୧ ✡ପ୍ରେରିତ ୧୮:୧.ନାନ୍‌ ପାଉଲ, ମାପୁରୁଦି ବଦାଦାନ୍ ବାସେଆତି ଜିସୁ କ୍ରିସ୍ତଦି ପ୍ରେରିତ ସିସୁ ପାଉଲ ମାରି ମା ତଡ଼ାନ୍‍ ତିମତି କରନ୍ତି ଗାଡ଼ାଦି ମାପୁରୁଦି ମଣ୍ତଲି ମାରି ଆକାୟା ଦେସ୍‍ତି ୱିଜୁ ବିସ୍‍ବାସିରି ଲାକୁତୁ ଇୟା ଆକୁ ରାସ୍‍ସିନାନ୍‍ ।

୨ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ମାରି ସାନ୍ତି ସିପିନ୍‍ ।

୩ ରାଦୁ, ମା ମାପୁରୁ ଜିସୁ କ୍ରିସ୍ତଦି ବୁବା, ଦୟାକିନିକାନ୍‍ ମାରି ୱିଜେରିଙ୍ଗ୍ ସାକାକିନିକାନ୍‍, ମାପୁରୁଙ୍ଗୁ ଦନ୍ୟବାଦ୍‍ ଜାଣେକିନାଟ୍‌ । ୪ ମା ଦୁକ୍ କାସ୍ଟୁ ବେଡ଼ାଦୁ ୱାନ୍‌ ମାଙ୍ଗିଁ ଏମେ ସାନ୍ତି ସିନାନ୍, ଆୟା ସାନ୍ତି ଦାନ୍ ମାଡ଼ୁ ଦୁଃକ୍‍କାଷ୍ଟୁ ପୟ୍‍ଜିମାନି ଆଇୱାରିଙ୍ଗ୍‌ ସାନ୍ତି ସିଦେଙ୍ଗ୍‌ ଆଟିନିକା । ୫ ମାଡୁ କ୍ରିସ୍ତଦି ନାଣ୍ତ ଦୁକ୍‌ବୋଗଦୁ ମିସାତିମାନିଙ୍ଗ୍ କ୍ରିସ୍ତଦି ସାକାଦାନ୍ ମାପୁରୁଦି ନାଣ୍ତସାନ୍ତିଦୁ ବା ମିସାଦେଙ୍ଗ୍ ଆଟ୍‍ନିକା । ୬ ମାଡୁ ଜଦି ଏମେ ଦୁଃକ୍‌ବୋଗ୍‌ କିନିକା, ଆକା ମି ନେଗିତାନିଙ୍ଗ୍‌ ମାରି ରକ୍‌ୟାଦି ଉଣ୍ତିଙ୍ଗ୍‌ । ମାପୁ ସାନ୍ତିପୋୟ୍‍ତିଙ୍ଗ୍‍, ମିର୍‌ ବା ଆୟାୱାଜା ଆଟୁୱାଦାନ୍‌ ଦୁକ୍ ବୋଗକିନି ଉଣ୍ତିଙ୍ଗ୍‌ ସାନ୍ତି ମାରି ସାକ୍ତି ପୟ୍‌ନିଦେର୍‌ । ୭ ମି ବିସୟ୍‍ତାନ୍‍ ମା ଆସା ମାନାତ୍ । ମାପୁ ନେସ୍‌ନାପ୍, ମିର୍‌ ମା ଦୁକ୍‍କାଷ୍ଟୁଦୁ ଏଣ୍ତେସ୍ ମିସାଜିନିଦେର୍‌, ଆୟାୱାଜା ମା ସାନ୍ତିଦୁ ବା ମିସାଦୁ ।

୮ ✡୧ କରିନ୍ତିୟ ୧୫:୩୨.ତଡ଼ାନ୍‌କୁ ନି ତାଙ୍ଗିଁକି, ମାଡ଼ୁ ଆସିଆ ଦେସ୍‌ତୁ ପୋଇତିମାନି କାସ୍ଟୁ ବିଷୟ ମିଙ୍ଗିଁ ୱେର୍‍ତେଙ୍ଗ୍ ଇଛାକିଜିନା । ଆୟାକାସ୍ଟୁ ବଜୁଆଜିମାନିଙ୍ଗ୍‌ ମା ଜିବନ୍‌ତୁ ସାକ୍ତି ଆସା ଡ଼ିସ୍‌ତାମାରାପ୍ । ୯ ମାଙ୍ଗିଁ ବିଚାର୍‌ ସିଆତାମାନାତ୍‌ ଇଜି ଅଡ଼୍‌ବିତାମାରାପ୍ । ମାତର ନିଜେ ମୁସୁକୁ ଆସାଇଡ୍‍ଏନ୍‍ଙ୍ଗା ସାନିମାଡ଼ାନ୍‍କୁ ଜିବନ୍‌ ସିନି ମାପୁରୁଦି ମୁସୁକୁ ଆସା ଇଡିନି ଉଣ୍ତିଙ୍ଗ୍ ଇୟାୱିଜୁ ଗୋଟାତା ମାନାତ୍ । ୧୦ ଇୟାୱାଜା ନାଣ୍ତସାନି ବିପଦତାନ୍ ୱାନ୍‌ ମାଙ୍ଗିଁ ଉଦାର୍‌ କିତାମାନାନ୍ ମାରି କିଜିମାନାନ୍ । ୱାନ୍‌ ମାରିଡ଼େସି ମାଙ୍ଗିଁ ଜାଗ୍‌ରାତା କିନାନ୍ ଇୟା ଆସା ମାଙ୍ଗିଁ ୱାନିମାନୁ ମାନାତ୍‌ । ୧୧ ମିର୍‌ ପାର୍‍ତନାଦାନ୍‍ ମାଙ୍ଗିଁ ସାହାଜ୍ୟ କିଦୁ । ଆର୍‌ତିଙ୍ଗ୍‌, ମା ଉଣ୍ତିଙ୍ଗ୍ କିତିମାନି ଏସ ପାର୍‍ତନାଦୁ ଉତର୍‌ ପୋଇନିକା ମାରି ମାପୁରୁ ମାଙ୍ଗିଁ ଆସିର୍ବାଦ୍‌ ଦାନ୍‍ କିନାନ୍ । ମା ଉଣ୍ତିଙ୍ଗ୍ ଗାଦିଲୋକ୍‌ ମାପୁରୁମାଡ଼ାନ୍ ଦନ୍ୟବାଦ ସିନାର୍‌ ।

୧୨ ଦୁନିଆଦୁ ଜିବନ୍‌ ମାରି ବିସେସ୍‍କିଜି ମିୱାଲେ ମା ମିଲାମିସା ମାପୁରୁମାନୁ ପବିତ୍ର ମାରି ବିସ୍‍ବାସ୍ ବୁଲାଜିସାଜି ଇଜି ମା ବୁଦିଦୁ ସାକି । ଇୟାଉଣ୍ତିଙ୍ଗ୍‌ ମା ମୋନତୁ ଗର୍ବ ଆଜିନାତ୍ ଦୁନିଆଦି ବୁଦିଦାନ୍ ଆଏତେ, ମାତର୍‌ ମାପୁରୁଦି ଦୟାଦାନ୍ ଇକା କିଦେଙ୍ଗ୍ ମାପୁ ସାକି ଆତିମାନିକା । ୧୩ ଆମାକା ପଡ଼ାଜି ମିର୍‌ ବୁଜାଜିନିଦେର୍‌, ମିମାନୁ ମାପ୍‌ ନାସନେ ରାସ୍‌ତାମାନାପ୍ । ୧୪ ନାନୁ ଆସା କିଜିନା, ଇଲେଇ ଆମାକା ଅଡ଼ପ୍‍ତାନ୍‍ ବାବେ ବୁଜାଜିନାପ୍, ଆକା ଅଡ଼ପ୍‍ତାନ୍‍ ବାବରେ ପ୍ରବୁ ଜିସୁଦି ଡ଼େସିୱାନି ୱାନିକା ପୁରା ବୁଜାଦେଙ୍ଗ୍ ଆଟ୍‌ନାର୍ । ଆର୍‌ତିଙ୍ଗ୍‌, ମିର୍‌ ମା ଉଣ୍ତିଙ୍ଗ୍ ଗର୍ବ କିଜିନିଦେର୍‌ ମାରି ମାପୁ ବା ମି ଉଣ୍ତିଙ୍ଗ୍ ଗର୍ବ କିଜିନାପ୍ ।

୧୫ ଇୟା ବିସୟତାନ୍ ନାନୁ ଟିକ୍‍ବାବେ ନେସ୍ତିମାନିଙ୍ଗ୍ ଆଗିଡ଼ିନେ ମି ଲାକ୍‌ତୁନେ ସନି ଉଣ୍ତିଙ୍ଗ୍‌ ନା ବଦା ମାର୍‌ଆତ୍‌ । ଆର୍‌ତିଙ୍ଗ୍‌ ମିର୍‌ ରିଜା ସୁଡ଼ୁଜି ନାଙ୍ଗିଁ ଦୟା ପୟ୍‌ଦେଙ୍ଗ୍‌ ଆଟ୍‌ତିଦେର୍‌ମାନ୍ଦି । ୧୬ ✡ପ୍ରେରିତ ୧୯:୨୧.ମାସିଦନିଆ ସନିୱାଲେ ମାରି ଆବେଟ୍‌କୁ ଡ଼େସିୱାନିୱାଲେ ମି ଲାକ୍‌ତୁ ଏସ ଦିନ୍ ମାନ୍‌ଡ୍ରେଙ୍ଗ୍ ନା ପାଣିକିନିକା ମାର୍‌ଆତ୍, ମାତର୍‌ ଜିହୁଦା ଦେସ୍‌ତୁ ସନିଉଣ୍ତିଙ୍ଗ୍ ନାନୁ ମି ସାହାଜ୍ୟ ଦରକାର୍ ମାର୍‌ଆତ୍ । ୧୭ ନାନୁ ଇନିକା ନା ବଦାଦାନ୍ ଇୟା ପାଣି ତିଆର୍ କିତାମାର୍‌ଆ ? ଏମେକାର୍ ଅରସେ “ହଁ, ହଁ” ମାରି “ସିଲେ, ସିଲେ,” ଇନାର୍, ୱାରିୱାଜା ଇନିକା ନା ନିଜେଦି ତରାନିଉଣ୍ତିଙ୍ଗ୍ ନା ପାଣିକିଜିନା ? ୧୮ ସତ୍‍ ମାପୁରୁ ନେସ୍‌ନାନ୍‌, ଅବସ୍ୟ ମାପୁରୁ ମି ମାଟା ୱେର୍‌ନିୱାଲେ ମାପ୍‌ ଏସ୍‌କାଙ୍ଗ୍‌ବା “ହୁଁ ସିଲ୍‌ତିଙ୍ଗ୍‌ ସିଲେ ।” ୧୯ ସିଲା, ତିମତି ମାରି ନାମାଣୁକୁ ମି ଲାକ୍‌ତୁ ପ୍ରଚାର୍‌କିତିମାନି ମାପୁରୁଦି କଡ଼ ଜିସୁ କ୍ରିସ୍ତଙ୍ଗ୍‌, ଏସ୍‌କାଙ୍ଗ୍ ଅର୍‌ସେ “ହୁଁ ” ମାରି “ସିଲେ” ଇନ୍‌ଏର୍‌ । ଆଇତରିନ୍‍, ୱାନ୍‌ ୱିଜୁଦିନ୍ ମାପୁରୁଦି ମାଟାଦିଙ୍ଗ୍‌ “ହୁଁ” ଇଜିନାନ୍‌ । ୨୦ ମାପୁରୁଦି ୱିଜୁ ଆସାଦି ଉଣ୍ତିଙ୍ଗ୍‌ ଜିସୁ କ୍ରିସ୍ତ “ହୁଁ,” ଇନାନ୍‌ ୱାନିମାନୁ ପୁରା ଆତାମାନାତ୍ । ଇୟାଉଣ୍ତିଙ୍ଗ୍‌ ଜିସୁ କ୍ରିସ୍ତଦି ଉଣ୍ତିଙ୍ଗ୍‌ ମା ମାପୁରୁଦି ଗୌରବ୍‍ ଉଣ୍ତିଙ୍ଗ୍‌ “ଆମେନ୍‍ ।” ୨୧ ନିଜେ ମାପୁରୁ ଜିସୁ କ୍ରିସ୍ତଦିମାନୁ ମିଦି ମାରି ମା ଜିବନ୍‌ତିଙ୍ଗ୍‌ ଅର୍‌ସେ କିଜି ରକ୍‌ୟା କିତାମାନାନ୍ । ୨୨ ୱାନ୍‌ ମାଙ୍ଗିଁ ୱେରେଏ କିତାମାନାନ୍ ମାରି ମା ଜିବନ୍‌ତୁ ୱାନି ପବିତ୍ରଆତ୍ମାଦିଙ୍ଗ୍ ଇଟିତାମାନାନ୍ । ପବିତ୍ରଆତ୍ମା ଆଜିନାତ୍, ମା ମୁସ୍‌କୁ ମାପୁରୁଦି ଅଦିକାର୍‍ତି ସିନା ମାରି ବବିସତ୍‌ଦୁ ମାଡୁ ଆମାକା ପୟ୍‌ନିକା, ୱାନି ୱିଜୁ ୱାଜା ।

୨୩ ମାପୁରୁ ନା ସାକି । ୱାନ୍‌ ନା ଜିବନ୍‌ ନେସ୍‌ନାନ୍‌ । ମିଙ୍ଗିଁ ନାନୁ ଏଣ୍ତେସ୍‌ମାରି ଦୁଃକ୍‌ସିଏ, ଆୟାଉଣ୍ତିଙ୍ଗ୍‌ ନାନ୍‌ କରନ୍ତିଦୁ ସନିକା ତେବାକିତା । ୨୪ ମିର୍‌ ଏମେ ବାସା ବିସ୍‍ବାସ୍‍ କିନିଦେର୍‌, ଇୟା ବିସୟ୍‌ତାନ୍‌ ମି ମୁସ୍‌କୁ ପାଣିକିଦେଙ୍ଗ୍ ମାପ୍‌ ସେସ୍ଟାକିଏପ୍, ମାତର୍‌ ମିର୍‌ ବିସ୍‍ବାସ୍ ଆଟୁୱା ଆଜି । ମାରି ମିଙ୍ଗିଁ କେବଲ ୱେଡ଼ିକା କିନି ଉଣ୍ତିଙ୍ଗ୍ ମି ୱାଲେ ମିସାବିଡ଼ାଜି ମାଡୁ ପାଣିକିନାଟ୍ ।