ତୀମଥିଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ତିମତିଦି ଲାକ୍ତୁ ପାଉଲତି ପାର୍ତୁମ୍ ଆକୁ
ଇୟା ଆକୁଦୁ ମାନି ଏସ ବିସୟ୍
ପାର୍ତୁମ୍ ତିମତି ପ୍ରେରିତ ପାଉଲଦି ମାଣାନ୍ ୱାନି ସିସୁ ତିମତିଦିଙ୍ଗ୍ ରାସ୍ତାମାନାନ୍ । ପାର୍ତୁମ୍ ତିମତି ଆନାତ୍ସୁଗି ପାକାପାକି ୬୨-୬୪ ବାର୍ସେକ୍ ଜିସୁ କ୍ରିସ୍ତଦି ଜନମ୍ ୱେନ୍କା ରାସାତାମାନାତ୍ । ଆଦେଙ୍ଗ୍ ଆଟ୍ନାତ୍ ଇକା ପାଉଲଦି ଜିବନ୍ତି ସାରାସାରି ବେଡ଼ା । ପାଉଲଦି ୱାଲେ ତିମତିଦି ପୁରା ମିସାବିଡ଼ା ମାର୍ଆତ୍ । ୱାନ୍ ଏସ ବେଡ଼ାଦୁ ତିମତିଦିଙ୍ଗ୍ ମାରିନ୍ ଇଜି ମାନାନାନ୍ ପିଲିପିୟ ୨:୨୨; ୧ ତିମତି ୧:୨, ୧:୧୮ । ଇକା ପାଉଲଦି ମାଣାନ୍ ରାସାତିମାନି ନାଲିଗି ବଇଙ୍ଗ୍ ଲୋଇ ଇକା ଉନ୍ଡ୍ରି । ଆଇ ମୁନ୍ଡ୍ରି ବଇଙ୍ଗ୍ ୨ ତିମତି, ତିତସ, ମାରି ପିଲିମନ ଇକେଙ୍ଗ୍ । ପାର୍ତୁମ୍ ତିମତିଦୁ ମଣ୍ତଲିଦି ଉପାସନା ବିସୟ୍ ତେବାତାମାନାତ୍ ୨:୧-୧୫ ।
ଇବେନୁ ମଣ୍ତଲିଦି ନେତାରି ଜଗ୍ ବିସୟ୍ତାନ୍ ସୁଡ଼ୁଜିନିକା ୩:୧-୧୩ ମାରି ମିସ୍ ଗୁରୁରି ତରିନ୍ ଜାଗାର୍ତାଦି ମାଟା ତେବାତାମାନାତ୍ ୧:୩-୧୧, ୪:୧-୫, ୬:୨-୫ । ମଣ୍ତଲି ଲୋଇ ତିମତି ଏଣ୍ତେସ୍ ନାନି ଉନ୍ଡ୍ରି ନେତା ଆନି ଦର୍କାର୍ ଆକା ପାଉଲ ଅଜା କିନି ସିନି ବିସୟ୍ତାନ୍ ୱେର୍ନାନ୍ । ପାର୍ତୁମ୍ ତିମତିଦୁ ଇଲେଇତି ନାର୍କାଣି ମଣ୍ତଲିଆଙ୍ଗାଁ ପାଣି ସାଲାକିନି ଉଣ୍ତିଙ୍ଗ୍ ମଣ୍ତଲିଦି ନେତାରିଙ୍ଗ୍ ଏସ ମୁଲ୍ ମାଟା ୱେର୍ନାର୍ ।
ଇୟା ଆକୁଦୁ ମାନି ମୁକ୍ୟ ବିସୟ୍
୧. ପାଉଲ ତିମତିଦିଙ୍ଗ୍ ମାଡ଼ିସ୍କିଜି ରାସ୍ନିକା ଆରାମ୍ କିତାନ୍ । ୧:୧-୨
୨. ପାଉଲ ତିମତିଦିଙ୍ଗ୍ ମିଚ୍ ୱେର୍ନି ଗୁରୁରି ତରିନ୍ ଜାଗାର୍ତା କିନାର୍ । ୧:୩-୧୧
୩. କ୍ରିସ୍ତଦିମାନୁ ପାଉଲଦି ଦନ୍ୟବାଦ୍ । ୧:୧୨-୧୯
୪. ପାଉଲ ମଣ୍ତଲିଦି ସେବା ପାଣି ନି ନେତାରି ବିସୟ୍ତାନ୍ ତିମତିଦିଙ୍ଗ୍ ମାଟା ୱେର୍ନାର୍ । ୨–୩
୫. ତିମତିଦିଙ୍ଗ୍ ପାଉଲଦି ସାରାସାରି ୱେର୍ନିକା । ୪–୬
୧
୧ ନାନୁ ପାଉଲ, ମା ରକିୟାକର୍ତ୍ତା ମାପୁରୁ ମାରି ଆସାଦିମୁଣ୍ତା କ୍ରିସ୍ତ ଜିସୁଦି ମାଟା ଇସାବ୍ତାନ୍ କ୍ରିସ୍ତ ଜିସୁଦି ଅରେନ୍ ପୋକ୍ତିମାନି ସିସୁ,
୨ ✡ପ୍ରେରିତ ୧୬:୧.ୱାନି ଦାର୍ମୁମାରିସି ତିମତିଦି ଲାକ୍ତୁ ରାସ୍ତିମାନି ଆକୁ :
ବୁବା ମାପୁରୁ ମାରି ମା ପ୍ରବୁ କ୍ରିସ୍ତ ଜିସୁଦିମାଣାନ୍ ଦୟା, ସାକା ମାରି ସାନ୍ତି ମି ଉଣ୍ତିଙ୍ଗ୍ ଆପିତ୍ ।
ତାଗ୍ଇ ସିକିୟା ଉଣ୍ତିଙ୍ଗ୍ ଜାଗାର୍ତା
୩ ନାନ୍ ମାସିଦୋନିଆଦୁ ସନିୱାଲେ ମିଙ୍ଗିଁ ୱେର୍ତିମାର୍ଇ ଇସାବ୍ତାନ୍ ମିର୍ ଏପିସ୍ତୁ ମାନ୍ଡ୍ରୁ । ଆବେନୁ ଆମାକାର୍ ତାଗ୍ଇ ସିକିୟା ୱିଜୁ ସିଜିନାର୍, ୱାରିଙ୍ଗ୍ ଆବେଟ୍ତାନ୍ ସୁପ୍ ଆଦେଙ୍ଗ୍ ଇଜି ଆଦେସ୍ ସିଦୁ । ୪ ୱାର୍ ପୁର୍ବେଦି କାତେଙ୍ଗ୍ ନି ପୁର୍ବେଦିଡକ୍ରାଦାଦାରି ନିର୍ଇ ଦାଡ଼ି ତିଆର୍ କିଜିନାର୍ । ଆୟାୱିଜୁ ଡ଼ିସ୍ତେଙ୍ଗ୍ ୱାରିଙ୍ଗ୍ ସିକିୟା ସିଦୁ, ଇରିଙ୍ଗ୍ ଆକା କେବଲ୍ ତାଗ୍ଇ ମାଟେଙ୍ଗ୍ ସପ୍ନାତ୍ । ଆମା ନେଗି ବିସ୍ବାସ୍ତୁ ମାପୁରୁଦି ବଦା ନେସ୍ତେଙ୍ଗ୍ ଆନାତ୍, ଇୟାୱିଜୁ ତାନିଙ୍ଗ୍ ବାଦା କିନାତ୍ । ୫ ନେଗି ଜିବନ୍, ନେଗି ବୁଦି ମାରି ସତ୍ ବିସ୍ବାସ୍ତାନ୍ ଆମା ଜିବନ୍ନୋନିକା ସନାତ୍, ତାନିଙ୍ଗ୍ ଜାଗାର୍ତା କିନି ଉଣ୍ତିଙ୍ଗ୍ ନେରୁ ନାନ୍ ଇୟା ଆଦେସ୍ ସିଜିନା । ୬ ଏସ ଲୋକୁ ଇୟା ମୁକିୟ ବିସୟ୍ଆଙ୍ଗ୍ ବାଣାଜି ସୋଲ୍ସି ପୁକା ମାଟେଙ୍ଗ୍ ଆସ୍ସି ସାରିବାଣାତା ମାନାର୍ । ୭ ୱାର୍ ଦାର୍ମୁଗୁରୁ ଆଜି ମାପୁରୁଦି ବିଦି ନିୟମ୍ ୱେର୍ତେଙ୍ଗ୍ ୱାର୍ ଆସାଆନାର୍, ମାତର୍ ନିଜେଦି ସିକିୟାଦି ଅରତ୍ ୱାର୍ ବୁଜାଦେଙ୍ଗ୍ ଆଟ୍ଏର୍; ଆମା ୱିଜୁ ବିସୟ୍ତାନ୍ ସତ୍ତାନ୍ ନିଜେଦି ମାଟା ୱେର୍ନାର୍, ଆକା ସତ୍ତାନ୍ ଇନିକା, ୱାର୍ ନେସ୍ଏର୍ ।
୮ ମାଡ୍ ନେସ୍ନାଟ୍ ଜେ, ନିୟମ୍ ନେଗେନ୍ତାନ୍ ମାନାଦେଙ୍ଗ୍ ଆଟ୍ତିଙ୍ଗ୍, ଆକା ନେଗିକା । ୯ ମାତର୍ ମନେ ଇଡ୍ଦେଙ୍ଗ୍ ଆନାତ୍, ଇୟା ନିୟମ୍ ଦାର୍ମୁଦି ଲୋକା ଉଣ୍ତିଙ୍ଗ୍ ଆଏତ୍ । ନିୟମ୍ତିଙ୍ଗ୍ ମାନାଇ ପାପିଦିଲୋକା ଉଣ୍ତିଙ୍ଗ୍ ଆକା ତିଆର୍ ଆତାମାନାତ୍ । ଆମାକାର୍ ତାଗ୍ଇକାର୍, ଆମାୱାରିଙ୍ଗ୍ ମାପୁରୁଙ୍ଗ୍ ତିୟେଲ୍ ସିଲେ, ଆମାକାର୍ ପାପ୍ ତାଗ୍ଇପାଣିଦୁ ମିସାତାମାନାର୍, ଆମାୱାରିଙ୍ଗ୍ ଦାର୍ମୁ ନି ସାନ୍ତିଜିବନ୍ ସିଲେତ୍, ଆମାକାର୍ ବୁବାୟାୟ୍ଙ୍ଗେ ସାୟାମାର୍ଗାଡାକ୍ତେଙ୍ଗ୍ ତିୟେଲ୍ ଆଏର୍; ଲୋକାଙ୍ଗ୍ ସାୟାମାର୍ଗାଡାକ୍ନିକା, ୧୦ ଲାଲାୟ୍ଆନି, ଲୋକାଙ୍ଗ୍ ଡଙ୍ଗାଁକିନିକାର୍ ମାରି ମିଚ୍ ମାଟା ୱେର୍ତେଙ୍ଗ୍ ଆମାକାର୍ ଅବ୍ୟାସ୍, ମିଚ୍ ସାକି ସିନାର୍ ଆମାକାର୍ ୱିଜୁ ସତ୍ସିକିୟାଦୁ ବିରୁଦ୍ କିନାର୍, ୱାରି ଉଣ୍ତିଙ୍ଗ୍ ନିୟମ୍ ନେଗିକା । ୧୧ ଗୌରବ୍ମୟ୍ ଦନ୍ୟ ମାପୁରୁଦି ନେଗି କାବୁର୍ ପ୍ରଚାର୍ କିନି ଦାଇତ୍ ନା ମୁସ୍କୁ ସିଆୟ୍ଆତା ମାନାତ୍ ।
ମାପୁରୁଦି ଦୟା ଉଣ୍ତିଙ୍ଗ୍ ଦନ୍ୟବାଦ୍
୧୨ ନା ଦାଇତ୍ କିଦେଙ୍ଗ୍ ନାଙ୍ଗିଁ ଦୟା କିତିମାନିଙ୍ଗ୍ ମା ପ୍ରବୁ ଜିସୁ କ୍ରିସ୍ତଙ୍ଗ୍ ଦନ୍ୟବାଦ୍ ସିଜିନା । ପୁର୍ବେ ନାନ୍ ୱାନିଙ୍ଗ୍ ନିନ୍ଦା କିଜିମାର୍ଆ, ୱାନିଙ୍ଗ୍ କାସ୍ଟୁ ନି ଅପ୍ମାନ୍ ସିଜିମାର୍ହା । ମାରିବା ୱାନ୍ ନାଙ୍ଗିଁ ବିସ୍ବାସ୍ ବୁଦି କିଜି ୱାନି ସେବା ଉଣ୍ତିଙ୍ଗ୍ ଆସ୍କିତାମାନାନ୍ । ୧୩ ✡ପ୍ରେରିତ ୮:୩; ୯:୪,୫.ମାରିବା ନାନ୍ ପୁର୍ବେ ନିନ୍ଦା, କାସ୍ଟୁସିନିକା ମାରି ଲୋକାଙ୍ଗ୍ ସାୟାମାର୍ଗାଡାକ୍ନିକାନ୍ ମାର୍ହା; ମାତର୍ ନାନ୍ ବିସ୍ବାସ୍ କିଇ ଉଣ୍ତିଙ୍ଗ୍ ନେସ୍ଏଣ୍ଗା ଆକା ୱିଜୁ କିତାମାର୍ହା, କେମା କିଜି ମାପୁରୁ ନା ଉଣ୍ତିଙ୍ଗ୍ ସାକା ଆତାମାନାନ୍ । ୧୪ ମାରି, ମା ପ୍ରବୁ ଜିସୁ ମାରି ଦୟା କ୍ରିସ୍ତ ଜିସୁଦି ୱାଲେ ମିସାଜି ବିସ୍ବାସ୍ ମାରି ଜିବନ୍ନୋନିକା ଆୟାୱାଜା ନା ଉଣ୍ତିଙ୍ଗ୍ ଅଦିକ୍ ନାଣ୍ତ୍ ଆତାତ୍ । ୧୫ ପାପି ଲୋକାଙ୍ଗ୍ ରକିୟା କିନି ଉଣ୍ତିଙ୍ଗ୍ କ୍ରିସ୍ତ ଜିସୁ ଜଗତ୍ଦୁ ୱାତାନ୍, ଇକା ଉନ୍ଡ୍ରି ପୁରା ସତ୍ ଇୟା ବାକ୍ୟ ବିସ୍ବାସ୍ ମାରି ୱିଜେରେ ମାନାନାର୍; ଆୟା ପାପି ଲୋକା ଲୋଇରାନ୍ ନାନ୍ ୱିଜେରିମାଣୁକୁ ପେରିକାନ୍ । ୧୬ ମାତର୍ ନା ୱାଜା ଉନ୍ଡ୍ରି ପାପି ଉଣ୍ତିଙ୍ଗ୍ ବା ମାପୁରୁଦି ଦୟା ମାରି କ୍ରିସ୍ତ ଜିସୁଦି ସାକା ନାଙ୍ଗିଁ ଉନ୍ଡ୍ରି କାତା କିଜି ଇଟ୍ତାମାନାତ୍ ଆଇକାର୍ ଏଣ୍ତେସ୍ ଜିସୁଦିମାନୁ ବିସ୍ବାସ୍ ତିଆର୍ କିଜି ଏସ୍କାଙ୍ଗ୍ୱିଜିଇ ଜିବନ୍ ପୟ୍ନାନ୍ । ୧୭ ୱିଜୁ ଦୁନିଆଦି ତରାଇ, ୱିଜ୍ଇ, ୱିଜୁଦିନ୍ତି ରାଜା ଅରେନ୍ ମାପୁରୁ ଜେ, ୱାନି ସମ୍ଭ୍ରମ ଗୌରବ୍ ଜୁଗ୍ ଜୁଗ୍ ଆପିତ୍ ! ଆମେନ୍ ।
୧୮ ଏ କଡ଼ ତିମତି, ମି ବିସୟ୍ତାନ୍ ଆଗ୍ଡ଼ି ରାସ୍ତିମାନି ୱିଜୁ ବାବବାଣି ଇସାବ୍ତାନ୍ ନାନ୍ ନିଙ୍ଗିଁ ଇୟା ମାଟା ୱେର୍ସିନା, ଏଣ୍ତେସ୍ ନିନୁ ଆୟାୱିଜୁ ବାବବାଣି ସାହାଜ୍ୟଦାନ୍ ନେଗେନ୍ତାନ୍ ଜୁଦ୍ କିଦେଙ୍ଗ୍ ଆଟ୍ନିଦେର୍; ୧୯ ବିସ୍ବାସ୍ ମାରି ନେଗି ବୁଦି ଆସ୍ସୋ ଇଡିଆ; ଆକା ଡ଼ିସ୍ତାର୍ଆକା ଏସଲୋକାଙ୍ଗ୍ ଦାର୍ମୁ ବିସ୍ବାସ୍ ରୁଙ୍ଗିଁତା ସର୍ହାତ୍ । ୨୦ ୱାରି ମାଣ୍କୁ ହୁମନାୟ ମାରି ଆଲେକ୍ଜାଣ୍ତର୍ ଆଇକାର୍; ଇୟାକାର୍ ଏଣ୍ତେସ୍ ସାସନ୍ ପୟ୍ଆୟ୍ ମାପୁରୁଙ୍ଗ୍ ନିନ୍ଦା କିଏର୍, ଇୟାଉଣ୍ତିଙ୍ଗ୍ ନାନ୍ ୱେରିଙ୍ଗ୍ ସୟ୍ତାନ୍ କିୟୁଦୁ ସର୍ପେ କିତା ।