୧୦
ଦିୟାମ୍କା ବିରୁଦ୍ତାନ୍ ଜାଗ୍ରାତା
୧ ଏ ତଡ଼ାନ୍କୁ ନି ତାଙ୍ଗିଁକି, ମୋସାଦି ୱେନ୍କା ସୋଲ୍ସି ମା ପୁର୍ବେଦିଡକ୍ରାଦାଦାରି ଉଣ୍ତିଙ୍ଗ୍ ଇନିକା ଗଟେ ଆତାମାର୍ହାତ୍, ମିର୍ ଏତ୍ କିଦୁ, ଇକା ନା ଅରେନ୍ୱାନି ଇଚ୍ଛା । ୱାର୍ ୱିଜେରେ ବାଦଡ଼ତାନ୍ ସୁରକ୍ୟାଦାନ୍ ମାର୍ହାର୍, ନିଡ଼ି ସାମ୍ଦୁର୍ତାନ୍ କାସ୍ଟୁସିଲେଏଣ୍ଗା ନାତାର୍ । ୨ ମାରି ମୋସାଦି ୱେନ୍କାସନିୱାରି ୱାଜା ୱାର୍ ୱିଜେରେ ବାଦଡ଼ ମାରି ସାମ୍ଦୁର୍ତୁ ଡୁବନ୍ ଅତାର୍, ୩ ମାରି ୱିଜେରେ ଉନ୍ଡ୍ରେ ଆତ୍ମିକ କାଦି ମାରି ଏର୍ରୁ ଉଟା ମାର୍ହାର୍, ୪ ଇରିଙ୍ଗ୍ ୱାରି ୱାଲେ ବୁଲାଜିମାନି ଜିବନ୍ତି ପିଡ଼୍ପିକାଲୁଦାନ୍ ୱାର୍ ଆତ୍ମିକ ଏର୍ରୁ ଉଣିଜି ମାର୍ହାର୍, ମାରି ଆୟା ପିଡ଼୍ପିକାଲୁ କ୍ରିସ୍ତ । ୫ ମାରିବା ୱାରି ମାଣ୍କୁ ଏସଲୋକାମାନୁ ମାପୁରୁଦି ୱେଡ଼ିକା ସିଲେତାତ୍, ଆଦେଙ୍ଗ୍ ୱାରି ସାତି ମେନ୍ଧଲ୍ ମରୁବୁମିଦି ୱିଜୁତରିନ୍ ଇନିଙ୍ଗାଁ ଆନିଙ୍ଗାଁ ଆଜି ମାର୍ଏ ।
୬ ୱାର୍ ଏଣ୍ତେସ୍ ନାନି ତାଗ୍ଇ ବିସୟ୍ତାନ୍ ଲାଲାୟ୍ ଆଜିମାର୍ହାର୍, ମାଡୁ ଏଣ୍ତେସ୍ ଆୟାୱାଜା ଲାଲାୟ୍ ଆଇକା, ଇୟାଉଣ୍ତିଙ୍ଗ୍ ଇୟାୱିଜୁ ବିସୟ୍ ମା ଉଣ୍ତିଙ୍ଗ୍ କାତାଦି ୱାଜା ଆତାମାନାତ୍ ମାରି ସେତ୍ନା ସିଜିନାତ୍ । ୭ ଏଣ୍ତେସ୍ ୱାରି ମାଣ୍କୁ ଏସଲୋକ୍ ବମା ପୁଜାକିନିକାର୍ ଆତାର୍, ଆୟାୱାଜା ମିର୍ ଦିୟାମ୍ ପୁଜାରୀରି ଆମାଟ୍; ଏଣ୍ତେସ୍ ଦର୍ମସାସ୍ତ୍ରଦୁ ରାସାତାମାନାତ୍, “ଲୋକୁ ଉନ୍ଡେଙ୍ଗ୍ ବାସ୍ତାର୍, ମାରି ତାନେୱେନ୍କା ନିଙ୍ଗିଁଜି ରଙ୍ଗ୍ରସ୍ତାନ୍ କିତାର୍ ।” ୮ ଏଣ୍ତେସ୍ ୱାରି ମାଣ୍କୁ ଏସଲୋକ୍ ଦାରିପାଣି କିଜି ଉନ୍ଡ୍ରେ ନାଣ୍ତିଙ୍ଗ୍ କଡ଼େ ତିନି ହାଜାର୍ ଲୋକୁ ସାତାର୍, ଆୟାୱାଜା ପାପ୍ ମାଡୁ କିଏଟ୍ । ୯ ଏଣ୍ତେସ୍ ୱାରି ମାଣ୍କୁ ଏସଲୋକ୍ ପ୍ରବୁଙ୍ଗୁଁ ପରିକା କିଜି ସାରାସ୍ତାନ୍ ନାସ୍ଟୁ ଆତାର୍, ଆୟାୱାଜା ମାଡୁ ପ୍ରବୁଙ୍ଗୁଁ ପରିକା କିଏଟ୍ । ୧୦ ଏଣ୍ତେସ୍ ୱାରି ମାଣ୍କୁ ଏସଲୋକ୍ ମାପୁରୁଦି ବିରୁଦ୍ ମାଟା ଇଜି ଜୁଦକିନି ଦୁତ୍ତାନ୍ ନାସ୍ଟୁ ଆତାର୍, ଆୟାୱାଜା ମିର୍ ବିରୁଦ୍ତି ମାଟେଙ୍ଗ୍ ଇନ୍ମାଟ୍ ।
୧୧ ଇୟାୱିଜୁ କାତାଦି ୱାଜା ୱାରି ଉଣ୍ତିଙ୍ଗ୍ ଗଟାତା ମାର୍ହାତ୍, ମାରି ଆମାୱାରି ବେଡ଼ାଦୁ ଦୁନିଆ ସେସ୍ଆନି ଦିନ୍ ବାସା କିଜିନିକା, ଇୟାୱାଜା ଜେ ମାଡୁ, ମା ସେତ୍ନା ଉଣ୍ତିଙ୍ଗ୍ ଆୟାୱିଜୁ ରାସାତାମାନାତ୍ ।
୧୨ ଏନ୍ ନିଜେଦିଙ୍ଗ୍ ଡାଟ୍ମାନା ଇଜି ଅଡ଼୍ବିନାନ୍, ୱାନ୍ ଏଣ୍ତେସ୍ ମେଡ଼େଏନ୍, ଇୟାଉଣ୍ତିଙ୍ଗ୍ ୱାନ୍ ଜାଗ୍ରାତା ଆପିନ୍ । ୧୩ ଲୋକ୍ତି ଉଣ୍ତିଙ୍ଗ୍ ଆମା ଏଣ୍ତେସ୍ ନାନି ପରିକା ପଡ଼ାତାମାନାତ୍, ଆକା ଡ଼ିସ୍ତିଙ୍ଗ୍ ଆଇପ୍ରକାର୍ତି ପରିକା ମି ଉଣ୍ତିଙ୍ଗ୍ ଗଟେ ଆଏତ୍; ମାତର୍ ମାପୁରୁ ୱାନି ପାର୍ମାଣ୍ତି ରକ୍ୟାଦାନ୍ ବିସ୍ବାସ୍, ୱାନ୍ ମିଙ୍ଗିଁ ଇନି ସାସ୍ସିଲି ପରିକାଦୁ ପରିକା ଆଦେଙ୍ଗ୍ ସିଏନ୍, ମାତର୍ ଏଣ୍ତେସ୍ ମିର୍ ସାସ୍ କିଦେଙ୍ଗ୍ ଆଟ୍ନିଦେର୍, ଇୟାଉଣ୍ତିଙ୍ଗ୍ ପରିକା ଆନି ଦାପ୍ରେ ଦାପ୍ରେ ୱାନ୍ ମିଙ୍ଗିଁ ସାକ୍ତି ସିନାନ୍ ମାରି ଉଦାର୍ତି ସାରି ବା ତିଆର୍ କିନାନ୍ ।
୧୪ ମାରି, ଏ ନା ତଡ଼୍କୁ, ବମା ପୁଜାଦାନ୍ ଆକ ମାନ୍ଡ୍ରୁ । ୧୫ ନାନ୍ ବୁଦିଦି ଲୋକାଙ୍ଗ୍ ୱେର୍ତି ୱାଜା ୱେର୍ସିନା; ନାନ୍ ଆମାକା ୱେର୍ସିନା, ଆକା ମିର୍ ନିଜେ ବିଚାର୍ କିଦୁ । ୧୬ ପ୍ରବୁବୋଜତୁ ମାଡୁ ଆମା ଉଣିଡୁବାୟ୍ ବ୍ୟବ୍ହାର୍ କିନିକା, ତାନି ଉଣ୍ତିଙ୍ଗ୍ ମାଡୁ ମାପୁରୁଙ୍ଗୁଁ ଦନ୍ୟବାଦ୍ ସିନିକା । ଇୟା ଉଣିଡୁବାୟ୍ତାନ୍ ଉଣିୱାଲେ ମାଡୁ କ୍ରିସ୍ତଦି ନେତେର୍ତୁ ମିସାନିକା । ମାରି ରୁଟି ରୁକ୍ସୋ ତିନି ମାଣ୍କୁ ମାଡୁ କ୍ରିସ୍ତଦି ମେନ୍ଦଲ୍ତୁ ମିସାନିକା । ୧୭ ଇରିଙ୍ଗ୍ ରୁଟି ଉନ୍ଡ୍ରେ ଆତିଙ୍ଗ୍ବା ମାଡୁ ଗାଦିଲୋକ୍ ଆତିଙ୍ଗ୍ ବା ମାଡୁ ଉନ୍ଡ୍ରେ ମେନ୍ଧଲ୍, ଇରିଙ୍ଗ୍ ମାଡୁ ୱିଜେରେ ଆୟା ଉନ୍ଡ୍ରେ ରୁଟିଦୁ ମିସାତିମାନିକା ।
୧୮ କେବଲ ଇସ୍ରାଏଲ ଲୋକା ବିସୟ୍ତାନ୍ ଏତ୍କିଦୁ, ୱାରି ମାଣ୍କୁ ଆମାକାର୍ ପୁଜାକିତିକାଣ୍ତା ତିନାର୍, ୱାର୍ ଇନିକା ବେଦିଦି ଉପାସ୍ତି ୱାଲେ ମିସାଏର୍ । ୧୯ ଆର୍ତିଙ୍ଗ୍ ଦିୟାମ୍କାଙ୍ଗ୍ ସିନି ବଗ୍ ଇଜି ଜେ ଇନିକା ମାନାତ୍ ମାରି ଦିୟାମ୍ ଇଜି ଜେ ଇନିକା ମାନାତ୍, ଇକା ଇନିକା ନାନ୍ ୱେର୍ସିନା ? ୨୦ ସିଲେ, ମାତର୍ ନାନ୍ ୱେର୍ସିନା ଜେ, ଆମା ଆମାକା ୱାର୍ ପୁଜା ୱାଜା ସର୍ପେ କିନାର୍, ଆୟାୱିଜୁ ୱାର୍ ମାପୁରୁଦି ଉଦେସ୍ତାନ୍ ସିଲେ, ଆକା ଦୁବେଙ୍ଗାଁ ଉଦେସ୍ତାନ୍ କିନାର୍ । ମାରି, ମିର୍ ଜେ ଦୁବେଙ୍ଗାଁ ୱାଲେ ମିସାଦୁ, ଇକା ନା ଇଚ୍ଛା ସିଲେ । ୨୧ ମିର୍ ପ୍ରବୁଦି ଉଣିଡୁବାୟ୍ ମାରି ଦୁବେଙ୍ଗାଁ ଉଣିଡୁବାୟ୍ତୁ ରୁଣ୍ତିୱାନିକାଙ୍ଗ୍ ଉଣ୍ତେଙ୍ଗ୍ ଆଟ୍ଇଦେର୍; ମିର୍ ପ୍ରବୁଦି ମେଜ ମାରି ଦୁବେଙ୍ଗାଁ ମେଜ ରୁଣ୍ତିୱାନିକାଙ୍ଗ୍ ମିସାଦେଙ୍ଗ୍ ଆଟ୍ଇଦେର୍ । ୨୨ ମାରିବା ମାଡୁ ଇନିକା ପ୍ରବୁଙ୍ଗୁଁ ଗିଦିରି କିନିକା ? ମାଡୁ ଇନିକା ମାପୁରୁମାଣୁକୁ ନାଣ୍ତ ସାକ୍ତି ?
୨୩ ✡୧ କରିନ୍ତିୟ ୬:୧୨.ୱାର୍ ୱେର୍ସିନାର୍, “ୱିଜୁ ବିସୟ୍ ପୁରା କିନି ଉଣ୍ତିଙ୍ଗ୍ ମାଙ୍ଗିଁ ଅଦିକାର୍ ମାନାତ୍,” ମାତର୍ ୱିଜୁ ବିସୟ୍ ନେଗିକା ସିଲେ । ମାପ୍ ୱିଜୁ ବିସୟ୍ କିଦେଙ୍ଗ୍ ଆଟ୍ନାପ୍, ମାତର୍ ୱିଜୁ ବିସୟ୍ତାନ୍ ମିଚ୍ ମାଟା ସଏତ୍ । ୨୪ ଏନ୍ ନିଜେଦି ନେଗିକା ସେସ୍ଟା କିମାକିନ୍, ମାତର୍ ୱିଜୁ ଲୋକା ଆଇୱାନିଙ୍ଗ୍ ନେଗିକା ସେସ୍ଟା କିପିନ୍ ।
୨୫ ବୁଦିଦିଙ୍ଗ୍ ସପା ଇଡ୍ନି ଉଣ୍ତିଙ୍ଗ୍ ଇନିକା ୱେନ୍ବାଏଣ୍ଗା ସାତାଦୁ ପର୍ଜିମାନି କାଣ୍ତା ମିର୍ ନିଜେଦିଇଚ୍ଛାଦାନ୍ ତିନ୍ଡ୍ରେଙ୍ଗ୍ ଆଟ୍ନିଦେର୍, ୨୬ ଇରିଙ୍ଗ୍ ସାସ୍ତ୍ରଦୁ ରାସ୍ତିମାନି ବାକ୍ୟ ଇସାବ୍ତାନ୍, ଦୁନିଆ ମାରି ଆବେନ୍ ମାନି ୱିଜୁ ବିସୟ୍ ପ୍ରବୁଦି ।
୨୭ ଅବିସ୍ବାସ୍ରି ମାଣ୍କୁ ଏନ୍ ଜଦି ମିଙ୍ଗିଁ ଉଣି ଉଣ୍ତିଙ୍ଗ୍ କୁକ୍ନାନ୍, ମାରି ମିର୍ ସନ୍ଡ୍ରେଙ୍ଗ୍ ଇଚ୍ଛା କିନିଦେର୍, ଆର୍ତିଙ୍ଗ୍ ମି ବୁଦିଦି ଉଣ୍ତିଙ୍ଗ୍ ଇନିକା ୱେନ୍ବାଏଣ୍ଗା, ଆମାକା ସିତାମାନାର୍, ଆକା ଉଣ୍ତୁ । ୨୮ ମାତର୍ ଏନ୍ ଜଦି ମିଙ୍ଗିଁ ୱେର୍ନାନ୍, ଇକା ପୁଜାଦି ୱାଜା ସର୍ପେ ଆତାମାନାତ୍, ଆର୍ତିଙ୍ଗ୍ ଜେ ଇକା ୱେର୍ତାନ୍, ତାନି ଉଣ୍ତିଙ୍ଗ୍ ମାରି ବୁଦିଦି ଉଣ୍ତିଙ୍ଗ୍ ଆକା ଉଣୁମାଟ୍ । ୨୯ ମି ନିଜେଦି ବୁଦିଦି ଉଣ୍ତିଙ୍ଗ୍ ଇଜି ନାନ୍ ଇନ୍ଏ, ମାତର୍ ୱାନି ବୁଦିଦି ଉଣ୍ତିଙ୍ଗ୍ ୱେର୍ସିନା ।
ମିର୍ ଏଣ୍ତେସାତିଙ୍ଗ୍ ପ୍ରସ୍ନ କିନିଦେର୍, “ମା ଅଦିକାର୍ ଏନ୍ଦା ଆଇୱାନି ବୁଦି*ନେଗି ତାଗ୍ଇ ବିସୟ୍ତିଙ୍ଗ୍ ବିଚାର୍ କିନି ଜ୍ଞାନ୍ ଦାନ୍ ବିସାର୍ ଆନାତ୍ ।” ୩୦ ନାନ୍ ମାପୁରୁଙ୍ଗୁଁ ଦନ୍ୟବାଦ୍ ସିଜି କାଦି ଉଣୁଜିନା, ଆର୍ତିଙ୍ଗ୍ ଆମାୱାନି ଉଣ୍ତିଙ୍ଗ୍ ଦନ୍ୟବାଦ୍ ସିନା, ୱାନି ଉଣ୍ତିଙ୍ଗ୍ ନିନ୍ଦା ଇନିତାନିଙ୍ଗ୍ ଆନା ?
୩୧ ଆୟାଉଣ୍ତିଙ୍ଗ୍ ମିର୍ ଉଣ୍ତୁ ସିଲିତିଙ୍ଗ୍ ତିନ୍ଡ୍ରୁ ମାରି ଆମାକା ଇନିକା କିଦୁ, ମାପୁରୁଦି ଗୌରବ୍ତି ଉଣ୍ତିଙ୍ଗ୍ ୱିଜୁ କିଦୁ । ୩୨ ଜିହୁଦି ମାରି ଗ୍ରିକ୍ ମାରି ମାପୁରୁଦି ମଣ୍ତଲି, ଏଙ୍ଗ୍ବା ତାକାନି ପାଣି ଆମାଟ୍ । ୩୩ ମିର୍ ନା ୱାଜା ବେବ୍ହାର୍ କିଦୁ । ଏଣ୍ତେସ୍ ନାନ୍ ବା ନା ସିନ୍ତା କିଏଣ୍ଗା ନାଣ୍ତଲୋକା ରକିୟାଦି ଉଣ୍ତିଙ୍ଗ୍ ୱାରି ନେଗିତାନିଙ୍ଗ୍ ସିନ୍ତା କିନା, ମାରି ୱିଜୁ ବିସୟ୍ତାନ୍ ୱିଜେରିଙ୍ଗ୍ ୱେଡ଼ିକା କିଦେଙ୍ଗ୍ ଜାତୁନ୍ କିନା ।