୧୧
ପାଉଲ ନି ବାଣ୍ତା ବାବବାଦିର୍
୧ ନାନ୍ ଅଡ଼୍ବିନା, ଇନି ବିସୟ୍ତିଙ୍ଗ୍ ଅଡ଼ପ୍ ବୁଲ୍ ଆତିଙ୍ଗ୍ବା ମିର୍ ନାଙ୍ଗିଁ ସାସ୍କିନିଦେର୍ । ୨ ମି ବିସୟ୍ତାନ୍ ଉନ୍ଡ୍ରି ସାକ୍ତିଦି ରିସାଆନିକା ନା ମୋନ୍ତୁ ମାନାତ୍ । ଇରିଙ୍ଗ୍ ମିର୍ ପବିତ୍ର ରିପାଆଇଲି ୱାଜା । ଅରେନ୍ନେମାତର୍ କାନ୍ୟାମୁରୁଲି କ୍ରିସ୍ତଦି ୱାଲେ ମି ମିସାକିନି ସିନି ଉଣ୍ତିଙ୍ଗ୍ ନାନ୍ ପାର୍ମାଣ୍ କିତାମାନା । ୩ ନାଙ୍ଗିଁ ତିଏଲ୍ୱାଜିନାତ୍, ସାରାସ୍ତି ସାଲାକିଦାନ୍ ହବା ଏଣ୍ତେସ୍ ବାୟାଆତି ୱାଜା ମିର୍ ଏଣ୍ତେସାତିଙ୍ଗ୍ କ୍ରିସ୍ତଦି ଉଣ୍ତିଙ୍ଗ୍ ମି ସାନ୍ତି ମାରି ପବିତ୍ର ବିସ୍ବାସ୍ତାନ୍ ୱେର୍ଏ ଆନିଦେର୍ । ୪ ଇରିଙ୍ଗ୍ ଏନ୍ ଜଦି ୱାଜି ମାଡୁ ପ୍ରଚାର୍ କିତିମାନି ଜିସୁଙ୍ଗୁଁ ଡ଼ିସ୍ସି ଆଇ ଇନି ଜିସୁଦି ମାଟା ପ୍ରଚାର୍ କିନାର୍ ବା ମିର୍ ପୟ୍ତିମାନି ପବିତ୍ର ଆତ୍ମାଦିଙ୍ଗ୍ ଡ଼ିସ୍ତିଙ୍ଗ୍ ଆଇ ଏମେ ଆତ୍ମାଦି ମାଟା ୱେର୍ନାର୍ ମାରି ମିର୍ ମାନାତିମାନି ସୁସମାଚାର୍ତିଙ୍ଗ୍ ଡ଼ିସ୍ସି ଆଇ ଇନି ସୁସମାଚାର୍ ପ୍ରଚାର୍ କିନାର୍, ମିର୍ ପୁରା ମାନାତିମାନିଦେର୍ ।
୫ ମି ଆୟା ୱିଜେରିଙ୍ଗ୍ପେରି “ପ୍ରେରିତ ସିସୁରି” ମାଣ୍କୁ ନାନ୍ ଇନି ଗୁଣୁତୁ ଇସ୍ରିକିନ୍ଦା ଇଜି ଅଡ଼ବିଏ । ୬ ନାନ୍ ୱାରି ୱାଜା ସାଲାକିଦିକାନ୍ ଆଦେଙ୍ଗ୍ ଆଟ୍ଏ, ମାତର୍ ବୁଦିଦୁ ଉଣା ସିଲେ । ମିଙ୍ଗିଁ ଇୟା ମାଟା ମାପ୍ ୱିଜୁଦିନ୍ ମାରି ୱିଜୁ ଅସୁବିଦାଦୁ ୱେର୍ସି ୱାଜିନାପ୍ ।
୭ ମାପୁରୁଦି ସୁସମାଚାର୍ ପ୍ରଚାର୍ କିତିୱାଲେ ନାନ୍ ମିମାଣୁକୁ ମୁସ୍କୁପେରାନି ଉଣ୍ତିଙ୍ଗ୍ ନାନ୍ ନିଜେଦିଙ୍ଗ୍ ଆଡ୍ଗି କିତାମାନା । ଇକା ଇନିକା ନା ବୁଲ୍ ? ୮ ମି ଲୋଇ ପାଣି କିତିୱାଲେ ନାନ୍ ଆଇ ମଣ୍ତଲିଙ୍ଗାଁମାଣୁକୁ ଡାବୁଙ୍ଗ୍ ସାହାଜ୍ୟ ପୟ୍ତାମାନା । ୱେର୍ତେଙ୍ଗ୍ ସରିଙ୍ଗ୍, ମି ନେଗି ଉଣ୍ତିଙ୍ଗ୍ ନାନ୍ ୱାରିଙ୍ଗ୍ ଡଙ୍ଗାଁ କିତାମାନା । ୯ ✡ପିଲିପିୟ ୪:୧୫-୧୮.ମି ୱାଲେ ମାରିଇୱାଲେ ନା ଅବାବ୍ ପୁରାକିନି ଉଣ୍ତିଙ୍ଗ୍ ନାନୁ ଏଙ୍ଗ୍ବା ବଜୁତିଗ୍ଦେଙ୍ଗ୍ ସିଏ । ଇରିଙ୍ଗ୍ ମାସିଦୋନିଆଦାନ୍ ୱାତିମାନି ତଡ଼ାନ୍କୁ ନା ୱିଜୁ ଅବାବ୍ ପୁରା କିତାମାର୍ହାର୍ । ସର୍ଇଦିନ୍ତି ୱାଜା ବବିସ୍ୟତରେ ବା ନାନୁ ଏସ୍କାଙ୍ଗ୍ ମିଙ୍ଗିଁ ବଜୁତିଗ୍ଏ । ୧୦ ନା ଜିବନ୍ତୁ ମାନି କ୍ରିସ୍ତଦି ସତ୍ତିଙ୍ଗ୍ ସାକି ସିଜି ନାନୁ ପାର୍ମାଣ୍ କିଜି ୱେର୍ସିନା ଜେ, ଆକାୟା ରାଜିଦି ଆମା ରାଜିଆଙ୍ଗାଁ ନା ଇୟା ଗର୍ବଦିଙ୍ଗ୍ ଏନ୍ ନାସ୍ଟୁ କିଦେଙ୍ଗ୍ ଆଟ୍ଏନ୍ । ୧୧ ନାନ୍ ଇନିଦାନିଙ୍ଗ୍ ଇୟାୱାଜା ଇଜିନା ? ନାନୁ ଇନିକା ମିଙ୍ଗିଁ ଜିବନ୍ନୋଏ ? ମାପୁରୁ ନେସ୍ନାନ୍, ମିଙ୍ଗିଁ ନାନୁ ଏସଜିବନ୍ନୋନା ।
୧୨ ମାତର୍ ଇଲେ ନାନୁ ଆମାକା କିଜିନା, ଆକା କିଜିମାନା । ଆର୍ତିଙ୍ଗ୍, ମା ୱାଜା ପାଣି କିଜିନିଦେର୍ ଇଜି ଆଇ “ପେରିତ୍ର୍” ଗର୍ବ କିନାର୍, ୱାର୍ ମାରି ଆକା କିଦେଙ୍ଗ୍ ଆଟ୍ଏର୍ । ୧୩ ୱାର୍ ସତ୍ତି ପ୍ରେରିତ ସିସୁର୍ ଆଏର୍, ୱାର୍ ୱିଜେରେ ଟକେକିନିକାର୍, ୱାର୍ ନିଜେଦି ପାଣି ବିସୟ୍ତାନ୍ ମିଚ୍ ଇନାର୍ ମାରି କ୍ରିସ୍ତଦି ପ୍ରେରିତ ସିସୁ ୱାଜା ତରାନି ଉଣ୍ତିଙ୍ଗ୍ ରୁପ୍ ବାଦ୍ଲେକିନାର୍ । ୧୪ ମାରି ଇକା କାବାଆନିକା ଇନିକା ସିଲେତ୍, ମାତର୍ ସୟତାନ୍ ବା ଜାୟ୍ତି ମୁସ୍କୁପୁର୍ତି ଦୁତ୍କା ୱାଜା ତରାନି ଉଣ୍ତିଙ୍ଗ୍ ରୁପ୍ ବାଦ୍ଲେକିଜିନାତ୍ । ୧୫ ଆଦେଙ୍ଗ୍ ୱାନି ଦାସ୍କୁ ଦାର୍ମୁଦି ସେବାକିନିୱାନି ରୁପ୍ ଆସ୍ତାର୍, କାବାଆନିକା ଇନିକା ସିଲେତ୍, ମାତର୍ ସାରାସାରିୱେନ୍କା ୱାର୍ କିତିମାନି ପାଣିଦି ଇସାବ୍ତାନ୍ ଦଣ୍ତ ୱାର୍ ପୟ୍ନାର୍ ।
ପାଉଲଦି ଦୁକ୍ବଗାନିକା ସିସୁ ୱାଜା
୧୬ ନାନ୍ ମାରିଡ଼େସି ଇଜିନା, ଏନ୍ ଏଣ୍ତେସ୍ ନାଙ୍ଗିଁ ବୁଦିସିଲିକାନ୍ ଇଜି ଅଡ଼୍ବିମାକିନ୍ । ଜଦି ଆୟାୱାଜା ଅଡ଼୍ବିନା,
ଆର୍ତିଙ୍ଗ୍ ନାଙ୍ଗିଁ ବୁଦିସିଲିକାନ୍ ୱାଜା ମାନାଦୁ, ଆର୍ତିଙ୍ଗ୍ ନାନୁ ବା ଅଡ଼ପ୍ ଗର୍ବ କିଦେଙ୍ଗ୍ ଉନ୍ଡ୍ରି ସୁଜୋଗ୍ ପୟ୍ନା । ୧୭ ମାରିବା ଇଲେ ନାନ୍ ଆମାକା ଇଜିନା, ଆୟାଉଣ୍ତିଙ୍ଗ୍ ପ୍ରବୁ ନାଙ୍ଗିଁ ଆଦେସ୍ ସିଏନ୍ । ଇରିଙ୍ଗ୍ ଗର୍ବ କିନି ବିସୟତାନ୍ ନାନୁ ସତ୍ତାନ୍ ବୁଦିସିଲି ୱାଜା ୱାର୍ଗିଜିନା । ୧୮ ମାତର୍ ଦୁନିଆଦି ବିସୟ୍ତାନ୍ ନାଣ୍ତଲୋକ୍ ଏଣ୍ତେସ୍ ଗର୍ବ କିନାର୍, ନାନ୍ ବା ଆୟାୱାଜା କିଦେଙ୍ଗ୍ ଆଟ୍ନା । ୧୯ ମିର୍ ବୁଦିଆଜି ବା ୱେଡ଼ିକାଦାନ୍ ବୁଦିସିଲିୱାରିଙ୍ଗ୍ ସାସ୍ କିଜିନିଦେର୍ । ୨୦ ଜଦି ଏନ୍ ମି ମୁସ୍କୁ ଅଦିକାର୍ କିଜି ସାକର୍ କିତିଙ୍ଗ୍, ମି ୱିଜୁ ଦନସମ୍ପତି ଆସ୍ତିଙ୍ଗ୍, ମିଙ୍ଗିଁ ଉରିଦୁ ପକ୍ତିଙ୍ଗ୍, ମିଙ୍ଗିଁ କାଡ଼ିତିଙ୍ଗ୍, ଇୟାୱାଜା ଜେ ମି ବୁଗୁଲିଦୁ ସାପୁଡ଼ା ଡାକ୍ତିଙ୍ଗ୍ ବା ମିର୍ ଆକା ସାସ୍କିଜିନିଦେର୍ । ୨୧ ନାନ୍ ସେମାର୍ତି ୱାଲେ ମାନାଜିନା ଜେ, ଇୟାୱିଜୁ ବିସୟ୍ଦୁ ନାନୁ ନାଣ୍ତ ଦୁର୍ବଲମାନା ।
ମାତର୍ ଆଇ ଇନି ବିସୟ୍ତୁ ଏନ୍ ଜଦି ଗର୍ବ କିଦେଙ୍ଗ୍ ସାହାସ୍ କିନାନ୍, ଆର୍ତିଙ୍ଗ୍ ମୁର୍କୁ ୱାଜା ନାନୁ ଇଜିନା, ନା ଆୟାୱାଜା ସାହାସ୍ ମାନାତ୍ । ୨୨ ୱାର୍ ଇନିକା ଏବ୍ରିୟ ? ନାନ୍ ବା ଏବ୍ରିୟ । ୱାର୍ ଇନିକା ଇସ୍ରାଏଲିୟ ? ନାନୁ ବା ଇସ୍ରାଏଲିୟ । ୱାର୍ ଇନିକା ଅବ୍ରାହାମଦି କୁଟୁମ୍ ? ନାନ୍ ବା ଅବ୍ରାହାମଦି କୁଟୁମ୍ । ୨୩ ✡ପ୍ରେରିତ ୧୬:୨୩.ୱାର୍ ଇନିକା କ୍ରିସ୍ତଦି ସେବାକିନିକାର୍ ? ନାନ୍ ବାୟାୱାଜା ଇଜିନା, ନାନ୍ ୱାରିମାଣୁକୁ ୱିଜେରିଙ୍ଗ୍ପେରି ସେବାକିନିକିନ୍ଦା । ନାନ୍ ୱାରିମାଣୁକୁ ନାଣ୍ତ କାସ୍ଟୁପାଣି କିତାମାନା, ନାଣ୍ତ ଜଇଲ୍ତୁ ତେବାତାମାନା ମାରି ବାଡିଗାଦାନ୍ ଡାଟ୍ତିମାନିକା ସାସ୍ କିତାମାନା ମାରି ନାଣ୍ତ ଦେବେଙ୍ଗ୍ ସାନିମାନୁ ସାମାନ୍ କିତାମାନା । ୨୪ ନାନ୍ ଜିହୁଦିରିମାଣୁକୁ ପାସ୍ ଦେବେଙ୍ଗ୍ ତିରିସ୍ ନ ଦେବେଙ୍ଗ୍ ବାଡିଗାଦାନ୍ ମାଡ୍ ତିରାମାନା । ୨୫ ✡ପ୍ରେରିତ ୧୬:୨୨ପ୍ରେରିତ ୧୪:୧୯.ରୋମିୟରିମାଣୁକୁ ମୁନ୍ଡ୍ରି ଦେବେଙ୍ଗ୍ କର୍ଡା ମାଡ୍ ପୟ୍ତାମାନା । ଉନ୍ଡ୍ରି ଦେବେଙ୍ଗ୍ କାଲୁକୁ ମାଡ୍ ତିରାମାନା । ମୁନ୍ଡ୍ରି ଦେବେଙ୍ଗ୍ ଜାହାଜ୍ ଦୁର୍ଗଟଣାଦାନ୍ ସାମାନ୍ କିତାମାନା ମାରି ଉନ୍ଡ୍ରି ଦେବେଙ୍ଗ୍ ସାମ୍ଦୁରୁତି ଏରୁଦୁ କଡ଼େ ନାଲ୍ଗି ଗଣ୍ଟା ତେବାତାମାନା । ୨୬ ✡ପ୍ରେରିତ ୯:୨୩ପ୍ରେରିତ ୧୪:୫.ଗାଦି ଦେବେଙ୍ଗ୍ ସନି ୱାଲେ ଗାଡାଦି ସାନିମାନୁ, ଡଙ୍ଗାଁରି କିୟୁଦୁ, ଜିହୁଦି ମାରି ଅଣଜିହୁଦିରି କିୟୁଦୁ, ଗାଡ଼୍ତୁ ମାରି ସୁନ୍ସାନ୍ବାଡିଦୁ, ସାମ୍ଦୁରୁତୁ, ଟକେକିନି ସଙ୍ଗ୍ରି ମାଣ୍କୁ ସାନିମାନୁ ସାମ୍ନା କିତାମାନା । ୨୭ ବେସିନାଣ୍ତ ପାଣି କିତାମାନା ମାରି ଦୁକ୍ କାସ୍ଟୁ ବୋଗକିତାମାନାନ୍, ସୁଜୁଏଣ୍ଗା ମାରି ବାଙ୍ଗାଁ, ଏର୍କିଦାନ୍ ବେସିଦିନ୍ କାଟେ କିତାମାନା, ନେଗି କାଦି, ଆଙ୍ଗିଁ ମାରି ଡର୍ନିବାଡି ସିଲେତି ଉଣ୍ତିଙ୍ଗ୍ ବେସି କାସ୍ଟୁ ପୟ୍ତାମାନା । ୨୮ ଇୟାକା ୱିଜୁ ଡ଼ିସ୍ତିଙ୍ଗ୍ ୱିଜୁ ମଣ୍ତଲିଆଙ୍ଗାଁ ଉଣ୍ତିଙ୍ଗ୍ ନା ଦାଇତ୍ ୱିଜୁ ଦିନ୍ ପିଣ୍ତ୍ଜି ବୁଲାଜିନା । ୨୯ ଏନ୍ ଜଦି ଦୁର୍ବଳ ଆନାନ୍, ନାନୁ ବା ୱାନି ୱାଲେ ଦୁର୍ବଳ ଏତ୍କିନା । ଏନ୍ ପାପ୍ କିତିଙ୍ଗ୍, ନାନ୍ ଜିବନ୍ତୁ କାସ୍ଟୁ ଏତ୍କିନା ।
୩୦ ଜଦି ଗର୍ବ କିଦେଙ୍ଗ୍ ଆନାତ୍, ଆର୍ତିଙ୍ଗ୍ ନା ଇୟାୱିଜୁ ଦୁର୍ବଲଦି ଉଣ୍ତିଙ୍ଗ୍ ନାଙ୍ଗିଁ ଗର୍ବ କିଦେଙ୍ଗ୍ ଆନାତ୍ । ୩୧ ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁ ୱିଜୁଦିନ୍ ଦନ୍ୟ ଆପିତ୍ । ୱାନ୍ ନେସ୍ନାନ୍ ଜେ, ନାନ୍ ମିଚ୍ ୱେର୍ଏଜିନା । ୩୨ ✡ପ୍ରେରିତ ୯:୨୩-୨୫.ନାନ୍ ଦାମାସ୍କସ୍ଦୁ ମାର୍ଇୱାଲେ ରାଜା ଆରେଟସ୍ଦି ଅଦିକାରତାନ୍ ସାସନ୍କିନିକାନ୍ ନାଙ୍ଗିଁ ଆସ୍ନି ଉଣ୍ତିଙ୍ଗ୍ ଗାଡ଼୍ତି ୱିଜୁତରିନ୍ ସନ୍ୟରିଙ୍ଗ୍ କାପ୍କିବିସ୍ କିତାମାର୍ହାନ୍ । ୩୩ ମାତର୍ ନାଙ୍ଗିଁ ସାଟ୍ନାଦି ସାହାଜ୍ୟଦାନ୍ ଜରକା ସାରି ଗାଡ଼୍ତି ଗଡା ଆତ୍ରେ ରେପ୍ତା ମାର୍ର୍ହାର୍ । ଇୟାୱାଜା ଇସାବ୍ତାନ୍ ନାନ୍ ଆୟା ସାସନ୍କିନିୱାନି ମାଣ୍କୁ ରକ୍ୟା ପୟ୍ତାମାର୍ଆ ।