ଯୋହନ ଲିଖିତ ଦ୍ୱିତୀୟ ପତ୍ର
ଜୋହନ ରାସ୍ତିମାନି ମାରିଉନ୍ଡ୍ରି ଆକୁ
ଇୟା ଆକୁଦୁ ମାନି ଏସ ମାଟା
ଜୋହନ ରାସ୍ତି ଦ୍ୱିତିୟ ଆକୁ ଜିସୁକ୍ରିସ୍ତଦି ଜନମ୍ତି ୫୦ ତାନ୍ ୧୦୦ ବାର୍ସେକ୍ ଲୋଇ ପେରିତ ଜୋହନଦି ମାଣାନ୍ ରାସାୟ୍ଆତା ମାର୍ହାତ୍ । ଜୋହନ ନିଜେଦିଙ୍ଗ୍ ରାସ୍ନିକାନ୍ ୱାଜା ୱେର୍ଏନ୍, ତାନି ବାଦ୍ଲୁ ୱାନ୍ ନିଜେଦିଙ୍ଗ୍ ପ୍ରାଚିନ୍ ଇଜି ୱେର୍ନାନ୍ । ଜୋହନତି ଦ୍ୱିତିୟ ବିସୟ ଆକୁଦିୱାଲେ ଜୋହନ ରାସ୍ତି ସୁସମାଚାର୍ତୁ ମାନି ବିସୟତି ୱାଲେ ସମାନ୍ । ଇକା ଟିକ୍ତାନ୍ ଜିସୁଙ୍ଗୁଁ ଆମା ଇସାବ୍ତାନ୍ ୱାନ୍ ଅରେନ୍ ଅରେନ୍ ୱାନିଙ୍ଗ୍ ଜିବନ୍ନୋନି ବିସୟ ଜିସୁଦି ମାଟାଦିଙ୍ଗ୍ ମନ୍ ସିନାନ୍, ଆୟାୱାଜା ଜିସୁଦି ମାଟା ମାନାଦେଙ୍ଗ୍ ଆଜିନାତ୍, ୱାନିଙ୍ଗ୍ ଜିବନ୍ନୋନିକା ଜହନ ୧:୫-୬, ଜୋହନ ୧୫:୯-୧୦ । ଇକା ବିସ୍ବାସ୍ କିଆୟ୍ଆନାତ୍ ଜେ, ଜୋହନ ଏସ୍ତିୱାଲେ ଏପିସିୟଦୁ ବାସାଜି ମାର୍ହାନ୍, ଜୋହନ ସୁସମାଚାର୍ତି ୱାଲେ ମୁଣ୍ତ୍ରି ଆକୁ ବା ରାସ୍ତା ମାର୍ହାନ୍, ଆଜିନେ ୧ ଜୋହନ, ୨ ଜୋହନ ମାରି ୩ ଜହନ ।
ଜୋହନ ଇୟା ଆକୁଦୁ ବାସେଆତି ଆଇମା ମାରି ତାନି କଡ଼ର୍ ଇଜି ୱେର୍ସି ମଣ୍ତଲିଦିଙ୍ଗ୍ ଆକୁ ରାସ୍ନାନ୍ । ଜୋହନତି ଇୟା ଆକୁ ରାସ୍ନି ଉଦେସ୍ ଆତାତ୍ ବିସ୍ବାସିରିଙ୍ଗ୍ ସାହାସ୍ ସିନିକା ମାରି ମିଚ୍ ଗୁରୁରି ମାଣାନ୍ ଜାଗାର୍ତା ମାଣ୍ତ୍ରେଙ୍ଗ୍ଁ ମାନାତ୍ ।
ଇୟା ଆକୁଦୁ ମାନି ମୁକିୟ ବିସୟ
୧. ଜୋହନ ଇୟା ଆକୁ ଏ ଉଣ୍ତିଙ୍ଗ୍ ରାସ୍ନାନ୍ ଇକା ଇଜି, ୱାନିଙ୍ଗ୍ ବିସ୍ବାସ୍ କିନିୱାରିଙ୍ଗ୍ ମାଡ଼ିସ୍ କିନାନ୍ । ୧:୧-୩
୨. ଜୋହନ ମଣ୍ତଲିଦିଙ୍ଗ୍ ସାହାସ୍ ସିଜି ପେରିମାଟା ବିସୟତାନ୍ ମନ୍ତୁ ଅଡ଼୍ବିସ୍ କିନାନ୍ । ୧:୪-୬
୩. ୱାନ୍ ମିଚ୍ ଗୁରୁରି ମାଣାନ୍ ଜାଗାର୍ତା ମାଣ୍ତ୍ରେଙ୍ଗ୍ ଇନାନ୍ । ୧:୭-୧୧
୪. ୱାନ୍ ଏମେବାନୁ ତେବାନାନ୍ ଆବେଣି ବିସ୍ବାସିରିଙ୍ଗ୍ଁ ମାଡ଼ିସ୍ କିଜି ରାସ୍ନିକା ୱିସ୍ନାନ୍ । ୧:୧୨-୧୩
୧
୧ ପ୍ରାଚିନ୍ ଜୋହନ ଯେ ନାନୁ ଅରେତ୍ ଆସ୍କିଆୟ୍ଆତି ଆଇମା ମାରି ତାନି କଡ଼ରି ଲାକ୍ତୁ ଇୟା ଆକୁ ରାସ୍ସିନା । ମିଙ୍ଗିଁ ନାନୁ ସତ୍ ୱାଜା ଜିବନ୍ନୋନା, ମାରି କେବଲ୍ ନାନ୍ ସିଲେ, ମାତର୍ ସତ୍ ନେସ୍ତିମାନି ୱିଜୁ ଲୋକୁ ବା ଜିବନ୍ନୋନାର୍ । ୨ ଆମା ସତ୍ ମା ଜିବନ୍ତୁ ତେବାତାମାନାତ୍ ମାରି ୱିଜୁଦିନ୍ତିଙ୍ଗ୍ ମା ୱାଲେ ତେବାନାତ୍ ।
୩ ବୁବା ମାପୁରୁ ମାରି ଆୟା ବୁବାଦି ମାରିନ୍ ଜିସୁ କ୍ରିସ୍ତଦିମାଣୁକୁ ଦୟା, ଦୟା ମାରି ସାନ୍ତି ମା ୱାଲେ ସତ୍ ନି ଜିବନ୍ନୋନିକା ତେବାନାତ୍ ।
ସତ୍ ନି ଜିବନ୍ନୋନିକା
୪ ମି କଡ଼ରି ମାଣୁକୁ ଏସଲୋକ୍ ମାପୁରୁଦି ମାଟାଇସାବ୍ତାନ୍ ସତ୍ତାନ୍ ବୁଲାସାଲା କିଜିନିକା ୱେନ୍ଜି ନାନ୍ ନାଣ୍ତ ୱେଡ଼ିକା । ୫ ✡ଜୋହନ ୧୩:୩୪; ୧୫:୧୨,୧୭.ଏ ନେଗି ଆଇମା, ନିଙ୍ଗିଁ ନାନୁ ୱେର୍ନି ମାଟା, ମାଡୁ ନିଜେନିଜେଦିଙ୍ଗ୍ ଜିବନ୍ନୋଜିସାନିକା ମାନାତ୍ । ନାନ୍ ଜେ ମି ଲାକ୍ତୁ ଇନି ପୁନି ମାଟା ରାସ୍ସିନା, ଆକା ସିଲେ, ମାତର୍ ପୁର୍ବେଦାନ୍ନେ ମାପୁ ଇୟା ଆଦେସ୍ ପୟ୍ତା ମାନାପ୍ । ୬ ଆମା ଜିବନ୍ନୋନି ମାଟା ଇବେନୁ ନାନ୍ ୱେର୍ସିନା, ତାନି ଅର୍ତ ଆଜିନାତ୍, ଜିବନ୍ତୁ ମାପୁରୁଦି ମାଟା ମାନାନିକା । ଆୟା ମାଟା ଇନିକା, ମିରୁ ପୁର୍ବେଦାନ୍ନେ ୱେର୍ଇମାନିଦେର୍, ଆକା ଆଜିନାତ୍, ମାଡୁ ୱିଜୁଲୋକୁ ନିଜେନିଜେଦି ଉଣ୍ତିଙ୍ଗ୍ ଜିବନ୍ନୋଜିସାନିକା ମାନାତ୍ ।
୭ ନାନ୍ ଇକା ଇଜିନା ଇରିଙ୍ଗ୍ ଆମାକାର୍ ଜିସୁ କ୍ରିସ୍ତ ସାତାନ୍ନୋ ଲୋକା ମେନ୍ଧଲ୍ତାନ୍ ୱାତାମାନାନ୍ ଇଜି ମାନାଏନ୍, ଇୟାୱାଜା ଗାଦିଲୋକ୍ ବାୟାକିନିକାର୍ ଜଗତ୍ତୁ ସତା ୱାତାମାନାର୍ । ଇୟାୱାଜା ଲୋକୁ ପୁରାସତ୍ ବାୟାକିନିକାର୍, ୱାନ୍ କ୍ରିସ୍ତଦି ସାତ୍ରୁ । ୮ ମିରୁ ଏଣ୍ତେସ୍ ମା କିତିମାନି ପାଣିଦି ପଲ୍ ଆରାକିଏଣ୍ଗା ବରଂ ଆବେଣି ପୁରାବର୍ତି ପୁରସ୍କାର୍ ପୟ୍ଦୁ, ଆୟାଉଣ୍ତିଙ୍ଗ୍ ନିଜେ ନିଜେଦି ବିସୟ୍ତାନ୍ ଜାଗ୍ରାତା ମାନ୍ଡ୍ରୁ ।
୯ ଏନ୍ଆପିନ୍ କ୍ରିସ୍ତଦି ସିକିୟାଦି ଆୟା ଲୋଇ ତେବାଏଣ୍ଗା ଆକା ନାଜି ସୋନାନ୍, ୱାନ୍ ମାପୁରୁଙ୍ଗୁଁ ପୟ୍ଏନ୍; ଏନ୍ ସିକିୟାଦି ଲୋଇ ତେବାନାନ୍, ୱାନ୍ ବୁବା ନି ମାରିନ୍ ରିଏରିଙ୍ଗ୍ ପୟ୍ତା ମାନାନ୍ । ୧୦ ଏନ୍ ଜଦି ଇୟା ସିକିୟା ଆସ୍ଏଣ୍ଗା ମି ଲାକ୍ତୁ ୱାନାନ୍, ଆର୍ତିଙ୍ଗ୍ ୱାନିଙ୍ଗ୍ ମି ଇନ୍ଡ୍ର କୁକ୍ମାଟ୍, “ନି ସାନ୍ତି ଆପିତ୍” ଇଜି ୱେର୍ସି ୱାନିଙ୍ଗ୍ ନମସ୍କାର୍ କିମାଟ୍ । ୧୧ ଇରିଙ୍ଗ୍ ଏନ୍ଆପିନ୍ ୱାନିଙ୍ଗ୍ ନମସ୍କାର୍ କିନାନ୍, ୱାନ୍ ୱାନି ତାଗ୍ଇପାଣିଦୁ ମିସାନାନ୍ ।
ସାରାସାରି ମାଟା
୧୨ ମି ଲାକ୍ତୁ ଗାଦି ବିସୟ୍ ରାସ୍ନିକା ମାନାତ୍, ମାତର୍ କାଗଜ ନି ସିରାଦାନ୍ ଆୟାୱିଜୁ ଇଲେଇ ନାନୁ ୱେର୍ତେଙ୍ଗ୍ ଇଚ୍ଛା କିଏ; ନା ଆସା ମାନାତ୍ ଜେ, ମି ଲାକ୍ତୁ ୱାଜି ସାମ୍ନାସାମ୍ନିଦାନ୍ ୱାର୍ଗିଜିସାନାଟ୍, ଆକା କିଦେଙ୍ଗ୍ ଆଟ୍ତିଙ୍ଗ୍ ମାଡୁ ୱେଡ଼ିକା ପୁରା ଆନାତ୍ ।
୧୩ ମି ଲାଡ୍ତି ତାଙ୍ଗିଁକି କଡ଼ର୍ ମିଙ୍ଗିଁ ନମସ୍କାର୍ ଜାଣେ କିଜିନାର୍ ।
✡୧:୫ ଜୋହନ ୧୩:୩୪; ୧୫:୧୨,୧୭.