ଏଫିସୀୟମାନଙ୍କ ନିକଟକୁ ପାଉଲଙ୍କ ପତ୍ର
ଏପିସିୟ ଲୋକା ଲାକ୍ତୁ ପାଉଲ୍ତି ଆକୁ
ଏପିସିୟ ଆକୁ ବିସୟ୍ତାନ୍ ଏସ ମାଟା
ଏପିସି ମଣ୍ତଲି ଲାକ୍ତୁ ପାଉଲତି ଆକୁ ପାଉଲତି ମାଣାନ୍ ଆନାତ୍ ୬୦ ବାର୍ସୁ ଲୋଇ କଲସିୟ ମଣ୍ତଲି ଲାକ୍ତୁ ରାସ୍ନି ୱେଡ଼ାଦୁ ରାସାତାମାର୍ହାତ୍ । ରାସ୍ନିକାନ୍ ୱାନ୍ ନିଜେ ପେରିତ ପାଉଲ ଇଜି ୱେର୍ସିନାନ୍ ୧:୧ । ଜଦିବା କଲସିୟ ଆକୁଦୁ ନିଜେଦି ମାଡ଼ିସ୍କିନିକା ସିଲିତିଙ୍ଗ୍ଁବା ଗାଦି ପଣ୍ତିତ୍କୁ ଏପିସି ଆକୁ ପାଉଲ ରାସ୍ତାମାନାନ୍ ଇଜି ଇନାର୍ । ଇୟାଉଣ୍ତିଙ୍ଗ୍ଁ ଆନାତ୍ ୱିଜୁ ମଣ୍ତଲିଦିଙ୍ଗ୍ଁ ଆକୁ ବାଟାକିନି ଉଦେସ୍ ଇଡ୍ଜି ରାସାନାମାନାତ୍ । ପାଉଲ ଇକାବା ୱେର୍ନାନ୍ ଜେ ୱାନ୍ ଇୟା ଆକୁ ରାସ୍ନି ବେଡ଼ାଦୁ ୱାନ୍ ଜଇଲ୍ତୁ ମାର୍ହାନ୍ ୩:୧, ୪:୧, ୬:୨୦ । ପାଉଲ ତୁକିକଦିଙ୍ଗ୍ ଏପିସି ମଣ୍ତଲିଦୁ ପୋକ୍ସି ୱାନି କିୟୁଦୁ ଇୟା ଆକୁ ପକ୍ତାମାର୍ହାନ୍ ୬:୨୧-୨୨ ।
ଏପିସି ଏସିଆ ରାଜିଦି ଉଣ୍ତ୍ରି ପେରି ଗାଡ଼୍ ନି ରାଜଧାନି ମାର୍ହାତ୍ । ଏପିସି ଗ୍ରିକ୍ ଦିୟାମ୍ ଆର୍ତେମିଦି ପୁଜା ନି ତେନି ମନ୍ଦିର୍ତି ଉଣ୍ତିଙ୍ଗ୍ ୱେଙ୍ଗିଁତା ମାର୍ହାନ୍ ପ୍ରେରିତ ୯:୨୩-୩୧ । ଏପିସି ମଣ୍ତଲି ପାର୍ତୁମ୍ ଡାଟ୍ ମାର୍ହାତ୍ ମାତର୍ ୱେନ୍କା ଦିରେ ଦିରେ ଉଣା ଆତାତ୍ ପ୍ରକାଶିତ ୨:୧-୭ ।
ପାଉଲ ୱାନି ରାସ୍ନି ଆଦା ବାଗ୍ତୁ ମାପୁରୁ ଏଣ୍ତେସ୍ ୱାନି ଲୋକାଙ୍ଗ୍ ଆସ୍କିତାନ୍ ମାରି ଏଣ୍ତେସ୍ ଜିସୁଦି ମାଣାନ୍ ପାପ୍ତାନ୍ ରକିୟା କିତାନ୍ଆକା ବୁଜାକିନା ସିନାନ୍ । ପାଉଲ ମଣ୍ତଲିଦିଙ୍ଗ୍ ମେନ୍ଦଲ୍ତି ୱାଲେ ତୁସ୍ସି କ୍ରିସ୍ତ ଇୟାୱାନି ତାଲା ମାରି କନାଦି ପେରି କାଲୁ ଆନାନ୍ ଆମାତାନି ୱାଲେ ମିସାଜି ଅର୍ସେ ପିର୍ଜିନାତ୍ । ପାଉଲଦି ବଇଦି ଆଦା ବିସୟ୍ତୁ କ୍ରିସ୍ଟାନ୍ ଜିବନ୍ତି ବିସୟ୍ତାନ୍ ମାଟା ୱେର୍ନାନ୍ ।
ଇୟା ବଇଦୁ ମାନି ଏସ ମୁକିୟ ବିସୟ୍
୧. ପାଉଲତି ମାଡ଼ିସ୍କିନିକା ମାରି ନିଜେଦି ବିସୟ୍ ୱେର୍ନିକା । ୧:୧-୨
୨. କ୍ରିସ୍ତଦି ୱାଲେ ମଣ୍ତଲିଦି ମିସାନିକା । ୧:୩–୩:୧-୨୧
୩. କ୍ରିସ୍ଟିଆନ୍ ଜିବନ୍ କାଟେକିନି ସାରି । ୪:୧–୬:୨୦
୪. ପାଉଲଦି ସାରାସାରି ମାଡ଼ିସ୍ କିନିକା । ୬:୨୧-୨୪
୧
୧ ✡ପ୍ରେରିତ ୧୮:୧୯-୨୧; ୧୯:୧.ମାପୁରୁଦି ବଦାଦାନ୍ କ୍ରିସ୍ତ ଜିସୁଦି ଅରେନ୍ ପ୍ରେରିତ ସିସୁ ବାସେଆତି ମାନି ପାଉଲ
ଜିସୁ କ୍ରିସ୍ତଦି ୱାଲେ ମିସାଜି ବିସ୍ବାସ୍ତାନ୍ ଜିଜିମାନି ଏପିସିୟଦି ମାପୁରୁଦି ବିସ୍ବାସିଲୋକା ଲାକ୍ତୁ ରାସ୍ତିମାନି ଇୟା ଆକୁ
୨ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍ ।
କ୍ରିସ୍ତମାନୁ ଆତ୍ମିକ ଆର୍ସିବାଦ୍
୩ ରାଦୁ ଦନ୍ୟବାଦ୍ ସିନାଟ୍ ମା ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁ । ଇରିଙ୍ଗ୍ ୱାନ୍ ମାଙ୍ଗିଁ କ୍ରିସ୍ତଦି ୱାଲେ ମିସାକିଜି ମୁସ୍କୁପୁର୍ତି ମେନ୍ଧଲ୍ତି ୱିଜୁ ଆତ୍ମିକ ଆର୍ସିବାଦ୍ ସିତିମାନି । ୪ କ୍ରିସ୍ତଦିମାନୁ ମିସାଜି ମାଡୁ ଏଣ୍ତେସ୍ ମାପୁରୁଦି ଲୋକୁ ଆନିକା ଆୟାଉଣ୍ତିଙ୍ଗ୍ ୱାନ୍ ମାଙ୍ଗିଁ ପୃତିବି ତିଆର୍ ଆନି ଆଗ୍ଡ଼ିରାନ୍ ବାସେକିତାମାନାନ୍ । ମାରି ୱାନି ଜିବନ୍ନୋନିକା ମାଡୁ ୱାନି ଆଗ୍ଡ଼ି ପବିତ୍ର ନି ଦସ୍ସିଲିକାର୍ ଆନିକା । ୫ ଜିସୁ କ୍ରିସ୍ତଦି ମାଣାନ୍ ୱାନ୍ ମାଙ୍ଗିଁ ୱାନି କଡ଼ର୍ ନି ଆଇଲିକ୍ ୱାଜା ପସା କିଦେଙ୍ଗ୍ ଇଜି ତିଆର୍ କିତାମାର୍ହାନ୍; ଇକାନେ ମାର୍ହାତ୍ ୱାନି ୱେଡ଼ିକା ନି ବଦା । ୬ ମାପୁରୁଦି ଗୌରବ୍ ଦୟା ଉଣ୍ତିଙ୍ଗ୍ଁ ମାରି ୱାନି ଲାଡ୍ତି ମାରିନ୍ତିଙ୍ଗ୍ଁ ଆର୍ଏନେ ଦାନ୍ ୱାଜା ପୟ୍ତିମାନିଙ୍ଗ୍ଁ ସିଲେ, ମାପ୍ ମାପୁରୁଦି ଦନ୍ୟବାଦ କିଜିନାପ୍ । ୭ ✡କଲସିୟ ୧:୧୪.କ୍ରିସ୍ତଦି ସାତି ମାଣାନ୍ ମାଡ୍ ରକିୟା ପୟ୍ତିମାନିକା, ଅର୍ତାତ୍ ମା ୱିଜୁ ପାପ୍ କେମା ଆତାମାନାତ୍ । ମାପୁରୁଦି ଦୟା ଏସା ପେରିକା, ୮ ଆୟା ଦୟା ୱିଜୁଜାତିଦି ବୁଦି ମାରି ଜ୍ଞାନ୍ ୱାନ୍ ମାଙ୍ଗିଁ ନାଣ୍ତଦାନ୍ ସିତାମାନାନ୍ ! ୯ ମାପୁରୁ ୱାନି ପେରି ବୁଦି ନି ଲୋଇ ସୁଣି ମାଣାନ୍ ଆମାକା ବଦାକିତା ମାର୍ହାର୍, ଆକା ପୁରା କିତାମାନାନ୍ ମାରି ତାନିଙ୍ଗ୍ କ୍ରିସ୍ତଦି ସାକାଦାନ୍ ପୁରା କିଦେଙ୍ଗ୍ ଇଜି ୱାନ୍ ଏମେ ମାର୍ଗିତି ସିନ୍ତା କିତାମାର୍ହାନ୍, ଆକା ମା ଲାକ୍ତୁ ୱେକ୍ତା ମାନାନ୍ । ୧୦ ଆୟା ସିନ୍ତାଦି ଇସାବ୍ତାନ୍ ମୁସ୍କୁପୁର୍ ନି ଦୁନିଆଦି ୱିଜୁ ତିଆର୍ ଆତି ବିସୟ୍ ଉନ୍ଡ୍ରେ ଆନେ ମାରି କ୍ରିସ୍ତ ଆୟାୱିଜୁଦି ତାଲା ୱାଜା ତେବାନାନ୍ । ଇୟା ସିନ୍ତା ମାପୁରୁ ଟିକ୍ ୱେଡ଼ାଦୁ ପୁରା କିନାନ୍ ।
୧୧ ୱିଜୁ ବିସୟ୍ ମାପୁରୁଦି ଜୋଜନା ନି ରାଜିଆନି ଇସାବ୍ତାନ୍ ଆନାତ୍; ଆଗ୍ଡ଼ିରାନ୍ କିତିମାର୍ହି ନିଜେଦି ଉଦେସ୍ କିଦେଙ୍ଗ୍ ଇଜି, କ୍ରିସ୍ତଦି ମାଣାନ୍ ୱାନି ନିଜେ ଲୋକୁ ଆଦେଙ୍ଗ୍ ଇଜି ମାପୁରୁ ମାଙ୍ଗିଁ ଆସ୍କିତାମାନାନ୍ । ୧୨ ରାଦୁ, ଏମେକାର୍ ୱିଜେରି ଆଗ୍ଡ଼ି କ୍ରିସ୍ତମାନୁ ଆସା ଇଟ୍ତାମାର୍ପା, ୱିଜେରେ ମାପୁରୁଦି ମହିମା କିନିକା ।
୧୩ ମିର୍ ବା ଏସ୍ତିୱାଲେ ରକିୟା ପୁଟ୍ନି ଇୟା ସୁସମାଚାର୍ତି ସତ୍ ମାଟା ୱେର୍ଇଦେର୍, ଆୟା ୱେଡ଼ାଦାନ୍ ମାପୁରୁଦି ଆତିମାନିଦେର୍ । ମିର୍ କ୍ରିସ୍ତଙ୍ଗ୍ଁ ବିସ୍ବାସ୍ କିତିମାନିଙ୍ଗ୍, ମାପୁରୁ ୱାନି ପାର୍ମାଣ୍ ଇସାବ୍ତାନ୍ ପବିତ୍ର ଆତ୍ମାଦିଙ୍ଗ୍ ସିଜି ମି ମୁସ୍କୁ ୱାନି ଅଦିକାର୍ତି ଟାପ୍ଡ଼େଇତା ମାନାନ୍ । ୧୪ ମାପୁରୁ ୱାନି ଲୋକାଙ୍ଗ୍ଁ ଏମେ ୱିଜୁ ବିସୟ୍ ସିଦେଙ୍ଗ୍ ଇଜି ପାର୍ମାଣ୍ କିତାମାନାନ୍, ଆୟାୱିଜୁ ଜେ ମାଡ୍ ପୟ୍ନିକା, ପବିତ୍ର ଆତ୍ମା ତାନି ସତ୍ ୱାଜା । ମାପୁରୁ ୱାନି ଲୋକାଙ୍ଗ୍ ମୁକ୍ଡ଼ାନି ପୁରାଆନିକା ସିନାନ୍, ଇୟା ସତ୍ ନେସ୍ସି, ରାଦୁ ମାପୁରୁଦି ଦନ୍ୟବାଦ କିନାଟ୍ ।
ପାଉଲ୍ତି ପାର୍ତନା
୧୫ ଇୟାଉଣ୍ତିଙ୍ଗ୍ ପ୍ରବୁ ଜିସୁମାନୁ ମି ବିସ୍ବାସ୍ ନି ମାପୁରୁ ଲୋକା ଉଣ୍ତିଙ୍ଗ୍ ମି ଜିବନ୍ନୋନିକା ମାନାତ୍, ୧୬ ଇୟାୱିଜୁ କାବୁର୍ ୱେନ୍ଜି ମି ଉଣ୍ତିଙ୍ଗ୍ ମାପୁରୁଙ୍ଗୁଁ ଦନ୍ୟବାଦ ସିଜି ୱାଜିନା, ନାନୁ ବା ନା ପାର୍ତନାଦୁ ମିଙ୍ଗିଁ ୱିଜୁଦିନ୍ ଏତ୍କିଜି ୱାଜିନା । ୧୭ ନାନୁ ନା ଗୌରବ୍ତି ବୁବା, ମା ପ୍ରବୁ ଜିସୁ କ୍ରିସ୍ତଦି ମାପୁରୁଙ୍ଗୁଁ ପାର୍ତନା କିନା, ଏଣ୍ତେସ୍ ୱାନ୍ ମିଙ୍ଗିଁ ପବିତ୍ର ଆତ୍ମା ସିନାନ୍, ଆୟା ଆତ୍ମା ମିଙ୍ଗିଁ ବୁଦି ସିନାତ୍ ମାରି ମାପୁରୁଙ୍ଗୁଁ ମି ଲାକ୍ତୁ ତର୍ନାତ୍ । ଆତିଙ୍ଗ୍, ମିର୍ ୱାନିଙ୍ଗ୍ ନେସ୍ତେଙ୍ଗ୍ ଆଟ୍ନିଦେର୍ । ୧୮ ନାନୁ ବାତିଙ୍ଗ୍ ମାଲ୍ନା, ଏଣ୍ତେସ୍ ୱାନି ଜାୟ୍ ସୁଡ଼ୁଦେଙ୍ଗ୍ ଇଜି ମି ଲୋଇରି କାଣ୍ଗା ରେଆନାତ୍ । ଆବେଣାନ୍ ଏମେ ଆସା ଉଣ୍ତିଙ୍ଗ୍ ମିର୍ ୱାନି ମାଣାନ୍ କୁକାୟ୍ଆତିମାନିଦେର୍, ଆକା ନେସ୍ନିଦେର୍ । ୧୯ ୱାନି ଲୋକା ଉଣ୍ତିଙ୍ଗ୍ ୱାନି ପାର୍ମାଣ୍ତିକା କାବାଆନି ଆର୍ସିବାଦ୍ ୱିଜୁ ଜେ ଏସା ନାଣ୍ତ, ମାରି ମା ନାନି ବିସ୍ବାସି ଲୋକା ଲୋଇ ୱାନି ସାଲାନି ସାକ୍ତି ଜେ ଏସା ପେରିକା, ଆକା ମିର୍ ନେସ୍ତେଙ୍ଗ୍ ଆଟ୍ନିଦେର୍ । ୨୦ ଇଲେଇ, ମା ଲୋଇ ପାଣିକିଜି ମାନି ଆୟା ସାକ୍ତି ଦାନ୍ ନେ ମାପୁରୁ କ୍ରିସ୍ତଙ୍ଗ୍ଁ ସାତି ମାଣାନ୍ ନିକ୍ସି ୱାନି ମୁସ୍କୁପୁର୍ତି ନିଜେଦି ଉଣେରି ତରିନ୍ ବାସିସ୍ କିତାମାନାନ୍ । ୨୧ କ୍ରିସ୍ତ ୱିଜୁ ମୁସ୍କୁପୁର୍ତି ସାସନ୍ କିନିକାନ୍, କିଦେଙ୍ଗ୍ ଆଟ୍ନି ଅଦିକାରି, ସାକ୍ତିଦିକାନ୍ ମାରି ନେତାରି ମୁସ୍କୁ ସାସନ୍ କିନାନ୍, ଇୟା ଜୁଗ୍ କି ୱାନି ଜୁଗ୍ଦି ଅଦିକାରିସିନା ୱିଜୁ ଅଦିକାର୍ ବାଦ୍ଲୁ ୱାନି ଅଦିକାର୍ ନାଣ୍ତ ପେରିକା । ୨୨ ✡କଲସିୟ ୧:୧୮.ମାପୁରୁ ୱିଜୁ ବିସୟ କ୍ରିସ୍ତଦି ପାଦାମ୍ ଆଡ୍ଗି ଇଟ୍ତାମାନାନ୍ ମାରି ୱିଜୁ ବିସୟ ମୁସ୍କୁ ୱାନିଙ୍ଗ୍ଁ ୱିଜେରିଙ୍ଗ୍ ପେରି ପ୍ରବୁ ୱାଜା ମଣ୍ତଲିଦିଙ୍ଗ୍ଁ ସିତାମାନାନ୍ । ୨୩ ମଣ୍ତଲି କ୍ରିସ୍ତଦି ମେନ୍ଧଲ୍; ମଣ୍ତଲି ଦାନ୍ କ୍ରିସ୍ତଦି ପାଣିଦି ପୁରାଆନି ପାଣି ଆନାତ୍; ମାରି କ୍ରିସ୍ତ ୱିଜୁ ବିସୟ ପୁରା କିନାନ୍ ।