బత్కిజినార్.

39 సెగొండార్, యూదురి రూలుఙ్‌ నెస్పిస్నికార్, “బోదకినికి, నీను నెగెండ వెహ్తి”, ఇజి వన్నిఙ్‌ వెహ్తార్‌. 40 వెనుక వారు వన్నిఙ్‌ ఇనికబా వెన్‌బాదెఙ్‌ ఎయెరిఙ్‌బా దయ్‌రం సాల్‌ఏతార్.

41 యేసు వరివెట ఈహు వెహ్తాన్‌. “క్రీస్తు దావీదు తెగ్గాతికాన్‌ ఇజి ఎలాగ వారు వెహ్సినార్‌? 42-43 ‘నాను నీ పగాతి వరిఙ్‌ నీ పాదమ్‌క అడిఃగి ఇడ్నిదాక, నీను నా ఉణెర్‌ పడఃకాదు బస్‌అ”, ఇజి ప్రబు నా ప్రబు వెట వెహ్తాన్‌†20:42-43 కీర్తన 110:1.”, ఇజి కీర్తన పుస్తకమ్‌దు దావిదునె వెహ్సినాన్. 44 దావిదునె వన్నిఙ్, “ప్రబు“ ఇజి కూక్సినాన్. అయావలె వాండ్రు ఎలాగ దావీదు మరిసి ఆనాన్.

45-46 లోకుర్‌ విజెరె వెంజి మహివలె, యేసు వన్ని సిసూరిఙ్‌ వెహ్తాన్‌, “మీరు యూదురి రూలుఙ్‌ నెస్పిస్నివరి వందిఙ్‌ జాగర్త మండ్రు వారు నిరీ సొక తొడ్ఃగిజి బూలాదెఙ్‌ ఇస్టం ఆతికార్. సత నడిఃమి పెరికార్‌ ఇజి మాడెః ఆదెఙ్‌ కోరిజినార్. యూదురి మీటిఙ్‌ ఇండ్రొ పెరికార్‌ బస్ని బాడిఃదు బస్తెఙ్, విందుద్‌ నెగ్గి బాడిఃదు బస్తెఙ్‌ కోరిజినార్. 47 వారు రాండి బోదెక్‌ ఇల్కాణికెఙ్‌ అనయమ్‌దాన్‌ లాగ్‌జినార్. మహి వరి ఇంక నెగ్గికాప్‌ ఇజి తోరె ఆదెఙ్‌ నిరీ పార్దనం కిజినార్. దేవుణు వరిఙ్‌ నండొ సిక్స సీనాన్”.