ଲୁକ ଲିଖିତ ଯୀଶୁ ଖ୍ରୀଷ୍ଟଙ୍କ ସୁସମାଚାର
ଲୁକ ରାସ୍ତିମାନି ଜିସୁ କ୍ରିସ୍ତଦି ନେଗିକାବୁର୍
ଲୁକ ବଇ ବିସୟ୍ତାନ୍ ଏସ ମାଟା
ଲୁକ ରାସ୍ତିମାନି ସୁସମାଚାର୍ ଆଜିନାତ୍, ଜିସୁ କ୍ରିସ୍ତଦି ଜିବନ୍ ୱେର୍ସିମାନି ପୁନି ନିୟମତି ନାଲ୍ଗି ବଇଙ୍ଗାଁ ମାଣ୍କୁ ଉନ୍ଣ୍ତ୍ରି । ଆୟାୱାନିକା ମାଣ୍କୁ ୱିଜୁ ବଇଙ୍ଗାଁ “ସୁସମାଚାର୍” ଇନାର୍, ଆମାତାନି ଅର୍ତ “ନେଗିକାବୁର୍” । ଆୟାୱିଜୁ ବଇଙ୍ଗିଁ ଜିସୁ ସାତି ୱେନ୍କା, ମାଥିଉ, ମାର୍କ, ଲୁକ ମାରି ଜୋହନଦି ମାଣ୍ନା ରାସାତେମାନେ । ଲୁକ ଜିସୁଦି ଜିବନ୍ତି ଗଟ୍ନେଙ୍ଗ୍ ରାସ୍ନି ୱାଲେ, ଜିସୁଦି ସାତି ମାରି ମାରିଡ଼େସି ଜିବନ୍ଆଜି ନିଙ୍ଗିଁତି ୱେନ୍କା ୱାନି ସିସୁର୍ ଏମେ ବିସୟୱିଜୁ କିତାର୍, ଆକାବା ରାସ୍ତାମାନାର୍, ଆୟା ବଇଦିଙ୍ଗ୍ ପ୍ରେରିତରି ପାଣିଦି ବିସୟ୍ ଇଜି ଇନାର୍ । ଲୁକ ବଇ ଏସ୍ତିୱାଲେ ମାରି ଏମେମାନୁ ରାସ୍ତାମାନାତ୍, ଆୟା ବିସୟ୍ତାନ୍ ପୁରା ଏନ୍ବା ନେସ୍ଏର୍, ମାତର୍ ଏସଲୋକ୍ ପଣ୍ତିତ୍କୁ ରାଜିଆନାର୍ ଜେ, ଇକା ଆନାତ୍ସୁଗି, ଜିସୁ କ୍ରିସ୍ତଦି ଜନମ୍ତି ୭୦ ବାର୍ସେକ୍ ୱେନ୍କା ରାସ୍ତାମାନାତ୍ ।
ରାସ୍ତିକାନ୍ ଆଜିନାନ୍ ଲୁକ, ଏନ୍ ଅରେନ୍ ଡାକ୍ତର୍ ମାର୍ଆନ୍ । ୱାନି ରାସ୍ତିକା ବଲ୍ ମାରି ବାସାଦି ୱାର୍ଗିନିକା ତର୍ନାତ୍ ଜେ, ୱାନ୍ ଅରେନ୍ ପଡ଼ାତି ଲୋକୁ ମାର୍ହାନ୍ । ଜିସୁଦି ଜିବନ୍ତି ଗଟ୍ନେଙ୍ଗ୍ ୱିଜୁ ଏମେ ଗଟ୍ନେଙ୍ଗ୍ ୱେନ୍କା ଏମେକା ଆତାତ୍ ଆୟା ଇସାବ୍ତାନ୍, ରାସ୍ସୋ ଟିକ୍ତାନ୍, ୱେର୍ତେଙ୍ଗ୍ ବଦାକିନାନ୍, ଏଣ୍ତେସ୍ ଆଇକାର୍ ଆକା ପଡ଼ାଜି ଲାବ୍ ପୟ୍ଦେଙ୍ଗ୍ ଆଟ୍ନାର୍ ୧:୧-୩ । ୱାନ୍ ଅରେନ୍ ଜିହୁଦି ଲୋକୁ ଆଏନ୍ ମାର୍ହାନ୍ କଲ୍ସିୟ ୪:୧୦-୧୪ ମାରି ୱାନ୍ ଇୟାୱାଜା ଇସାବ୍ତାନ୍ ରାସ୍ତାମାନ୍ନାନ୍, ଅଣଜିହୁଦିରି ବୁଜାଦେଙ୍ଗ୍ ଆଟ୍ନାର୍ । ୱାନ୍ ଜିହୁଦିରି ନିୟମକୁ ୱେର୍ନିକା ଇକା ମାଡ୍ ନେଗେନ୍ତାନ୍ ସୁଡ଼ୁଦେଙ୍ଗ୍ ଆଟ୍ନିକା ୧:୮ ।
ଲୁକ ରାସ୍ତିମାନି ସୁସମାଚାର୍, ମାଥିଉ ମାରି ମାର୍କ ବଇଦି ୱାଲେ ପୁରା ସାମାନ୍ ତର୍ନାତ୍, ଇରିଙ୍ଗ୍ ୱାର୍ ସାମାନ୍ ବିସୟ୍ ମାରି ସାମାନ୍ତାନ୍ ରାସ୍ନାର୍ । ମୁନ୍ଡ୍ରି ବଇଙ୍ଗାଁ ଲୋଇ ଲୁକ ଡୁବନ୍ସିନି ଜୋହନତି ଜନମ୍ ବିସୟ୍ତାନ୍ ନାଣ୍ତ ୱେର୍ନାନ୍ । ମାରିବା ଲୁକ ପାର୍ତନା ବିସୟ୍ତି ମୁସ୍କୁ ନାଣ୍ତ ୱେର୍ନାନ୍ ୩:୨୧, ୫:୧୬, ୬:୧୨, ୧୧:୧-୧୨, ୨୨:୩୨, ମାରି ୱାନ୍ କେମାସିନି ବିସୟତୁ ବା ୱେର୍ନାନ୍ ୩:୩, ୧୧:୪, ୧୭:୩-୪, ୨୩:୩୪, ୨୪:୪୭
ଇୟା ବଇଦୁ ମାନି ମୁକିୟ୍ ବିସୟ୍
୧. ଲୁକ ସୁସମାଚାର୍ତୁ ଇନିକା ମାନାତ୍ ମାରି ରାସ୍ତି ଉଦେସ୍ତିଙ୍ଗ୍ ୱେର୍ନାନ୍ । ୧:୧-୪
୨. ଜିସୁଦି ଜନମ୍ ନି ୱାନ୍ ଏଣ୍ତେସ୍ ସେବାପାଣିଦି ଉଣ୍ତିଙ୍ଗ୍ ତିଆର୍ ଆତାନ୍ । ୧:୫; ୪:୧୩
୩. ଜିସୁଦି ପାଣି ୱିଜୁ, ବିସେସ୍କିଜି ୱାନ୍ କିତିମାନି କାବାଆନି ପାଣି ମାରି ୱାନି ସିକିୟା ବିସୟ୍ତାନ୍ ୱେର୍ନାନ୍ । ୪:୧୪–୨୧:୩୮ ଇକା ଆଜିନାତ୍ ସୁସମାଚାର୍ତି ପେରି ବାଗ୍ ।
୪. ସାରାସାରି, ୱେନ୍କା ବଇଦୁ ମାନି ମୁଣ୍ତ୍ରି ଅଦ୍ୟାୟ୍ତୁ, ଜିସୁ ଏଣ୍ତେସ୍ ସାତାନ୍, ମୁସାତାନ୍ ମାରି ସାତିମାଣ୍କୁ ନିଙ୍ଗିଁତାନ୍ । ଅଦ୍ୟାୟ୍ । ୨୨:୧-୨୪
୧
ଜିସୁଦି ଜିବନ୍ତି ବିସୟ୍ତାନ୍ ଲୁକ ରାସ୍ତିମାନିକା
୧ ଏ ତିୟପିଲ, ଏମେକାର୍ ମା ଲୋଇ କିତିମାନି ଗଟେନେଙ୍ଗ୍ତି ନାଣ୍ତ ମାଟେଙ୍ଗ୍ ସତ୍ତାନ୍ ରାସ୍ତେଙ୍ଗ୍ ବଦାକିତାର୍, ୨ ଆୟା ନିଜେଦି କାଣ୍ଗାଦାନ୍ ସୁଡ଼ୁତିମାନିକା ମାରି ବାକ୍ୟ ପ୍ରଚାର୍ କିଜିମାନି ଲୋକୁ ମାଙ୍ଗିଁ ୱେର୍ନି ଇସାବ୍ତାନ୍, ୩ ଆରାମ୍ତାନ୍ ୱିଜୁ ବିସୟ୍ ଇସ୍ରିମିସ୍ରିକା ଉଣ୍ତା କିଜି ଦାଡ଼ିଦି ୱାଜା ମି ଉଣ୍ତିଙ୍ଗ୍ ରାସ୍ତେଙ୍ଗ୍ ନାନ୍ ବା ଟିକ୍ ଇଜି ଅଡ଼୍ବିତା, ୪ ଏଣ୍ତେସ୍ ନିନ୍ ଏମେ ୱିଜୁ ବିସୟ୍ ସିକିୟା ପଇତିମାନି, ଆୟାୱିଜୁ ବିସୟ୍ତାନ୍ ପୁରା ତାନି ବୁଦି ନେସ୍ନାର୍ ।
ଡୁବନ୍ସିନି ଜୋହନତି ଜନମ୍ ବିସୟ୍ତାନ୍ ୱେଙ୍ଗିଁତାତ୍
୫ ଜିହୁଦା ରାଜିଦି ରାଜା ହେରୋଦଦି ସମୟତୁ ଅବିୟ ଜାଜକତି ଦଳ୍ତୁ ଜିକରିୟ ଦର୍ତି ଅରେନ୍ ଜାଜକ ମାର୍ହାନ୍; ୱାନି ଆଡ଼୍ସି ହାରୋଣ କୁଟୁମ୍ତିକାତ୍ ମାର୍ହାତ୍, ତାନେ ଦର୍ ଏଲିସାବେତ୍ । ୬ ଜିକରିୟ ମାରି ଏଲିସାବେତ୍ ପ୍ରବୁଦି ୱିଜୁ ମାଟା ମାରି ନିୟମ୍ତାନ୍ ଇନି ଦୋସ୍ କିଏଣ୍ତ୍ଗା ମାପୁରୁମାନୁ ଦାର୍ମୁଦିକାର୍ ମାର୍ହାର୍ । ୭ ମାତର୍ ୱାରିଙ୍ଗ୍ ଅରେନ୍ବା କଡ଼ ସିଲେତାନ୍, ଇରିଙ୍ଗ୍ ଏଲିସାବେତ୍ ବାଞ୍ଜି ମାର୍ହାତ୍, ମାରି ୱାର୍ ନାଣ୍ତ ଡକ୍ରା ଡକ୍ରି ଆତାମାର୍ହାର୍ ।
୮ ୱାନ୍ ନିଜେଦି ଦଲ୍ତି ପାଲିଦାନ୍ ମନ୍ଦିର୍ତୁ ମାପୁରୁଦି ପାଣି କିନିୱାଲେ, ୯ ଜାଜକତି ପାଣିଦି ନିୟମ୍ତାନ୍ କୁଡ଼ୁକୁଡ଼ି ପକ୍ତାର୍ ଆକା ୱାନି ପାଲି ୱାତାତ୍ ପ୍ରବୁଦି ମନ୍ଦିର୍ତୁ ଡ଼ୁଗୁଜି ଦୁପ୍ଣି ଆଡ଼େକ୍ତେଙ୍ଗ୍, ୧୦ ମାରି ଦୁପୁଣି ଆଡ଼ିକ୍ନିୱାଲେ ୱିଜୁ ଲୋକୁ ଆତ୍ରେ ପାର୍ତନା କିଜିମାର୍ଆର୍ ।
୧୧ ଆୟାୱାଲେ ପ୍ରବୁଦି ଅରେନ୍ ଦୁତ୍ ଦୁପୁଣି ଆଡ଼ିକ୍ନି ବାଡ଼ିଦି ଉଣେର୍ ତରିନ୍ ନିଲ୍ସି ଜିକରିୟଙ୍ଗ୍ ତରାୟ୍ ଆତାତ୍ । ୧୨ ଜିକରିୟ ଦୁତ୍ତିଙ୍ଗ୍ ସୁଡ଼ୁଜି ତିର୍ଗିତାନ୍ ମାରି ତିଲାତା ସର୍ଆନ୍ । ୧୩ ମାତର୍ ଦୁତ୍ ୱାନିଙ୍ଗ୍ ଇର୍ହାତ୍, “ଜିକରିୟ, ତିଲାମା, ମାତର୍ ନିନ୍ ଲସ୍ତିକା ୱେର୍ଆ ମାନାନ୍, ମାରି ନି ଆଡ଼୍ସି ଏଲିସାବେତ୍ ମି ଉଣ୍ତିଙ୍ଗ୍ ଅରେନ୍ କଡ଼ ଜନମ୍ କିନାତ୍, ମିର୍ ୱାନି ଦର୍ ଜୋହନ ସିନିଦେର୍ । ୧୪ ୱାନି ଉଣ୍ତିଙ୍ଗ୍ ମିର୍ ନାଣ୍ତ ୱେଡ଼ିକା ଆନିଦେର୍, ମାରି ୱାନି ଜନମ୍ ଆତି ଉଣ୍ତିଙ୍ଗ୍ ନାଣ୍ତ ଲୋକୁ ୱେଡ଼ିକା କିନାର୍ । ୧୫ ୱାନ୍ ପ୍ରବୁଦି ଲାକ୍ତୁ ପେରିକାନ୍ ଆନାନ୍; ୱାନ୍ ଅଙ୍ଗୁର୍ରସ୍ ମାରି କାଡ଼ୁ ଏସ୍କାଙ୍ଗ୍ବା ଉଣୁଏନ୍, ମାରି ୟାୟା ପଟା ଲୋଇରାନ୍ନେ ପବିତ୍ରଆତ୍ମାଦୁ ପୁରା ତେବାନାନ୍, ୧୬ ମାରି ୱାନ୍ ଇସ୍ରାଏଲ୍ତି କଡ଼ରି ମାଣ୍କୁ ୱିଜୁଲୋକାଙ୍ଗ୍ ପ୍ରବୁ ୱାରି ମାପୁରୁମାନୁ ଡ଼େସି ତାନାନ୍ । ୧୭ ବୁବାରି ଜିବନ୍ କଡ଼ରି ଉଣ୍ତିଙ୍ଗ୍ ମାରି ମାନାଇୱାରିଙ୍ଗ୍ ଦାର୍ମୁଲୋକ୍ତି ବୁଦିଦୁ ସାଲାକିବିସ୍ କିଜି ଡ଼େପ୍ସିତାତେଙ୍ଗ୍ ମାରି ପ୍ରବୁଦି ଉଣ୍ତିଙ୍ଗ୍ ନେଗେନ୍ତିଆର୍କିତି ଉନ୍ଣ୍ତ୍ରି ଲୋକ୍ଦଲ୍ତିଙ୍ଗ୍ ତିଆର୍ କିଦେଙ୍ଗ୍ ୱାନ୍ ଏଲିୟଦି ଆତ୍ମା ମାରି ସାକ୍ତିଦାନ୍ ୱାନି ଆଗ୍ଡ଼ି ବୁଲାନାନ୍ ।”
୧୮ ଆବେଟ୍ ଜିକରିୟ ଦୁତ୍ତିଙ୍ଗ୍ ଇର୍ଆନ୍, “ନାନ୍ ଏଣ୍ତେସ୍ ଇକା ନେସ୍ତେଙ୍ଗ୍ ଆଟ୍ନା ? ଇରିଙ୍ଗ୍ ନାନ୍ ତୋ ଡକ୍ରା, ମାରି ନା ଆଡ଼ିଙ୍ଗ୍ ନାଣ୍ତ ବାର୍ସେକ୍ ଆତାତ୍ନି ।”
୧୯ ଦୁତ୍ ୱାନିଙ୍ଗ୍ ଇର୍ଆନ୍, “ନାନ୍ ଗାବ୍ରିଏଲ,” ନାନ୍ ମାପୁରୁ ଲାକ୍ତୁ ନିଲ୍ସିମାନି ଦୁତ୍, ମାରି ନିଙ୍ଗିଁ ଇନ୍ଡ୍ରେଙ୍ଗ୍ ମାରି ଇୟା ନେଗି କାବୁର୍ ୱେର୍ତେଙ୍ଗ୍ ନାନ୍ ମାପୁରୁ ମାଣ୍କୁ ୱାତାମାନା । ୨୦ “ସୁଡ଼ୁଆ, ଇୟାୱିଜୁ ଗଟାଇ ଦିନ୍ ସାନ୍ଦି ନିନ୍ ଗୁଲା ଆଜି ୱାର୍ଗିଦେଙ୍ଗ୍ ଆଟ୍ଇ, ଇରିଙ୍ଗ୍ ନା ଏମେ ୱିଜୁ ବାକ୍ୟ ଟିକ୍ ସମୟତୁ ସତ୍ ଆନାତ୍, ଆୟାୱିଜୁ ନିନ୍ ବିସ୍ବାସ୍ କିଇତି ।”
୨୧ ଇୟାୱାଲେ ଲୋକୁ ଜିକରିୟଙ୍ଗ୍ କାପ୍କିଜି ମାର୍ଆର୍, ମାରି ମନ୍ଦିର୍ତୁ ୱାନି ୱେଡ଼ା କିନିକା ସୁଡ଼ୁଜି ୱାର୍ କାବାଆଜି ମାର୍ଆର୍ । ୨୨ ମାତର୍ ୱାନ୍ ସହସି ୱାଜି ୱାରିଙ୍ଗ୍ ୱାର୍ଗିଦେଙ୍ଗ୍ ଆଟ୍ଏତାନ୍; ଆବେଟ୍ ୱାନ୍ ମନ୍ଦିର୍ତୁ ଦର୍ସନ ପଇତାମାନାନ୍ ଇଜି ୱାର୍ ବୁଜାତାର୍, ମାରି ୱାନ୍ ୱାରିଙ୍ଗ୍ ଜୁଟ୍ସି ଇନ୍ଡ୍ରେଙ୍ଗ୍ ଆସ୍ତାନ୍ ମାରି ଗୁଲା ଆତା ତେବାତାନ୍ ।
୨୩ ୱେନ୍କା ୱାନି ସେବା ପାଲିଦି ଦିନ୍ୱିଜୁ ୱିଜିତାତ୍, ମାରି ୱାନ୍ ୱାନି ଇନ୍ଡ୍ର ସର୍ଆନ୍ । ୨୪ ତାନେ ୱେନ୍କା ୱାନି ଆଡ଼୍ସି ଏଲିସାବେତ୍ ପଟାଦୁ ଆତାତ୍, ମାରି ୱାଦ୍ ପାସ୍ଗୋଟା ଲେଜ୍କୁ ସାନ୍ଦି ଏଙ୍ଗ୍ବା ଇନ୍ଏଣ୍ଗା ମାର୍ଆତ୍, ୨୫ ଆବେଟ୍ ୱାଦ୍ ଇର୍ହାତ୍, “ଲୋକା ମାଣ୍କୁ ନା ଅପ୍ମାନ୍ ଆକ କିନି ଉଣ୍ତିଙ୍ଗ୍ ପ୍ରବୁ ନାଙ୍ଗିଁ ସୁଡ଼ୁଜି ନା ଉଣ୍ତିଙ୍ଗ୍ ଇୟାୱାଜା କିତାମାନାନ୍ ।”
ଜିସୁ କ୍ରିସ୍ତଦି ଜନମ୍ତି ବିସୟ୍ତାନ୍ ୱେଙ୍ଗିଁତାତ୍
୨୬ ଏଲିସାବେତ୍ ସଗୋଟା ଲେଜ୍କୁ ୱେନ୍କା ଗାବ୍ରିଏଲ ଦୁତ୍ ମାପୁରୁ ମାଣ୍କୁ ଗାଲିଲିଦି ନାଜରିତ ଦର୍ତି ଗାଡ଼୍ତୁ ଅରେତ୍ ରିପା ଆଇଲି ଲାକ୍ତୁ ୱାତାନ୍; ୨୭ ✡ମାତିଉ ୧:୧୮.ଦାଉଦତି କୁଟୁମ୍ତି ଜୋସେପ ଦର୍ତି ଅରେନ୍ ମେମାରି ୱାଲେ ତାନିଙ୍ଗ୍ ପେଡ଼ି କିଦେଙ୍ଗ୍ ଲସ୍ତା ମାର୍ଆର୍; ଆୟା ଆଇଲିଦି ଦରୁ ମରିୟମ୍ । ୨୮ ମୁସ୍କୁପୁର୍ତି ଦୁତ୍ ଇନ୍ଣ୍ତ୍ର ଡ଼ୁଗିତାଦୋ ତାନେ ଲାକ୍ତୁ ୱାଜି ଇର୍ହାତ୍, “ମାଡ଼ିସ୍ନା, ଏ ଆଇଲି, ନିନୁ ନେଗେନ୍ ମାନାଆ, ପ୍ରବୁ ନି ୱାଲେ ମାନାନ୍ ।”
୨୯ ମାତର୍ ଦୁତ୍ତି ମାଟା ମରିୟମ୍ ୱେନ୍ଞ୍ଜି ନାଣ୍ତ କାବାଜି ଇକା ଏଣ୍ତେସ୍ମାରି ମାଟା ଇଜି ମନ୍ତୁ ଅଡ଼ବିଦେଙ୍ଗ୍ ଆସ୍ତାତ୍ । ୩୦ ଆବେଟ୍ ଦୁତ୍ ତାନେଙ୍ଗ୍ ଇର୍ହାତ୍, “ଏ ମରିୟମ୍, ତିଲାମା, ମାତର୍ ନିନୁ ମାପୁରୁମାନୁ ଦୟା ପଇତିମାନି । ୩୧ ✡ମାତିଉ ୧:୨୧.ମାରି ସୁଡ଼ୁଆ, ନିନୁ ପଟାଦୁ ଆନିନୋ ଅରେନ୍ କଡ଼ ଜନମ୍ ସିନି ମାରି ୱାନି ଦର୍ ଜିସୁ ସିନିଦେର୍ । ୩୨ ୱାନ୍ ପେରିକାନ୍ ଆନାନ୍ ମାରି ମାପ୍ରୁ ମାରିନ୍ ଇଜି ୱେଙ୍ଗ୍ଁନାନ୍; ମାରି ପ୍ରବୁ ମାପ୍ରୁ ୱାନିଙ୍ଗ୍ ୱାନି ଡକ୍ରାଦାଦା ଦାଉଦଦି ୱାଜା ରାଜା କିନାନ୍, ୩୩ ୱାନ୍ ଜାକୁବରି କୁଟୁମ୍ତି ମୁସ୍କୁ ଜୁଗ୍ ଜୁଗ୍ ସାନ୍ଧି ସାସନ୍ କିନ୍ନାନ୍, ମାରି ଜିସୁଦି ରାଜି ଏସ୍କାଙ୍ଗ୍ବା ୱିଜେଏତ୍ ।”
୩୪ ମାତର୍ ମରିୟମ୍ ଦୁତ୍ତିଙ୍ଗ୍ ଇର୍ହାତ୍, “ଇକା ଏଣ୍ତେସ୍ ଆନାତ୍ ?” ନାନ୍ ତୋ ମେମାରିଙ୍ଗ୍ ନେସେଏ ।
୩୫ ଦୁତ୍ ତାନେଙ୍ଗ୍ ଇର୍ହାତ୍, “ପବିତ୍ର ଆତ୍ମା ନି ମୁସ୍କୁ ୱାନାତ୍ ମାରି ପେରି ମାପୁରୁଦି ସାକ୍ତି ନିଂଇ ଆସ୍ନାତ୍, ଏନ୍ ଜନମ୍ ଆନାନ୍, ୱାନ୍ ପବିତ୍ର ମାରି ମାପ୍ରୁଦି ମାର୍ସି ଇଜି ୱେଙ୍ଗ୍ଁନାନ୍ । ୩୬ ମାରି ସୁଡ଼ୁଦୁ, ମି ଲୋକ୍ବାକ୍ ଏଲିସାବେତ୍ ବା ଡକ୍ରି ଆତି ୱାଲେନେ ଉଣ୍ତ୍ରି କଡ଼ଦିଙ୍ଗ୍ ପଟାଦୁ ଆସ୍ତା ମାନାତ୍ । ଏଦ୍ ବାଞ୍ଜି ଇଜି ୱେଙ୍ଗିଁତା ମାର୍ଆତ୍, ତାନେଙ୍ଗ୍ ଇଲେଇ ସଗୋଟା ଲେଜ୍କୁ ଆଜିନାତ୍; ୩୭ ମାତର୍ ମାପୁରୁଦିମାଣ୍କୁ ସୋନି ୱିଜୁ ବାକ୍ୟ ସତ୍ ଆନାତ୍ ।”
୩୮ ଆବେନୁ ମରିୟମ୍ ଇର୍ହାତ୍, “ସୁଡ଼ୁଦୁ, ନାନୁ ପ୍ରବୁଦି ସେବାକିନିକିନ୍ଧା; ନି ବାକ୍ୟଦି ୱାଜା ନା ଉଣ୍ତିଙ୍ଗ୍ ଗଟାପିତ୍ ।” ତାନେ ୱେନ୍କା ଦୁତ୍ ତାନେ ଲାକ୍ତୁରାନ୍ ସର୍ଆତ୍ ।
ମରିୟମ୍ ଏଲିସାବେତ୍ତି ଲାକ୍ତୁ ସର୍ଆତ୍
୩୯ ଆୟା ସମୟତୁ ମରିୟମ୍ ନିଙ୍ଗିଁଜି ଗରନ୍ ରାଜି ତରିଟି ଜିହୁଦା ଦେଶ୍ତି ଉଣ୍ତ୍ରି ଗାଡ଼୍ତୁ ବେଗି ସର୍ଆତ୍, ୪୦ ମାରି ଜିକରିୟରି ଇଲୁ ଲୋଇ ଡ଼ୁଗିତାଦୋ ଏଲିସାବେତ୍ତିଙ୍ଗ୍ ମାଡ଼ିସ୍ କିତାତ୍ । ୪୧ ମାରି, ଏଲିସାବେତ୍ ମରିୟମ୍ତି ମାଡ଼ିସ୍ନିକା ୱେର୍ଇଦାପ୍ରେ ଇସ୍ରି କଡ଼ ତାନି ପଟାଦୁ ଗାତିସ୍ ନିଙ୍ଗିଁତାନ୍, ଏଲିସାବେତ ପବିତ୍ର ଆତ୍ମାଦୁ ପୁରା ତେବାଜି ୪୨ ନାଣ୍ତ ଆଉଲି ଆଜି ଇର୍ହାତ୍, “ଆଇମେକା ମାଣ୍କୁ ନିନୁ ଦନ୍ୟ, ମାରି ଦନ୍ୟ ନି ପଟାଦି ପଲ୍ । ୪୩ ମାରି, ନା ପ୍ରବୁଦି ୟାୟା ଜେ ନା ଲାକ୍ତୁ ୱାନାତ୍, ନା ଇୟା ନେଗିକା ଏମେଣ୍କୁ ଆତାତ୍ ? ୪୪ ମାତର୍ ସୁଡ଼ୁଦୁ, ନି ମାଟାଦି ବଲୁ ନା ଗିତଣିଦୁ ଇତି ଦାପ୍ରେ ଇସ୍ରି କଡ଼ ନା ପଟାଦୁ ୱେଡ଼ିକାଦାନ୍ ଗାତିସି ନିଙ୍ଗିଁତାନ୍ । ୪୫ ଏନ୍ ବିସ୍ବାସ୍ କିତାନ୍, ୱାନ୍ ଦନ୍ୟ, ଇରିଙ୍ଗ୍ ପ୍ରବୁମାଣ୍କୁ ୱାନିଙ୍ଗ୍ ଆମା ଆମାକା ୱେର୍ତାମାନାର୍, ଆୟାୱିଜୁ ପୁରା ଆନାତ୍ ।”
ମରିୟମ୍ ମାପ୍ରୁଙ୍ଗ୍ ଦନ୍ୟବାଦ୍ କିତାତ୍
୪୬ ଆବେଟ୍ ମରିୟମ୍ ଇର୍ହାତ୍,
“ନା ଜିବନ୍ ପ୍ରବୁଙ୍ଗ୍ ପ୍ରସଂସା କିଜିନାତ୍,
୪୭ ମାରି ନା ଆତ୍ମା ନା ରକିୟା କିନି ମାପ୍ରୁମାନୁ ୱେଡ଼ିକା କିଜିନାତ୍;
୪୮ ଇରିଙ୍ଗ୍ ୱାନ୍ ନିଜେଦି ଦାସିଦି କାକୁର୍ତିଦିଙ୍ଗ୍ ସୁଡ଼ୁତାମାନାନ୍ ।
ମାରି ସୁଡୁଆ, ଇଲେରାନ୍ ଜୁଗ୍ ଜୁଗ୍ ସାନ୍ଦି ୱିଜେରେ ନାଙ୍ଗିଁ ଦନ୍ୟ ଇଜି ଇନାର୍,
୪୯ ମାତର୍ ସାକ୍ତିମାନି ମାପୁରୁ, ୱାନ୍ ନା ଉଣ୍ତିଙ୍ଗ୍ ପେରି ପାଣି କିତାମାନାନ୍;
ୱାନି ଦରୁ ପବିତ୍ର ।
୫୦ ମାରି ଏର୍ ୱାନିଙ୍ଗ୍ ମାନାନାର୍ ୱାନ୍ ୱାରିଙ୍ଗ୍ ଜୁଗ୍ ଜୁଗ୍ ସାନ୍ଦି ଦୟା କିନାନ୍ ।
୫୧ ୱାନ୍ ୱାନି କିୟୁଦି ସାକ୍ତି ତର୍ତାମାନାନ୍,
ଆକାର୍ଆନିୱାରିଙ୍ଗ୍ ୱାରି ମନ୍ତୁ ଅଡ଼୍ବିତିମାର୍ଇ ମାଟାଦିଙ୍ଗ୍ ଇନିଙ୍ଗାଁ ଆନିଙ୍ଗାଁ କିତାମାନାନ୍;
୫୨ ୱାନ୍ ରାଜାରିଙ୍ଗ୍ ବାସ୍ନି ବାଡିଦାନ୍ ଆଡ୍ଗି ରେପ୍ତାମାନାନ୍,
ସିଲିସାତିୱାରିଙ୍ଗ୍ ମୁସ୍କୁ ନିକ୍ତାମାନାନ୍,
୫୩ ୱାନ୍ ବାଙ୍ଗାଁଆତିୱାରିଙ୍ଗ୍ ନେଗି ନେଗି ବିସୟ୍ ସିଜି ପାଜିସ୍ କିତାମାନାନ୍,
ମାରି ମାଜନ୍ ଲୋକାଙ୍ଗ୍ ୱାର୍ଇ କିୟୁଦାନ୍ ପୋକ୍ତାନ୍ ।
୫୪ ମା ପୁର୍ବେଦିଡକ୍ରାଦାଦାରି ଉଣ୍ତିଙ୍ଗ୍ ରାସ୍ତିମାନି ୱାରି ବାକ୍ୟଦାନ୍ ଆୟା ଅବ୍ରାହାମ ମାରି ଇସ୍ରାଏଲ୍ତି କଡ଼କକ୍ରାରି ଉଣ୍ତିଙ୍ଗ୍,
୫୫ ଜୁଗ୍ ଜୁଗ୍ ସାନ୍ଦି ଦୟା ଏତ୍କିନି ଉଣ୍ତିଙ୍ଗ୍ ନିଜେଦି ଦାସ୍ ଅବ୍ରାହାମ ନି ଇସ୍ରାଏଲତିଙ୍ଗ୍ ନେଗିକା କିତାମାନାନ୍ ।”
୫୬ ମରିୟମ୍ ପୁରା ମୁଣ୍ତ୍ରି ଲେଜ୍କୁ ଏଲିସାବେତ୍ ୱାଲେ ମାନ୍ଞ୍ଜି ନିଜେଦି ଇନ୍ଣ୍ତ୍ର ଡ଼େସି ସର୍ଆତ୍ ।
ଡୁବନ୍ସିନି ଜୋହନତି ଜନମ୍
୫୭ ୱେନ୍କା ଏଲିସାବେତ୍ତି ଜନମ୍କିନି ଦିନ୍ ଇଗା ୱାତାତ୍, ୱାଦ୍ ଅରେନ୍ କଡ଼ ଜନମ୍ କିତାତ୍, ୫୮ ମାରି ପ୍ରବୁ ଜେ ତାନି ଉଣ୍ତିଙ୍ଗ୍ ନାଣ୍ତ ଦୟା କିତାମାନାନ୍, ଇକା ୱେନ୍ଞ୍ଜି ତାନି ଲାକ୍ତୁରି ଲୋକୁ ମାରି ନିଜେଦି ଲୋକୁ ତାନି ୱାଲେ ୱେଡ଼ିକା କିଦେଙ୍ଗ୍ ଆସ୍ତାର୍ ।
୫୯ କଡ଼ଦି ଜନମ୍ ଆତି ଆଟ୍ଦିନ୍ତୁ ୱାର୍ କଡ଼ଦିଙ୍ଗ୍ ସୁନ୍ନତ*ସୁନ୍ନତ କଡ଼ରି କୁସ୍ନି ଟିପୁଦି ଆଗ୍ଡ଼ିରି ତଲ୍ କୟ୍ନିତାନେଙ୍ଗ୍ ବୁଜାକିନାତ୍ । କିଦେଙ୍ଗ୍ ତାତାର୍ ମାରି ୱାରି ବୁବାସି ଦର୍ ଇସାବ୍ତାନ୍ ୱାନି ଦର୍ ଜିକରିୟ ସିଦେଙ୍ଗ୍ ବଦା କିତାର୍ । ୬୦ ମାତର୍ ୱାନି ଆଇସି ଇର୍ହାତ୍, “ସିଲେ, ୱାନି ଦର୍ ଯୋହନ ଆନାତ୍ ।”
୬୧ ୱାର୍ ଏଲିସାବେତ୍ତିଙ୍ଗ୍ ୱେର୍ତାର୍, “ମି ଲୋକାମାନୁ ତୋ ଇୟା ଦର୍ ଏଙ୍ଗ୍ବା ସିଲେତ୍ ।” ୬୨ ଆବେଟ୍ ୱାନିଙ୍ଗ୍ ଏମେ ଦର୍ ସିନାଟ୍ ଇଜି ୱାନି ବୁବାସି ବଦା କିଜିନାନ୍, ଆକା ୱାର୍ ୱାନିଙ୍ଗ୍ ସିନା ସିଜି ୱେନ୍ବାଦେଙ୍ଗ୍ ଆସ୍ତାର୍ ।
୬୩ ଆବେନୁ ୱାନ୍ ଉଣ୍ତ୍ରି ରାସ୍ନି ପାଟା ଲସ୍ସି ଇକା ରାସ୍ତାନ୍, “ୱାନି ଦର୍ ଜୋହନ ।” ଆବେଟ୍ ୱିଜେରେ କାବାଆତାର୍ । ୬୪ ମାରି, ଆୟାଦାପ୍ରେ ଜିକରିୟଦି ୱେୟୁ ରେଆତାତ୍ ମାରି ୱାନ୍ ମାରିଡ଼େସି ମାଟା ୱାର୍ଗିଜି ମାପ୍ରୁଦିଙ୍ଗ୍ ଦନ୍ୟବାଦ୍ କିଦେଙ୍ଗ୍ ଆସ୍ତାନ୍ । ୬୫ ଆବେନୁ ୱାରି ଲାକ୍ତୁରି ଲୋକୁ ୱିଜେରେ ତିଲାତାର୍, ମାରି ଇୟାୱିଜୁ ମାଟା ଜିହୁଦା ଦେସ୍ତି ଗରନ୍ ରାଜିଦି ୱିଜୁ ତରିଣ୍ତ୍ ଲୋକୁ ଇନ୍ଞ୍ଜି ସାତାର୍, ୬୬ ମାରି ୱେନି ଲୋକ୍ଡର୍ ଆୟାୱିଜୁ ନିଜେ ନିଜେଦି ମନ୍ତୁ ଇଡ୍ଜି ଇର୍ହାର୍, “ଇୟା ଇସ୍ରି କଡ଼ ଆତିଙ୍ଗ୍ ଇନିକା ଆନାନ୍ ?” ଇରିଙ୍ଗ୍ ଇକା ସତ୍ ମାର୍ଆତ୍ ଜେ ପ୍ରବୁଦି କିୟୁ ୱାନି ମୁସ୍କୁ ମାର୍ହାତ୍ ।
ଜିକରିୟଦି ବାବବାଣି
୬୭ ମାରି, ଜୋହନଦି ବୁବା ଜିକରିୟ ପବିତ୍ର ଆତ୍ମାଦୁ ପୁରା ତେବାଜି ଇୟା ବାବବାଣି ଇର୍ହାନ୍,
୬୮ “ଦନ୍ୟ ପ୍ରବୁ, ଇସ୍ରାଏଲ୍ତି ମାପ୍ରୁ,
ଇରିଙ୍ଗ୍ ୱାନ୍ କାର୍ମୁ ସୁଡ଼ୁଜି ନିଜେଦି ଲୋକା ଉଣ୍ତିଙ୍ଗ୍ ରକିୟା କିତାମାନାନ୍;
୬୯ ୱାନ୍ ନିଜେଦି ଦାସ୍ ଦାଉଦଦି କୁଟୁମ୍ତି ଅରେନ୍ ସାକ୍ତିମାନି ରକିୟା କିନିୱାନିଙ୍ଗ୍ ମାଙ୍ଗିଁ ସିତାମାନାନ୍
୭୦ ପୁର୍ବେ କାଡ଼ାଦାନ୍ ନିଜେଦି ପବିତ୍ର ବାବବାଦିରି ୱେୟୁଦାନ୍ ଏଣ୍ତେସ୍ ଇର୍ହା ମାର୍ଆର୍,
୭୧ ଆୟାୱାଜା ମା ସାତ୍ରୁରିମାଣ୍କୁ ମାରି ମାଙ୍ଗିଁ ୱିଜୁ କାଡ଼୍ନିୱାରି କିକାଣ୍କୁ ରକିୟା କିତାମାନାନ୍,
୭୨ ଏଣ୍ତେସ୍ ୱାନ୍ ମା ପୁର୍ବେଦିଡକ୍ରାଦାଦାରି ଉଣ୍ତିଙ୍ଗ୍ ଦୟା ତର୍ନାନ୍ ମାରି ୱାରି ୱାଲେ କିତିମାନି ନିଜେଦି ଆୟା ନିୟମ୍ ଏତ୍କିନାର୍ ।
୭୩ ଆମାକା ୱାନ୍ ମା ବୁବା ଅବ୍ରାହାମତି ଲାକ୍ତୁ ପାର୍ମାଣ୍ କିତାମାର୍ହାନ୍,
୭୪ ମାରି ମାପ୍ ମା ସାତ୍ରୁରିକିୟୁଦାନ୍ ରକିୟା ପୟ୍ତାମାନାପ୍,
୭୫ ଏଣ୍ତେସ୍ ମାପ୍ ଜିନି ସାନ୍ଧି ତିଲାଏଣ୍ଗା, ପବିତ୍ରଦାନ୍ ମାରି ଦାର୍ମୁଦାନ୍ ୱାନି ସେବା କିଦେଙ୍ଗ୍ ଆଟ୍ନାପ୍ ।”
୭୬ “ଏ ମାରିନ୍, ନିନ୍ ୱିଜେରିଙ୍ଗ୍ ପେରି ମାପୁରୁଦି ଅରେନ୍ ବାବବାଦି ଇଜି ୱେଙ୍ଗ୍ନି । ନିନ୍ ପ୍ରବୁଦି ଅରେନ୍ ଦୁତ୍ ୱାନି ଉଣ୍ତିଙ୍ଗ୍ ୱାନି ସାରି ତିଆର୍ କିନାତ୍ ।
୭୭ ପାପ୍କେମା ପଇନି ମାଣାନ୍ ୱାର୍ ଜେ ରକିୟା ପୟନାର୍, ୱାନି ଲୋକାଙ୍ଗ୍ ଇୟା ମାଟା ଇଣ୍ତ୍ରେଙ୍ଗ୍ ସନାର୍ ।
୭୮ ମାରି ମା ମାପୁରୁ କାର୍ମୁସୁଣିକାନ୍ ମାରି କଡ଼୍କିଜିବନ୍ ୱାନ୍ ମା ଉଣ୍ତିଙ୍ଗ୍ ରକିୟାଦି ୱେଡ଼ା ସପ୍ନାନ୍,
୭୯ ଏମେକାର୍ ସାନିୱାଜା ସିକାଟିଦି ସିତିଡ଼ିଦୁ ବାସାନାର୍, ସାନ୍ତି ସାରିଦୁ ୱାରିଙ୍ଗ୍ ତର୍ସି ଅନିଉଣ୍ତିଙ୍ଗ୍ ୱାନ୍ ୱିଜେରି ମୁସ୍କୁ ଜାୟ୍ ସିନାନ୍ ।”
୮୦ ମାରି, କଡ଼ ପିର୍ଜି ଆତ୍ମାଦୁ ବପୁ ଆଦେଙ୍ଗ୍ ଆସ୍ତାନ୍ ମାରି ଇସ୍ରାଏଲ୍ ଲୋକା ଲାକ୍ତୁ ତରାଇ ସାନ୍ଧି ସୁନ୍ସାନ୍ ବାଡ଼ିଦୁ ତେବାତାନ୍ ।