୫
ମାଜନଲୋକ୍ ଉଣ୍ତିଙ୍ଗ୍ ଜାଗ୍ରାତାମାଟା
୧ ଏ ମାଜନ୍ ଲୋକ୍, ନା ମାଟା ୱେନ୍ଡ୍ରୁ । ମି ଆମା କାସ୍ଟୁ ଆଦେଙ୍ଗ୍ ସୋଲ୍ସିନାତ୍, ଆୟାଉଣ୍ତିଙ୍ଗ୍ ଆଡ଼୍ବାଦୁ ମାରି ଦୁଃକ୍ କିଦୁ । ୨ ✡ମାତିଉ ୬:୧୯.ମି ଦନ୍ ୱିଜିତାତ୍ନି, ମାରି ମି ୱାତିଗନ୍ଦା ସେଦା ତିରାତ୍ନି । ୩ ମାରି ମି ବାଙ୍ଗାଁରାମ୍ ମାରି ୱେଣ୍ତିଦୁ କିଟିଙ୍ଗ୍ ଆସ୍ତାତ୍ନି ମାରି ଇୟା କିଟିଙ୍ଗ୍ ମି ବିରୁଦ୍ତାନ୍ ସାକି ସିନାତ୍, ମାରି ମି ମେନ୍ଦଲ୍ତିଙ୍ଗ୍ ସିସୁୱାଜା ତିନାତ୍ । ଇୟା ୱିଜ୍ନିଦିନ୍ତୁ ମିର୍ ଦନ୍ ଉଣ୍ତା କିଜିନିଦେର୍ । ୪ ୱେନ୍ଡ୍ରୁ, ମି କିଡ଼ିଇଦୁ ପାଣି କିଜିମାନି ପାଣିକିନିୱାରିଙ୍ଗ୍ ବୁତି ସିଇଦେର୍ । ୱାରି ମାଟା ୱେନ୍ଡ୍ରୁ । ପାସି କୟ୍ନିୱାରି ମାଟା ସାକ୍ତିମାନ୍ ପ୍ରବୁ ମାପୁରୁ ୱେର୍ଆ ମାନାନ୍ । ୫ ଇୟା ଦୁନିଆଦୁ ମି ଜିବନ୍ ସୁକ୍ ମାରି ୱେଡ଼ିକାଦାନ୍ ଦିନ୍କାଟେକିଜିନିଦେର୍ । ସାନିଦିନ୍ତି ଉଣ୍ତିଙ୍ଗ୍ ମିର୍ ମଟାରଟା ଆତିମାନିଦେର୍ । ୬ ମିର୍ ଦସ୍ ସିଲି ଲୋକାଙ୍ଗ୍ ଦସ୍ ଆସ୍ସି ସାୟାମାର୍ଗାଡାକ୍ତିମାନିଦେର୍; ୱାର୍ ମିଙ୍ଗିଁ ବିରୁଦ୍ କିଦେଙ୍ଗ୍ ଆଟ୍ଏତାର୍ ।
ସାସ୍ ଆସ୍ସି ପାର୍ତାନା କିଦୁ
୭ ମାରି, ଏ ତଡ଼ାନ୍କୁ ନି ତାଙ୍ଗିଁକି, ପ୍ରବୁଦି ୱାନିଦିନ୍ ସାନ୍ଦି ସାସ୍ ଆସ୍ସି ତେବାଦୁ । ସୁଡ଼ୁଦୁ, ଚାସ୍ପାଣିକିନିକାନ୍ ଏଣ୍ତେସ୍ ୱାନି ଡଡିଦୁ ନାଣ୍ତ୍ ପାସି ପୟ୍ନି ଉଣ୍ତିଙ୍ଗ୍ ସାସ୍ ଆସ୍ସି ପାର୍ତୁମ୍ତି ନି ସାରାସାରିଦି ପିରୁଦିଙ୍ଗ୍ କାପ୍କିନାନ୍ । ୮ ଆୟାୱାଜା, ମି ଜିବନ୍ତିଙ୍ଗ୍ ବା ସାସ୍ ଆସ୍ସି କାପ୍କିଦୁ । ମି ଆସା ଡାଟ୍ ମାନିତ୍, ଇରିଙ୍ଗ୍ ପ୍ରବୁଦି ୱାନିଦିନ୍ ଲାକ୍ତୁ ୱାତାତ୍ନି ।
୯ ଏ ତଡ଼ାନ୍କୁ ନି ତାଙ୍ଗିଁକି, ନିଜେନିଜେଦିମାନୁ ଦୋସ୍ ଆସ୍ସିସାମାଟ୍, ଆର୍ତିଙ୍ଗ୍ ମାପୁରୁ ମି ବିସାର୍ କିଏନ୍ । ସୁଡ଼ୁଦୁ ! ପେରିବିସାର୍କିନିକାନ୍ ସେର୍ଲା ଲାକ୍ତୁ ନିର୍ଆମାନାନ୍ । ୧୦ ଏ ତଡ଼ାନ୍କୁ ନି ତାଙ୍ଗିଁକି, ଆମା ବାବବାଦିରି ପ୍ରବୁଦି ଦର୍ତାନ୍ ମାଟା ସିତାମାର୍ହାର୍, ୱାରିଙ୍ଗ୍ ଏତ୍ କିଦୁ । ୧୧ ଦୁଃକ୍କାସ୍ଟୁ ସମୟ୍ତୁ ସାସ୍ ନି ସାକା ଆନି ଉଣ୍ତିଙ୍ଗ୍ ୱାର୍ ମି ଲାକ୍ତୁ ମାନିର୍ । ୱାରି ସାସ୍ ଉଣ୍ତିଙ୍ଗ୍ ମାପ୍ ୱାରିଙ୍ଗ୍ ଦନ୍ୟ ଇଜି ୱେର୍ସିନାପ୍ । ମିର୍ ଆୟୁବଦି ସାସ୍ ବିସୟ୍ ୱେର୍ଇମାନିଦେର୍ ମାରି ସାରାସାରିୱେନ୍କା ପ୍ରବୁ ଏଣ୍ତେସ୍ ୱାନିଙ୍ଗ୍ ଆସିର୍ବାଦ୍ କିତାମାର୍ହାନ୍, ଆକା ନେସ୍ତିମାନିଦେର୍ । ଇରିଙ୍ଗ୍ ପ୍ରବୁଦି ଦୟା ମାରି କାର୍ମୁଦୁ ବର୍ତି ।
୧୨ ✡ମାତିଉ ୫:୩୪-୩୭.ଏ ନା ତଡ଼ାନ୍କୁ ନି ତାଙ୍ଗିଁକି, ପାର୍ମାଣ୍ କିନିୱାଲେ ମୁସ୍କୁପୁର୍ ନୋ ଦୁନିଆ ନୋ ଆଇ ଇନି ବିସୟ୍ ଅସି ପାର୍ମାଣ୍ କିମାଟ୍ । ମି “ହଁ” ମାଟା “ହଁ” ଆପିତ୍, “ସିଲେ” ମାଟା “ସିଲେଣ୍” ଆପିତ୍ । ଆର୍ତିଙ୍ଗ୍ ମିର୍ ବିସାର୍ତୁ ଦଣ୍ତ୍ ପୟ୍ଇଦେର୍ ।
୧୩ ମି ଲୋଇରାନ୍ ଏନ୍ ଇନିକା ଦୁଃକ୍କାସ୍ଟୁ ପୟ୍ଜିନାନ୍ ? ୱାନ୍ ପାର୍ତାନା କିପିନ୍ । ଏନ୍ ଇନିକା ୱେଡ଼ିକା କିଜିନାନ୍ ? ୱାନ୍ ପ୍ରସଂସାଦି ପାଟା ପାରିନ୍ । ୧୪ ✡ମାର୍କ ୬:୧୩.ମି ଲଇ ଏନ୍ ଇନିକା ନବ୍ ? ୱାନ୍ ମଣ୍ତଲିଦି ନେତାରିଙ୍ଗ୍ କୁକିନ୍; ୱାର୍ ପ୍ରବୁଦି ଦର୍ତାନ୍ ନିୟୁ ଉସ୍ସି ଆୟା ଉଣ୍ତିଙ୍ଗ୍ ପାର୍ତାନା କିପିର୍ । ୧୫ ଇୟାୱାଜା ବିସ୍ବାସ୍ତୁମାନି ପାର୍ତାନାଦାନ୍ ରଗ୍ତିୱାନିଙ୍ଗ୍ ନେଗେନ୍ କିନାତ୍ । ପ୍ରବୁ ୱାନିଙ୍ଗ୍ ନେଗେନ୍ କିନାନ୍ ମାରି ଜଦି ୱାନ୍ ପାପ୍ କିନାମାନାନ୍, ଆର୍ତିଙ୍ଗ୍ ୱାନିଙ୍ଗ୍ କେମା ସିଆୟ୍ଆନାତ୍ । ୧୬ ମାରି, ନିଜେନିଜେଦି ମାନୁ ନିଜେ ନିଜେଦି ପାପ୍ ମାନାଦୁ, ମାରି ନେଗେନ୍ ଆନି ଉଣ୍ତିଙ୍ଗ୍ ନିଜେନିଜେଦି ଉଣ୍ତିଙ୍ଗ୍ ପାର୍ତନା କିଦୁ । ଦାର୍ମୁଦି ଲୋକ୍ତି ପାର୍ତାନା ନାଣ୍ତ୍ ପାଣି ପୁରା କିଦେଙ୍ଗ୍ ଆଟ୍ନାତ୍ । ୧୭ ଏଲିୟ ମା ୱାଜା ସୁକ୍ଦୁଃକ୍ତି ଲୋକ୍ ମାର୍ହାନ୍ । ପିରୁ ଆମାକିତି ଇଜି ୱାନ୍ ଉନ୍ଡ୍ରି ମୋନ୍ତାନ୍ ପାର୍ତାନା କିତାମାର୍ହାନ୍, ମାରି ତିନି ବାର୍ସେକ୍ ସଗୋଟା ଲେଜ୍କୁ ସାନ୍ଦି ଦୁନିଆଦୁ ପିରୁ ଆଏତାତ୍ । ୧୮ ୱାନ୍ ମାରିଡ଼େସି ପାର୍ତାନା କିତାନ୍, ମାରି ବାଦ୍ଡ଼ତାନ୍ ପିରୁ ଆତାତ୍ ମାରି ବୁମିଦୁ ମାରିଡ଼େସି ପାସି ଆସ୍ତାତ୍ ।
୧୯ ଏ ନା ତଡ଼ାନ୍କୁ ନି ତାଙ୍ଗିଁକି, ମି ଲୋଇରାନ୍ ଏନ୍ ଜଦି ସତ୍ ସାରିଦାନ୍ ବାଣାନାନ୍ ମାରି ଆଇକାନ୍ ଅରେନ୍ ୱାନିଙ୍ଗ୍ ସତ୍ସାରିଦୁ ଡ଼େସି ତାନାନ୍, ୨୦ ✡୧ ପିତର ୪:୮.ଆର୍ତିଙ୍ଗ୍ ମନ୍ତୁଇଡ୍ଦୁ ଏନ୍ ତାଗ୍ଇସାରିଦାନ୍ ପାପ୍ଲୋକ୍ତିଙ୍ଗ୍ ଡ଼େସି ତାନାନ୍, ୱାନ୍ ଆୟା ପାପି ଲୋକ୍ତି ଆତ୍ମାଦିଙ୍ଗ୍ ସାନିମାଣୁକୁ ରକିୟା କିନାନ୍ ମାରି ୱାନି ନିଜେଦି ନାଣ୍ତ୍ ପାପ୍ କେମା ଆନାତ୍ ।