୧୨
ମାପୁରୁ ମା ବୁବା
୧ ଇୟାୱାଜା ସାକିଲୋକାରି ଉଣ୍ତ୍ରି ପେରି ଦଲ୍ ମା ସାରିବେଡ଼ିତି କେର୍ବିତାମାନାର୍ । ମାରି ରାଦୁ, ଏମେ ୱିଜୁ ବିସୟ୍ ମାଙ୍ଗିଁ ବାଦା କିଜିନାତ୍ ମାରି ଏମେ ୱିଜୁ ପାପ୍ ମାଙ୍ଗିଁ ରେଲ୍ଜି ଆସିନାତ୍, ୱିଜୁ ଡ଼ିସ୍ସି ଆଟୁୱା ଆଜି ମା ଉଣ୍ତିଙ୍ଗ୍ ତିଆର୍ଆତିମାନି ସାରିଦୁ ଉରୁକ୍ସି ଆଗ୍ଡ଼ି ସନାଟ୍ । ୨ ଏମେୱାନି ମୁସୁକୁ ମା ଟିକ୍ ବିସ୍ବାସ୍ ଆସା କିଜିନିକା, ଆୟା ଜିସୁଦି ଉଣ୍ତିଙ୍ଗ୍ ମା କାଣୁକୁ ନେଗିକା ଇଡିନିକା । ୱାନ୍ କ୍ରୁସଦି ତିଲାଜି ନିଜେ ପାଣିଦାନ୍ ତେବାଏନ୍ ମାର୍ହାନ୍; ମାତର୍ ୱାନିଦିନ୍ତୁ ୱାନି ଉଣ୍ତିଙ୍ଗ୍ ଉଣ୍ତାତିମାନି ୱେଡ଼ିକା ଉଣ୍ତିଙ୍ଗ୍, କ୍ରୁସକାଟ୍ଦି ସାତିମାନି ଅପମାନ୍ତିଙ୍ଗ୍ ୱାନ୍ ମାନାଏନ୍ଣ୍ତା ବୁଦି କିତାନ୍; ଇଲେଇ ୱାନ୍ ମାପୁରୁଦି ରାଜାଗାଦିଦି ଉଣିକିୟୁ ତରିନ୍ ବାସ୍ତାମାନାନ୍ ।
୩ ଅଡ଼୍ବିଜ ସୁଡ଼ୁଦୁ, ୱାନ୍ ଏସୋ ଦୁଃକ୍ ପୋଇତାମାନାନ୍ । ୱାନ୍ ପାପି ଲୋକାମାଡ଼ାନ୍ ଏସୋ ନିଦା ପୋଇଏତାମାନାନ୍ । ଆଦେଙ୍ଗ୍ଁ ମିର୍ ମନ୍ଉଣା କିଜି ନିରାସ୍ ଆମାଟ୍ । ୪ ଇରିଙ୍ଗ୍ ମିଙ୍ଗିଁ ଇୟାସାନ୍ଦି ପାପ୍ ବିରୁଦ୍ତାନ୍ ସାନିନାନି ଜୁଦ୍ କିଦେଙ୍ଗ୍ ପୋଡ଼ାଏତ୍ । ୫ ମାପୁରୁ ୱାନି ମାରିନ୍ ୱାଜା ମିଙ୍ଗିଁ ଏମେ ୱେଡ଼ିକା କାବୁର୍ ୱେନିସ୍ତା ମାନାର୍, ଆକା ଇନିକା ମିର୍ ବାଣାଜିନିଦେର୍ ?
“ଏ ନା ମାରିନ୍, ମାପୁରୁ ମିଙ୍ଗିଁ ସାସନ୍ କିନିୱାଲେ ମୋନଦିୟାନ୍ ସିଦୁ ।
ୱାନ୍ ମିଙ୍ଗିଁ ଲାଗାନିୱାଲେ ମନ୍ଉଣା କିମାଟ୍ ।
୬ ଇରିଙ୍ଗ୍ ମାପୁରୁ ଏମେୱାନିଙ୍ଗ୍ ଜିବନ୍ନୋନାନ୍, ୱାନିଙ୍ଗ୍ ସାସନ୍ କିନାନ୍
ମାରି ଏମେୱାନିଙ୍ଗ୍ ମାରିନ୍ ଇଜି ମାନାନାନ୍, ୱାନିଙ୍ଗ୍ ସାସ୍ତି ସିନାନ୍ ।”
୭ ମି ଦୁଃକ୍ କାସ୍ଟୁଦିଙ୍ଗ୍ ବୁବାଦି ସାସନ୍ ଇଜି ଅଡ଼୍ବିଜି ସାସ୍ ଆସ୍ତୁ, ତେନିମାଡ଼ାନ୍ ମାପୁରୁ ମି ୱାଲେ ମାରିନ୍ ୱାଜା ବ୍ୟବହାର୍ କିଜିନାନ୍ ଇଜି ୱେଙ୍ଗିଁଜିନାତ୍ । ଇରିଙ୍ଗ୍ ବୁବା ଆମାୱାନିଙ୍ଗ୍ ସାସନ୍ କିଏନ୍, ଇୟାୱାଜା ମାରିନ୍ ଏନ୍ ମାନାନ୍ ? ୮ ୱାରି ଆଇ ମାରିସିର୍ ୱାଜା ନିଙ୍ଗିଁ ଜଦି ମି ବୁବା ମିସା କିଏନ୍, ଆର୍ତିଙ୍ଗ୍ ନିନୁ ନିଜେଦି ମାରିନ୍ ଆଇ, ନିନୁ ଉପ୍କା ମାରିନ୍ । ୯ ମା ଦୁନିଆଦି ବୁବାର୍ ମାଙ୍ଗିଁ ସାସ୍ତି ସିତିଙ୍ଗ୍ ବା ମାଡୁ ମେନ୍ଦଲ୍ତି ବୁବାରିଙ୍ଗ୍ ମାନାନିକା । ଆର୍ତିଙ୍ଗ୍ଁ ମା ମୁସ୍କୁପୁର୍ତି ବୁବାଦି ସାସନ୍ତି ଆଡ୍ଗି ଆଜି ତେବାନିକା ଏସ ନାଣ୍ତ ନେଗିମାଟା ! ୧୦ ମା ଦୁନିଆଦି ବୁବାରି ଆଗ୍ଡ଼ି ଏମେକା ତାଗ୍ଇକା, ଆୟା ଇସାବ୍ତାନ୍ ମାଙ୍ଗିଁ ଉଣା ଦିନ୍ ଉଣ୍ତିଙ୍ଗ୍ ସାସନ୍ କିନାର୍; ମାତର୍ ମାଡୁ ଏଣ୍ତେସ୍ ୱାନି ପବିତ୍ରତାଦୁ ମିସାଦେଙ୍ଗ୍ ଆଟ୍ନିକା, ଇୟାଉଣ୍ତିଙ୍ଗ୍ ମାପୁରୁ ମା ନେଗି ଉଣ୍ତିଙ୍ଗ୍ ମାଙ୍ଗିଁ ସାସନ୍ କିନାନ୍ । ୧୧ ସାସ୍ତି ପୋଇନି ୱାଲେ ମାଙ୍ଗିଁ ଆକା ଦୁଃକ୍ଅଡ଼୍ବିନିକା ମାନାତ୍, ମୁଡ଼ୁକେ ୱେଡ଼ିକାଦିକା ଆଏତ୍ । ମାତର୍ ସାସ୍ତିଦାନ୍ ଏମେୱାରି ଜିବନ୍ ସାନ୍ତି ଆନାତ୍, ୱାର୍ ୱେନ୍କା ସାନ୍ତିଦି ଦାର୍ମୁଦି ଜିବନ୍ ୱାଜା ପୁରସ୍କାର୍ ପୋଇନାର୍ ।
ଉପଦେସ୍ ନି ଜାଗାର୍ତାମାଟା
୧୨ ଆଦେଙ୍ଗ୍ଁ ମି ସାକିସିଲି କିୟୁ ମୁସ୍କୁ ପେରୁଦୁ ମାରି ତିରିଗ୍ନି ମେଣ୍ତାଦିଙ୍ଗ୍ ସାକ୍ତି କିଦୁ । ୧୩ ମାରି ନିଜେ ନିଜେଦି ପାଦାମ୍ତି ଉଣ୍ତିଙ୍ଗ୍ ସିଦା ସାରିଙ୍ଗାଁ ବୁଲାଦୁ; ଆର୍ତିଙ୍ଗ୍ ମି ସଟା କାଲୁ ସଟାଆଏଜି ନେଗେନ୍ ତେବାନାତ୍ ।
୧୪ ୱିଜେରି ୱାଲେ ସାନ୍ତିଦାନ୍ ବାସାକିଦେଙ୍ଗ୍ ମାରି ପବିତ୍ରଦାନ୍ ଜିଦେଙ୍ଗ୍ ସେସ୍ଟା କିଦୁ; ଇରିଙ୍ଗ୍ ତାନି ବାଦୁଲୁ ଏନ୍ ପ୍ରବୁଦି ଦର୍ସନ ପୋଇଦେଙ୍ଗ୍ ଆଟ୍ଏନ୍ । ୧୫ ଜାଗାର୍ତା, ଏଣ୍ତେସ୍ ମାପୁରୁଦି ଦୟାଦାନ୍ ତେବାମାଟ୍ । କେୟ୍ନି ମାରାନ୍ ୱାଜା ଆମାଟ୍ । କେୟ୍ନି ମାରାନ୍ ପିରିତିଙ୍ଗାଁ, ତାନି ୱିସାମ୍ତି ମାଡ଼ାନ୍ ନାଣ୍ତ ନାସ୍ଟୁ ଆନାତ୍ । ୧୬ ଏସୌ ୱାଜା ଏନ୍ ତାଗ୍ଇକାନ୍ ମାରି ଅଦାର୍ମୁଦିକାନ୍ ଆମାଟ୍; ୱାନ୍ ତୋ ଉନ୍ଡ୍ରେ ଅଡିଦି କାଦି ଉଣ୍ତିଙ୍ଗ୍ ପେରିଅଦିକାର୍ ପୋର୍ତା ମାର୍ହାନ୍ । ୧୭ ମିର୍ ନେସ୍ତିମାନିଦେର୍ ଜେ, ୱାନ୍ ବୁବାଦି ଆସିର୍ବାଦ୍ତି ଅଦିକାରି ଆନି ଉଣ୍ତିଙ୍ଗ୍ ବଦା କିତାନ୍, ମାତର୍ ଡ଼ିସାୟ୍ ଆତାତ୍ । ମାରି ଏତ୍କିନି ନାଣ୍ତ କାଣେର୍ଙ୍ଗୁଁ ୱାକ୍ସି ଜାତୁନ୍ତାନ୍ ସେସ୍ଟା କିତିଙ୍ଗ୍ବା ଆକା କିନି ଉଣ୍ତିଙ୍ଗ୍ ମାରି ସୁଜୋଗ୍ ପୋଇଏତାନ୍ ।
୧୮ ଇସ୍ରାଏଲ୍ତିଲୋକୁ ୱାଜା ମିର୍ ସିନାଇ ଗରନ୍ତୁ କାସ୍ସିମାନି ସିସୁ, ସିର୍ ସିକାଟି, ନାଣ୍ତଗାଲିପିରୁ, ୧୯ ବାଜାମରିଦି ଆଉଲି ମାରି ବାକ୍ୟଦି ବଲୁ ଲାକ୍ତୁ ରେଇଦେର୍, ଲୋକୁ ଆୟା ବଲୁ ୱେନ୍ଜି ଏଣ୍ତେସ୍ ୱାରିଙ୍ଗ୍ ମାରି ଆମାଇନି ବାକ୍ୟ ୱେର୍ଏର୍, ଇକା ଅନୁରଦ୍ କିତାମାର୍ହାର୍, ୨୦ ଇରିଙ୍ଗ୍ ଆମାଇନି “ଜାତୁ ବା ଜଦି ଆୟା ଗରନ୍ତିଙ୍ଗ୍ ମୁଟ୍ତିଙ୍ଗ୍, ଆର୍ତିଙ୍ଗ୍ ତାନିଙ୍ଗ୍ କାଲ୍କାଣ୍କୁ ସାୟାମାର୍ଗା ଡାକ୍ନାର୍,” ଇୟା ଆମା ମାଟା ସିଆୟ୍ଆତା ମାର୍ହାତ୍ ଆକା ୱାର୍ ସାସ୍ କିଦେଙ୍ଗ୍ ଆଟ୍ଏତାର୍ । ୨୧ ମାରି ଆୟା ସୁଡ଼ୁତିକା ଇୟାୱାଜା ତିଲାନିକା ମାରାତ୍ ଜେ, ମୋସା ଇର୍ହାମାରାନ୍, “ନାନୁ ତିଲାତା ମାରି ତିର୍ଗିଜିନା ।”
୨୨ ମାତର୍ ମିର୍ ୱାତିମାନିଦେର୍ ସିୟୋନ ଗରନ୍ତୁ ମାରି ଜିବନ୍ତି ମାପୁରୁଦି ଗାଡ଼୍, ମୁସ୍କୁପୁର୍ତି ଜିରୁସାଲମ୍ତୁ, ଏମେମାନୁ ହଜାର୍ ହଜାର୍ ମୁସ୍କୁପୁର୍ତି ଦୁତ୍କା ଦୋଲ୍ । ୨୩ ମାପୁରୁଦି ଏମେ ଆଗ୍ଡ଼ି ଜନମ୍ଆତି କଡ଼ର୍ଆଇଲିକା ଦରୁ ମୁସ୍କୁପୁର୍ତୁ ରାସାତା ମାନାତ୍, ମିର୍ ୱାରି ୱେଡ଼ିକାଦୁ ୱାତିମାନିଦେର୍ । ୱିଜୁ ଲୋକା ଜାତିଦି ବିଚାର୍କିନି ମାପୁରୁଦି ଲାକ୍ତୁ ମାରି ପୁରା ଦାର୍ମୁଦି ଲୋକାଦି ଆତ୍ମେଙ୍ଗାଁ ଲାକ୍ତୁ ମିର୍ ୱାତିମାନିଦେର୍ । ୨୪ ମାରି, ପୁନି ନିୟମ୍ ତିଆର୍ ଆତିମାନି ଜିସୁଦି ଲାକ୍ତୁ ମାରି ଏମେୱାନି ନେତେର୍ ହେବଲଦି ନେତେର୍ ବାଦ୍ଲୁ ନେଗି ବାକ୍ୟ ସିନାନ୍ ଇଜି ଆସା କିଜିନା, ଆୟା ନେତେର୍ ଲାକୁତୁ ୱାତିମାନିଦେର୍ ।
୨୫ ଆୟାଉଣ୍ତିଙ୍ଗ୍ ଜାଗାର୍ତା, ଏନ୍ ବାକ୍ୟ ୱେର୍ସିନାନ୍, ୱାନିଙ୍ଗ୍ ଡ଼ିସ୍ମାଟ୍ । ମୁସ୍କୁପୁର୍ତାନ୍ ବାକ୍ୟ ଆସ୍ସି ୱାଜି ଦୁନିଆଦୁ ତାନିଙ୍ଗ୍ ୱେର୍ତିମାନି ଲୋକ୍ତି ଉଣ୍ତିଙ୍ଗ୍ ଏମେକାର୍ ୱେନ୍ଏତାର୍, ୱାର୍ ଏର୍ବା ରକିୟା ପୋୟ୍ଏତାର୍ । ଆର୍ତିଙ୍ଗ୍, ଇଲେଇ ଏନ୍ ମୁସ୍କୁପୁର୍ତୁ ମାନ୍ଜି ୱାର୍ଗିଜିନାନ୍, ୱାନିଙ୍ଗ୍ ଡ଼ିସ୍ତିଙ୍ଗ୍ ମାଡୁ ଇନିକା ରକିୟା ପୋଇଦେଙ୍ଗ୍ ଆଟ୍ନିକା ? ୨୬ ନାସ୍ତିୱାଲେ ୱାନି ବଲୁ ପୃତିବିଦିଙ୍ଗ୍ ଦୁକ୍ତା ମାର୍ହାତ୍ । ମାତର୍ ଇଲେଇ ୱାନ୍ ପାର୍ମାଣ୍ କିଜି ଇର୍ହାମାନାନ୍, “ନାନୁ ମାରିଡ଼େସି କେବଲ ପୃତିବିଦିଙ୍ଗ୍ ସିଲେ, ବାଦଡ଼୍ତିଙ୍ଗ୍ ବା ଦୁକ୍ନା ପୋକ୍ନା ।” ୨୭ ଇବେଟ୍ତାନ୍ ଟିକ୍ ଜେ, ୱାନ୍ “ମାରିଡ଼େସି” ଆମାକା କିନାନ୍, ତାନିମାଡ଼ାନ୍ ତିଆର୍ଆତି ୱିଜୁ ବିସୟ୍ ଦୁଙ୍ଗୁଁଜି ମାର୍ଗାନାତ୍ । କେବଲ ଏମେ ୱିଜୁ ବିସୟ୍ ଦୁଙ୍ଗୁଁଦେଙ୍ଗ୍ ଆଟ୍ଉ, ଆକା ଡାଟ୍ ଆଜି ତେବାନାତ୍ ।
୨୮ ଆଦେଙ୍ଗ୍ ରାଦୁ, ମାଡ୍ ଦନ୍ୟବାଦ୍ ସିନାଟ୍, ଇରିଙ୍ଗ୍ ମାଡ୍ ଉନ୍ଡ୍ରି ଆଟ୍ୱା ରାଜି ପୋୟ୍ନାଟ୍ । ରାଦୁ, ମା ଦନ୍ୟବାଦ୍ ସିଜି ମାରି ବକ୍ତି ନି ତିଏଲ୍ତି ୱାଲେ ମାପୁରୁଦି ୱେଡ଼ିକା ଆଜି ୱାନିଙ୍ଗ୍ ପୁଜା କିନାଟ୍ । ୨୯ ଇରିଙ୍ଗ୍ ସତ୍ତାନ୍ ମା ମାପୁରୁ ଅରେନ୍ ଦଂସକିନି ସିସୁ ୱାଜା ।