୧୩
ଜିବନ୍ନୋନିକା
୧ ଜଦି ନାନ୍ ଲୋକୁ ମାରି ଦୁତ୍କା ବାସାଦାନ୍ ୱାର୍ଗିନା, ମାତର୍ ନା ଜିବନ୍ନୋନିକା ତେବାଏତ୍, ଆର୍ତିଙ୍ଗ୍ ନାନ୍ ଆଉଲିଆଜିମାନି ଗଣ୍ଟା ମାରି ଜମ୍ ଜମ୍ ଆଉଲିଆଜିମାନି ଉନ୍ଡ୍ରି ପାପୁଡ଼ିଡାକ୍ନି ୱାଜା ଆତାମାନା । ୨ ✡ମାତିଉ ୧୭:୨୦; ୨୧:୨୧; ମାର୍କ ୧୧:୨୩.ଜଦି ନାନ୍ ବାବବାଣି ୱେର୍ତେଙ୍ଗ୍ ସାକ୍ତି ମାନାତ୍ ମାରି ନାନ୍ ୱିଜୁ ମାର୍ଗିତିମାନି ମାଟା ବୁଜାଦେଙ୍ଗ୍ ସାକ୍ତି ମାନାତ୍ ମାରି ୱିଜୁ ବିସୟ୍ତି ଜ୍ଞାନ୍ ମାନାତ୍, ମାରି ଗରନ୍ତିଙ୍ଗ୍ ଗୁସାକିନି ଉଣ୍ତିଙ୍ଗ୍ ନାଙ୍ଗିଁ ପୁରା ବିସ୍ବାସ୍ ମାନାତ୍, ମାତର୍ ନା ଜିବନ୍ନୋନିକା ସିଲେତିଙ୍ଗ୍, ଆର୍ତିଙ୍ଗ୍ ନାନ୍ ଇନିକା ସିଲେ । ୩ ଜଦି ନାନ୍ ସିଲିସାତିୱାରିଙ୍ଗ୍ ଉଟ୍ପିସ୍କିନି ଉଣ୍ତିଙ୍ଗ୍ ନା ୱିଜୁ ଦାନ୍ ସିନା, ମାରି ନାନ୍ ନା ମେନ୍ଦଲ୍ତିଙ୍ଗ୍ ସିସୁଦୁ ଦଂସ୍ ଆନି ଉଣ୍ତିଙ୍ଗ୍ ସର୍ପେ କିନା, ମାତର୍ ନା ଜିବନ୍ତୁ ଜିବନ୍ନୋନିକା ସିଲେତ୍, ଆର୍ତିଙ୍ଗ୍ ଆୟାୱିଜୁ ନା ଉଣ୍ତିଙ୍ଗ୍ ଇନି ଲାବ୍ ଆଏତ୍ ।
୪ ଜିବନ୍ନୋନିକା ସାହାସ୍, ଦୟାକିନିକା । ଜିବନ୍ନୋନିକା ରିସା କିଏତ୍, ଜିବନ୍ନୋନିକା ଗର୍ବ କିଏତ୍, ଆକାର୍ ସିଲେ । ୫ ଜିବନ୍ନୋନିକା ତାଗ୍ଇ ବ୍ୟବ୍ହାର୍ କିଏତ୍, ସ୍ୱାର୍ଥପର ସେସ୍ଟା କିଏତ୍, ରିସା ଆଏତ୍, ଜିବନ୍ନୋନିକା ତାନି ଉଣ୍ତିଙ୍ଗ୍ କିଆୟ୍ଆତିମାନି ଅନ୍ୟାୟ୍ ଏତ୍ ଇଡ୍ଏତ୍ । ୬ ଜିବନ୍ନୋନିକା ଅଦାର୍ମୁଦୁ ୱେଡ଼ିକା କିଏତ୍, ମାତର୍ ସତ୍ତାନ୍ ୱେଡ଼ିକା କିନାତ୍ । ୭ ଜିବନ୍ନୋନିକା ୱିଜୁ ଇନିକା ସାସ୍ କିନାତ୍, ୱିଜୁ ବିସ୍ବାସ୍ କିନାତ୍, ୱିଜୁ ଆସା କିନାତ୍, ୱିଜୁ ବିସୟ୍ତୁ ସାସ୍ ଆସ୍ସି ତେବାନାତ୍ ।
୮ ଜିବନ୍ନୋନିକା ଏସ୍କାଙ୍ଗ୍ବା ୱିଜ୍ଏତ୍; ଜଦି ମାପୁରୁଦି ମାଣ୍କୁ ପ୍ରଚାର୍ଆନି ମାଟା ମାନାତ୍, ଆକା ମାରାଗ୍ନାତ୍; ଜଦି ଆଇବାସା ମାନାତ୍, ଆୟାୱିଜୁ ବେକାର୍ ଆନାତ୍; ଜଦି ବୁଦି ମାନାତ୍, ଆକାବା ମାରାଗ୍ନାତ୍ । ୯ ଇରିଙ୍ଗ୍ ମାପ୍ ନେଗେନ୍ତାନ୍ ନେସ୍ନାପ୍ ମାରି ନେଗେନ୍ତାନ୍ ବାବବାଦି ଇନାପ୍ । ୧୦ ମାତର୍ ପୁରାୱିଜୁ ବିସୟ୍ ଇଗା ୱାତିଙ୍ଗ୍ ଇୟା ଇସ୍ରି ବିସୟ୍କୁ ମାରେଗ୍ନେ ।
୧୧ ଇସ୍ରି କଡ଼ ମାର୍ଇ ବେଡ଼ାଦୁ ନାନ୍ ଇସ୍ରି କଡ଼ଦି ୱାଜା ୱାର୍ଗିନିକା, ଏତ୍କିନିକା, ବିଚାର୍ ଇସ୍ରି କଡ଼ଦି ୱାଜା କିଜିମାର୍ଆ; ମାତର୍ ନାଣ୍ତବୟସ୍ ଆତି ୱେନ୍କା ଇଲେଇ ନାନ୍ ମାରି ଇସ୍ରି କଡ଼ଦି ୱାଜା ବ୍ୟବ୍ହାର୍ କିଏ । ୧୨ ଇରିଙ୍ଗ୍ ଇଲେଇ ମାଡୁ ସତ୍ ବାକ୍ୟଦି ରୁପ୍ ଦାର୍ପାଣ୍ତି ସାହାଜ୍ୟଦାନ୍ ସୁଡ଼ୁଜିନିକା, ମାତର୍ ନାସ୍ତିୱାଲେ ମାଡୁ ସାମ୍ନାସାମ୍ନି ଆଜି ସୁଡ଼ୁଜିସାନିକା; ଇଲେଇ ନାନ୍ ଇସ୍ରି ଇସାବ୍ତାନ୍ ନେସ୍ସିନା, ମାପୁରୁ ନାଙ୍ଗିଁ ପୁରା ନେସ୍ତି ୱାଜା ନାସ୍ତିୱାଲେ ନା ବୁଦି ବା ପୁରା ଆନାତ୍ ।
୧୩ ମାରି ବିସ୍ବାସ୍, ଆସା ମାରି ଜିବନ୍ନୋନିକା, ଇୟା ମୁନ୍ଡ୍ରିଦି ମାଟା ବିସୟ୍ ମାନେ, ମାରି ଇୟାୱାନିକା ଲୋଇ ଜିବନ୍ନୋନିକା ନେ ପେରିକା ।