୧୫
ଜିସୁ ଅଙ୍ଗୁର୍ତିୱାଦି ୱାଜା
୧ ନାନ୍ ସତେନେ ଅଙ୍ଗୁର୍ ତିୱା, ମାରି ମା ବୁବା ପାଣିକିନିକାନ୍ । ୨ ନା ମାନୁ ମାନି ଆମା କମାଦୁ ପଲ୍ ଆସ୍ଏତିଙ୍ଗ୍, ଆୟାକା କାତ୍ନା ପୋକ୍ନାନ୍; ମାରି ଆମା କମାଦୁ ପଲ୍ ଆସ୍ନାତ୍, ଆବେନ୍ ନାଣ୍ତ ଆସ୍ତେଙ୍ଗ୍ ଇଜି ୱାନ୍ ତାନେଙ୍ଗ୍ କୟ୍ଜି ସେବା କିନ୍ନାନ୍ । ୩ ନାନ୍ ମିଙ୍ଗିଁ ଏମେ ବାକ୍ୟ ୱେର୍ତାମାନା, ଆୟାଉଣ୍ତିଙ୍ଗ୍ ମିର୍ ନର୍ୟାଆତି ୱିସ୍ତିମାନିଦେର୍ । ୪ ନା ମାନୁ ମାନ୍ଡ଼୍ରୁ, ଆବେଟ୍ ନାନ୍ ମିମାନୁ ତେବାନା । ଏଣ୍ତେସ୍ କମା ଅଙ୍ଗୁର୍ ତିୱାଦୁ ମାନ୍ଏତିଙ୍ଗ୍ ନିଜେଦାନ୍ ପଲ୍ ଆସ୍ତେଙ୍ଗ୍ ଆଟ୍ଏତ୍, ଆୟାୱାଜା ମିର୍ ବା ନା ମାନୁ ମାନ୍ଏତିଙ୍ଗ୍ ପଲ୍ ଆସ୍ତେଙ୍ଗ୍ ଆଟ୍ଇଦେର୍ ।
୫ ନାନ୍ ଅଙ୍ଗୁର୍ ତିୱା, ମିର୍ କମେଙ୍ଗ୍, ଏନ୍ ନାମାନୁ ମାନ୍ନାନ୍ ମାରି ନାନ୍ ଏମାନୁ ମାନା, ୱାନ୍ ନାଣ୍ତ ପଲ୍ ଆସ୍ନାତ୍; ଇରିଙ୍ଗ୍ ନାଙ୍ଗିଁ ଡ଼ିସ୍ତିଙ୍ଗ୍ ମିର୍ ଇନିକା କିଦେଙ୍ଗ୍ ଆଟ୍ଇଦେର୍ । ୬ ଏନ୍ ଏସ୍କାଙ୍ଗ୍ ନାମାନୁ ମାନ୍ଏନ୍, ଆରିଙ୍ଗ୍ ୱାନିଙ୍ଗ୍ କାତ୍ନିମାନି କମେଙ୍ଗ୍ ୱାଜା ଆତେରେ ପୋକ୍ନାର୍ ମାରି ୱାର୍ନା ସୋନାତ୍, ଇୟାୱାଜା କମେଆଙ୍ଗାଁ ଲୋକୁ ଉଣ୍ତା କିଜି ସିସୁଦୁ ପୋକ୍ନାର୍ ମାରି ଆୟା କମେଙ୍ଗ୍ ୱେନ୍ସନ୍ନେ । ୭ ଜଦି ମିର୍ ନାମାନୁ ମାନ୍ଡ଼୍ରୁ, ମାରି ନା ବାକ୍ୟ ମିମାନୁ ମାନାତ୍, ଆରିଙ୍ଗ୍ ଆମା ବିସୟ୍ ବଦା କିନିଦେର୍, ଆକା ଲସ୍ତୁ, ମାରି ମି ଉଣ୍ତିଙ୍ଗ୍ ଆକା ଆନାତ୍ । ୮ ମିର୍ ନାଣ୍ତ ପଲ୍ ଆସ୍ତିଙ୍ଗ୍ ମା ବୁବା ଦନ୍ୟବାଦ୍ ପୟ୍ନାନ୍, ମାରି ମିର୍ ନା ସତ୍ତି ସିସୁର୍ ଆନିଦେର୍ । ୯ ବୁବା ଏଣ୍ତେସ୍ୱାଜା ନାଙ୍ଗିଁ ଜିବନ୍ନୋତାମାନାନ୍, ନାନ୍ ବା ଆୟାୱାଜା ମିଙ୍ଗିଁ ଜିବନ୍ନୋତାମାନାନ୍; ନା ଜିବନ୍ନୋନିମାଣାନ୍ ତିର୍ ଆଜି ମାନ୍ଡ଼୍ରୁ । ୧୦ ନାନ୍ ଏଣ୍ତେସ୍ ମା ବୁବାଦି ମାଟାଦିଙ୍ଗ୍ ମାନାଜି ୱାନି ଜିବନ୍ନୋନିମାଣାନ୍ ତିର୍ ଆତାମାନା, ଆୟାୱାଜା ମିର୍ ଏସ୍କାଙ୍ଗ୍ ନା ମାଟାଦିଙ୍ଗ୍ ମାନାନିଦେର୍, ଆରିଙ୍ଗ୍ ନା ଜିବନ୍ନୋନିମାଣାନ୍ ତିର୍ ଆନି ତେବାନିଦେର୍ ।
୧୧ ନା ୱେଡ଼ିକା ଏଣ୍ତେସ୍ ମି ମାନୁ ତେବାତାନ୍, ମାରି ମି ୱେଡ଼ିକା ଏଣ୍ତେସ୍ ବର୍ତି ଆନାତ୍, ଇୟାଉଣ୍ତିଙ୍ଗ୍ ନାନ୍ ଇୟାୱିଜୁ ମିଙ୍ଗିଁ ୱେର୍ତା । ୧୨ ନାନ୍ ଏଣ୍ତେସ୍ ମିଙ୍ଗିଁ ଜିବନ୍ନୋତା ମାନା, ମିର୍ ବା ଆୟାୱାଜା ନିଜେନିଜେଦିଙ୍ଗ୍ ଜିବନ୍ନଦୁ, ଇକା ନା ଆଦେସ୍ । ୧୩ ନିଜେଦି ସଙ୍ଗ୍ତିଲୋକା ଉଣ୍ତିଙ୍ଗ୍ ନିଜେଦି ଜିବନ୍ ସିନି ବାଦୁଲୁ ଏନ୍ ମାରି ନାଣ୍ତ ପେରି ଜିବନ୍ନୋନିକା ସିଲେତ୍ । ୧୪ ନାନ୍ ମିଙ୍ଗିଁ ଆମା ମାଟା ସିତାମାନା, ଆୟାକା ଜଦି ମାନାନିଦେର୍, ଆରିଙ୍ଗ୍ ମିର୍ ନା ସଙ୍ଗ୍ । ୧୫ ନାନ୍ ମିଙ୍ଗିଁ ମାରି ସାକର୍ ଇଜି ଇନ୍ଏ, ଇରିଙ୍ଗ୍ ମାଲିକ୍ ଇନିକା କିନ୍ନାନ୍, ସାକର୍ ଆକା ନେସ୍ଏପ୍, ମାତର୍ ନାନ୍ ମିଙ୍ଗିଁ ସଙ୍ଗ୍ ଇଜି ଇର୍ହାମାନା, ଇରିଙ୍ଗ୍ ନାନ୍ ମା ବୁବାଦିମାଣ୍ନା ଇନି ଇନିକା ୱେର୍ଆମାନା, ଆୟାୱିଜୁ ମିଙ୍ଗିଁ ୱେର୍ତାମାନା । ୧୬ ମିର୍ ନାଙ୍ଗିଁ ଆସ୍କିଇଦେର୍, ମାତର୍ ନାନ୍ ମିଙ୍ଗିଁ ଆସ୍କିତାମାନା, ମାରି ମିର୍ ଏଣ୍ତେସ୍ ସୋଲ୍ସ ପଲ୍ ଆସିସ୍କିଦୁ ମାରି ମି ପଲ୍ ତିର୍ ତେବାତାନ୍, ଇୟାଉଣ୍ତିଙ୍ଗ୍ ମିଙ୍ଗିଁ ଆସ୍କିତାମାନା । ଆବେଟ୍ ମିର୍ ନା ଦର୍ତାନ୍ ବୁବେଙ୍ଗ୍ ଆମାକା ଲସ୍ନିଦେର୍, ୱାନ୍ ଆକା ମିଙ୍ଗିଁ ସିନାନ୍; ୧୭ ମିର୍ ଏଣ୍ତେସ୍ ନିଜେନିଜେଦିଙ୍ଗ୍ ଜିବନ୍ନଦୁ, ଇୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଇୟାୱିଜୁ ମାଟା ସିଜିନା ।
ଦୁନିଆ କାଡ଼୍ନାତ୍
୧୮ ଜଦି ଜଗତ୍ ମିଙ୍ଗିଁ କାଡ଼୍ନାତ୍, ଆରିଙ୍ଗ୍ ମିଙ୍ଗିଁ କାଡ଼ିନି ଆଗ୍ଡ଼ି ଆକା ଜେ ନାଙ୍ଗିଁ କାଡ଼ିତା ମାନାତ୍, ଇକା ନେସ୍ତୁ । ୧୯ ମିର୍ ଜଦି ଇୟା ଦୁନିଆଦିକାର୍ ଆତିଦେର୍ ମାନ୍ଦି, ଆରିଙ୍ଗ୍ ଦୁନିଆ ମିଙ୍ଗିଁ ନିଜେଦିକାର୍ ଅଡ଼୍ବିଜି ଲାଡ୍ କିତାତ୍ମାନ୍ଦି; ମାତର୍ ନାନ୍ ମିଙ୍ଗିଁ ଆସ୍କିଜି ଦୁନିଆଦାନ୍ ୱେର୍ଏ କିତାମାନା । ଆୟାଉଣ୍ତିଙ୍ଗ୍ ଦୁନିଆ ମିଙ୍ଗିଁ କାଡ଼୍ନାତ୍ । ୨୦ ✡ମାତିଉ ୧୦:୨୪; ଲୁକ ୬:୪୦; ଜୋହନ ୧୩:୧୬.ସାକର୍ ନିଜେଦି ମାଲିକ୍ମାଣୁକୁ ପେରିକାନ୍ ଆଏନ୍, ନାନ୍ ମିଙ୍ଗିଁ ଇୟା ଏମେ ବାକ୍ୟ ୱେର୍ତାମାନା, ଆକା ଏତ୍କିଦୁ । ଜଦି ୱାର୍ ନାଙ୍ଗିଁ ନିଦା କିତାମାନାର୍, ଆର୍ତିଙ୍ଗ୍ ମିଙ୍ଗିଁ ବା ନିଦା କିନାର୍; ଜଦି ୱାର୍ ନା ବାକ୍ୟ ମାନାତାମାନାର୍, ଆରିଙ୍ଗ୍ ମି ବାକ୍ୟ ବା ମାନାନାର୍ । ୨୧ ମାତର୍ ୱାର୍ ନା ପୋକ୍ତିମାନି ମାଲିକ୍ତିଙ୍ଗ୍ ନେସ୍ଏତିମାନିଙ୍ଗ୍ ନା ଦର୍ ଉଣ୍ତିଙ୍ଗ୍ ମିଙ୍ଗିଁ ଇୟାୱିଜୁ କିନାର୍ । ୨୨ ଜଦି ନାନ୍ ୱାଜ ୱାରିଙ୍ଗ୍ ଇନ୍ଏତି ମାରିଙ୍ଗ୍, ଆରିଙ୍ଗ୍ ୱାରି ପାପ୍ ଆଏତାତ୍ମାନ୍ଦି; ମାତର୍ ଇଲେଇ ୱାରି ପାପ୍ ବିସୟ୍ତାନ୍ ୱାରି ଇନି ସାଲାକି କିଦେଙ୍ଗ୍ ଆଟ୍ଏର୍ । ୨୩ ଏନ୍ ନାଙ୍ଗିଁ କାଡ଼୍ନାନ୍, ୱାନ୍ ମା ବୁବେଙ୍ଗ୍ ବା କାଡ଼୍ନାନ୍ । ୨୪ ଏମେ ପାଣିୱିଜୁ ମାରି ଏନ୍ କିଏନ୍, ନାନ୍ ଜଦି ଆୟାୱିଜୁ ୱାରି ମାନୁ କିଏତାମାନ୍ଦି, ଆରିଙ୍ଗ୍ ୱାରି ପାପ୍ ଆଏତାତ୍ମାନ୍ଦି; ମାତର୍ ଇଲେଇ ୱାର୍ ସୁଡ଼ୁତାମାନାର୍, ମାରି ନାଙ୍ଗିଁ ମାରି ମା ବୁବେଙ୍ଗ୍ ରିଏରିଙ୍ଗ୍ବା କାଡ଼ିତାମାନାର୍ । ୨୫ ମାତର୍ ୱାର୍ ମାଟାସିଲିକାବା ନାଙ୍ଗିଁ କାଡ଼ିତାର୍, ୱାରି ଦାର୍ମୁସାସ୍ତ୍ରଦୁ ରାସ୍ତିମାନି ଇୟା ବାକ୍ୟ ଏଣ୍ତେସ୍ ପୁରା ଆନାତ୍, ଇୟାଉଣ୍ତିଙ୍ଗ୍ ଇୟାୱାଜା ଗଟାଜିନାତ୍ ।
୨୬ ବୁବାଦି ଲାକ୍ତୁରାନ୍ ନାନ୍ ମି ଲାକ୍ତୁ ଆମା ସାହାଜ୍ୟକିନିୱାନିଙ୍ଗ୍ ପୋକ୍ତାନା, ୱାନ୍ ବୁବାଦିମାଣାନ୍ ୱାନାତ୍, ଆୟା ସତ୍ତି ଆତ୍ମା ୱାତିଙ୍ଗ୍ ନା ବିସୟ୍ତାନ୍ ସାକିୟ ସିନାତ୍; ୨୭ ମାରି, ମିର୍ ନା ବିସୟ୍ତାନ୍ ସାକି ୱେର୍ନିଦେର୍, ଇରିଙ୍ଗ୍ ମିର୍ ଆଗିଡ଼ିରାନ୍ନେ ନା ୱାଲେ ମାନିଦେର୍ ।