ତୀମଥିଙ୍କ ନିକଟକୁ ପ୍ରେରିତ ପାଉଲଙ୍କ ଦ୍ୱିତୀୟ ପତ୍ର
ତିମତିଦି ଲାକ୍ତୁ ପ୍ରେରିତ ପାଉଲତି ମାରିଉନ୍ଡ୍ରି ଆକୁ
ଇୟା ଆକୁଦୁ ମାନି ଏସ ବିସୟ୍
ମାରିଉଣ୍ତ୍ରି ତିମତି ଆକୁ ପାଉଲତି ମାଣାନ୍ ୱାନି ସିସୁ ତିମତିଦି ଲାକ୍ତୁ ରାସ୍ତିମାନି ଆକୁ । ମାରିଉଣ୍ତ୍ରି ତିମତି ପାଉଲତି ଜିବନ୍ତି ସାରାସାରି ବେଡ଼ାଦୁ ରାସାତିମାନି ଆକୁ ଇକା ।
ଇୟା ବେଡ଼ାଦୁ ୱାନ୍ ରୋମ୍ତି ଜଇଲ୍ତୁ ତେବାତା ମାର୍ହାନ୍ ୧:୧୬ ପାଉଲତି ୱାଲେ ତିମତିଦି ପୁରା ମିସାବିଡ଼ାନିକା ମାର୍ହାତ୍ ମାରି ୱିଜୁୱାଲେ ୱାନିଙ୍ଗ୍ ମାରିନ୍ ୱାଜା ରାସ୍ନାନ୍ ପିଲିପିୟ ୨:୨୨, ୧ ତିମତି ୧:୨, ୧:୧୮ ଇକା ପାଉଲତି ୪ ନାଲିଗି ବଇଙ୍ଗାଁ ମାଣୁକୁ ଉନ୍ଡ୍ରେ, ଆମାମାନୁ କି ମଣ୍ତଲିଦିଙ୍ଗ୍ ଅରେନ୍ ଲୋକ୍ ରାସାନାନ୍ । ଆଇ ୩ ମୁନ୍ଡ୍ରି ବଇଙ୍ଗ୍ ୱିଜୁ ୧ ତିମତି, ତିତସ, ମାରି ଫିଲିମନ । ମାରିଉନ୍ଡ୍ରି ଆକୁ ରାସାନି ବେଡ଼ାଦୁ ରମିୟ ଦେସ୍ଦୁ କାସ୍ଟୁ ଆଜିମାର୍ହାତ୍ । ଆନ୍ମାନ୍ତାନ୍ ଇୟା ପାଣି ମାନିଙ୍ଗ୍ ପାଉଲ ଜଇଲ୍ତୁ ମାର୍ହାନ୍ ମାରି ତିମତିଦିଙ୍ଗ୍ କାସ୍ଟୁ ସାସ୍ କିଦେଙ୍ଗ୍ ଆଦେସ୍ ସିଜିମାର୍ହାନ୍ । ପାର୍ତୁମ୍ ତିମତି ଇସାବ୍ତାନ୍ ପାଉଲ ତିମତିଦିଙ୍ଗ୍ ମିଚ୍ ୱେର୍ନି ଗୁରୁରି ବିସୟ୍ତାନ୍ ଏସ ଜାଗ୍ରାତାଦି ମାଟେଙ୍ଗ୍ ସିନାନ୍ । ୧ ତିମତି ୧:୧୬-୧୮ ପାଉଲ ତିମତିଦିଙ୍ଗ୍ ଇନାନ୍ ଜେ, ବବିସତ୍ଦୁ ନାଣ୍ତ କାସ୍ଟୁଦି ବେଡ଼ା ମାନାତ୍ ୩:୧ ।
ଇୟା ଆକୁଦୁ ମାନି ଏସ ମୁକ୍ୟ ବିସୟ୍
୧. ପାଉଲ ତିମତିଦିଙ୍ଗ୍ ନମସ୍କାର୍ ଜାଣେକିଜି ମାରି ୱାନିଙ୍ଗ୍ ସାହାସ୍ ସିଦୁ । ୧:୧-୧୮
୨. ତିମତିଦିଙ୍ଗ୍ ସାସ୍ ପାର୍ମାଣ୍ କିଜି ତର୍ନି ଉଣ୍ତିଙ୍ଗ୍ ପାଉଲ ସାହାସ୍ ସିନାନ୍ । ୨:୧-୧୩
୩. ୱେନ୍କା ପାଉଲ ଏସ ସମାନ୍ତି ମାଟେଙ୍ଗ୍ ସିନାନ୍ । ୨:୧୪-୨୬
୪. ବବିସତ୍ ଗଟ୍ନା ବିସୟ୍ତାନ୍ ଜାଗାର୍ତା ତେବାନିକା ମାରି ସତ୍ତି ରାସ୍ତା ଆସ୍କିନି ଉଣ୍ତିଙ୍ଗ୍ ଜାଗ୍ରାତା କିନାନ୍ । ୩:୧–୪:୮
୫. ପାଉଲ ତିମତିଦିଙ୍ଗ୍ ଏସ ନିଜେଦି ମାଟା ସିଜି ରାସ୍ନିକା ୱିସ୍ତାନ୍ । ୪:୯-୨୨
୧
୧ ନାନ୍ ପାଉଲ, କ୍ରିସ୍ତ ଜିସୁଦି ୱାଲେ ମିସାତି ମାଣାନ୍ ମାପୁରୁଦି ପାର୍ମାଣ୍ତି ଇସାବ୍ତାନ୍ ମାପ୍ ଆମା ଜିବନ୍ ପୟ୍ତା ମାନାପ୍, ଆକା ୱେର୍ତେଙ୍ଗ୍ ମାପୁରୁଦି ମାଟା ଇସାବ୍ତାନ୍ ନାନ୍ ଅରେନ୍ ସିସୁ ୱାଜା ୱାତାମାନା ।
୨ ✡ପ୍ରେରିତ ୧୬:୧.ନା ଲାଡ୍ତି ମାରିନ୍ ତିମତିଦି ଲାକ୍ତୁ ନାନ୍ ଇୟା ଆକୁ ରାସ୍ସିନା : ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା, ସାକା ମାରି ସାନ୍ତି ସିପିନ୍ ।
ଦନ୍ୟବାଦ୍ ନି ୱେଡ଼ିକାଦି ମାଟା
୩ ନା ପୁର୍ବେଦିଡକ୍ରାଦାଦାରି ୱାଜା ନାନ୍ ମାପୁରୁଙ୍ଗ୍ ନେଗି ବୁଦିଦାନ୍ ସେବା କିଜି ୱାଜିନା, ୱାନିଙ୍ଗ୍ ଦନ୍ୟବାଦ୍ ସିଜିନା । ନା ପାର୍ତନାଦୁ ୱେର୍ସି ୱେଡ଼େନାଡ଼ା ନିଙ୍ଗିଁ ଏତ୍ କିନିୱାଲେ ନାନ୍ ମାପୁରୁଙ୍ଗ୍ ଦନ୍ୟବାଦ୍ ସିଜିନା । ୪ ନି କାଣେର୍ଙ୍ଗୁ ନାଙ୍ଗିଁ ଏତ୍ ମାନାତ୍ ମାରି ନିଙ୍ଗିଁ ସୁଡ଼ୁଜି ସୁକ୍ ଆନି ଉଣ୍ତିଙ୍ଗ୍ ନାନ୍ ବଦା କିଜିନା । ୫ ✡ପ୍ରେରିତ ୧୬:୧.ମି ଡକ୍ରିବିବି ଲୋୟି ମାରି ଆଇସି ଇଉନିସି ଆମାୱାଜା ବିସ୍ବାସ୍ କିଜିମାର୍ହାତ୍, ମିଦି ବା ଆୟା ଜିବନ୍ତି ବିସ୍ବାସ୍ ମାନାତ୍ । ଇୟା ମାଟା ନାନ୍ ଏତ୍ କିଜିନା । ମି ଆୟା ବିସ୍ବାସ୍ ମାନାତ୍ ଇଜି ସତ୍ତାନ୍ ନାନ୍ ନେସ୍ନା । ୬ ନାନ୍ ନି ମୁସ୍କୁ କିୟୁସର୍ପେ କିତିୱାଲେ ନିନ୍ ମାପୁରୁମାଣାନ୍ ଆମା ଦାନ୍ ପୟ୍ତିମାର୍ଇ, ତାନିଙ୍ଗ୍ ଜିବନ୍କିଜି ଇଡ୍ଦେଙ୍ଗ୍ ନାନ୍ ନିଙ୍ଗିଁ ଏତ୍ କିବିସ୍କିଜିନା । ୭ ମାପୁରୁ ମାଙ୍ଗିଁ ଆମା ଆତ୍ମା ଦାନ୍ କିତାମାନାନ୍, ଆକା ମାଙ୍ଗିଁ ତାଗ୍ଇଲୋକ୍ କିଏତ୍, ମାରି ୱାନିମାଣାନ୍ ମାପ୍ ସାକ୍ତି, ଜିବନ୍ନୋନିକା ମାରି ଆତ୍ମାଦାନ୍ ପୁରାବର୍ତି ଆପିତ୍ ।
୮ ଆଦେଙ୍ଗ୍ ପ୍ରବୁ ଜିସୁଦି ବିସୟ୍ତାନ୍ ସାକ୍ୟୟ୍ ସିଦେଙ୍ଗ୍ ସେମାର୍ ଆମାଟ୍; ୱାନି ଉଣ୍ତିଙ୍ଗ୍ ନାନ୍ ଜଇଲ୍ତୁ ନା ଉଣ୍ତିଙ୍ଗ୍ ବା ସେମାର୍ ଆମାଟ୍ । ମାରି ମାପୁରୁ ମିଙ୍ଗିଁ ସିତିମାନି ସାକ୍ତି ଇସାବ୍ତାନ୍ ମିର୍ କ୍ରିସ୍ତ ଜିସୁଦି ସୁସମାଚାର୍ ଉଣ୍ତିଙ୍ଗ୍ ଦୁଃକ୍କାସ୍ଟୁ ପୟ୍ଦେଙ୍ଗ୍ ତିଆର୍ ଆଦୁ । ୯ ମା ନିଜେଦି ସତ୍ପାଣିଦି ପୁର୍ସ୍କାର୍ ୱାଜା ୱାନ୍ ମାଙ୍ଗିଁ କୁକ୍ଏନ୍, କେବଲ୍ ୱାନି ଦୟାଦାନ୍ ୱାନି ଉଦେସ୍ ପୁରା କିଦେଙ୍ଗ୍ ମାଙ୍ଗିଁ ୱାନି ଲାଡ୍ତିଲୋକୁ ଆନି ଉଣ୍ତିଙ୍ଗ୍ ରକିୟା କିତାମାନାନ୍ ମାରି ଆସ୍କିତାମାନାନ୍ । କ୍ରିସ୍ତ ଜିସୁଦି କିତିମାନି ପାଣି ପୁର୍ବେ କାଡ଼ାଦାନ୍ ମାପୁରୁ ମାଙ୍ଗିଁ ଇୟା ଦୟା କିଜି ଇଟ୍ତା ମାର୍ହାନ୍ । ୧୦ ମାତର୍ ଇଲେଇ ଇୟା ଦୁନିଆଦୁ ୱାତାନ୍ନୋ ରକିୟାକର୍ତ୍ତା କ୍ରିସ୍ତ ଜିସୁ ଇୟାୱିଜୁ ବିସୟ୍ ୱେର୍ତା ମାନାନ୍ । ୱାନ୍ ସାନି ସାକ୍ତିଦିଙ୍ଗ୍ ମାରିଗିସ୍ କିତାମାନାନ୍ ମାରି ୱାନି ସୁସମାଚାର୍ଦାନ୍ ଏସ୍କାଙ୍ଗ୍ୱିଜ୍ଇ ଜିବନ୍ତି ସାରି ୱେର୍ତା ମାନାନ୍ ।
୧୧ ଇୟା ସୁସମାଚାର୍ ୱେର୍ସି ବୁଜାକିଦେଙ୍ଗ୍ ମାପୁରୁ ନାଙ୍ଗିଁ ଅରେନ୍ ପ୍ରେରିତ୍ ସିସୁ ମାରି ଗୁରୁ ୱାଜା ଆସ୍କିତାମାନାନ୍ । ୧୨ ଆୟାଉଣ୍ତିଙ୍ଗ୍ ନାନ୍ ଇୟାୱିଜୁ ଦୁଃକ୍କାସ୍ଟୁ କିଜିନା । ଇରିଙ୍ଗ୍ ନାନ୍ ଆମାୱାନିଙ୍ଗ୍ ବିସ୍ବାସ୍ କିଜିନା, ନାନ୍ ୱାନିଙ୍ଗ୍ ନେଗେନ୍ତାନ୍ ନେସ୍ତାମାନା, ଆକା ସାଲାକିଦେଙ୍ଗ୍ ପେରିବିସାର୍ ଦିନ୍ ସାନ୍ଦି ୱାନ୍ ନାଙ୍ଗିଁ ନେଗେନ୍ତାନ୍ ଇଡ୍ନାନ୍, ଇକା ସତ୍ତାନ୍ ନେସ୍ସି ନାନ୍ ଇୟାସାନ୍ଦି ପୁରାପୁରି ଆସା ଆଜି ତେବାତାମାନା । ୧୩ ନାନ୍ ମିଙ୍ଗିଁ ସିକିୟା ସିତିମାନିକା ସତ୍ ବିସୟ୍ତିଙ୍ଗ୍ ଡାଟ୍ତାନ୍ ଆସ୍ସୋ ଇଡ୍ଦୁ ମାରି ପ୍ରବୁ ଜିସୁ କ୍ରିସ୍ତଦି ୱାଲେ ମିସାଜ ସତ୍ତି ଜିବନ୍ନୋନିକା ମାରି ଦର୍ମ ବିସ୍ବାସ୍ତାନ୍ ତିଲାଏଣ୍ଗା ମାନ୍ଡ୍ରୁ । ୧୪ ଆମା ପେରି ବିସୟ୍ତି ଦାଇତ୍ ମି ମୁସ୍କୁ ସର୍ପେ ଆତାମାନାତ୍, ମା ଲୋଇ ବାସାଜିମାନି ପବିତ୍ର ଆତ୍ମାଦି ସାକ୍ତିଦାନ୍ ଆୟାୱିଜୁଦିଙ୍ଗ୍ ଜାଗ୍ରାତା କିଜି ଇଡ୍ଦୁ ।
୧୫ ମିର୍ ନେସ୍ନିଦେର୍ ପୁଗେଲ୍ ନି ହର୍ମଗେନା ୱିଜୁ ଆସିଆ ଦେସ୍ତୁ ୱିଜେରେ ନାଙ୍ଗିଁ ଡ଼ିସ୍ତା ସରାମାନାର୍ । ୧୬ ଅନିସିପର୍ଦି ଇଲୁପରିବାର୍ତିଙ୍ଗ୍ ପ୍ରବୁ ଦୟା କିପିନ୍, ମାତର୍ ୱାନ୍ ବାର୍ବାର୍ ୱାଜି ନାଙ୍ଗିଁ ସାନ୍ତି ନି ୱେଡ଼ିକା ସିତାମାନାନ୍, ନାନ୍ ଜଇଲ୍ତୁ ଇଜି ୱାନ୍ ସେମାର୍ ଆଏନ୍ । ୧୭ ମାତର୍ ରୋମ୍ ଗାଡ଼୍ତୁ ଇତି ଦାପ୍ରେ ୱାନ୍ ନାଙ୍ଗିଁ ପୋଇତାନ୍ନୋ ନା ଲାକ୍ତୁ ୱାତାମାର୍ହାନ୍ । ୧୮ ପେରିବିସାର୍ ଦିନ୍ତୁ ପ୍ରବୁ ୱାନି ଉଣ୍ତିଙ୍ଗ୍ ଦୟା କିପିନ୍, ଏପିସ୍ତୁ ୱାନ୍ ନାଙ୍ଗିଁ ଏସ ସେବା କିତାମାର୍ହାନ୍, ମିର୍ ଆୟାୱିଜୁ ମାଟା ନେସ୍ନିଦେର୍ ।