ଯୋହନ ଲିଖିତ ଯୀଶୁ ଖ୍ରୀଷ୍ଟଙ୍କ ସୁସମାଚାର
ଜୋହନ ରାସ୍ତିମାନି ଜିସୁ କ୍ରିସ୍ତଦି ନେଗିକାବୁର୍
ଜୋହନ ବଇ ବିସୟ୍ତାନ୍ ଏସ ମାଟା
ଜିସୁ କ୍ରିସ୍ତଦି ଜିବନ୍ ୱେର୍ସିମାନି ପୁନି ନିୟମ୍ତି ନାଲ୍ଗି ବଇଙ୍ଗାଁ ମାଣ୍କୁ ଜୋହନ ରାସ୍ତିମାନି ସୁସମାଚାର୍ ଉନ୍ଡ୍ରି । ଆୟାୱିଜୁ ବଇଙ୍ଗାଁ ସୁସମାଚାର୍ ଇନାର୍, ଆମାତାନି ଅର୍ତ “ନେଗିକାବୁର୍ ।” ଆୟାୱିଜୁ ଜିସୁ ସାତି ୱେନ୍କା ମାଥିଉ, ମାର୍କ, ଲୁକ ମାରି ଜୋହନତି ମାଣାନ୍ ରାସାତେମାନେ । ଜୋହନ ରାସ୍ତି ସୁସମାଚାର୍ କ୍ରିସ୍ତ ଜନମ୍ତି ନବେ ବାର୍ସେକ୍ ୱେନ୍କା ପ୍ରେରିତ ଜୋହନତି ମାଣ୍କୁ ରାସାତାମାନାତ୍ । ଜଦିବା ଇୟା ସୁସମାଚାରତୁ ଇୟା ବଇଦି ରାସ୍ନିକାନ୍ ଜୋହନ ଇଜି ନେସ୍ନି ୱାଜା ରାସାଏତ୍, ମାତର୍ ଇୟା ସୁସମାଚାରତି ରାସ୍ତି ବଲ୍ ୧ ଜୋହନ, ୨ ଜୋହନ ମାରି ୩ ଜୋହନତି ୱାଲେ ପୁରା ସାମାନ୍ । ଏସ ପୁର୍ବେଦି ରାସ୍ନିକାର୍ ବିସ୍ବାସ୍ କିନାର୍, ଇୟା ସୁସମାଚାର୍ ଏପିସିଦାନ୍ ରାସାତାମାନାତ୍, ଇରିଙ୍ଗ୍ ଇୟା ସମୟତିୱାଲେ ଜୋହନ ଏପିସିଦୁ ତେବାଜି ମାର୍ହାନ୍ ।
ଜୋହନ ବୁଜାନିୱାଜା ଇନାନ୍, “ଜିସୁନେ କ୍ରିସ୍ତ ଜିବନ୍ମାନି ମାପୁରୁଦି ମାରିସି” ଜୋହନ ୨୦:୩୧, ଇକା ବିସ୍ବାସ୍ କିଦେଙ୍ଗ୍ ଇଜି ଲୋକାଙ୍ଗ୍ ସାକା କିନିକା ଆଜିନାତ୍ ଇୟା ସୁସମାଚାର୍ତି ମୁକ୍ୟ ଉଦେସ୍ । ଇକା ବିସ୍ବାସ୍ କିନି ମାଣାନ୍ ମାଡ୍ ଏଣ୍ତେସ୍ ଜିବନ୍ ପୟ୍ଦେଙ୍ଗ୍ ଆଟ୍ନିକା । ଇୟା ସୁସମାଚାର୍ ଜିହୁଦି ମାରି ଅଣଜିହୁଦି ରିଏରି ଉଣ୍ତିଙ୍ଗ୍ ରାସାତା ମାର୍ହାତ୍ । ଇୟା ସୁସମାଚାରତୁ ଜିସୁଦି କାତା ଡ଼ିସ୍ତିଙ୍ଗ୍ ୱାନି କାବାଆନି ପାଣିଙ୍ଗ୍ ନାଣ୍ତ ଦିୟାନ୍ ସିଆୟ୍ଆତାମାନାତ୍ । ଜିସୁଦି ଡୁବନ୍ ମାରି ବାଲିବୁମିଦୁ ୱାନି ପରିକା ୱାଜା ବିସେସ୍ ଗଟ୍ଣେଙ୍ଗ୍ ବିସୟ୍ତାନ୍ ଜୋହନ ଇୟା ସୁସମାଚାରତୁ ଇନିକା ରାସ୍ଏନ୍ । ଇୟା ସୁସମାଚାର୍ ଆଇ ମୁନ୍ଡ୍ରି ସୁସମାଚାର୍ ମାଣ୍କୁ ଆଇକା ।
ଇୟା ବଇଦୁ ମାନି ମୁକିୟ୍ ବିସୟ୍
୧. ସୁସମାଚାରତି ଆରାମ୍ ଜୋହନ । ୧:୧-୧୮
୨. ଜିସୁଦି ଏସ କାବାଆନି ପାଣିଙ୍ଗ୍ ଜୋହନ । ୧:୧୯–୧୨:୫୦
୩. ଜିସୁଦି ଜିବନ୍, ସାନିକା ମାରି ନିଙ୍ଗିଁନିକା ଜୋହନ । ୧୩:୧–୨୦:୩୧
୪. ଜିସୁଦି ଡ଼େସିଜିବନ୍ଆଜି ୱେନ୍କା ତର୍ୟାଆନିକା ଜୋହନ । ୨୧:୧-୨୫
୧
ଜିବନ୍ତି ବାକ୍ୟ
୧ ଆଗ୍ଡ଼ି ବାକ୍ୟ ମାର୍ଆତ୍, ବାକ୍ୟ ମାପୁରୁୱାଲେ ମାର୍ଆତ୍, ଆୟା ବାକ୍ୟ ମାପୁରୁ ମାର୍ଆତ୍ । ୨ ବାକ୍ୟ ଆଗ୍ଡ଼ି ମାପୁରୁୱାଲେ ମାର୍ଆତ୍ । ୩ ୱାନି ମାଣାନ୍ ମାପୁରୁ ୱିଜୁ ତିଆର୍ କିତାତ୍; ମାରି ଆମାୱିଜୁ ତିଆର୍ ଆତାମାନାତ୍, ଆୟା ଲୋଇରାନ୍ ଉଣ୍ତ୍ରେବା ୱାନିଙ୍ଗ୍ ଡ଼ିସ୍ତିଙ୍ଗ୍ ତିଆର୍ ଆଏତ୍ । ୪ ୱାନିମାନୁ ଜିବନ୍ ମାର୍ଆତ୍ ମାରି ଆୟା ଜିବନ୍ ଲୋକା ଜାୟ୍ । ୫ ଆୟା ଜାୟ୍ ସିକାଟିଦୁ ଜାୟ୍ଆଜି ୱାଜିନାତ୍, ମାରି ସିକାଟି ଆକା ମାନାଏଜିନାତ୍ ।
୬ ✡ମାତିଉ ୩:୧; ମାର୍କ ୧:୪; ଲୁକ ୩:୧,୨.ମାପୁରୁ ୱାନି କାବୁର୍ ସିନିୱାନିଙ୍ଗ୍ ପୋକ୍ତାନ୍; ୱାନି ଦର୍ ଜୋହନ । ୭ ୱାନ୍ ଏଣ୍ତେସ୍ ଜାୟ୍ ବିସୟ୍ତାନ୍ ସାକି ସିନାନ୍, ମାରି ଆକା ୱେନ୍ଞ୍ଜି ୱିଜେରେ ବିସ୍ବାସ୍ କିନାର୍, ଆୟାଉଣ୍ତିଙ୍ଗ୍ ୱାନ୍ ୱାତାନ୍ । ୮ ଜୋହନ ନିଜେ ଆୟା ଜାୟ୍ ସିଲେତାନ୍, ମାତର୍ ଜାୟ୍ ବିସୟ୍ତାନ୍ ସାକି ସିଦେଙ୍ଗ୍ ଇଜି ୱାତାନ୍ । ୯ ଏମେ ସତ୍ ଜାୟ୍ ଦୁନିଆଦି ୱାଜି ୱିଜୁ ଲୋକାଙ୍ଗ୍ ଜାୟ୍ ସିନାତ୍, ଆକାଦେ ସତ୍ତି ଜାୟ୍ ।
୧୦ ବାକ୍ୟ ଦୁନିଆଦୁ ମାର୍ଆତ୍ ମାରି ଦୁନିଆ ୱାନି ମାଣାନ୍ ତିଆର୍ ଆତାତ୍, ଆରିଙ୍ଗ୍ବା ଦୁନିଆ ୱାନିଙ୍ଗ୍ ସିନିସ୍ କିଏତାତ୍ । ୧୧ ୱାନ୍ ନିଜେଦି ରାଜିଦୁ ୱାତାନ୍, ଆରିଙ୍ଗ୍ବା ୱାନି ନିଜେଦି ଲୋକୁ ୱାନିଙ୍ଗ୍ ମାନାଏତାର୍ । ୧୨ ମାତର୍ ଏସୋ ଲୋକୁ ୱାନିଙ୍ଗ୍ ମାନାତାର୍, ଅର୍ତାତ୍ ଏମେକାର୍ ୱାନି ଦର୍ତାନ୍ ବିସ୍ବାସ୍ କିତାର୍, ଆୟା ୱିଜେରିଙ୍ଗ୍ ୱାନ୍ ମାପୁରୁଦି କଡ଼ର୍ ଆଦେଙ୍ଗ୍ ଅଦିକାର୍ ସିତାନ୍; ୧୩ ୱାର୍ ମାପୁରୁଦି ମାରିସିର୍ ନିଜେଦି ବଦାଦାନ୍ କି, ମେନ୍ଦଲ୍ତି ନେତେର୍ତାନ୍ କି ଲୋକା ବଦାଦାନ୍ ଜନମ୍ ଆଏର୍, ମାତର୍ ମାପୁରୁ ନିଜେ ୱାରି ବୁବା ।
୧୪ ମାରି, ଆୟା ବାକ୍ୟ ନର୍ ମେନ୍ଧଲ୍ ଆସ୍ସି ମା ୱାଲେ ଜିତାନ୍ । ୱାନ୍ ଦୟା ନି ସତ୍ତୁ ପୁରା ଆଜିମାର୍ହାନ୍ । ମାରି ମାପୁରୁଦି ଅରେନ୍ନେ ମାରିସିୱାଜା ୱାନ୍ ଏମେ କାବାଆନି ମହିମାକି ପୋଇତାମାର୍ହାନ୍, ଆକା ମାପ୍ ସୁଡ଼ୁତାପ୍ ।
୧୫ ଜୋହନ ୱାନି ବିସୟ୍ତାନ୍ ସାକି ସିଜି ନାଣ୍ତ ଆଉଲି ଆଜି ଇର୍ଆନ୍, “ଏନ୍ ନା ୱେନ୍କା ୱାଜିନାନ୍, ୱାନ୍ ନାଙ୍ଗିଁ ପେରିକାନ୍, ଇରିଙ୍ଗ୍ ୱାନ୍ ନା ଜନମ୍ ଆନି ଆଗ୍ଡ଼ି ମାର୍ଆନ୍, ଏମେୱାନି ବିସୟ୍ତାନ୍ ନାନ୍ ଇକା ଇର୍ହାମାର୍ହା, ୱାନ୍ ଇକାନ୍ ।”
୧୬ ଆଦେଙ୍ଗ୍ ୱାନି ଦୟାଦି ପୁରାଦାନ୍ ମାଡ୍ ୱିଜେରେ ଆସିର୍ବାଦ୍ ପୋଇତିମାନିକା, ହୁଁ, ଆସିର୍ବାଦ୍ ମୁସ୍କୁ ଆସିର୍ବାଦ୍ ପୋଇତିମାନିକା । ୧୭ ଇରିଙ୍ଗ୍ ନିୟମ୍ ମାପୁରୁ ମୋସା ମାଣାନ୍ ସିତାନ୍, ମାତର୍ ଦୟା ନି ସତ୍ ଜିସୁ କ୍ରିସ୍ତ ମାଣାନ୍ ୱାତାତ୍ । ୧୮ ଏନ୍ ଏସାଙ୍ଗ୍ ମାପୁରୁଙ୍ଗ୍ଁ ସୁଡ଼ୁଏନ୍, ବୁବାସି ଗାତୁଦୁ ମାନି ଅରେନ୍ନେ ୱାନି ଲାଡ୍ ମାରିସି, ୱାନିଙ୍ଗ୍ ନେସିସ୍ କିତାମାନାନ୍ ।
ଡୁବନ୍ସିନି ଜୋହନତି କାବୁର୍
(ମାତିଉ ୩:୧-୧୨; ମାର୍କ ୧:୧-୮; ଲୁକ ୩:୧-୧୮)
୧୯ ଜିରୁସାଲାମ୍ତି ଜିହୁଦି ପେରିକାର୍ ଏସ ଲୋକ୍ ଦାର୍ମୁଜାଜକରିଙ୍ଗ୍ ମାରି ଲେବିୟରିଙ୍ଗ୍ ଜୋହନତି ଲାକ୍ତୁ, “ନିନ୍ ଏନ୍ ?” ଇଜି ୱେନ୍ବାଦେଙ୍ଗ୍ ପୋକ୍ତାର୍,
୨୦ ୱାନ୍ ମାନାଏଜି ସତ୍ତାନ୍ ୱେର୍ତାନ୍, “ନାନ୍ କ୍ରିସ୍ତ ଆଏ ।”
୨୧ ଆବେଟ୍ ୱାର୍ ଜୋହନ୍ତିଙ୍ଗ୍ ୱେନ୍ବାତାର୍, ଆରିଙ୍ଗ୍, “ନିନ୍ ଇନିକା ଏଲିୟ୍ ?”
ୱାନ୍ ଇର୍ଆନ୍, “ନାନ୍ ଆଏ ।”
ନିନ୍ ଇନିକା ଆୟା ବାବବାଦି ?
ୱାନ୍ ଇର୍ହାନ୍, “ସିଲେ ।”
୨୨ ଆବେଟ୍ ୱାର୍ ୱାନିଙ୍ଗ୍ ଇର୍ହାର୍, “ମାଙ୍ଗିଁ ପୋକ୍ତିମାନି ୱାରିଙ୍ଗ୍ ଏଣ୍ତେସ୍ ଇନ୍ଡ୍ରେଙ୍ଗ୍ ଆଟ୍ନାପ୍, ଆୟାଉଣ୍ତିଙ୍ଗ୍ ନିନ୍ ଏନ୍ ? ନିନ୍ ନିଜେଦି ବିସୟ୍ତାନ୍ ଇନିକା ଇଜିନି ?”
୨୩ ଜିସାୟ ବାବବାଦି ଏଣ୍ତେସ୍ ୱେର୍ତାମାର୍ଆନ୍, ଆୟାୱାଜା ଜୋହନ ଇର୍ହାନ୍ ।
“ନାନ୍ ଆୟା ସିମ୍ରାବାଡିଦୁ ଆଉଲିଆଜିମାନି ଅରେନ୍ୱାନି ବଲ୍,
ପ୍ରବୁଦି ସାରି ସାଡ଼ୁକୁ କିଆ ।”
୨୪ ମାରି, ପାରୁସିର୍ ପୋକ୍ତିମାନି କାବୁର୍ ଅନିକାର୍ ୱାନିଙ୍ଗ୍ ୱେନ୍ବାତାର୍, ୨୫ “ନିନ୍ ଜଦି କ୍ରିସ୍ତ ମାରି ଏଲିୟ୍ ମାରି ଆୟା ବାବବାଦି ଆଇ, ଆରିଙ୍ଗ୍ ଏନ୍ଦା ଡୁବନ୍ ସିଜିନି ?”
୨୬ ଜୋହନ ୱାରିଙ୍ଗ୍ ଇର୍ଆନ୍, “ନାନ୍ ଏର୍ତୁ ଡୁବନ୍ ସିଜିନା; ଆମାୱାନିଙ୍ଗ୍ ମିର୍ ନେସ୍ଇଦେର୍, ୱାନ୍ ମିବାନ୍ ମାନାନ୍; ୨୭ ୱାନ୍ ନା ୱେନ୍କା ୱାଜିନାନ୍, ୱାନି ଜୁତେଙ୍ଗ୍ତି ଗାଟି କୁତ୍ତେଙ୍ଗ୍ ବା ନାନ୍ ଜଗ୍ ସିଲେ ।”
୨୮ ଜର୍ଦନ ଗାଡାଦି ଆୟାପାଡ଼ିରି ଆମା ବେତନିଆଦୁ ଜୋହନ ଡୁବନ୍ ସିଜିମାର୍ଆନ୍, ଆୟା ବାଡିଦୁ ଇୟାୱିଜୁ ଗଟାତାତ୍ ।
ମାପୁରୁଦି ମେଣ୍ତାପିଲା
୨୯ ମାର୍ନାଣ୍ଡିଙ୍ଗ୍ ଜୋହନ ଜିସୁଙ୍ଗୁଁ ୱାନି ଲାକ୍ତୁ ୱାନିକା ସୁଡ଼ୁଜି ଇର୍ଆନ୍, ଇକା ସୁଡ଼ୁଦୁ, ମାପୁରୁଦି ମେଣ୍ତାପିଲା, ଏନ୍ ଦୁନିଆଦି ପାପ୍ ପିଣ୍ତ୍ନା ଅନାନ୍ । ୩୦ ନା ୱେନ୍କା ଏନ୍ ୱାଜିନାନ୍, ୱାନ୍ ନାମାଣାନ୍ ପେରିକାନ୍, ଇରିଙ୍ଗ୍ ୱାନ୍ ନା ଜନମ୍ ଆଗ୍ଡ଼ି ମାର୍ଆନ୍, ଆମାୱାନି ବିସୟ୍ତାନ୍ ନାନ୍ ଇକା ଇର୍ଆମାର୍ହା, ୱାନ୍ ଆକାନ୍ । ୩୧ ନାନ୍ ବା ୱାନିଙ୍ଗ୍ ସିନିସ୍ କିଏ ମାର୍ହା, ମାତର୍ ୱାନ୍ ଏଣ୍ତେସ୍ ଇସ୍ରାଏଲ୍ ଲୋକାମାନୁ ନେସାଇ ଆନାନ୍, ଆୟାଉଣ୍ତିଙ୍ଗ୍ ନାନ୍ ଏର୍ତୁ ଡୁବନ୍ ସିଦେଙ୍ଗ୍ ୱାତାମାନା ।
୩୨ ମାରି ଜୋହନ ସାକି ସିଜି ଇର୍ହାନ୍, “ନାନ୍ ପବିତ୍ର ଆତ୍ମା ପାର୍ୱାଦି ୱାଜା ବାଦଡ଼୍ତାନ୍ ରେତାଜି ୱାଦ୍ ୱାନି ମୁସ୍କୁ ବାସ୍ନିକା ସୁଡ଼ୁତା । ୩୩ ନାନ୍ ବା ୱାନିଙ୍ଗ୍ ସିନିସ୍ କିଏ ମାର୍ହା, ମାତର୍ ଏନ୍ ନାଙ୍ଗିଁ ଏର୍ତୁ ଡୁବନ୍ ସିଦେଙ୍ଗ୍ ପୋକ୍ତାନ୍, ୱାନ୍ ନାଙ୍ଗିଁ ଇର୍ଆନ୍, ଆମାୱାନି ମୁସ୍କୁ ଆତ୍ମା ବାସ୍ନିକା ସୁଡ଼ୁନି, ଏନ୍ ପବିତ୍ରଆତ୍ମାଦୁ ଡୁବନ୍ ସିନାନ୍, ଆକାନ୍ ଆୟା ଲୋକୁ । ୩୪ ମାରି, ନାନ୍ ଆକା ସୁଡ଼ୁତାମାନା ମାରି ୱାନ୍ ମାପୁରୁଦି ମାରିସି ଇଜି ସାକି ସିତାମାନା ।”
ଜିସୁଦି ପାର୍ତୁମ୍ ସିସୁର୍
୩୫ ମାର୍ନାଣ୍ଡିଙ୍ଗ୍ ମାରିଡ଼େସି ଜୋହନ ନି ୱାନି ସିସୁରି ଲୋଇ ରିଏରି ୱାଲେ ନିର୍ଆମାର୍ଆର୍; ୩୬ ମାରି, ୱାନ୍ ଜିସୁଙ୍ଗୁଁ ଆୟା ସାରି ସିଜି ସନିକା ସୁଡ଼ୁଜି ୱାନିଙ୍ଗ୍ କାଣ୍ଗା କିଜି ଇର୍ହାନ୍, ଇକାନ୍ ସୁଡ଼ୁଦୁ, ମାପୁରୁଦି ମେଣ୍ତା ପିଲା ।
୩୭ ଆୟା ରିଏର୍ ସିସୁର୍ ୱାନି ମାଟା ୱେନ୍ଜି ଜିସୁୱାଲେ ୱାଲେ ସରଆର୍ । ୩୮ ଜିସୁ ମାର୍ଜି ୱେସ୍ସି ୱାରିଙ୍ଗ୍ ୱେନ୍କା ୱେନ୍କା ୱାଜିମାନିକା ସୁଡ଼ୁଜି ୱେନ୍ବାତାନ୍, “ମିର୍ ଇନିକା ପୋୟ୍ଜିନିଦେର୍ ?” ୱାର୍ ୱାନିଙ୍ଗ୍ ଇର୍ହାର୍, “ରାବ୍ବି” ଅନୁବାଦ୍ କିତିଙ୍ଗ୍ ତେନି ଅର୍ତ “ଗୁରୁ,” ନିନ୍ ଏମେ ତେବାନି ?
୩୯ ଜିସୁ ୱାରିଙ୍ଗ୍ ଇର୍ହାନ୍, ରାଦୁ, ସୁଣିଦେର୍ । ଆବେଟ୍ ୱାର୍ ସଲ୍ସି ୱାନି ବାସାନିକା ସୁଡ଼ୁତାର୍, ମାରି ଆୟା ନାଣ୍ଡିଙ୍ଗ୍ ୱାନିୱାଲେ ତେବାତାର୍; ନାସ୍ତିୱାଲେ ମିଲ୍ମିଲିକା ସାର୍ଟା ୱେଡ଼ା ଆତାମାର୍ଆତ୍ ।
୪୦ ଏମେ ରିଏର୍ ଜୋହନତି ମାଟା ୱେନ୍ଜି ଜିସୁଦି ୱାଲେ ୱାଲେ ସର୍ଆମାର୍ଆର୍, ୱାରି ଲୋଇ ଅରେନ୍ ସିମୋନ୍ ପିତର୍ତି ତଡ଼ାନ୍ ଆନ୍ଦ୍ରିୟ ମାର୍ଆନ୍ । ୪୧ ୱାନ୍ ପାର୍ତୁମ୍ ୱାନି ତଡ଼ାନ୍ ସିମୋନ୍ତିଙ୍ଗ୍ ପୋୟ୍ଜି ୱାନିଙ୍ଗ୍ ଇର୍ଆନ୍, ମାପ୍ “ମସିହଦି*ମସିହଦି ଆମାତାନି ଅର୍ତ କ୍ରିସ୍ତଙ୍ଗ୍ ” ସୁଡ଼ୁତାମାନାପ୍ । ୪୨ ୱାନ୍ ୱାନିଙ୍ଗ୍ ଜିସୁ ଲାକ୍ତୁ ତାତାନ୍ । ଜିସୁ ପିତର୍ ତରିନ୍ ସୁଡ଼ୁଜି ଇର୍ଆନ୍, “ନିନ୍ ସିମୋନ୍ ଜୋହନତି ମାରିସି । ନିନ୍ କେପା ଦର୍ତାନ୍ ୱେଙ୍ଗ୍ଁନି ଅନୁବାଦ କିତିଙ୍ଗ୍ ତେନି ଅର୍ତ କାଲୁ ।”
ଜିସୁ ପିଲିପ୍ତିଙ୍ଗ୍ ନି ନିତନିଏଲ୍ତିଙ୍ଗ୍ କୁକ୍ତାନ୍
୪୩ ମାର୍ନାଣ୍ଡିଙ୍ଗ୍ ଜିସୁ ଗାଲିଲିଦୁ ସହସ ସନ୍ଡ଼୍ରେଙ୍ଗ୍ ବଦା କିତାନ୍, ମାରି ୱାନ୍ ପିଲିପ୍ତିଙ୍ଗ୍ ସୁଡ଼ୁତାନ୍ନୋ ୱାନିଙ୍ଗ୍ ଇର୍ଆନ୍, “ନା ୱାଲେ ରାଆ ।” ୪୪ ପିଲିପ୍ ବେତ୍ସାଇଦାଦି ଲୋକୁ ମାର୍ଆନ୍, ଆକା ଆନ୍ଦ୍ରିୟ ନି ପିତର୍ତି ଗାଡ଼୍ ମାର୍ଆତ୍ । ୪୫ ପିଲିପ୍ ନିତନିଏଲ୍ତିଙ୍ଗ୍ ପୋୟ୍ଜି ୱାନିଙ୍ଗ୍ ଇର୍ଆନ୍, ଆମାୱାନି ବିସୟ୍ତାନ୍ ମୋସା ନିୟମ୍ ବଇଦୁ ରାସ୍ତାମାନାନ୍, ମାରି ବାବବାଦିର୍ ବା ରାସ୍ତାମାନାର୍, “ମାପ୍ ୱାନିଙ୍ଗ୍ ପୋୟ୍ତାମାନାପ୍; ୱାନ୍ ଜୋସେପ୍ତି ମାରିସି ନାଜରିତିୟଦି ଜିସୁ ।”
୪୬ ନିତନିଏଲ୍ ୱାନିଙ୍ଗ୍ ୱେନ୍ବାତାନ୍, “ନାଜରିତଦାନ୍ ନୋ ଇନି ନେଗି ବିସୟ୍ ସନା ୱାନାତ୍ ନୋ ?”
ପିଲିପ୍ ୱାନିଙ୍ଗ୍ ଇର୍ଆନ୍, “ୱାଜ ସୁଡ଼ୁଆ ।”
୪୭ ଜିସୁ ନିତନିଏଲ୍ତିଙ୍ଗ୍ ୱାନି ଲାକ୍ତୁ ୱାନିକା ସୁଡ଼ୁଜି ୱାନି ବିସୟ୍ତାନ୍ ଇର୍ଆନ୍, “ଇଦି ସୁଡ଼ୁଦୁ, ସତେନେ ଇକାନ୍ ଅରେନ୍ ଇସ୍ରାଏଲ୍ତି ଲୋକୁ, ୱେନିମାନୁ ଇନି ତାଗ୍ଇକା ସିଲେତ୍ ।”
୪୮ ନିତନିଏଲ୍ ୱାନିଙ୍ଗ୍ ୱେନ୍ବାତାନ୍, “ନାଙ୍ଗିଁ ନିନ୍ ଏଣ୍ତେସ୍ ସିନିସ୍କିତି ?”
ଜିସୁ ୱାନିଙ୍ଗ୍ ଇର୍ହାନ୍, “ପିଲିପ୍ ନିଙ୍ଗିଁ କୁକ୍ନି ଆଗ୍ଡ଼ି ନିନ୍ ଏସ୍ତିୱାଲେ ତଗା ମାରାନ୍ ଆଡ୍ଗି ମାର୍ହି, ନାସ୍ତିୱାଲେ ନାନ୍ ନିଙ୍ଗିଁ ସୁଡ଼ୁତାମାର୍ହା ।”
୪୯ ନିତନିଏଲ୍ ୱାନିଙ୍ଗ୍ ଇର୍ହାନ୍, “ଏ ଗୁରୁ, ନିନ୍ ମାପୁରୁଦି ମାରିସି, ନିନ୍ ଇସ୍ରାଏଲ୍ତି ରାଜା ।”
୫୦ ଜିସୁ ୱାନିଙ୍ଗ୍ ଇର୍ହାନ୍, “ନାନ୍ ନିଙ୍ଗିଁ ତଗା ମାରାନ୍ ଆଡ୍ଗି ସୁଡ଼ୁତାମାର୍ହା ଇଜି ଇର୍ହାଆକା ନୋ ନିନ୍ ବିସ୍ବାସ୍ କିଜିନି ? ନିନ୍ ତେନେ ମାଣାନ୍ ପେରି ପେରି ବିସୟ୍ ସୁଣି ।” ୫୧ ମାରି, ୱାନ୍ ୱାନିଙ୍ଗ୍ ଇର୍ଆନ୍, “ସତ୍ ସତ୍ ନାନ୍ ମିଙ୍ଗିଁ ଇଜିନା, ମିର୍ ମୁସ୍କୁପୁର୍ ରେଆତିକା ମାରି ମାପୁରୁଦି ଦୁତ୍କୁ ମନୁସ୍ୟପୁତ୍ରଦି ମୁସ୍କୁ ଏକ୍ନିକା ନି ରେତାନିକା ସୁଣିଦେର୍ ।”